എപ്പെസോസ്‌ക്കാറാര് 2
2
പുദ്യ ഉജുറു
1ക്‌റ്‌സ്‌ത്ത്‌ണ ണമ്പ്‌റാദ്‌ക്ക് മുദ ണിമ്മ സാമി സൊല്ലുപഡി ണഡാക്കാദെ പാവ സെയ്‌ദ് കൊണ്ട് പെ്ളേത്തിര്‌ന്തേര്. അദ്‌ണാലെ അയ്യി ഗള്യേലി ണിമ്മ സാമ്യോഡെ ഉറാവു ബെത്ത് ണഡാക്ക്യ മുഡ്യാദെ ണിമ്മ സാമി മുന്തുക്ക് സത്തവാര്‌ണ പാസെ ആയിര്‌ന്തേര്. 2അയ്യി ഗള്യേലി ഈ ഉലഗാത്തില്യവാര് സാമി സൊല്ലുപഡിക്ക് പെ്ളേക്കാദെ ഇര്‌ന്ത പാസെ ണിമ്മ പെ്ളേത്തിര്‌ന്തേര്. എന്ത്‌ക്കെന്റ സാമി സൊല്ലുപഡിക്ക് ണഡാക്കാത്തവാര്‌ണ ഇപ്പ്‌മ് ണഡാത്ത്‌റാദ് മാഗെ ലോഗണ ആണ്ടിര്‌ക്ക ഗരഗഗാത്തെ. ഈ ഗരഗഗാത്തെ മുന്തുക്ക് ണിമ്മ് പെ്ളേപ്പ്‌ണ ണഡാത്തിര്‌ന്താദ്. 3അക്കുളെ ണമ്മ് മനേസ്സ്‌ക്ക്‌മ് സരിഗലാക്ക്‌മ് പ്‌ഡിത്ത കാര്യഗണ സെയ്‌ദ് കൊണ്ട് ണമ്മാമ് അഡ്‌ത്തവാര്‌ണ പാസെ പാവ സെയ്‌ദ് കൊണ്ട് ണഡാന്താമ്. അച്ചെ സെയ്‌ദ് ണഡാന്ത് ണമ്മ സാമിദ് കോവാക്ക് ആളായിര്‌ന്താമ്.
4-5ആന ണമ്മോഡെ അളാവുക്ക് മീ്റി സീവാ് ബ്‌ട്ട സാമി, തന്ന് സൊല്ലുപഡി ണഡാക്കാദെ പാവ സെയ്‌ദ് കൊണ്ട് സത്തവാര്‌ണ പാസെ ആയിര്‌ന്ത ണമാണ ക്‌റ്‌സ്‌ത്ത്‌ദൊപ്പ ഉജുറേ്ത്തിനാ്. സാമി ണമ്മോഡെ പ്‌ണ്ണ്യ സെയ്‌ദ് സാമി മൊനേക്ക് ആളായിര്‌ന്ത ണമാണ അദിലിര്‌ന്ത് കാപാറ്റിനാ്. അദ്‌ണാലെ സാമി ണമ്മോഡെ ബെത്തിര്‌ന്ത മൊനെന ബ്‌ഡ ണമാണ പട്ട ഗവാത്തെ എത്തറാഗൊ ബെല്ല്യാദ്. 6സാമി ക്‌റ്‌സ്‌ത്ത്‌ണ ഉജുറേ്ത്തിന പാസെ സാമി സൊല്ലുപഡി ണഡാക്കാദെ സത്തവാര്‌ണ പാസെ ആയിര്‌ന്ത ണമാണാമ് ഉജുറേ്ത്തി ക്‌റ്‌സ്‌ത്ത് ഏസുദൊപ്പ മോലോഗാത്തിലി ആള്യ എ്ഡ്‌ത്ത് ബെത്താ്. 7ഏസു ക്‌റ്‌സ്‌ത്ത്‌ദ് പേരിലി സാമി ണമ്മോഡെ പട്ട ഗവ എത്തറ ബെല്ല്യാദെന്ത് ഇനി ബര കാലാത്തില്യ ആള്‌ഗ കാണ്യ ബേ്ണ്ടിത്തെ സാമി ഇച്ചെ ഗവപട്ടാദ്. 8സാമി ണിമ്മോഡെ ബെത്തിര്‌ന്ത മൊനേലിര്‌ന്ത് ണിമാണ ദെങ്ക്‌സിനാദ് ണിമ്മ ണല്ല കാര്യഗ സെയ്‌ദാദ്‌ണാലെ അല്ല. അദ്‌ക്ക് ബഡ്ഡി ണിമ്മ ഏസുണ ണമ്പി പെ്ളേക്ക്യ ണെനേക്കാട്ടി സാമി ണിമാക്ക് പ്‌ണ്ണ്യ സെയ്‌ദാദ്‌ണാലെത്തെ സാമി ണിമാണ ദെങ്ക്‌സിനാദ്. അദ്‌ണാലെ ണിമ്മ ഇപ്പ് പെ്ളേക്ക പുദ്യ പെ്ളേപ്പ് സാമി ണിമാക്ക് തന്തിര്‌ക്ക ഇനാമ്‌ത്തെ. 9അദ്‌ണാലെ ണമ്മ എന്താറ്റൊന്റ് സെയ്‌ദാദ്‌ണാലെത്തെ ണമാണ കാപാറ്റിനാദ് എന്ത് ആര്‌ക്ക്‌മ് പെര്‌മെപഡ്യ മുഡ്യമാട്ട. 10ആന ക്‌റ്‌സ്‌ത്ത് ഏസു ണല്ല കാര്യഗ സെയ്‌ദ പാസെ ണമ്മാമ് ണല്ല കാര്യഗ സെയ്യ ബേ്ണ്ടിത്തെ ക്‌റ്‌സ്‌ത്ത് ഏസുദൊപ്പ സാമി ണമാണ പുദ്യ മന്‌സാര് ആക്കിനാദ്. ഇച്ചെ ണമ്മ ണല്ല കാര്യഗ സെയ്‌ദ് പെ്ളേക്കുഡൊ എന്ത് സാമി മുദതാനെ ണെനേത്തിര്‌ന്താ്.
ക്‌റ്‌സ്‌ത്ത് പേരിലി എല്ലാര്‌മ് ഒന്റുത്തെ
11അദ്‌ണാലെ ഒരു കാലാത്തിലി ണിമ്മ സാമി സൊല്ലുപഡി ണഡാക്കാദെ പെ്ളേത്തിര്‌ന്ത എഗുദാര് അല്ലാത്ത ജാദിഗായിര്‌ന്തേര് എന്ത് ണെനേത്ത്‌കൊള്ളിരി. എന്ത്‌ക്കെന്റ സുന്നത്ത് സാത്ത്‌റ കളിത്തവാര് സാമി സൊല്ലുപഡി ണഡാക്കാത്ത എഗുദാര് അല്ലാത്ത ജാദിഗളെന്ത്‌മ് സുന്നത്ത് സാത്ത്‌റ കളിക്കവാര് സാമി സൊല്ലുപഡി ണഡാക്കവാരെന്ത്‌മ് ഇസ്‌റേല്‌ക്കാറാര് ണെനേത്തിര്‌ന്താര്. 12അദേപാസെ ണിമ്മ സാമി സൊല്ലുപഡി ണഡാക്കാദെ പെ്ളേത്തിര്‌ന്ത കാലാത്തിലി ണിമ്മ് പെ്ളേപ്പിലി ക്‌റ്‌സ്‌ത്ത് ഇര്‌ക്കാലെ. അദ്‌ണാലെ സാമി പ്‌ള്ളെ എങ്ക മദ്‌പ്പിര്‌ക്ക ഇസ്‌റേല്‌ക്കാറാരോഡെ എ്ണേയ മുഡ്യാദെ അന്ന്യ ജാദിഗ ആയിര്‌ന്തേര്. അയ്യി ഗള്യേലി സാമി ഇസ്‌റേല്‌ക്കാറാരോഡെ ബെത്ത ഒപ്പ്‌കെ്ട്ട്‌ണാമ് സാമി കൊഡുത്ത ബാക്ക്‌ണാമ് ണിമ്മ ണമ്പാലെ. സാമിക്ക്‌മ് ണിമാക്ക്‌മ് ഉറാവില്ലാദേമ് ഇര്‌ന്ത്‌ദ്. 13ആന സാമി സൊല്ലുപഡി പെ്ളേക്കാദിര്‌ന്ത കാലാത്തിലി സെയ്‌ദ പാവഗണ തീക്ക്യ ഏസു ക്‌റ്‌സ്‌ത്ത് സൂസിന സോരേലി ഏസോഡെ എ്ണേന്ത് സാമ്യോഡെ ഉറാവു ബെത്ത് ണഡാക്ക്യ ഉള്ള ബാഗ്യ ണിമാക്ക് കെ്ഡേത്ത്‌ദ്.
14-15അദ് എച്ചെന്ത് സൊന്ന സാമി ഇസ്‌റേല്‌ക്കാറാര്‌ക്ക് കൊഡുത്ത സട്ടഗാക്ക്‌മ് കല്‌പനെഗാക്ക്‌മ് ണിമ്മ കെ്ട്ട്‌പട്ട് ണഡാക്കാത്താദ്‌ണാലെ ണിമാക്ക് ഇന്നാരമാട്ട്‌ക്ക്‌മ് സാമ്യോഡെ ഉറാവു ബെത്ത് ണഡാക്ക്യ മുഡ്യാദെ ണിമ്മാമ് സാമിമ് ആങ്കീങ്ക് പഗെ ഇര്‌ന്തേര്. അച്ചെ ഗോഡേന പാസെ തഡെയായിര്‌ന്ത ഈ പഗേന ഏസു ക്‌റ്‌സ്‌ത്ത് മന്‌സാനായി ബന്ത് സത്താദ്‌ണാലെ ഇല്ലാദാറ്റ്. അദ്‌ണാലെ ഏസു ക്‌റ്‌സ്‌ത്തോഡെ എ്ണേന്ത് പുദ്യ മന്‌സാനായി സാമ്യോഡേമ് ഇസ്‌റേല്‌ക്കാറാരോഡേമ് റാജി കൂഡ്യ ബാഗ്യ ണിമാക്ക് കെ്ഡേത്ത്‌ദ്. 16അച്ചെ സാമി സട്ടാക്ക് കെ്ട്ട്‌പട്ട് ണഡാക്ക ജാദിഗ സാമി സട്ടാക്ക് കെ്ട്ട്‌പട്ട് ണഡാക്കാത്ത അന്ന്യ ജാദിഗ എന്ത് പ്‌റ്‌ത്ത് ബെത്തിര്‌ന്ത മന്‌സാ് ബങ്കേസാക്ക് ഇര്‌ന്ത പഗേന, ഏസു കുരുസിലി സത്താദ്‌ണാലെ ഇല്ലാദെ ആക്കി സാമി പ്‌ള്ളെഗ എങ്ക പുദ്യ ഒരു മന്‌സാ് ജാദിന ആക്കിനാ്. 17ഇച്ചെ സാമ്യാലെ ണിമ്മദ്യോഡെ പെ്ളേക്ക ഈ പുദ്യ മന്‌സാര് ബങ്കേസാക്ക് എ്ണേന്ത ണല്ല സേദിന ക്‌റ്‌സ്‌ത്ത് കുരുസിലി സത്താദ്‌ണാലെ ണമാക്ക് സൊന്നാ്. സാമി പ്‌ള്ളെഗ എന്ത് സൊല്ലുറവാര്‌ക്ക്‌മ് സാമി പ്‌ള്ളെഗ അല്ല എന്ത് സൊല്ലുറ അന്ന്യ ജാദിഗാക്ക്‌മ് സൊല്ലുറ ഒരേ ഒരു സേദിത്തെ ഇദ്. 18അദ് എച്ചെന്ത സാമി പ്‌ള്ളെഗ, സാമി പ്‌ള്ളെഗ അല്ലാത്തവാര് എന്ത് സൊല്ലുറ അന്ന്യ ജാദിഗാമ് എന്ത് റണ്ടായി പ്‌റ്‌ന്തിര്‌ന്ത ണമ്മൊട്ടുക്ക് അയ്യി സേദിന ണമ്പ്‌റാദ്‌ണാലെ ഒരേ സാമിണിഗാലിലി അപ്പാനായിര്‌ക്ക സാമ്യോഡെ എ്ണേയ ണമാക്ക് ബാഗ്യ കെ്ഡേത്ത്‌ദ്.
19അദ്‌ണാലെ അയ്യി ണല്ല സേദിന ണമ്പി പെ്ളേക്ക ണിമ്മൊട്ടുക്ക് ഇപ്പ് അന്ന്യ ജാദിഗ അല്ല. അദ്‌ക്ക് ബഡ്ഡി സാമിക്ക് ബേ്ണ്ടി പ്‌റ്‌ത്ത് ബെത്തിര്‌ക്ക ജാദിക്ക് പട്ട സാമിദ് സൊന്ത പ്‌ള്ളെഗാത്തെ. 20എച്ചെന്ത് സൊന്ന, ഒരു കൂരേന ഒറേപ്പാക്കി ണില്ല്‌സ്‌റ മൂലെ കല്ല്‌ണ പാസെത്തെ ക്‌റ്‌സ്‌ത്ത് ഏസു. അയ്യി കൂരെ പട്ടിലി ബേസ്‌മട്ടണ പാസെത്തെ സാമിദാസ്‌ഗാമ് അപ്പൊസലല ആയിര്‌ക്ക എമ്മാമ്. 21-22അച്ചെ സാമി, സാമിണിഗാലിലി തങ്ക്യ, സാമി തനാക്ക് ബേ്ണ്ടി കെ്ട്ടികൊണ്ടിര്‌ക്ക കൂരെ എന്ത് സൊല്ലുറ കോയാല്‌ക്ക് ണിമാണാമ് എമാണാമ് അവാര്‌ദൊപ്പ എജേത്ത് അദ്‌ക്ക് തക്കിന ദിന്‌സിലി കൂരെ ഉണ്ടാക്കി കൊണ്ടിര്‌ക്കാ്.
Currently Selected:
എപ്പെസോസ്‌ക്കാറാര് 2: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
