1 തെസ്‌ലോനിക്ക്യക്കാറാര് 4
4
സാമിക്ക് പ്‌ഡിത്തപഡി പെ്ളേക്കുഡൊ
1ഏസുക്കാറാരെ, കഡേസ്യായി ണാന് ഒന്റുഗൂഡി സൊല്ലുറെ. സാമിന പിര്യപഡ്‌സ്‌റ ദിന്‌സിലി ണിമ്മ എച്ചെ പെ്ളേക്കുഡൊ എങ്കാദ്‌ണ എമ്മോഡിര്‌ന്ത് ണിമ്മ പഡിത്തെ്ഡ്‌ത്തിര്‌ക്കേര്. അദേപാസെത്തെ ണിമ്മ പെ്ളേക്കേര്. ആന ഇന്നിമ് സേത്തി സേത്തി സാമിക്ക് മെച്ച്‌പ്‌ഡിക്ക ദിന്‌സിലി ണിമ്മ പെ്ളേക്കുഡൊ എന്ത് ആണ്ടവാനാന ഏസുദ് അദിഗാരത്തിലി എമ്മ ണിമാക്ക് ബുദ്ദി സൊല്ലികൊണ്ട് ബേ്ണ്ടികൊള്ളുറേര്. 2ആണ്ടവനാന ഏസുദ് അദിഗാരത്തിലി എമ്മ ണിമാക്ക് ബെത്ത കല്‌പനെഗ എന്തായെന്റ് ണിമാക്ക് തെര്യുമല്ല.
3സാമിക്ക് പ്‌ഡിത്ത കാര്യ എങ്കാദൊ, ണിമ്മ സുത്താപ്പോഡെ പെ്ളേക്കാദ്‌ത്തെ. ണിമ്മ കാമാക്ക് അഡിപട്ട് കണ്ടപഡിക്ക് ണഡാക്കാദ്‌ണ തള്ള്യെക്കി. 4-5സാമിന തെര്യാത്ത എഗുദാര് അല്ലാത്ത ജാദിഗാത്തെ കാമാക്ക് അഡിപട്ട് കണ്ടപഡിക്ക് പെ്ളേക്കാദ്. ആന ണിമ്മ അയ്യി ദിന്‌സിലി പെ്ളേക്ക്യ പാങ്കില്ലെ. ണിമ്മ ഒരൊരു ആള്‌ഗാമ് മാനമര്യാദ്യോഡേമ് സുത്താപ്പോഡേമ് പെ്ളേത്ത് അവാനവാന സൂസാരിത്ത് ബെക്കാദ് എച്ചെന്ത് പഡിത്തിര്‌ക്കുഡൊ. 6ഈ കാര്യാത്തിലി ഏസുക്കാറാര് ആയിര്‌ക്ക ണിമ്മ് കൂട്ടാത്തിലി ആര്‌ക്ക്‌മ് കെ്ട്ട കാര്യഗാളൊ ഏമാത്ത്‌റ കാര്യഗാളൊ ണിമ്മ സെയ്യാദി. ഇദ്‌ക്കെല്ല പളി എ്ഡ്‌ക്കവാ് ആണ്ടവാ്ത്തെ എന്ത് എമ്മ ണിമാക്ക് ണേരാത്ത്യെ സൊല്ലിര്‌ക്കേര്. 7സാമി ണമാണ ഒളേത്തിര്‌ക്കാദ് കേ്ഡ്‌ഗെ്ട്ട് പെ്ളേക്ക്യാല്ല, സുത്താപ്പുള്ളവാരായി പെ്ളേക്ക്യാത്തെ. 8അദ്‌ണാലെ ഈ സൊല്ലി തന്ത കാര്യഗണെല്ല ബെലെ ബെക്കാത്തവാ് മന്‌സാനെ അല്ല തന്ന്‌ദ് ണിഗാല്‌ണ തന്ത സാമിനാത്തെ ബെലെ ബെക്കാത്താദ്.
9ഏസുണ ണമ്പിര്‌ക്ക ണിമ്മ ആങ്കീങ്ക് സീവാ് ബ്‌ട്ട് ണഡാക്കുഡൊ എങ്കാദ്‌ണ പറ്റി ആര്‌മ് ണിമാക്ക് എ്ള്‌ദി തര്യ തേവില്ലെ. ണിമ്മ ആങ്കീങ്ക് സീവാ് ബ്‌ട്ട് ണഡാക്ക്യ സാമി താനെ ണിമാക്ക് പഡിസിര്‌ക്കാ്. 10അദ്‌താനെമല്ല ഇപ്പ്‌മ് മക്കദോനിലിര്‌ക്ക ഏസുക്കാറാരോഡെ ണിമ്മ സീവാ് ബ്‌ട്ട് കൊണ്ടിര്‌ക്കേര്. ആന ഏസുക്കാറാരെ, ണിമ്മ ഇന്നിമ് സേത്തി സേത്തി സീവാ് ബ്‌ട്ട് ണഡാക്കുഡൊ എന്ത് ണാന് ണിമാണ ബേ്ണ്ടികൊള്ളുറെ.
11എമ്മ ണിമാക്ക് സൊല്ലി തന്ത പാസെ അഡ്‌ത്തവാര്‌ണ ണിമ്മ തൊന്തറെ പഡ്‌സാദേമ്, അഡ്‌ത്തവാര്‌ദ് കാര്യാക്ക് തലെ ഇക്കാദേമ് ഇര്‌ക്കുഡൊ. അദ്‌താനെമല്ല, അവാനവാ് കയ്യാലെ പാഡ്‌പട്ട് തിങ്കാദ്‌മ് ആയിര്‌ക്കുഡൊ ണിമ്മ്‌ദ് മ്‌ഗ്‌ന്ത ആസെ. 12അച്ചെ ണിമ്മ പെ്ളേക്കാട്ടി ഏസുണ ണമ്പാത്തവാര് ണിമാണ മദ്‌സിമ് ണഡാക്കുവാര്, ണിമാക്ക് ബേ്ഡുമാന കാര്യഗാക്ക് ബേ്ണ്ടി ണിമ്മ അഡ്‌ത്തവാര്‌ണ കയ്യിരാക്ക ഗെദിമ് ബരമാട്ട.
ആണ്ടവാന്‌ദ് ബരാവു
13ഏസുക്കാറാരെ, സത്തവാര്‌ണ പറ്റി ണെഞ്ചഡെ ഇല്ലാത്തവാര്‌ത്തെ അവാര്‌ണ ണെനേത്ത് സങ്കഡപഡ്‌റാദ്. ആന ണമ്മ അവാര്‌ണ പിന്നേമ് കാണില എങ്ക ണെഞ്ചഡെ ബെത്തിര്‌ക്കാമ്. അദ്‌ണാലെ സത്തവാര്‌ണ പറ്റി ണിമ്മ സങ്കഡപഡാദിര്‌ക്ക്യ ബേ്ണ്ടി അവാര്‌ണ പറ്റി ണിമ്മ തെരിന്തിര്‌ക്കുഡൊ എന്ത് എമ്മ ആസെപഡ്‌റേര്. 14എന്ത്‌ക്കെന്റ് സൊന്ന ഏസു സാഗാമ് സെയ്‌ദാ് ഉജുറേ്ഗാമ് സെയ്‌ദാ് എന്ത് ണമ്മ ണമ്പ്‌റാമ്. അച്ചെ സാമി സത്ത് പോനവാര്‌ണാമ് ഏസുണ ബെത്ത് ഉജുറേ്ത്തി ഏസു തിലിമ്പി ബര്‌ഗാട്ടി അവാന്‌ദൊപ്പ ബര്‌സുവാ് എന്ത് ണെഞ്ചഡെ ബെത്തിര്‌ക്കാമ്.
15ഏസുണ ണമ്പി സത്തവാര്‌ത്തെ ആണ്ടവാ് ബര ണാള്‌ക്ക് ഉജുറോഡെ ഇര്‌ക്ക ണമാക്ക് മുദ അവാന്‌ദ് പട്ട്‌ക്ക് പോവാര് എന്ത് ആണ്ടവാ് പഡിസിന കാര്യഗണ ബെത്ത് എമ്മ ഇപ്പ് ണിമാക്ക് സൊല്ലുറേര്. 16ആണ്ടവാ് അമ്‌സത്തോഡെ സൊല്ലുറ കല്‌പനോഡേമ്, മുക്ക്യമാന ദൂദാ് ബ്‌ഡ്‌റ ജദ്ദത്തോഡേമ്, സാമിദ് കൊമ്പൂത്തോഡേമ് മേലോഗാത്തിലിര്‌ന്ത് ഇ്റാങ്കി ബരുവാ്. അക്കുളെ ക്‌റ്‌സ്‌ത്ത്‌ണ ണമ്പി സത്തവാര്‌ഗ മുദ ഉജുറേ്ഗാമ് സെയ്‌വാര്. 17പ്‌റ ഉജുറോഡെ ഇര്‌ക്ക ണമ്മ ആണ്ടവാന ബാനാത്തിലി കാണ്യ ഉജുറെ്ന്തവാര്‌ദൊപ്പ ബാന മഞ്ച്‌മേലെ പോയില. ഇച്ചെ ണമ്മ ആണ്ടവാന്‌ദ് ഒപ്പ എപ്പേക്ക്‌മ് ഇര്‌ക്കില. 18അദ്‌ണാലെ ണിമ്മ ഈ സൊല്ലുസുലാക്കണ സൊല്ലികൊണ്ട് ആങ്കീങ്ക് ദയ്യിരപഡ്‌സി കൊള്ളിരി.
Currently Selected:
1 തെസ്‌ലോനിക്ക്യക്കാറാര് 4: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
