ഗലാത്ത്യക്കാറാര് 2
2
പവുലോസ്‌മ് ബാക്കി അപ്പൊസലലാമ്
1പദിണാല് ബര്‌സ കളിന്ത പ്‌റ ണാന് പിന്നേമ് എര്‌സലേമ്‌ക്കെ പോഗാട്ടി ബറ്‌ണവാസ്‌മ് ണാന്‌മ് പോനേര്. അക്കുളെ തീത്തോസ്‌ണാമ് എന്ന്‌ദൊപ്പ കൂട്ടി പോനെ. 2<<ണീ എര്‌സലേമ്‌ക്ക് പോഡൊ>> എന്ത് എന്ന് മനേസ്സ്‌ക്ക് സാമി സൊന്നാദ്‌ണാലെത്തെ ണാന് ആങ്ക് പോനാദ്. എഗുദാര് അല്ലാത്ത ജാദിഗ പട്ടിലി ണാന് ഏസുണ പറ്റ്യുള്ള ണല്ല സേദി സൊല്ലുഗാട്ടി എന്തെല്ല കാര്യഗ സൊല്ലിര്‌ക്കേനെന്ത് അദിലി ഒനൊന്റൊനൊന്റായി സൊന്നെ. എന്ത്‌ക്കെന്റ ണാന് പോന ണാളിലിമ് ഇപ്പ്‌മ് സെയ്‌ദ് കൊണ്ടിര്‌ക്ക കാര്യഗ ബീ്ണാലായെക്കിനാലൊ എന്ത് അര്‌ക്കപട്ട് ഏസുക്കാറാര് കൂട്ടാത്തില്യ തലെവലാക്ക് മാട്ട്‌ത്തെ സൊന്നാദ്. 3ണാന് സൊന്ന കാര്യഗണ അവാര് ഒത്തുപട്ടാര്. എന്നൊപ്പിര്‌ന്ത ഗ്‌റീക്ക്‌ക്കാറാ് തീത്തോസ്‌ണ സുന്നത്ത് സാത്ത്‌റ കള്‌സുഡൊ എന്ത് ഈ തലെവല ണത്താമില്ലെ. 4ആന ഏസുക്കാറാര് എന്ത് സൊല്ലി ണഡിക്ക ബേ്റെ ആള്‌ഗാത്തെ തീത്തോസ്‌ണ സുന്നത്ത് സാത്ത്‌റ കള്‌സുഡൊ എന്ത് സൊന്നാദ്. ണമ്മ ക്‌റ്‌സ്‌ത്ത് ഏസുണ ണമ്പി ണഡാക്കാദ്‌ണാലെ മോസെ ബെത്ത സാമി സട്ടാക്ക് അഡിമെഗ ആഗാദെ പെ്ളേക്കാമ്. അച്ചെ പെ്ളേക്ക ണമാണ പിന്നേമ് അയ്യി സട്ടാക്ക് അഡിമെഗ ആക്കി കെ്ഡ്‌സ്യ ബേ്ണ്ടി അവാര് ഓസണോഡെ ണമ്മ് കൂട്ടാക്ക് ബന്തിര്‌ക്കാര്. 5അദ്‌ണാലെ ണിമ്മ ണമ്പിക്കെ ബെത്തിര്‌ക്ക സത്ത്യമാന ണല്ല സേദിന പിന്നേമ് ഒറേപ്പായി ണമ്പി പെ്ളേക്ക്യ ബേ്ണ്ടി അവാര് ണായണ സെറ്റെ ഗൂഡി എമ്മ കേ്ക്കാലെ.
6എര്‌സലേമില്യ ഏസുക്കാറാര് കൂട്ടാത്തില്യ തലെവല ണാന് സൊന്ന ണല്ല സേദിക്ക് സേത്ത്യ പുദ്യ ഒരു കാര്യാമ് എനാക്ക് സൊല്ലി തരാലെ. ഈ തലെവല ആര് ആയിര്‌ന്താല്‌മ് സെരി എനാക്ക് ഒന്റുമില്ലെ. സാമി ആര്‌ണാമ് ബെല്ല്യവാ് എന്തൊ സിന്നവാ് എന്തൊ ബഗെപ്‌റ്‌ത്ത് കാണ്‌റാദില്ലെ. 7-8ആന പത്ത്‌റോസ്‌ണ എഗുദാര്‌ക്ക് ണല്ല സേദിന സൊല്ല്യ ബേ്ണ്ടി സാമി എ്ഡ്‌ത്ത് ബെത്തിര്‌ക്ക പാസെത്തെ എഗുദാര് അല്ലാത്ത ജാദിഗളോഡെ ണല്ല സേദിന സൊല്ല്യ എനാണാമ് സാമി എ്ഡ്‌ത്ത് ബെത്തിര്‌ക്കാ് എന്ത് ഈ തലെവലാക്ക് തെരിന്ത്‌ദ്. എഗുദാര്‌ദ് പട്ടിലി ണല്ല സേദിന സൊല്ല്യ ബേ്ണ്ടി പത്ത്‌റോസ്‌ണ അപ്പൊസലനായി ബിലപഡ്‌സിന സാമി എനാണ എഗുദാര് അല്ലാത്ത ജാദിഗ പട്ടിലി ണല്ല സേദിന സൊല്ല്യ ബിലപഡ്‌സിനാ്. 9ഈ ബേലെ സെയ്യ സാമി എനാക്ക് ബാക്ക്‌വര തന്തിര്‌ക്കനെന്ത് കണ്ട് മുക്ക്യമാന തലെവലാന ആക്കോവു, പത്ത്‌റോസ്, ഓഗന്നാ് എങ്കവാര് തമ്മ്‌ദൊപ്പ ബേലെ സെയ്യ ബേ്ണ്ടി എനാക്ക്‌മ് ബറ്‌ണവാസ്‌ക്ക്‌മ് കയ്യി തന്ത് സേത്തിനാര്. അദ്‌ണാലെ അവാര്: <<എമ്മ എഗുദാര് പട്ടിലിമ് ണീമ് ബറ്‌ണവാസ്‌മ് എഗുദാര് അല്ലാത്ത ജാദിഗ പട്ടിലിമ് ണല്ല സേദിന സൊല്ലിരി>> എന്ത് സൊന്നാര്. 10ആന ഏ്ളെഗണ കയ്യിതാങ്ക്യ മറാക്കാക്കില്ലെ എന്ത്‌ത്തെ അവാര് സൊന്ന ഒരേ ഒരു കാര്യ. അയ്യി കാര്യഗെല്ല ണാന് ണല്ല ബെ്ഡ്‌ബെ്ഡ്‌ത്ത് സെയ്‌രെ.
അന്തൊക്ക്യാലി ബെത്ത് പവുലോസ് പത്ത്‌റോസ്‌ണ സണ്ടെ കൊഡുക്കാ്
11-12ആന ഒരു ഗള്യേലി പത്ത്‌റോസ് അന്തൊക്ക്യ പട്ടണാക്ക് ബന്തിര്‌ക്കാട്ടി, അവാ് തപ്പ് സെയ്‌ദാ്. അദ്‌ണാലെ എല്ലാര്‌ദ്‌മ് മുന്തുക്ക് ബെത്ത് ണാന് അവാന സണ്ടെ കൊഡുത്തെ. പത്ത്‌റോസ് അന്തൊക്ക്യ പട്ടണാക്ക് ബന്തിര്‌ന്ത ഗള്യേലി ഏസുണ ണമ്പിന എഗുദാര് അല്ലാത്ത ജാദിഗാദൊപ്പ ഒന്റായി തിന്ത്‌കുഡിത്ത് ണഡാന്തിര്‌ന്താ്. ആന ആക്കോവു സൊല്ലിബ്‌ട്ട ഏസുണ ണമ്പിര്‌ക്ക ലേസ എഗുദാര്‌ഗ ബന്ത പ്‌റ ഏസുണ ണമ്പിര്‌ക്ക എഗുദാര് അല്ലാത്ത ജാദിഗ പട്ട്‌ക്കെ, പത്ത്‌റോസ് അണ്ട്‌റാദൊ തീനി തിങ്കാദൊ ഒന്റുമ് സെയ്യാദെ ഇര്‌ന്താ്. എന്ത്‌ക്കെന്റ സുന്നത്ത് സാത്ത്‌റ കളിത്തിര്‌ക്ക അവാര്‌ണ അയാള് അഞ്ചിര്‌ന്താ്. 13പത്ത്‌റോസ് ആങ്ക്‌മ് ണല്ലവാനായി ഈങ്ക്‌മ് ണല്ലവാനായി ണഡിത്ത പാസെ ഏസുണ ണമ്പിര്‌ക്ക ബേ്റെ എഗുദാര്‌മ് ണഡിത്താര്. അച്ചെ ബറ്‌ണവാസ് ഗൂഡി അവാര്‌ദൊപ്പ എ്ണേന്ത് തപ്പ് സെയ്‌ദാ്.
14അവാര് സത്ത്യമാന ണല്ല സേദിക്ക് എ്ണേന്ത ദിന്‌സിലി കെ്ട്ട്‌പട്ട് ണഡാക്കാദില്ലെ എന്ത് കാണ്‌ഗാട്ടി ണാന് എല്ലാര്‌ദ് മുന്തുക്ക് ബെത്ത് പത്ത്‌റോസ്‌ക്കെ ഇച്ചെ സൊന്നെ: <<ണീ എഗുദാനായിര്‌ന്ത് ഗൂഡി എഗുദാര് സട്ട്‌മെ്ട്ട്‌ക്ക് തഗ്‌ന്ത പഡി പെ്ളേക്കാദെ എഗുദാരല്ലാത്ത ജാദിഗാക്ക് എ്ണേന്ത് ണഡാന്തേനല്ല. അച്ചെ ണഡാക്ക ണീ എഗുദാരല്ലാത്ത ബേ്റെ ജാദിഗണ എഗുദാര്‌ണ പാസെ പെ്ളേക്ക്യ ണത്ത്‌റാദ് എന്ത്‌ക്ക്?>>
ഏസുണ ണമ്പ്‌റ ഏവാന്‌മ് ദെങ്കുവാ്
15<<സാമി സട്ട കെ്ഡേത്ത എഗുദാര് ജാദിക്ക് പ്‌റാന്തവാര്‌ത്തെ ണമ്മ. അല്ലാദെ പാവ സെയ്‌ര എഗുദാരല്ലാത്ത ജാദിഗാക്ക് പട്ടവാരല്ല. 16മോസെ ബെത്ത സാമി സട്ടാത്തിലി സൊല്ലിര്‌ക്ക കാര്യഗണ സെയ്‌രാദ്‌ണാലെ അല്ല ണമ്മ ണേര്‌മെക്കാറാര് ആരാദ്. ക്‌റ്‌സ്‌ത്ത് ഏസുണ ണമ്മ ണമ്പ്‌റാദ് മേലെത്തെ സാമി ഒരുത്താന ണേര്‌മെക്കാറാ് എന്ത് കണക്കാക്ക്‌റാദ്. അയ്യി കാര്യ ണമാക്ക് തെര്യു. അദ്‌ണാലെ ണമ്മ മോസെ ബെത്ത സാമി സട്ടാത്തിലി സൊല്ലിര്‌ക്ക കാര്യഗണ സെയ്യാദെ. ക്‌റ്‌സ്‌ത്ത് ഏസുണ ണമ്പി ണേര്‌മെക്കാറാരായ ബേ്ണ്ടി ണമ്മാമ് ക്‌റ്‌സ്‌ത്ത് ഏസുണ ണമ്പിനാമ്.
17ആന എമ്മ ക്‌റ്‌സ്‌ത്ത് ഏസുണ ണമ്പി ണേര്‌മെക്കാറാര് ആയി തീര്യ ബേ്ണ്ടി ആസെപഡ്‌റാദ്‌ണാലെ എമ്മ പാവ സെയ്‌രേര? ഇല്ലെ. ക്‌റ്‌സ്‌ത്ത് ഏസു എമാണ പാവ സെയ്യ ആസെപ്‌ഡ്‌സ്‌റാ് എന്ത് ഇദ്‌ക്ക് അര്‌ത്ത ബര്‌ദ? ഇല്ലെ, അച്ചെ ബരാദെ ഇല്ലെ. 18ണാന് ബേ്ഡ എന്ത് തള്ളിന മോസെ ബെത്ത സാമി സട്ടണ സെരി എന്ത് ണെനേത്ത് പിന്നേമ് അദേപാസെ സെയ്‌രദാനാക്കി ണാന് താനെ തപ്പ് സെയ്‌ദവാ് എന്ത് കാട്ട്‌റെ. 19ണാന് ക്‌റ്‌സ്‌ത്ത്‌ദൊപ്പ കുരുസിലി സത്തവാനായി എനാണ കണക്കാക്ക്‌റെ. അദ്‌ണാലെ മോസെ ബെത്ത സാമി സട്ടപഡി സായ ഉള്ള ദണ്ടണെ എനാക്ക് കെ്ഡേത്ത്‌ദ് എന്ത്‌മ്, ണാന് ഇനി ഈ സട്ടാക്ക് അഡിമെ അല്ല എന്ത്‌മ് എനാക്ക് തെരിദ്. അച്ചെ എനാക്ക് ഇനി സാമി ആസെപഡി പെ്ളേക്ക്യ മുഡ്യു. 20ഇനി ണാന് അല്ല എന്ന് പെ്ളേപ്പ്‌ണ ആള്‌റാദ്, ക്‌റ്‌സ്‌ത്ത്‌ത്തെ. അദ്‌ണാലെ ണാന് ഇനി പെ്ളേത്തിര്‌ക്ക കാലമാട്ട്‌മ് എന്നോഡെ സീവാ് ബ്‌ട്ട് എനാക്ക് ബേ്ണ്ടി ഉജുറുണ തന്ത സാമിമഗാ് ക്‌റ്‌സ്‌ത്ത്‌ണ ണമ്പികൊണ്ട്‌ത്തെ ണാന് പെ്ളേക്കുവെ. 21സാമി ണമാണ ണേര്‌മെക്കാറാര് ആക്ക്യ ബേ്ണ്ടി ണമ്മോഡെ ബേ്റ്‌വായി ബെന്താദ്‌ണ ണാന് തള്ളി എക്കാഗെമാട്ടെ. ആന മോസെ ബെത്ത സാമി സട്ടാത്തിലി സൊല്ലിര്‌ക്ക കാര്യഗണ സെയ്‌രാദ്‌ണാലെ സാമി ഒരുത്താന തങ്കാരിക്കദാനാക്കി ക്‌റ്‌സ്‌ത്ത് സത്താദ് പണ്ടെ ബെ്റ്‌ദെ ആദല്ല.>>
Currently Selected:
ഗലാത്ത്യക്കാറാര് 2: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
