Bwøth Wøk 36

1«'Ba Bacaliil ko Oliyap, ki jiy bëët moa näk nyeŋge reegø ki tïïc, na näk omooc Wuuö Jwøki ki riek waŋ ka acaara ki man ŋäcge jïëdhi mo tïïe bëët moa dege tïïö kiper oduŋkaara na näk kanya en kur keere, tïïe moøgø wär putge tïïc na karge ki køør mana cemi ya Wuuö Jwøki.»

Kanya Thöönh Jap Tïïc Mo Oduŋkaara Ni Kaala Moa Manynyi

2Køøre Modhe Bacaliil ko Oliyap, ki jiy bëët moa nyeŋge reegø ki tïïc, na näk omooc Wuuö Jwøki ki riek waŋ, acwøle nee öge nee tïïc manøgø tïïcge, ni beege jiy bëët moa näk cwïnyge ojïëy. 3Ni ö jøøgø ni lwørge jammi bëët baŋ Modhe, ni beege muuce moa cïp jø Icrielli nee oduŋkaara na näk kanya en kur keere tïïc ki ge. 'Ba jø Icriel ge poot kännö jï Modhe ki muuce mo wø cïp ki met ec ka amöölla man nø cooth. 4Kanyøgø jiy bëët moa näk nyeŋge reegø ki tïïc, na näk tïï kanya en kur keere ege nø täk, gena öö, ni ŋati man nø käla baŋ tïïc mana tïïe; 5ni köge jï Modhe, ni «Jiy akännö ki jammi mo thööth døc ni kaala jammi moa doo manynyø kiper tïïc mana ö Wuuö Jwøki na kööm waani ki gø ni tïïcwa.»

6Kanyøgø Modhe ajäägö ki dwøl; ni ö awaaci ni gøøi piny dï twïër bäre, ni køp, ni «Kär dee dhaanhø ma dïcwøø wala dhaagø mo känni ki muuce këët kiper tïïc mar oduŋkaara na näk kanya en kur keere.» Ni ö jiyi ni putge mänö nee ba känge ki muuce këët. 7Kiper jammi moa no okwøŋ kälö atïmö no orømø ni kaala moa doo manynyø kiper tïïe bëët moo tïïc.

Kanya Tïïc Oduŋkaara Na Näk Kar Bëëtö Mar Wuuö Jwøk

(Bwøth Wøk 26:1-37)

8Køøre jiy bëët moa nyeŋge reegø ki tïïe na en røk jø tïïc kaagø, oduŋkaara na näk kar bëëtö mar Wuuö Jwøk atïïcge ka abïïe apaar, mo tïïc ka waac lïïna mo tar mo mïërö ki waare mo kïtge caala kït abïcøle, ki ma dïmuur, ki mo kwaar; ni dëëtge da kït nyïïatwiet maal mo wø cwøl ni kirubëlli, ni tïïya dhaanhe mo waŋe riek ki tïïc manøgø. 9'Ba bär mar abïï man nø beeye gööye ma pïërariiø ka abära, ni dööŋ yie beeye gööye aŋween. 'Ba abïïe bëët otïïö ni gööye moge röömi. 10Ni ö jøøgø ni kwøcge abïïe moa näk abïïc na abïï aciel, ni kwøcge abïïc møga na abïï aciel thuwø. 11Køøre deŋ abïï mana dïkwøŋ akïthge ki waare mo odølø mo kïtge caala kït abïcøle, ni kïthge deŋ abïï maya thuwø ki waare mo odølø ni caala mana dïkwøŋ. 12Ni waare moa no odølø na kïthge deŋ abïï mana dïkwøŋ beege pïërabïïc, ni moa kïthge deŋ maya thuwø beege waare mo odølø ma pïërabïïc. 'Ba waare moa no odølø na kïthge deŋ abïïe moøgø atïïcge ni man nø dïët ki maya. 13Ni tïïge ki nywïëny mo tïïc ka warkey mo dhøkge ogønø ma pïërabïïc, ni kïthge geni yïthakic waare moa no odølø ni kuupge abïïe moa näk ariiø ki geni, ni put oduŋkaara na näk kar bëëtö mar Wuuö Jwøk nëënnö na gïrpiny aciel.

14Køøre jøøgø atïïö ka abïïe mo tïïc ka jïëc dïëk ma atëëe kiper nee rïëp bäät oduŋkaara na näk kar bëëtö mar Wuuö Jwøk; ni tïïcge abïïe moøgø na apaar kurciel. 15'Ba bär mar abïï man nø beeye gööye ma pïëradäk, ni dööŋ yie beeye gööye aŋween. 'Ba abïïe moøgø na apaar kurciel yøø otïïö ni gööye moge röömi. 16Ni kwøcge abïïe moa näk abïïc kur keerge, ni kwøcge moa dööŋ na näk abïciel kur keerge. 17Køøre thuwø deŋ abïï mana dïkwøŋ akïthge ki waare mo odølø ma pïërabïïc, ni kïthge deŋ maya thuwø ki waare ma pïërabïïc mo odølø. 18Ni tïïge ki nywïëny ma pïërabïïc mo tïïc ka nywïënyö ma jwïël mo dhøkge ogønø, ni kïthge geni yïthakic waare moa no odølø, ni kuupge abïïe ni tïme na rëëbi aciel. 19Ni tïïge ki rëëbi kipere mo tïïc ka pëët nyöök rööm mo otïïö ki kït mo kwayø, ni tïïge ki rëëbi mør thuwø mo kïth bääte maal mo tïïc ka pëët lääy mo onyøŋø.

20Køøre gena tïïö ko opämi mo jaadha cwøl ni cïta kiper oduŋkaara na näk kar bëëtö mar Wuuö Jwøk, ni cïpge ge piny ni cuŋŋö. 21'Ba bär mar opäm man nø beeye rumme apaar, ni dööŋ yie beeye rumi aciel ki thääŋö, ni rumme moøgø røm ka cenø. 22'Ba ro opäm man nø atïïcge ni da tiel ariiø mo løny ki man kuup opämi ki ge. Køøre opämi bëët mo oduŋkaara na näk kar bëëtö mar Wuuö Jwøk atïïcge ki jöö manøgø. 23Ni tïïge ko opämi ma pïërariiø kiper jï løø tier-piny mar oduŋkaara. 24Ni tïïge ki gïï wø cwöth tietge yïthge ma pïëraŋween mo tïïc ka gwel-bïrö kiper nee opämi moa näk pïërariiø yøø cwöth yïthge, ni gïï wø cwöth tietge yïthge ariiø moi nø ena tier opäm man nø kiper tiete na näk ariiø. 25Køøre gena tïïö ko opämi ma pïërariiø thuwø kiper jï løø wï-piny mar oduŋkaara, 26ki gïï wø cwöth tietge yïthge ma pïëraŋween mo tïïc ka gwel-bïrö, ni gïï wø cwöth tietge yïthge ariiø moi nø ena tier opäm man nø. 27Ni tïïge ko opämi abïciel kiper ŋää oduŋkaara na en jï løø kur pänh-cäŋ. 28Ni tïïge ko opämi ariiø kiper gøøde moa en ŋää oduŋkaara. 29Ni ö opämi mo gøøt ni kuup geni ni tägi ka tiere piny këël mana këët røk oguudi moa en maal. Ni ö opämi mo gøøde karge riet ni tïïcge ge ki jöö manøgø. 30'Ba kwään opämi moa en ŋää oduŋkaara beege abära, no opäm man nø jïre da gïï wø cwöth tiete yïthge ariiø mo tïïc ka gwel-bïrö, ni gïï wø cwöth tiet opämi yïthge bëët beege apaar ka abïciel.

31Køøre gena tïïö ki jenni mo caala läämme ki ri jaadha cwøl ni cïta, ni beege abïïc kiper opämi moa en løø oduŋkaara løøi, 32ka abïïc kiper opämi moa en løø oduŋkaara løøga, ka abïïc møøk kiper opämi moa en ŋää oduŋkaara na en jï løø kur pänh-cäŋ. 33Ni ö läämmö mana en dïër ni tïïcge gø ni di rwaagø ki teegø man këël mano këët teegø maya, no opämi maae ki dïge. 34'Ba geni dëët opämi alëënyge ki warkey; ni tïïge ko oguudi mo warkey kiperge, ni tïmge na mäge kiper jenni moa näk caala läämme, ni leenyge warkey dëët jenni moøgø.

35Køøre thuwø gena tïïö ka abïï man wø gëëŋ kanya en kur keere na pere leth ki gø, ni tïïcge ka waare mo kïtge caala kït abïcøle, ki ma dïmuur, ki mo kwaar, ki waac lïïna mo tar mo mïërö; ni tïïcge dëër gø ni da kït nyïïatwiet maal moa cwøl ni kirubëlli, ni tïïya dhaanhe mo waŋe riek ki tïïc manøgø. 36Ni tïïge ki cööthe aŋween ki ri jaadha cwøl ni cïta kiper abïï mar gëëŋ manøgø, ni lëënyge dëët cööthe moøgø ki warkey, ni da nywïëny moge mo ogøn mo tïïc ka warkey; ni tïïge ki gïï wø cwöth tiel yïthge ki gwel-bïrö kiper cööthe moøgø. 37Ni tïïge ka abïï mo mar gëëŋ kiper dho oduŋkaara, ni cwääcge gø ki waare mo kïtge caala kït abïcøle, ki ma dïmuur, ki mo kwaar, ki waac lïïna mo tar mo mïërö; ni cwääya dhaanhe mo waŋe riek ki tïïc manøgø. 38Ni tïïge ki cööthe abïïc, ki nywïëny moge mo ogøn kiper abïï mar gëëŋ manøgø, ni lëënyge wïth cööthe moøgø ki dëët gïï omäk piny ki ge ki warkey; 'ba gïï wø cwöth tietge yïthge moa näk abïïc beege gïï mo tïïc ka nywïënyö ma jwïël.

Currently Selected:

Bwøth Wøk 36: AnyuB

Highlight

Copy

Compare