Moa Tïïc Nyïïatwieli 20

Kanya Ci Pøølli Po Jø Gïrïïk Ki Macedönia

1'Ba na pï dïŋaŋ manøgø piny, Pøøl ajääk baŋ bääŋi. 'Ba na nø luum geni døøc, gena wiie ni aa Macedönia. 2'Ba na nø caath kwörögø bëët ni cøma cwïny jiy døøc, ena ci po jø Gïrïïk. 3Ni bëëde kaace ki dwäde adäk. 'Ba kanya dee aa Ciria ki jää naam, luubö mør aput jø Juuthi tuut kipere. Ni caar wïïe ni beerra man døøe ni cøra Macedönia. 4'Ba jøøa aay ki Pøøl beege Cöpater o Payra ma nyï Beria, ki Aritarka ki Cekunda ma jak Thecalönika, ki Geea ma nyï Derbe, ki Timöthi, ki jaak Eecia na näk Taykika ki Taröpima. 5Jøøgø gena aay ni koorge waani yi Tarööa. 6'Ba køør nïr Ajwöma mar Møga Näk Ree Bäŋ Thømmø, waana läw tïŋŋö Pilipay ki jää naam. 'Ba na tïme na ri nïne abïïc, waana pïï buutge Tarööa. Ni bëëtwa kaace ki nïne abïriiø.

Kanya Päth Yutika Piny Ki Waŋawëërnyeŋ

7'Ba na tïme na täk tïïc, ni dëëtwa ewa cooŋ kanya ciel nee wa cämwa ki møø, Pøøl acäänö ki geni, ni ee cooŋø ki cwïnye ni eni tïŋŋö ka aruunnø. Ni tïïc luumme ni yie bäär ni këët dï wäär. 8'Ba øt pööki mana en maal na cooŋwa yie, yie da lambae mo thööth. 9'Ba nyen ma wøp mo cwøl ni Yutika opï piny dha awëërnyeŋ. 'Ba kanya ruu Pøølli ni poot cäänö, eni nyeŋŋe amägö døc, ni bute, ni put päth piny ki yi dää øt pööki maal. Ni tïŋi maal no othøw. 10'Ba Pøøl aci piny baŋ gø ni guuŋe bäät gø, ni tïŋ gø ni kïth gø kööre, ni kööe, ni «Käru lwäyö. Jwïëye poot nut dëëre.» 11'Ba na nø døø Pøølli maal, ni pøt møø ni cäme, ena wääö ki geni ki kany mo yie bäär, gøøc mana tuul cäŋŋi. Køøre, ena aay. 12Ni kälge nyenøgø no okwøw, ni yïthge omïnnö døc.

Kanya Ci Pøølli Yi Milita

13'Ba na ciwa yi jää naam, waana tïŋŋö ki gø ni ciwa Eecø, ni ewa caarø ni Pøøl kïthwa yi jääy kaace, kiper na kwøŋ gø caan. Kiper eni ki dëëre ee caarø ni eno cäädhi ki wøk. 14'Ba kanya røømme ki waani yi Eecø, ena kïthwa yi jääy ni ciwa Mitilin. 15'Ba na tïŋwa kaace ka aruunnø man, waana pïï nyïm Kiø. 'Ba na tïme na aruunnø maya, waana mäk piny yi Cemø. 'Ba na tïme na amöölla maya, waana pïï Milita. 16Kiper ocaar Pøølli ni eni pöödhö ki buut Epeca, kiper eni ba many man ruue Eecia. Kiper eni läädö nee tïme ni ena Jerucalem ki cäŋ Pentikø, ni näk mo løny jïre.

17'Ba na pïïe Milita ena jääk Epeca, ni eni cwöla jaak acooŋ Jwøk baŋe. 18'Ba na nø öge, ena köö jïge, ni «Uuni ki dëëtu, bëëtö mara mana beeda dïïu, këël dïcäŋa kwøŋa tiera këël yi Eecia, ŋäyu, 19naa tïnynya Wuuö ni dëëra yaa dwøk piny naa jwöŋö, ni jït dëëra ki gïï mo leth ki køør luup moa tuut jø Juuthi bääta. 20Ni kära lwäyö ki man køba jammi bëët jïïu moa doo beyø kiperu ki man wïnynyu gø. Ni pwönynya uuni nyïm jiy bëët, ni cäŋa pöö naa cøøa yi ødi nø ki ødi nø, 21naa cäänna jø Juuth ki jø Gïrïïk bëët kiper løk cwïny baŋ Jwøk, ki ŋääth Kwääyø ma Jecu Krictø.

22«'Ba kawaane, neennu, a aa Jerucalem ni aano mak Jwïëc Jwøki, ni kuua gïno pïï dëëra kunöce, 23'ba tiirra man wø køp Jwïëc Jwøki na en kur keere jïra yïth mïëri bëët, ni tööc ki jwør gïï mo leth ena nyïma. 24'Ba jwïëya patha yaa caarø ni gïn mo pere leth jïra, mo daa gwøø. 'Ba mana manynya keere beeye ki man thööra tïïc mara, ki tïïc mana wëëk Kwäärö ma Jecu aani ki man køba gïr luumma nyään na met mar met yi Jwøk.

25«'Ba kawaane, neennu, ŋääa ni uuni bëët, u na dïïu caadha naa køpa luum buc Jwøk, waŋa ba jootu këët. 26Kiper manøgønø, a cäänna uuni dïcäŋi, naa tøør ri remmu karubëët. 27Kiper a kär lwäyö ki man caana luup Jwøk bëët jïïu. 28'Ba kawaane gwøgu rou, ni gwøgu pïïth bäre, pïïdha cïp Jwïëc Jwøki na en kur keere ceŋŋu ni uuna dïkuye, na acooŋ Jwøk na joode ki køør remme caammu. 29Kiper ŋääa, ni køøra noo aaa, orude mo reyø døc ööa dïïu ni ba wecge pïïth. 30'Ba jø møøk dïïu røkge othïïŋge, ni kierge wïthu nee cwïny bääŋi løøge køørge. 31Kiper manøgønø, gwøgu rou, ni parru wïthu ki cwiiya näk adäk na thööra cääŋŋe ki wärre naa köömma uuni bëët ki luubö mo teek, naa jwöŋö. 32'Ba kawaane, uuna wiia cer Jwøk, ki luum met ec mare, ni beeye noo wëëk u tëënnö, ni mëëk olaawi uuni na aciel ki jøøa näk ocïp kur keerge bëët na mo Jwøk. 33Bäŋ ŋat mo gwete yaa parø, wala warkey, wala abïïe. 34Uuni ki dëëtu ŋäyu ni ceŋŋi ii beege na tïny aani ki jøøa öö ki aani na aciel. 35'Ba ki yïth japøgø bëët, a nyuunhnha uuni, ni dhaanhø doo tïïö døc na enøgønø ni køny jøøa can, ni para wïïe ki luupa caan Kwäärö ma Jecu, na kööe, ni ‹Beerra mar ŋat wø cïpi, ni kaala ŋat wø mooc.› »

36'Ba na nø caan luummögø, cøŋŋe akëël piny ni läme ki geni bëët. 37Ni jwöŋge bëët, ni gämge gø, ni nuumge dhi gø. 38Ni cwïnyge opädhö døc ki luumma caane, ni waŋe ba cäŋge jootø këët. Ni öge ni jiethge eni bäät jääy.

Currently Selected:

Moa Tïïc Nyïïatwieli 20: AnyuB

Highlight

Copy

Compare