1 കൊരിന്ത്യക്കാറാര് 15
15
ഏസു ക്‌റ്‌സ്‌ത്ത് ഉജുറെ്ന്ത്‌റാ്
1ഏസുക്കാറാരെ, ണാന് ണിമാക്കെ സൊന്ന ണല്ല സേദിന പറ്റി ണിമാക്ക് ഇപ്പ് ണെനേവു ബര്‌സ്യ ണാന് ആസെപഡ്‌റെ. ണിമ്മ അയ്യി സേദിന കേ്ട്ട് ഒറേപ്പായി ണമ്പിര്‌ക്കേര്. 2ണാന് ണിമാക്കെ സൊന്ന അയ്യി ണല്ല സേദിന ഒറേപ്പായിമ് ണമ്പ്‌റദാനാക്കി ണിമ്മ ദെങ്കി കഡാക്കുവേര്. അല്ലാദെ പോന ണിമ്മ് ണമ്പിക്കെ ബീ്ണാലായെക്കു.
3ണാന് കേ്ട്ട് എ്ഡ്‌ത്ത് ണിമാക്ക് സൊന്ന മ്‌ഗ്‌ന്ത കാര്യ എന്തായെന്റ് സൊന്ന, സാമി സൊല്ലുസുലാക്കാത്തിലി മുദാഗെ സൊല്ലി ബെത്തിര്‌ക്ക പാസെ ക്‌റ്‌സ്‌ത്ത് ണമ്മ സെയ്‌ര പാവാക്ക് ബേ്ണ്ടി സത്താ്. 4അവാന പൊദേക്കാമ് സെയ്‌ദാര്. സാമി സൊല്ലുസുലാക്കാത്തിലി മുദാഗെ സൊല്ലി ബെത്തിര്‌ക്ക പാസെ അവാ് മൂണാവദ് ണാള് എങ്കാട്ടി ഉജുറെ്ന്താ്. 5പ്‌റ കേപാവുക്ക്‌മ് പന്നന്റ് അപ്പൊസലലാക്ക്‌മ് ബെ്ളിപട്ടാ്. 6അദ്‌ക്ക് പ്‌റ അവാ് തനാണ ണമ്പി ണഡാന്തിര്‌ന്ത അയിന്നൂറ്‌ക്ക്‌മ് മേല് ആള്‌ഗ ഒന്റായിര്‌ക്കാട്ടി അവാര്‌ക്ക് ഒരേ ജമ്പ് എല്ലാര്‌ക്ക്‌മ് ബെ്ളിപട്ടാ് അദിലി എത്തിന്യൊ ആള്‌ഗ ഇപ്പ്‌മ് ഉജുറോഡെ ഇര്‌ക്കാര് ലേസ ആള്‌ഗ സത്താര്. 7അദ്‌ക്ക് പ്‌റ അവാ് ആക്കോവുക്ക്‌മ് പ്‌റ എല്ല അപ്പൊസലലാക്ക്‌മ് ബെ്ളിപട്ടാ്. 8കഡേസിലി അളിത്തെക്കിന പ്‌ള്ളെന പാസെ ഇര്‌ക്ക എനാക്ക്‌മ് ബെ്ളിപട്ടാ്.
9എല്ല അപ്പൊസലലണ ബ്‌ഡ ണാന്‌ത്തെ സിന്നവാ്. സാമിക്ക് പട്ട ഏസുക്കാറാര് കൂട്ടണ കൊഡിമെപഡ്‌സിനാദ്‌ണാലെ എനാണ അപ്പൊസലാ് എന്ത് ഒളേക്ക്യ തഗ്‌ദിമില്ലെ. 10ആന സാമി പ്‌ണ്ണ്യാത്തിലിത്തെ ണാന് അപ്പൊസലാ് ആനാദ്. സാമി എനാക്ക് സെയ്‌ദ പ്‌ണ്ണ്യ ഉവഗാര ഇല്ലാത്താദ് ആഗാലെ. ബേ്റെ അപ്പൊസലലണ ബ്‌ഡ ണാന് മ്‌ഗ്‌ന്ത പാഡ്‌പട്ടിര്‌ക്കെ. ണാന് ഒരുത്താ് താനെ എന്താറ്റൊന്റ് സെയ്‌ദെനെന്ത് അല്ല, സാമി പ്‌ണ്ണ്യാത്തിലിത്തെ ണാന് ഇദെല്ല സെയ്‌ദാദ്. 11അദ്‌ണാലെ ണാനാഡൊ അവാരാഡൊ എമ്മ എല്ലാര്‌മ് ഒരേ കാര്യഗണാത്തെ ണിമാക്ക് സൊല്ലി തന്താദ്. അദേ കാര്യണാത്തെ ണിമ്മാമ് ണമ്പ്‌റാദ്.
സാവുലിര്‌ന്ത് ഉജുറെ്ന്ത്‌റാദ്
12ക്‌റ്‌സ്‌ത്ത് സത്തവാര് പട്ടിലിര്‌ന്ത് ഉജുറെ്ന്താ് എന്ത് എമ്മ സൊല്ലി ണഡാക്കേര്, ആന സത്തവാര് ഉജുറെ്ന്ത്‌റാദില്ലെ എന്ത് ണിമ്മ് കൂട്ടാത്തിലി ലേസ ആള്‌ഗ സൊല്ലുറാദ് എച്ചെ? 13സത്തവാര് ഉജുറെ്റാദില്ലെ എന്ത് സൊല്ലുറദാനാക്കി ക്‌റ്‌സ്‌ത്ത്‌മ് ഉജുറേ്ഗാലെ എന്തല്ല. 14ക്‌റ്‌സ്‌ത്ത് ഉജുറേ്ഗാദെ ഇര്‌ന്തിര്‌ന്ത എമ്മ സൊല്ലുറ ണായാമ് ബെ്റ്‌ദെത്തെ, ണിമ്മ ക്‌റ്‌സ്‌ത്ത്‌ണ ണമ്പ്‌റാദ്‌മ് ബെ്റ്‌ദെത്തെ. 15സത്തവാര് ഉജുറെ്ന്ത്‌റാദില്ലെ എങ്കാദാനാക്കി ക്‌റ്‌സ്‌ത്ത്‌ണ സാമി ഉജുറേ്ത്തിനാ് എന്ത് എമ്മ സൊല്ലുറാദ് ഉറുട്ട്‌ത്തെ. അച്ചെ സാമി സെയ്യാത്ത കാര്യണ സെയ്‌ദാ് എന്ത് സൊല്ലുറാദ്‌ണാലെ എമ്മ സാമി മുന്തുക്ക് കുറ്റക്കാറാര്‌ത്തെ. ആന ണിമ്മ സൊല്ലുറാദ് സെര്യല്ല. 16സത്തവാര് ഉജുറേ്ഗാദെ പോന ക്‌റ്‌സ്‌ത്ത്‌മ് ഉജുറേ്ഗാലെ. 17ക്‌റ്‌സ്‌ത്ത് ഉജുറേ്ഗാദെ ഇര്‌ന്തിര്‌ന്ത ണിമ്മ ണമ്പ്‌റ ണമ്പിക്കേമ് ബെ്റ്‌ദെത്തെ, ണിമ്മ ഇപ്പ്‌മ് ണിമ്മ്‌ദ് പാവാക്ക് പൊറിമെ കെ്ഡേക്കാത്തവാരായിത്തെ ഇര്‌ക്കേര്. 18അച്ചാനാക്കി ക്‌റ്‌സ്‌ത്ത്‌ണ ണമ്പി പെ്ളേത്ത് സത്തവാര്‌മ് ഇല്ലാദായെക്കിനാര്. 19ണമ്മ ഈ ബൂമില്യ പെ്ളേപ്പ്‌ക്ക് ബേ്ണ്ടിത്തെ ക്‌റ്‌സ്‌ത്ത്‌ണ ണെഞ്ചഡെ ബെത്തിര്‌ക്കദാനാക്കി ക്‌റ്‌സ്‌ത്ത്‌ണ ണമ്പാത്തവാര്‌ണ ബ്‌ഡ ണമ്മ എത്തറാഗൊ അറങ്കെ്ട്ടവാര്‌ത്തെ.
20ആന സത്തവാര് ഉജുറെ്ന്തുവാര് എന്ത് ഒറേപ്പ് കൊഡുത്ത്‌കൊണ്ട് ക്‌റ്‌സ്‌ത്ത് സത്തവാര് പട്ടിലിര്‌ന്ത് മുമ്പാനായി ഉജുറെ്ന്താ്. 21മന്‌സാനാലെത്തെ സാവു ബന്താദ്. അദ്‌ണാലെ സത്തവാര് ഉജുറെ്ന്ത്‌റാദ്‌മ് മന്‌സാനാലെത്തെ. 22ആദാമ് കാല്‌ക്ക് പട്ട ണമാക്ക് ആദാമ് മേലെ സാവു ബന്ത്‌ദ്. അദേപാസെ ക്‌റ്‌സ്‌ത്ത്‌ക്ക് എ്ണേന്തിര്‌ക്ക ണമ്മ എല്ലാര്‌മ് സാവിലിര്‌ന്ത് ഉജുറെ്ന്ത്‌റവാര് ആയില. 23ആന എല്ലാര്‌മ് ഒരേ ഗള്യേലി അല്ല ഉജുറെ്ന്ത്‌റാദ്, മുദ ക്‌റ്‌സ്‌ത്ത്‌ത്തമ്പ, പ്‌റ അവാ് ബര്‌ഗാട്ടി അവാന്‌ക്കുള്ളവാര് ഉജുറെ്ന്തുവാര്. 24പ്‌റ ഉലഗ കഡേസി ണാള്. അയ്യി ണാളിലി സാമ്യോഡെ പോട്ടി പ്‌ഡിത്തിര്‌ക്ക മാഗെ ലോഗാത്തില്യ എല്ല അദിഗാരഗണാമ് ഈ ഉലഗാത്തില്യ അദിഗാരിഗണാമ് സക്‌ദിഗണാമ് ക്‌റ്‌സ്‌ത്ത് തോല്‌സി താന് ആള്‌റ ണാഡ്‌ണ അപ്പനാന സാമിദ് കയ്യിക്ക് ഒപ്പഡിത്ത് കൊഡുക്കുവാ്. 25എല്ല പോട്ടിക്കാറാര്‌ണാമ് തോല്‌സി തന്ന് കാല്‌ക്കഡി ആക്കമാട്ട്‌ക്ക് ക്‌റ്‌സ്‌ത്ത് റാജാവായി ആളുഡൊ അല്ല. 26കഡേസി പോട്ടിക്കാറാ് എങ്കാദ് സാവുത്തെ. അദ്‌ണ അവാ് ഇല്ലാദെ ആക്കുവാ്. 27എന്ത്‌ക്കെന്റ <<എല്ലാദ്‌ണാമ് അവാന്‌ദ് കാല്‌ക്കഡി ആക്കി ബെത്തിര്‌ക്കെ>>#സാമി പാട്ട് ബുക്ക് 8:6 എന്ത് സാമി സൊല്ലുസുലാക്കാത്തിലി എ്ള്‌ദിര്‌ക്ക്‌ദല്ല. <<എല്ലാദ്‌ണാമ്>> എന്ത് സൊല്ലിര്‌ക്കാദിലി എല്ലാദ്‌ണാമ് ക്‌റ്‌സ്‌ത്ത്‌ദ് കാല്‌ക്കഡി ആക്കി കൊഡുത്ത സാമി അദ്‌ക്ക് പഡ്‌റാദില്ലെ എന്ത് സൊക്കാന കാട്ടി തര്‌ദ്. 28ആന എല്ലാദ്‌ണാമ് അവാന്‌ദ് കാല്‌ക്കഡി ആക്കിന പ്‌റ സാമി എല്ലാദ്‌ക്ക്‌മ് ബെല്ല്യവാ് ആയിര്‌ക്ക്യ ബേ്ണ്ടി മഗാ് താന്‌മ് എല്ലാദ്‌ണാമ് തന്ന് കാല്‌ക്കഡി ആക്കി കൊഡുത്ത സാമിക്ക് കെ്ട്ട്‌പട്ട് ഇര്‌ക്കുവാ്.
29സത്തവാര് ഉജുറേ്റാദ് ഇല്ലെങ്കദാനാക്കി പിന്നെ സത്തവാര്‌ക്ക് ബേ്ണ്ടി തണ്ണിക്കെ മുളുഗ്‌റവാര് എന്ത സെയ്‌വാര്? സത്തവാര് ഉജുറേ്റാദ് ഇല്ലെങ്കദാനാക്കി പിന്നെ എന്ത്‌ക്ക് അവാര്‌ക്ക് ബേ്ണ്ടി തണ്ണിക്കെ മുളുഗ്‌റാദ്. 30ഈ സേദിക്ക് ബേ്ണ്ടി എമ്മാമ് എപ്പ്‌മ് ഉജുറുക്ക് അഞ്ച്‌റാദ് എന്ത്‌ക്ക്? 31ഏസുക്കാറാരെ, ണമ്മ്‌ദ് ആണ്ടവാ് ഏസു ക്‌റ്‌സ്‌ത്തോഡെ ഒന്റായിര്‌ക്ക ണിമാണ പെര്‌മെപഡ്‌റ എനാക്ക് ണാള്‌ക്ക്‌മ് ഉജുറുക്ക് അവങ്കേ്ഡ് ബര്‌ദ് എന്ത് എനാക്ക് കണ്ടിപ്പായിമ് സൊല്ല്യ മുഡ്യു. 32ണാന് എപ്പെസോസിലി ബെത്ത് ബേ്ണ്ട്‌ഗളോഡെ ജുദ്ദ സെയ്‌ര പാസെ അത്തറ പാഡ്‌പട്ടാദ് എന്ന് സൊന്ത കാര്യാക്ക് ആയിര്‌ന്താക്കി അദ്‌ണാലെ എനാക്ക് എന്ത ഉവഗാര കെ്ഡേക്ക്‌ദ്. സത്തവാര് ഉജുറേ്ഗാദെ പോന
<<തിന്നിരി കുഡിരി
ണാളെ സായിലാമല്ല>>#എസയ്യാ് 22:13
എന്ത് മുന്തുക്കേത്തവാര് സൊല്ലുറ പാസെ പെ്ളേക്കില. 33ണിമാണ ഏമാത്ത്യ ആര്‌ണാമ് ബ്‌ഡാദി. <<കെ്ട്ടവാര്‌ക്കെ എജേരാദ് ണല്ലവാര്‌ണ കെ്ഡ്‌സ്‌ദ്.>> 34ണിമ്മ പാവ സെയ്‌രാദ്‌ണ തള്ളി ണല്ല ബോദ ഇര്‌ക്കവാരായി ഇരിരി. ണിമ്മ് കൂട്ടാത്തിലി ലേസ ആള്‌ഗാക്ക് സാമിന പറ്റി ഒരു സുക്ക്‌മ് തെര്യ. ണാന് ണിമാണ ണാണഗെ്ഡ്‌സ്യാത്തെ ഇച്ചെ സൊല്ലുറാദ്.
ഉജുറെ്ന്ത്‌റ സരിഗല
35ആന <<സത്തവാര് എച്ചെ ഉജുറെ്ന്തുവാര്>> എന്ത്‌മ് <<അവാര്‌ദ് സരിഗല എച്ച്‌ള ദിന്‌സ് ഇര്‌ക്കു>> എന്ത്‌മ് ഒരു ബേ്ള്യെ ആരാറ്റ് കേ്ക്കുവാര്. 36ബുദ്ദിഗെ്ട്ടവാനെ, ണാട്ടിന ബെദെ ഊത്തി ഒഡെഗാദിര്‌ന്താക്കി അദ് മറ്‌ദേമ് കൊഡിത്ത് ബളാരമാട്ട, 37ണീ ബെദേന ണാട്ട്‌ഗാട്ടി അദ് ഉണ്ടായ പോര സരിഗലണ അല്ല ണഡ്‌ക്കാദ്. ഗോദിമ്പെ ബെദെനാഗൊ ഇല്ലെ ബേ്റെ എദാറ്റൊന്തു ബെദെനാഗോത്തെ ണഡ്‌ക്കെ. 38ആന സാമി തനാക്ക് പ്‌ഡിത്ത പാസെ അദ്‌ക്ക് ഒരു സരിഗലണാമ് അദാദ് ബെദേക്ക് അദാദ് സരിഗലണാമ് കൊഡുക്കാ്. 39എല്ല ഉജുറുകെ്ളെഗാക്ക്‌മ് ഒരേ ദിന്‌സ് സരിഗല അല്ല. മന്‌സാന്‌ദ് സരിഗല ഒരു ദിന്‌സ് ആയിര്‌ന്ത ബേ്ണ്ട്‌ഗാദ് ബേ്റെ ഒരു ദിന്‌സ്, പക്കിഗാദ് സരിഗല ബേ്റെ ഒരു ദിന്‌സായിര്‌ന്ത മീന്‌ഗാദ് സരിഗല ബേ്റെ ഒരു ദിന്‌സ്. 40മേലോഗ സരിഗലാമ് ബൂലോഗ സരിഗലഗാമ് ഇര്‌ക്ക്‌ദ്, മേലോഗ സരിഗലഗാക്ക് ഇര്‌ക്ക മദ്‌പ്പ് ബേ്റെ, ബൂലോഗ സരിഗലഗാക്ക് ഇര്‌ക്ക മദ്‌പ്പ് ബേ്റെ. 41ണേരാക്ക് ഇര്‌ക്ക അളാഗ് ബേ്റെ ദിന്‌സ്, ണിലാവുക്ക് ഇര്‌ക്ക അളാഗ് ബേ്റെ ദിന്‌സ്, ബെ്ള്ളിഗാക്ക് ഇര്‌ക്ക അളാഗ് ബേ്റെ ദിന്‌സ്, ബെ്ള്ളിഗാക്ക് ബെ്ള്ളിഗാക്ക് താനെ പല ദിന്‌സ് അളാഗ് ഇര്‌ക്ക്‌ദ്.
42അദ്‌ണാലെ സത്തവാര് ഉജുറെ്ന്ത്‌റാദ്‌മ് ഇദേപാസെത്തെ ആയിര്‌ക്കു. അളിന്തെക്ക്‌റ സരിഗലണ മണ്ണ്‌ക്ക് പൊദേക്കാമ്, അദ് അളിവില്ലാത്ത സരിഗല ആയി ഉജുറെ്ന്ത്‌ദ്. 43പൊദേക്കാട്ടി മോസ ആയിര്‌ക്കാദ്‌മ് ണാറിമ് തള്ള്‌റാദ്‌ണാത്തെ പൊദേക്കാമ്. ആന അദ് ഉജുറെ്ന്ത്‌ഗാട്ടി മദ്‌പ്പോഡേമ് സക്‌ദി ഓഡേമ്‌ത്തെ ഉജുറേ്ദ്. 44പൊദേക്കാട്ടി ഈ ഉലഗാത്തില്യ സരിഗലണാത്തെ പൊദേക്കാമ്, ആന അദ് ഉജുറെ്ന്ത്‌ഗാട്ടി സാമിണിഗാല് തര സരിഗല ആയി ഉജുറേ്ദ്. ഈ ഉലഗാത്തിലിര്‌ക്ക സരിഗലാമ് ഇര്‌ക്ക്‌ദ് സാമിണിഗാല് തര സരിഗലാമ് ഇര്‌ക്ക്‌ദ്.
45<<മുദാത്തില്യ മന്‌സാനാന ആദാമ് ഉജുറുപ്‌റാണി ഉള്ളവാനായി തീന്താ്>>#ഉറുപത്തി 2:7 എന്ത് ബേദ ബുക്കിലി എ്ള്‌ദിര്‌ക്ക്‌ദല്ല. ആന കഡേസില്യ ആദാമ് ഉജുറുണ കൊഡുക്കവാ് ആനാ്. 46മുദ കെ്ഡേത്ത സരിഗല ഈ ഉലഗാക്ക് പട്ടാദ്‌ത്തെ. ആന പ്‌റാത്തെ സാമിണിഗാല് തര സരിഗല കെ്ഡേക്കാദ്. 47മുദാത്തില്യ മന്‌സാ് ആദാമ് മണ്ണിലിര്‌ന്ത് ഉണ്ടായി ബന്തവാ്ത്തെ, ആന റണ്ടാവദ് മന്‌സാ് മേലോഗാത്തിലിര്‌ന്ത് ബന്താ്. 48ഈ ഉലഗാക്ക് പട്ടവാര് മണ്ണിലി ഉണ്ടായി ബന്ത മന്‌സാന പാസേമ് മേലോഗാത്തില്യവാര് മേലോഗാത്തിലിര്‌ന്ത് ബന്തവാന പാസേമ് ഇര്‌ക്കാര്. 49ണമ്മ മണ്ണിലി ഉണ്ടാനവാന്‌ദ് ഉരുവ എ്ഡ്‌ത്ത പാസെ മേലോഗാത്തിലിര്‌ന്ത് ബന്തവാന്‌ദ് ഉരുവാമ് എ്ഡ്‌ക്കില.
50ഏസുക്കാറാരെ, കറിസദേലിമ് സോരെലീമ് ഉണ്ടാക്കിര്‌ക്ക ഈ സരിഗലാക്ക് സാമി ആള്യ പോര ണാഡിലി പങ്ക് കെ്ഡേക്കമാട്ട. അളിവില്ലാത്ത പെ്ളേപ്പ്‌ണ സൊന്ത ആക്ക്യ ഈ അളിന്ത് പോര സരിഗലാക്ക് മുഡ്യമാട്ട എന്ത് ണാന് ണിമാക്കെ സൊല്ലുറെ. 51കേ്ളിരി, ണാന് ണിമാക്കെ മറേന്തിര്‌ക്ക ഒരു സത്ത്യണ സൊല്ലുറെ, ണമ്മ എല്ലാര്‌മ് സാഗമാട്ടില. ആന ണമ്മ എല്ലാര്‌ക്ക്‌മ് ഇര്‌ന്തമായാത്തിലി ഉരുവു മാറില, 52കഡേസിലി കൊമ്പൂദ്‌റ ജദ്ദ കേ്ക്കാട്ടി ഇര്‌ന്തമായാത്തിലി അദ് ണഡാക്കു. സത്തവാര് അളിവില്ലാത്തവാരായി ഉജുറെ്ന്തുവാര്, ണമ്മ ഉരുവുമ് മാറില. 53അദ്‌ണാലെ ഈ അളിന്തെക്ക്‌റ സരിഗല അളിവില്ലാത്ത ഉരുവു എ്ഡ്‌ക്കുഡൊ, ഈ സത്ത് പോര സരിഗല സാഗാദെ ഇര്‌ക്ക ഉരുവു എ്ഡ്‌ക്കുഡൊ 54ഈ അളിവുള്ള സരിഗല അളിവില്ലാത്താദ്‌മ് സത്ത് പോര ഈ സരിഗല സാഗാത്താദ്‌മ് ആയി തീര്‌ഗാട്ടി <<സാവു ഇല്ലാദായി ഗെലിസി കഡാന്തിര്‌ക്കാമ്>>#എസയ്യാ് 25:8 എന്ത് സാമി സൊല്ലുസുലാക്കാത്തിലി എ്ള്‌ദിര്‌ക്കാദ് ണഡാന്ത് മുഡ്യു.
55<<ഓ, സാവെ, ണീ ഏദിലി ഗെലിസിനെ?
ഓ, സാവെ ബിജ എ്ഡ്‌സ്‌റ ണിന്ന് മുള്ളു ഏദിലി?>>#ജോസയ്യാ് 13:14
56പാവ സെയ്‌രാദ്‌ണാലെത്തെ ണമാക്ക് സാവു ബരാദ്. മോസെ ബെത്ത സാമി സട്ട ഇര്‌ക്കാദ്‌ണാലെത്തെ പാവ എന്തായെന്റ് ണമാക്ക് തെരിരാദ്. 57ആന ആണ്ടവാ് ഏസു ക്‌റ്‌സ്‌ത്താലെ ണമാണ ഗെലിസി കഡാക്ക്യ ബെക്ക സാമിക്ക് ണാന് ണണ്ണി സൊല്ലുറെ.
58അദ്‌ണാലെ ഏസുക്കാറാരെ, എനാക്ക് മെച്ച്‌പ്‌ഡിത്ത ണിമ്മ ണമ്പിക്കേലി ഒറേപ്പുള്ളവാരായി അല്‌ങ്കാദെ ഇരിരി. ആണ്ടവാന്‌ക്ക് ബേ്ണ്ടി പാഡ്‌പഡ്‌റാദ് ബെ്റ്‌ദെ അല്ല എന്ത് തെരിന്ത് ആണ്ടവാന്‌ദ് ബേലെന സേത്തി സേത്തി സെയ്‌രവാരായിരി.
Currently Selected:
1 കൊരിന്ത്യക്കാറാര് 15: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
