Moa Tïïc Nyïïatwieli 19

Kanya Bëët Pøølli Epeca Ni Køpa Luum Jwøk

1'Ba kanya poot Apøla ni ena Körin, Pøøl agak ni lwøra dï mïëri moa en wøk ni ö yi Epeca. Ni cwänne ki bääŋi møøk kaace. 2Ni kööe jïge, no «?U kär jïtö ki Jwïëc Jwøk na en kur keere kanya jïëyu?»

Ni köge, ni «Jïwa bäyö. Poot kärwa wïnynyö cøøn ni da Jwïëc Jwøk mo ena kur keere.»

3Ni kööe, ni «?Uuno lwøø na nyuudhi ka nyeŋ ŋø?»

Ni köge, ni «Wa lwøk ka lwøø Jøøn na nyuudhi.»

4'Ba Pøøl aköö, ni «Jøøn alöö ki lwøk na nyuudhi mar løk cwïny, ni kööm jiy ki man jïëcge ŋato ööi køøre, ni beeye Jecu.» 5'Ba na wïnyge luummögø, gena lwøk na nyuudhi ki nyeŋ Kwäärö ma Jecu. 6'Ba na nø ö Pøølli na peeth ceŋŋe bäätge, Jwïëc Jwøk na en kur keere aö bäätge. Ni cäänge ki dhøgi møøk, ni køpge dwør Jwøk. 7'Ba ge bëët ge jïtö ki kar apaar kurriiø.

8Ni ö Pøølli ni døny yi øt acooŋ lam, ni pwöny geni ki dwäde adäk ni cwïnye da cer, ni pïëmö ni cøga jiy kiper buc Jwøk. 9'Ba na tïm jø møøki ni wïthge teek ni ge kär jïëy, ni ge cäänö ki luup mo reyø kiper Jöör Lam mar Jecu nyïm acooŋa, Pøøl ree adaae dïge, ni cwöl bääŋi køøre. Ni tïme ni pïëmö yi øt pwöc mar Tirana cooth. 10Ni put gïnögø tïïc ki cwiiri ariiø. Kiper manøgønø, luum Wuuö awïnyö jï jø Juuth ki jø Gïrïïk bëët moa en Eecia.

11Ni ö Jwøki ni tïïe ki gïï mo døøŋŋø mo rëëma ec ki ri Pøøl. 12Ni tïme ni manydhïïle wala thäk abïïe di kälö ki baŋe ni kïthi baŋ jøøa tuu, ni aac täwe dëëtge, ni ö juuga reyø ni öge wøk dëëtge. 13'Ba kanyøgø ajuuk mo jø Juuth mo wø cäädhi kaagø, gena tägö ki man cøørge nyeŋ Kwäärö ma Jecu bäät jøøa näk rege da juuga reyø, ni ge köö, na «A köömma uuni ki nyeŋ Jecu ni wø køp Pøølli.» 14'Ba jak ma abïriiø ma wäät Eckiiba, na näk Kwääy Lam Mana Dwøŋ mar jø Juuth, gïnögø wø tïïcge tïïö. 15'Ba adwøk jwøa raaci jïge, ni «Jecu ŋääa, ni ŋääa Pøøl, 'ba uuna jøøe?» 16'Ba ŋata näk dëëre da jwøa raac apäär bäätge ki teek, ni put geni böötö. Ni ö geni ni reŋge wøk ki yi øtø ni dëëtge da ŋwiili ni bäŋ abïïe dëëtge. 17Ni put gïnögø tïmö ni ŋäc jø Juuthi ki jø Gïrïïk bëët moa en Epeca. Ni jït cwïnyge bëët ki lwär. Ni ö nyeŋ Kwäärö ma Jecu ni jiemi døøc. 18Kanyøgø jøøa näk ojïëy mo thööth thuwø aö nyïm, ni ö gïïa reyø na wara tïïcge ni caange ge nyïm jiy bëët. 19Ni ö jø møøki dëët jøøa tïïö ki tïï ajuuk ni kälge weeli moge kanya ciel ni waaŋge geni nyïm jiy bëët. 'Ba na kwaange japa ŋeewge weeli ki ge, atïmö na gwel ma kume ma pïërabïïc. 20Kanyøgø luum Wuuö anyaay døc.

21'Ba ki køør gïïögø bëët, acaar Pøølli ki ri Jwïëc Jwøk na en kur keere, ni eni doo cøøa Jerucalem, ni cøra Macedönia ka Akeea, ni kööe, ni «Noo nø bëëda kaace, a cøøa kuna neena Röm thuwø.» 22'Ba na nø jääk Macedönia ki jiy ariiø mo wø køny gø, ni beege Timöthi ki Eracta, eni ki dëëre adööŋ Eecia ki nïne møøk.

Kanya Ö Dïŋaŋŋi Na Täge Epeca

23'Ba yïth nïrögø luubö mo ba thiinh atägö kiper Jöör Lam mar Jecu. 24Kiper da nyen mør mo nyeŋŋe Dimitaria ma rëëm gwet-bïrö, ni beeye ŋat wø tïïc gwet-bïrö na kït øt jwø wø cwøl na Artema. Ni eni jø wø tïïö tiere wø wëëge joot jammi mo ba nøk ki køør tïïögø. 25Eni jøøgø acooŋ kanya ciel ki jø wø tïïc teeŋ tïïögø, ni kööe, ni «Jaay, ŋäyu ni kwärö marø ööi ka køør tïïc man. 26'Ba aneennu ni wïnynyu gø ni paa Epeca keere, 'ba päl Eecia ki kare bäre, jiy mo thööth anø pwöny Pøøløgø ni løø cwïnyge wøk, ki køør mana kööe, ni ‹Juu mo tïïc ka ceŋ, paa juu ma adïëri.› 27'Ba, paa tïïc marø keere noo ränynyi, 'ba këël øt jwøk mar jwøa dwøŋ ma Artema, kanymør di taaø. Ni kanymør nyeŋŋe døøa cään ni bäŋ ŋat jiem gø këët, jwø wø wøør jø Eecia bëët gøøc piny bäre.»

28'Ba na wïnyge luummögø, cwïnyge aränynyö døc, ni kwöŋge, ni «Dwøŋŋa Artema jwø jø Epeca!» 29Ni tïm paaci bäre ni döönni. Ni reŋge kar acooŋa karge bëët, ni ge pieya Geea ki Aritarka, jak Macedönia mo wø cäädhi ki Pøøl na aciel. 30'Ba Pøøl manynya man ci dï lwaaøgø, 'ba ena män bääŋi. 31'Ba jø Eecia møøk thuwø mo kwörge døøŋŋø, moa näk nyïïawääte, gena öön baŋe ni ge kwaya gø nee ba ci yi kar acooŋa.

32'Ba jøøgø rëëdi ni ge cara luup ma teeŋi. Kiper acooŋa manøgø wïïe ree akiere, ni ö thööthge ni kucge gïna öge kanya ciel kipere. 33'Ba jø Juuth ŋat poge ma Alekdhander akïthge nyïm, nee tier luummögø caane. Ni ö Alekdhander ni tïŋ cere maal, ni manynya man piem jø poge ki luummögø. 34'Ba na ŋecge gø ni ena ŋat Juuth, gena rëëdö ki dwøl aciel ki kany mo jïtö ki kar caae ariiø, ni ge rëëdi, ni «Dwøŋŋa Artema jwø jø Epeca!»

35'Ba kanya ö kwääy päänynyi na nø jook lwaaøgø, ena köö, ni «?Wui jø Epeca, aŋø, da ŋat mo kuc gø ni beeye jø Epeca wø koor øt jwøk mar Artema na dwøŋ, ki kïn jwøk mana pänhnhö ki maal? 36Na ŋäyu gø nø, ni gïïögø ba maar piem, u dou lïŋö nø, ni bäŋ gïn mo tïïyu. 37Kiper jøøi ii akälu kany ni gena jiy mo bäŋ gïn mo raac mo ege tïïö dëër øt jwøk, wala ajaany mo ege tïïö dëër jwøø. 38Kiper manøgønø, ni näk Dimitaria ki jø wø tïïc tïïögø na en buute yøøgø, nee jïge da luubö ki dhaanhø mør, kwör løøe nutö, ni kwääri dagø. Wär cige baŋ løøk. 39'Ba nee poot da gïn mør mo manynyu manynyø, ocaan ya acooŋa mano cooŋ. 40Kiper kanymør ø di jäälö ni pøø da dïŋaŋ dïcäŋi, ni tïme ni bäŋ gïn mo maarø caan kiper luummi ni kierø wïthø ki gø en.» 41'Ba na nø caan gïnögø, acooŋa manøgø awëëk keethø.

Currently Selected:

Moa Tïïc Nyïïatwieli 19: AnyuB

Highlight

Copy

Compare