Bwøth Wøk 34

Kanya Ö Jwøki Na Nyooth Ajieme Jï Modhe

1Køøre Wuuö Jwøk aköö jï Modhe, ni «Tööï ko opäp kïte ariiø mo caala moa dïkwøŋ, nee luup moa en bäät opäp kïte moa dïkwøŋ na gøøï piny na tøyø nee gööra bäät opäp kïte moøgø. 2Jiiŋ riï, ni ööï maal bäät Kïn Caynay diøø ka amöölla, ni koorï aani bäät kïdi kaace. 3'Ba kär dee dhaanhø mo ö bäät kïdi ki ïïni, ni kär dee dhaanhø mo joot bäät kïdi kaagø bäre; këël pïïth dïëk wala dhäk, kär dee gø mo kööl tier kïdi manøgø.»

4Ni ö Modhe ni tööe ko opäp kïte ariiø mo caala moa dïkwøŋ, ni päny maal ka amöölla cøøn ni ci bäät Kïn Caynay, kaawat mana ö Wuuö Jwøki na kööm eni, ni aae no opäp kïte di käärö ki cere. 5Kanyøgø Wuuö Jwøk aö piny ni ena yi pöölö, ni cuŋŋe kaace buut Modhe, ni køp gïr nyeŋŋe na näk Wuuö Jwøk. 6Køøre eni na Wuuö Jwøk apöödhö ki nyïm Modhe, ni cäänö, ni «Beeye aani na Wuuö Jwøk, Jwøa näk yie bäth ni wø nyooth met ec mare jï jiy, ni wø ba laar wëër, ni mëëye ni wø ba jøøl päl, na adïëri mare okadhø; 7ni beeye wø gwøk mëëye ni wø ba jøøl kiper jiy ma kum kum, ni ŋat mo obääyö, ki ŋat adhala, ki ŋat mo otïïö ki gïï mo reyø di wëënnö; 'ba ŋat raay poot ba wiie ka ajäla, ni raay moa tïïc wëëe poot di coolø dëët obwöre moge ki nyïïkwaacge, këël mano pïïe dää beenhnhe wala ŋweer beenhnhe.»

8Ni ö Modhe ni put cøŋŋe këël piny ni wøør Wuuö Jwøk. 9Ni kööe, ni «Wui Kwäärö, ennø, ni näk mo yiï met ki aani, a kwaya ïïni niï cäädhï ki waani na aciel, këël na bëët jøøgø ni gena jiy mo wïthge teek. Wëën bääyö marwa ki gïïa reyø na tïïcwa, ni käärï wa ni waana jiyï.»

Kanya Ö Jwøki Na Nwøc Luubö Mana Tuude

10Køøre Wuuö Jwøk aköö, ni «Ennø, a tudö ki luubö ki uuni. 'Ba gïï mo rëëma ec mo poot kära tïïö bäät piny cøøn, wala dï jur mo ena bäät piny kany, tïïa tïïö nyïm jiyï bëët. Ni ö jiyi bëët moø ni bëëdï dïge yøø ni jootge tïïc mara, a na Wuuö Jwøk; kiper gïno tïïa buutï enø beeye gïn mo kännö ki lwär mo päl døc. 11Gwøk gïn ni köömma ïïni ki gø dïcäŋi en. Ka adïëri møn, jø Amör, ki jø Keenan, ki jø Këth, ki jø Përec, ki jø Ëwi, ki jø Jeebuc riema wøk nyïmï. 12Gwøk riï ki man ba tudï ki luubö ki jiy mo wø bëëdö yi ŋöömmo ciï yie, kiper nee ba tïme na gïn mo caala abïëp dïïu. 13'Ba gïno tïïyu beeye ki man raanynyu gïï wø cïpge olämme moge bäätge, ni tøgu kïte moa näk ege cwöth piny kiper nee lamge, ni ŋødu jenni moge piny moa näk ege tieŋø ni wø lamge. 14Kär dee jwøk mør jaak mo lammu, kiper a na Wuuö Jwøk, na näk nyeŋŋa Këëny, aana Jwøk ma ŋat keec møn.

15«Käru tudö ki luubö ki jiy mo wø bëëdö yi ŋöömmöce; kiper ni näk mo uuno tudö ki luubö ki geni, kanyo bëëtge ni ge tïïö ki gïï mo reyø ni cwïnyge ena køør juu moge, ni cïpge ko olämme jï juu moge, u cwølge cwølø ki man cämu ki ge ko olämme moo cïpge. 16'Ba ni näk nyïïge you nywømø jï wäätu nee tïmge na määrge, kanyo bëët nyïïge moøgø ni ge tïïö ki gïï mo reyø ni cwïnyge ena køør juu moge, wäätu bwøthge bwødhø ki øtjöörögø ni tïïcge teeŋ tïïc manøgø.

17«Kär dëëtu tïnynyu ki kït gïrpiny mo oleenyø na jwøk.

18«Ajwöm Møga Näk Ree Bäŋ Thømmø dou gwøø. U doo cämö ki nïne abïriiø ki møø mo ree bäŋ thømmø, kaawat mana köömma uuni. 'Ba møgøgø wär cammu kanya no owäŋŋö yi dwääna cwøl na Abip; kiper dwäänögø na cwøl na Abip enø, beeye dwääna ööu wøk yie ki Ijep.

19«Kaai moa näk cwøw bëët moo lwaarø ki ge beege 'moa; këël kaai mo lääc paac mou bëët moa näk thwönhi poot na 'moa thuwø, ni beege kaai mo dhäk ki mo dïëk. 20'Ba kaa mo mar arëën jaak dou wiilø ki nyidiel, 'ba ni näk mo ba wiillu, ŋute dou meenø. 'Ba kaai mo jiy na näk wäätu wär wïïlu wøk. Køøre thuwø, kär dee ŋat mo ö nyïma ki ceŋŋe jaak.

21«U doo tïïö ki nïne abïciel, 'ba noo tïme na bïriet nïne, u doo jwöm; këël køp ni beeye kar puur wala kar kac caammi, rou dou jwömö.

22«Ajwöma Man Wø Wøør Køør Juu Abïriiø, man wø wøør ki muuce mo caammi mo wø kwøŋ ciek, ka Ajwöm Thum Kac mar aŋuun cwiir, dou wøørø. 23Kwöre adäk ki yi cwiir cooth cwøw mou bëët doo ööa nyïma, a na Wuuö Jwøk na näk Jwø Icriel. 24Kiper aani juurre riema wøk nyïmmu, ni nyaaa nyeŋ keee mou, ni tïïa ŋöömö maru ni päl. 'Ba kany wø ööu nyïma, a na Wuuö Jwøk na näk Jwøu, kwöre moøgø na adäk yøø ki yi cwiir, bäŋ dhaanhø mo cädö ki man mac ŋöömö maru.

25«Olämi man wø ŋaal ni wø remme cïpu jïra, kär cïpu na aciel ki møø mo ree da thømmø. Olämi mana jiiŋŋi kiper cam Cäŋa Pööth Thøøe Yie enø, kär dee gø mo weyu ree mo këët amöölla.

26«Thwöth caammi moa beyø moo kwøŋ ciek dïkwøŋ yïth pwöth mou, dou kïtha yi øda, a na Wuuö Jwøk na näk Jwøu.

«Kär nyidiel thaallu ki caa menni.»

27Køøre Wuuö Jwøk aköö jï Modhe, ni «Göör luupögø piny, kiper ki køør luupögø yøø, aana nø tudö ki luubö ki ïïni ki jø Icriel.» 28Ni ö Modhe ni put bëëtö kaace buut Wuuö Jwøk ki cääŋŋe ma pïëraŋween ki wärre ma pïëraŋween; ni bäŋ gïn mo ee camø, wala pïï mo ee maadhø. Ni göör luup moa tuut, na näk ciik moa näk apaar, bäät opäp kïte.

Kanya Duu Modhe Baŋ Jø Icriel Ni Täärnyïme Orieny

29'Ba kanya tïme ni Modhe ööa piny ki bäät Kïn Caynay no opäp kïte karge riet moa näk ciik ogöör bäätge ena cere, ni eni ööa piny ki bäät kïdi, eni na Modhe enø kuue ni täärnyïme bëëdö no orieny kiper mana cääne ki Wuuö Jwøk. 30'Ba kanya ö Aranni ki jø Icriel bëët na jootge Modhe, aneenge møn ni täärnyïme orieny, ni putge lwäyö ki man nyänhge buute. 31Køøre gena cwøl Modhe, ni ö Aranni ki jiy bëët moa näk dïbwöthe ni duuge baŋ Modhe; ni ö eni ni put cäänö ki geni. 32'Ba na tïme na køøre cään, jø Icriel bëët anyänhnhö, ni cem geni ki man tïïcge jammi bëët moa caan Wuuö Jwøki jïre bäät Kïn Caynay.

33'Ba kanya ö Modhe na lønye ki cäänö ki ge, täärnyïme aput rïëp ka abïï. 34'Ba kany wø ci Modhe nyïm Wuuö Jwøk nee cääne ki gø, abïï wø käle wøk täärnyïme këël mano duu wøk. Ni kany wø duu wøk ni caana luup jï jø Icriel moa köömmi ki ge, 35jø Icriel täärnyïm Modhe wø jootge joodø no orieny. Ni ö Modhe ni dwøk abïï täärnyïme këël mano cäŋ ci nyïm Wuuö Jwøk nee cääne ki gø.

Currently Selected:

Bwøth Wøk 34: AnyuB

Highlight

Copy

Compare