Moa Tïïc Nyïïatwieli 14

Kanya Ö Pøølli Na Køp Luum Jwøk Yi Ayköniem

1'Ba Barnaba ki Pøøl, kanya bëëtge yi Ayköniem, gena døny yi øt acooŋ lam mar jø Juuth, ni pööge, ni ö jiyi mo thööth ni jïëcge ni ŋääthge, ni beege jø Juuth ki jø Gïrïïk. 2'Ba jø Juuth moa näk kär jïëy, yïth juurre acoonge ni wëëkge ge männö ki nyïïmëëe. 3Kiper manøgønø, gena bëëdö ki kany mo bäär ni ge køpa gïr Wuuö ni cwïnyge da cer. Ni ö Kwäärö ni nyooth luum met yie na adïëri ki køør ŋïïce ki gïï mo rëëma ec na wëëk tïïc ki rege. 4'Ba jø paanøgø dëëtge apääŋge. Ni ö jø møøki ni cige kur jø Juuth, ni ci møøki kur nyïïatwieli. 5'Ba na tïm juurre ki jø Juuth ki kwääri moge bëët ni ge manynya man tïïge ka ageem nee jøøgø këërge ki kïte, 6awïny jøøgø, ni reŋge Litara ki Derbe mïëc Laykönia, ki mïëya en deŋ paanøgø. 7Ni køpge luumma nyään na met kaace.

Kanya Ö Pøølli Na Køp Luum Jwøk Yi Litara Ki Derbe

8'Ba yi Litara da nyen mo opï piny mo tiete ba maar tuk, ni eni nywöli na puuth, ŋat mo wääth kuue bäre bäre. 9Eni ïthe aciie ki dwør Pøøl na cääne. Ni ö Pøølli ni neen jïgø døøc. 'Ba na joot gø ni cwïnye da ŋäädhe man køny eni, 10ena cäännö ki dwøl mo päl, ni «Ö maal ni cuŋŋï ki tietï!» Ni put päny maal ni cäädhe.

11'Ba jøøa thööth na en kaagø bëët na neenge gïna tïïc Pøølli, döötge atïŋge maal ni köge ki dhi Laykönia, ni «Juu aö piny baŋø ni caala jiy.» 12Ni cakge nyeŋ Barnaba ni Dhuc, 'ba Pøøl kiper mana näk ŋat wø cäänö, nyeŋ gø acakge ni Eermec. 13Ni ö kwääy lammi mar jwøa cwøl na Dhuc, na näk øt lam mare ena nyïm pääny, ni kïth dhøk kiir ki rwädhe ki ïth jenni mo oŋøøk ni mïërö, ni eni manynya man 'näk rwädhe moøgø no olämme jï Barnaba ki Pøøl nyïm jiy.

14'Ba gïnögø na wïnynyi ya Barnaba ki Pøøl, ge na näk nyïïatwieli, abïïkge ajeecge ni reŋge dï lwaak, ni ge rëëdö, 15ni «?Jaay, aŋø ni tïïyu gïnögø? Waani, waana jiy thuwø mo caala uuni, ni wa käla luumma nyään na met jïïu, kiper nee gïïö no oballe yøø nee weyu, ni løøu dëëtu baŋ Jwøa kwøw na cwääc maal ki piny, ki näm ki jammi bëët moø ni en yïthge yøø. 16Kiper yïth cwiiri moa pöödhö, Jwøk mïëri bëët awëëk bëëte kaawat mana manyge. 17'Ba këël na näk enøgønø, eni kär bëëdö ni dëëre käre nyoodhø. Kiper ena tïïö ki gïï mo beyø; eni køth wø jääŋŋe jääŋŋö jïïu ki maal, ni cïpe jïïu ki kwör ciek caammi mou yie yi cwiir, ni wëëk cwïnynyu mïnnö ki caammi mou, ni bëëdu ni yïthu met.» 18'Ba këël na carge luupögøøni, gïïa dege nääö jïge na jëëthe, bøth ka kany mo thiinh.

19'Ba da jø Juuth møøk mo oö kanyøgø mo käla yi Antïëk ki Ayköniem. 'Ba na nø coonge yïth jiy, Pøøl akëërge ki kïte, ni jwaage gø wøk ŋää paac, ni ege caarø no othøw. 20'Ba na ö bääŋi na cooŋge dëëtge buute, ena ö maal, ni ci paac ki geni na aciel. 'Ba na tïme na aruunnø man, ena aa Derbe ge ki Barnaba. 21'Ba na nø køpge luumma nyään na met paanøce, ni tïïcge jiy mo thööth na bääŋi, gena døø Litara, ni pööthge Ayköniem ki Antïëk, 22ni ge cøømma cwïny bääŋi, ni köömge geni døøc ki man putge bëëtö ri ŋäädhe. Ni ge cara gø, ni «Ki yïth gïï mo leth mo thööth moo jwørø beeye noo dønynyø buc Jwøk.» 23'Ba na nø kwänyge ki jaae yïth acook Jwøk bëët ki køør lam ki wödö, gena wiige cer Wuuö, ŋata jïëcge ni ŋääthge.

Kanya Ö Barnaba Ki Pøøl Na Duuge Yi Antïëk Yi Ciria

24Køøre gena cør yi Picidia ni öge Pampilia. 25'Ba na nø caange luum Jwøk yi Perga, gena pööth Atalia. 26Ni tïŋge kaace ki jää naam ni ge cøøa Antïëk, kanya kwøŋ geni cïp cer met yi Jwøk kiper tïïc manøgø na thöörge enø. 27'Ba na pïïcge, acooŋ Jwøk bäre acooŋge kanya ciel, ni køpge gïïa tïïc Jwøki ki rege, ki kanya jap øtjöör ŋäädhe jï juurre. 28Ni putge bëëtö ki bääŋi ki kany mo bäär.

Currently Selected:

Moa Tïïc Nyïïatwieli 14: AnyuB

Highlight

Copy

Compare