Wïlöölö 34

Gïna Tägö Dëët Jø Cekam Ki Ri Dina

1Kanyøgø Dina nyi Liia, na nywølge ki Jeekap, alaŋ wøk baŋ nyïïakuk paanøgø. 2'Ba kanya ö Cekammi wär Eemör nyï Ëwi, na näk kwääc paanøgø, na joot Dina, Dina amaae ki teek ni butge ki gø na dhaagø. 3Køøre Cekam cwïnye aput tïmö ni ena køør Dina nyi Jeekap, ni put mëëyö ki gø døc, ni cään gø ki luup mo cøm cwïny. 4Ni ö Cekammi ni cääne ki wänni ma Eemör, ni kööe, ni «Nywøm nyakøø man jïra nee tïme na cïïa.»

5Kanyøgø awïny Jeekapi ni nyaare ma Dina oraany Cekammi; 'ba kiper mana näk wääte ena paap baŋ kwaath, ena lïŋö ni bäŋ gïn mo ee caanø këël mana duu wääte paayø.

6Køøre Eemör wää Cekam aci baŋ Jeekap nee cääne ki gø. 7'Ba kanya ö wäät Jeekapi na wïnyge gïnögø, gena duuö ki kar kwaath; ni päth cwïnyge, ni wëërge døc kiper mana ö Cekammi na bute ki nyi Jeekap na dhaagø, ni tïïe ka aranya dëët jø Icriel, ni beeye gïn mo ba doo maara tïïc cøøn.

8'Ba Eemör acäänö ki geni, ni kööe, ni «Cwïny wääda ma Cekam apädhö kiper nyou; a kwaya uuni ki man cïpu nyou jï wääda nee ci jïre na dhaagø. 9Beerra man nywømø dëëtø; cïpu nyïïu jïwa, ni nywømmu nyïïwa thuwø. 10Køøre u puta bëëtö ki waani, ni bëëdu yïth ŋøøm moi kanya manynyu jaak, ni pïïu piny ni gädhu, ni jïtu ki ŋøøm yie ma mou.»

11Ni kö Cekammi jï wää Dina ki nyïïmenni, ni «Ni näk mo u jïëy, gïn wäro pëënynyu baŋa jaak cïba cïbö jïïu. 12Pëënynyu jap nywöm ki teeŋ jammi møøk jaak, køøre cïba cïbö jïïu ki køør mana caannu, këël thööth nidïï. 'Ba cïpu nyou jïra keere nee ci jïra na dhaagø.»

13'Ba adwøk wäät Jeekapi ki cwøk jï Cekam ki wänni ma Eemör, kiper mana ö Cekammi na raany cokge ma Dina. 14Ni kö wäät Jeekapi, ni «Waani ba løny jïwa ki man tïïcwa gïnögø, kiper tïmö na lään wïc bäätwa ki man cïpwa nyiwa jï dhaanhø mo kär daŋø. 15'Ba gïrpiny aciel keere mo ø doo dwätö ki køøre beeye en; ni näk mo u tïmö kaamar marwa, ni jiy bëët moa näk cwøw mou daŋŋu daŋø, 16nyïïwa cïpwa cïbö jïïu, ni nywømwa nyïïu, køøre nø wa bëëdö ki uuni ni tïmø ni øøna aciel. 17'Ba ni näk mo luubö marwa ba wïnynyu, ni ba daŋ uuni, waani nyiwa lwørwa lwørø ni aacwa.»

18Kanyøgø luubö mana caan wäät Jeekapi atïmö na luubö mo beer ki jï Eemör ki wääde ma Cekam. 19Ni ö Cekammi ni put tägö ki man tïïc gïnögø, kiper eni cwïnye okäl nyi Jeekap døc. 'Ba Cekam beeye dhaanhø mo pere leth døc dï jiy moa en po wänni bëët. 20Køøre Eemör ki wääde ma Cekam aö dhi kiir kar acooŋa mar pääny marge, ni cäänge jø poge, ni köge, 21ni «Jøøi ii mëër ki øøni; kiper manøgø nø, beerra man bëëtge pøø ni gäthge yie, kiper ŋøøm thööth ni rømø kiperge. Beerra man lwørø nyïïge ni nywømø ge, ni cïbø nyïïø jïge. 22'Ba gïrpiny aciel keere mo ø doo dwätö ki ge ki køøre nee ge bëëtge ki øøni, nee ø tïmø ni øøna aciel ki ge beeye en; jiy bëët moa näk cwøw dïïø døø daŋø kaamar marge. 23?Aŋø, dhäk moge ki dïëk moge ki gïïa en jïge bëët këël lääc paac moge ba doo tïmö na moø? Beerra man jïëø marge keere, køøre ge bëëdö ki øøni.»

24'Ba cwøw bëët moa näk løny jïge ki ciin baŋ leny ajïëy ki luum Eemör ki wääde ma Cekam. Ni ö cwøwi bëët moa näk løny jïge ki ciin baŋ leny ni daŋ geni.

25'Ba kanya tïme na dää nïne ni dëët cwøw moa daŋ poot leth døc, wäät Jeekap ariiø na näk Cimien ki Libay, nyïïmii Dina, opëëlle moge akwanyge ni dønyge dï pääny mëëth ni putge cwøw bëët 'näk. 26Ni 'näkge Eemör ki wääde ma Cekam ko opëëlle, ni putge cokge ma Dina lwør po Cekam ni aacge. 27Ni ö wäät Jeekapi møga ni cige dï jøøa thøw ni twierge pääny kiper mana ö jøøgø na raanyge cokge. 28Ni kälge dïëk ki dhäk ka arëëni ki gïïa en dï pääny bëët këël gïïa en yïth pwöth bëët. 29Ni twierge jammi moge bëët, ni kälge obwöre ki mään këël gïïa en yïth uudi bëët.

30Kanyøgø Jeekap aköö jï Cimien ki Libay, ni «Uuna kän bääta ki gïn mo leth, ni raanynyu nyeŋŋa dï jø Keenan ki jø Përec na näk jø paani. Aani kwään jiya nøk. 'Ba ni näk mo jøøgø dëëtge dwalge dwalø ni öge baŋa ni tukge aani, a 'näkge nääö ki jø paara bëët.»

31'Ba Cimien ki Libay aköö, na «?Aŋø, cöökwa doo tïïc Cekammi kaamar dhaagø ma kääbi jaak cøøn?»

Currently Selected:

Wïlöölö 34: AnyuB

Highlight

Compare

Copy