1 തെസ്‌ലോനിക്ക്യക്കാറാര് 2
2
പവുലോസ് തെസ്‌ലോനിക്ക്യേലി സെയ്‌ദ ബേലെഗ
1അദ്‌ണാലെ ഏസുക്കാറാരെ, എമ്മ ണിമ്മ് പട്ട്‌ക്ക് ബന്താദ് ബെ്റ്‌ദെ ആഗാലെ എന്ത് ണിമാക്ക് തെര്യുമല്ല. 2എമ്മ ണിമ്മ് പട്ട്‌ക്ക് സാമി ബേലെ സെയ്യ ബരാത്ത മുദ പിലിപ്പ്യ പട്ടണാത്തിലി സെയ്‌ദ ബേലെഗണാമ് എമ്മ പട്ട കജട്ടഗണാമ് എമ്മ ണാണഗെ്ട്ടാദ്‌ഗണാമ് പറ്റി ണിമ്മ കേ്ട്ടിര്‌ക്കേരല്ല. അയ്യി കജട്ടഗളിലി എമ്മ സോറ്റു പോഗാദിര്‌ക്ക്യ സാമി ബില തന്താദ്‌ണാലെ എമ്മ ണിമ്മ് പട്ടണാത്തിലി ബന്ത് അയ്യി സാമിന പറ്റി സൊല്ലുറ ണല്ല സേദിന ണിമാക്ക് സൊല്ല്യ എമാക്ക് ദയ്യിര കെ്ഡേത്ത്‌ദ്. 3അദ്‌ണാലെ എമ്മ ണിമാക്ക് സൊന്ന സേദി തപ്പാന കാര്യഗൊ, കെ്ട്ടെ്ണ്ണത്തോഡേഗൊ, സദിക്ക്യ ബേ്ണ്ട്യുള്ള ണായഗൊ അല്ല. 4എന്ത്‌ക്കെന്റ് സൊന്ന, എമാണ ണല്ല സേദിന സൊല്ലുറവാര് ആക്ക്യ ബേ്ണ്ടി സാമി ണമ്പ്യമുഡിരവാര് എന്ത് കണ്ട് എമാണ എ്ഡ്‌ത്ത് ബെത്തിര്‌ക്കാ്. അദ്‌ണാലെ എമ്മ മന്‌സാര്‌ണ പിര്യപഡ്‌സ്യാല്ല, എമ്മ് മനേസ്സ്‌ണ സോദണെ സെയ്‌ര സാമിന പിര്യപഡ്‌സ്യാത്തെ എമ്മ ണല്ല സേദിന സൊല്ലുറാദ്. 5എമ്മ ണിമ്മ് പട്ടിലിര്‌ക്കാട്ടി ണിമാണ മയാക്ക്യ ബേ്ണ്ടി പിര്യപഡ്‌സ്‌റ ണായഗൊ, പണാക്ക് ബേ്ണ്ടി ഏമാത്ത്‌റ ണായഗൊ ണിമാക്ക് സൊല്ലാലെ എന്ത് ണിമാക്ക് താനെ തെര്യുമല്ല. അദ് സാമിക്ക് ണേര് എന്ത് തെര്യു.
6-7അദ്‌താനെമല്ല, എമ്മ ക്‌റ്‌സ്‌ത്ത്‌ക്ക് അപ്പൊസലല ആയിര്‌ന്ത്‌മ് ണിമ്മ എമാണ മദിക്കുഡൊ എന്ത് ആസെപഡാലെ. ണിമ്മോഡിര്‌ന്തൊ ബേ്റെ ആള്‌ഗോഡിര്‌ന്തൊ എമ്മ പേര്‌പെര്‌മെ കെ്ഡേസ്യ ബേ്ണ്ടി ണോഡാലെ. അച്ചെ ഇര്‌ന്ത് ഗൂഡി എമ്മ ണിമ്മ് പട്ടിലിര്‌ക്കാട്ടി അവ്വാസി തന്ന് പ്‌ള്ളെഗണ ണോഡുറ പാസെത്തെ എമ്മ ണിമാണ പേര്‌ഗെ്ളേത്തിര്‌ന്താദ്. 8ണിമ്മ എമാക്ക് മെച്ച്‌പ്‌ഡിത്തവാര് ആയിര്‌ന്താദ്‌ണാലെ സാമിന പറ്റ്യുള്ള ണല്ല സേദിന ണിമാക്ക് സൊല്ല്യ താനേമല്ല ണിമാക്ക് ബേ്ണ്ടി എമ്മ്‌ദ് ഉജുറുണ കൊഡുക്ക്യ ബീസാക്ക് എമ്മ ണിമ്മോഡെ സീവാ് ബ്‌ട്ടിര്‌ന്തേര്. 9ഏസുക്കാറാരെ, എമ്മ പട്ട പാഡ്‌ഗണാമ് എമ്മ പട്ട ബുദ്ദിമുട്ടുഗണാമ് ണിമ്മ ണെനേക്കേരല്ല. ണിമാണ ആര്‌ണാമ് ബുദ്ദിമുട്ടുസാദിര്‌ക്ക്യ ബേ്ണ്ടി എമ്മ ഇ്റ്‌ട്ട്‌പഗാല് ബേലെ സെയ്‌ദ് കൊണ്ട്‌ത്തെ സാമിദ് ണല്ല സേദിന ണിമാക്ക് സൊന്നാദ്.
10ഏസുണ ണമ്പിര്‌ക്ക ണിമ്മ് പട്ടിലി എമ്മ റമ്പ സുത്താപ്പുള്ളവാരായിമ്, ണേര്‌മെക്കാറാരായിമ്, ഒരു കുറ്റകൊറെ സൊല്ല്യ മുഡ്യാത്തവാരായിമ് പെ്ളേത്തേര് എങ്കാദ്‌ണ പറ്റി സാമിക്ക്‌മ് ണിമാക്ക്‌മ് ണേര് എന്ത് സൊല്ല്യ മുഡ്യു. 11സാമി തന്ന് ണാഡ്‌ക്ക്‌മ് തന്ന് മദ്‌പ്പ്‌ക്ക്‌മ് പങ്ക്‌ക്കാറാര് ആയ ബേ്ണ്ടി ണിമാണ ഒളേത്തിര്‌ക്കാ്. 12അയ്യി സാമിക്ക് തഗ്‌ന്ത ദിന്‌സിലി ണിമ്മ പെ്ളേക്ക്യ ബേ്ണ്ടി ഒരു അപ്പാ് തന്ന് പ്‌ള്ളെഗണ ണോഡുറപാസെ എമ്മ ണിമാക്ക് ബുദ്ദിണായാമ് സൊല്ലി തന്തിര്‌ക്കേര്, ണിമാണ റുജക്കുത്താമ് സെയ്‌ദിര്‌ക്കേര്, ണിമാണ ഒറേപ്പ്‌സാമ് സെയ്‌ദിര്‌ക്കേര് എന്ത് ണിമാക്ക് തെര്യുമല്ല.
13ണിമ്മ എമ്മോഡിര്‌ന്ത് കേ്ട്ട് എ്ഡ്‌ത്ത സാമി സേദിന, മന്‌സാര് സൊന്ന സേദി എന്ത് അല്ല, സെരിക്ക്‌മ് സാമി സൊന്ന സേദ്യായി താനെത്തെ ഏറ്റ്‌കൊണ്ടേര്. അദ്‌ണാലെ സാമിന എമ്മ എപ്പ്‌മ് ഒഗെ ഇക്കികൊണ്ടിര്‌ക്കേര്. അയ്യി സേദിന ണമ്പിര്‌ക്ക ണിമ്മ് പെ്ളേപ്പിലി സാമി കാര്യഗ സെയ്‌ദ് കൊണ്ട്‌മിര്‌ക്കാ്.
14ഏസുക്കാറാരെ, ണിമ്മാമ് എഗുദ ണാഡില്യ ക്‌റ്‌സ്‌ത്ത് ഏസുണ ണമ്പിര്‌ക്ക ഏസുക്കാറാര് കൂട്ടണ പാസെത്തെ. അവാര് തമ്മ്‌ദ് ആള്‌ഗ ആന ഏസുണ ണമ്പാത്ത എഗുദാര് കയ്യിലി കൊഡിമെപട്ടാര്. അദേപാസെത്തെ ണിമ്മാമ് ണിമ്മ്‌ദ് ആള്‌ഗ കയ്യാലെ കൊഡിമെപട്ടേരല്ല. 15എഗുദാര്, ആണ്ടവനാന ഏസുണാമ് തമ്മ്‌ദ് സാമിദാസ്‌ഗണാമ് കൊന്റവാര്‌മ്, എമാണ മുഡിക്കി ബ്‌ട്ടവാര്‌മ്, സാമിന പിര്യപഡ്‌സാത്തവാര്‌മ് എല്ല ആള്‌ഗാക്ക്‌മ് ഏദ്‌ക്കാറാര്‌മ്‌ത്തെ. 16സാമി ദണ്ടിക്ക ദണ്ടണേലിര്‌ന്ത് ദെങ്കി കഡാക്ക്യ ബേ്ണ്ടി എഗുദാര് അല്ലാത്ത ജാദിഗാക്ക് എമ്മ സൊല്ലുറ ണായണ തഡ്‌ക്കവാര്‌ത്തെ അവാര്. അച്ചെ അവാര് സെയ്‌ദ് കൊണ്ടിര്‌ക്ക പാവാക്ക് മേല് പാവ സേത്തികൊണ്ടിര്‌ക്കാര്. ആന സാമിക്ക് അവാരോഡിര്‌ക്ക മൊനെന തീക്ക കഡേസി ണാള് എജ്ജിറ്റ്.
പവുലോസ് പിന്നേമ് തെസ്‌ലോനിക്ക്യേക്ക് പോയ ആസെപഡ്‌റ
17ഏസുക്കാറാരെ, ഒരു ലേസ ണാള് ണമ്മ റണ്ട് കൂട്ടാര്‌മ് ആങ്കീങ്ക് പ്‌റ്‌ന്തിര്‌ന്താല്‌മ് എമ്മ് ണെനേപ്പ് മുച്ചുഡ ണിമാണ പറ്റിത്തെ. അദ്‌ണാലെ ണിമാണ ബന്ത് ണോഡ്യ എമാക്ക് എത്തറാഗൊ അറാക്കെ എ്ഡ്‌ത്ത്‌ദ്. അദ്‌ക്ക് ബേ്ണ്ടി ണിമ്മ് പട്ട്‌ക്ക് ബര്യ എത്തിന്യൊ ജമ്പ് ഓരാഡിനേര്. 18പവുലോസാന ണാന് ണിമാണ ബന്ത് ണോഡ്യ റണ്ട് ജമ്പ് ണെനേത്തെ. ആന സെയിത്ത്യാ് എമാണ ബര്യ ബ്‌ഡാലെ. 19എന്ത്‌ക്കെന്റ് സൊന്ന, ണമ്മ് ആണ്ടവാനാന ഏസു ക്‌റ്‌സ്‌ത്ത് ബര്‌ഗാട്ടി അവാ് മുന്നുക്ക് ണിമാണ അല്ലാദെ ബേ്റെ ആര്‌ണ എമ്മ കാണ്യ ആസെപഡ്‌റാദ്. അയ്യി ണാള് എമാക്ക് ബര പിര്യാമ്, പേര്‌പെര്‌മേക്ക് എമാക്ക് കെ്ഡേക്ക ഗിര്യാഡാമ് ണിമ്മാത്തെ. 20ണേര്‌മായിമ് എമാക്ക് മദ്‌പ്പ്‌മ്, പിര്യാമ് കെ്ഡേക്കാദ് ണിമ്മ് മേലെത്തെ.
Currently Selected:
1 തെസ്‌ലോനിക്ക്യക്കാറാര് 2: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
