1 കൊരിന്ത്യക്കാറാര് 14
14
സാമിക്ക് സൊല്ല്യുള്ള കാര്യണ സൊല്ലുറ ബരാമ് ബേ്റെബേ്റെ ണായാത്തിലി പേസ്യുള്ള ബരാമ്
1അദ്‌ണാലെ സീവാ് ഇര്‌ക്കവാര് ആയിര്‌ക്ക്യ മനേസ്സ് ബെത്ത് ണഡായിരി. സാമിണിഗാല് ബരഗാക്ക് ബേ്ണ്ടിമ് മുക്ക്യമായിമ് സാമിക്ക് സൊല്ല്യ ഇര്‌ക്ക കാര്യഗണ സൊല്ലുറ ബരാക്ക് ബേ്ണ്ടിമ് ണിമ്മ റമ്പ ആസെപഡിരി. 2ണെപ്പ്‌കെ്ഡേക്കാത്ത ണായാത്തിലി ണായ പേസ്‌റവാ് മന്‌സാരോഡെ അല്ല സാമ്യോഡെത്തെ ണായ പേസ്‌റാ്. ആര്‌ക്ക്‌മ് അദ് ണെപ്പ്‌കെ്ഡേക്കാദ്‌മില്ലെ. ആനാല്‌മ് അവാ് സാമിണിഗാല് സക്‌ദിലി മറേന്തിര്‌ക്ക സത്ത്യഗണ സൊല്ലുറാ്. 3സാമിക്ക് സൊല്ല്യ ഇര്‌ക്ക കാര്യഗണ സൊല്ലുറവാ് മന്‌സാര്‌ക്ക്‌ത്തെ സൊല്ലുറാദ്. ഏസുക്കാറാര്‌ക്ക് സാമ്യോഡെ ഇര്‌ക്ക ഉറാവുണ ഒറേപ്പാക്ക്യാമ് ദയ്യിരപഡ്‌സ്യാമ് പിരാക്ക്യ ബേ്ണ്ടിമ് അവാര് ണായ പേസ്‌റാര്. 4ണെപ്പ്‌കെ്ഡേക്കാത്ത ണായാത്തിലി ണായ പേസ്‌റവാ് തനാക്ക് സാമ്യോഡെ ഇര്‌ക്ക ബക്‌ദിന സേത്തി സേത്തി ആക്ക്‌റാ്. ആന സാമിക്ക് സൊല്ല്യ ഇര്‌ക്ക കാര്യഗണ സൊല്ലുറവാ് ഏസുക്കാറാര് കൂട്ടാക്ക് ഒട്ടുക്ക് സാമ്യോഡെ ഇര്‌ക്ക ഉറാവുണ റമ്പ ദാസ്‌ത്തി ആക്ക്‌റാ്. 5ണിമ്മ എല്ലാര്‌മ് ണെപ്പ്‌കെ്ഡേക്കാത്ത ണായാത്തിലി ണായ പേസുഡൊ എന്ത്‌മ് ണാന് ആസെപഡ്‌റെ. മുക്ക്യമായിമ് സാമിക്ക് സൊല്ല്യ ഇര്‌ക്ക കാര്യഗണ സൊല്ലുഡൊ എന്ത്‌മ് ണാന് ആസെപഡ്‌റെ. ണെപ്പ്‌കെ്ഡേക്കാത്ത ണായാത്തിലി ണായ പേസ്‌റവാ് ഏസുക്കാറാര് കൂട്ടാക്ക് സാമ്യോഡെ ഇര്‌ക്ക ബക്‌ദിന റമ്പ ആക്ക്യ ബേ്ണ്ടി താന് സൊല്ലുറ ണായാദ് അര്‌ത്തണ പുരുപ്പാക്കി കൊഡുക്കുഡൊ. പുരുപ്പാക്കി കൊഡുക്കാദെ പോന സാമി സൊല്ലുറാദ്‌ണ ണേരെ കേ്ട്ട് സൊല്ലുറാദ്‌ത്തെ ഏസുക്കാറാര് കൂട്ടണ ബിലപഡ്‌സ്യ ഉവഗാരാവു.
6ഏസുക്കാറാരെ, ണാന് ണിമ്മ് പട്ട്‌ക്കെ ബര്‌ഗാട്ടി സാമി കാട്ടി തന്ത കാര്യണാഗൊ, അറുവുമ് ബുദ്ദിമ് ഉള്ള കാര്യണാഗൊ, സാമി ണേരെ സൊന്ന കാര്യണാഗൊ, പഡ്‌സ്‌റ കാര്യണാഗൊ സൊല്ലാദെ ണെപ്പ്‌കെ്ഡേക്കാത്ത ണായാത്തിലി ണായ പേസികൊണ്ട് ണാന് ണിമ്മ് പട്ട്‌ക്ക് ബന്താക്കി ണിമാക്ക് എന്ത ഉവഗാര? 7ഉജുറില്ലാത്ത ജാദിഗളാന ത്‌റ്‌ളിമ് ബീ്ണേമ് പ്‌ഡിക്കാട്ടി പ്‌ഡിക്ക ജദ്ദ ഇന്നന്നാദ് എന്ത് കാട്ടാദെ പോന എന്ത ജദ്ദ ബര്‌സിനാദ് എന്ത് എച്ചെ ണെപ്പ്‌കെ്ഡേക്കു? 8പഡെയാളിഗണ ജുദ്ദാക്ക് ഒരിക്ക്യ ബേ്ണ്ടി കൊമ്പൂദുഗാട്ടി ണെപ്പ്‌കെ്ഡേക്കാത്ത ദിന്‌സിലി കൊമ്പൂദാദെ പോന പഡെയാളിഗ എച്ചെ ജുദ്ദാക്ക് ഒരുങ്കുവാര്? 9അദേപാസെ ണിമ്മാമ് ബായിലി ണെപ്പ്‌കെ്ഡേക്കാത്ത ണായഗ പേസിനാക്കി സൊല്ലുറ കാര്യ എന്തായെന്റ് എച്ചെ തെര്യു? അദ് ണിമ്മ കാറ്റോഡെ ണായ പേസ്‌റ പാസെ ആയിര്‌ക്കു. 10ഉലഗാത്തിലി എത്തിന്യൊ ണായഗ ഇര്‌ക്ക്‌ദ്. അദ്‌ഗ ഒന്റുമ് ണെപ്പ്‌കെ്ഡേക്കാത്താദല്ല. 11എനാക്ക് തെര്യാത്ത ണായാത്തിലി ഒരുത്താ് പേസ്‌റാദ് എനാക്ക് ണെപ്പ്‌കെ്ഡേക്കാദെ പോന അവാ് എനാക്ക് ബെ്ള്‌ജൂരു ആയിര്‌ക്കുവാ്. ണാന്‌മ് അയാള്‌ക്ക് ബെ്ള്‌ജൂരു ആയിര്‌ക്കുവെ. 12അച്ചെ സാമി ബരഗാക്ക് ബേ്ണ്ടി മ്‌ഗ്‌ന്ത ആസെപഡ്‌റ ണിമ്മ അദ്‌ണ ബെത്ത് ഏസുക്കാറാര്‌ക്ക് സാമ്യോഡെ ഇര്‌ക്ക ബക്‌ദിന റമ്പ ആക്ക്യ ബേ്ണ്ടി ഓരാഡിരി.
13അദ്‌ണാലെ ണെപ്പ്‌കെ്ഡേക്കാത്ത ണായ പേസ്‌റവാ് അദ്‌ദ് പൊറുള്‌ണ പുരുപ്പാക്ക്യുള്ള ബരാക്ക് ബേ്ണ്ടി പരേസുഡൊ. 14ണാന് ണെപ്പ്‌കെ്ഡേക്കാത്ത ണായാത്തിലി പരേസിനാക്കി എന്ന്‌ദ് ണിഗാല്‌കുട്ടിത്തെ പരേസ്‌ദ്, ആന അദ് എന്ന് ബുദ്ദിലി അല്ല പരേസ്‌റാദ്. 15അദ്‌ണാലെ ണാന് എന്ത സൊല്ല്യ? ണാന് എന്ന് ണിഗാല് കുട്ട്യാലേമ് പരേസുവെ, എന്ന് ബുദ്ദിലിമ് പരേസുവെ. ണാന് എന്ന് ണിഗാല് കുട്ട്യാലേമ് പാഡുവെ, എന്ന് ബുദ്ദിലിമ് പാഡുവെ. 16ണീ ണിന്ന് ണിഗാല് കുട്ട്യാലെ ഒഗെ ഇക്ക്‌ഗാട്ടി സാമിണിഗാല് ബര കെ്ഡേസാത്തവാ് ണിന്ന് ഒഗേക്ക് എച്ചെ ആമെ സൊല്ലുവാ്? 17ണീ ഒരു ബേ്ള്യെ സാമിക്ക് ണലമായി ഒഗെ ഇക്കി പരേസുവെങ്കൊ. ആന ഇനി ഒരുത്താന്‌ക്ക് അദ് ണെപ്പ്‌കെ്ഡേക്കാത്താദ്‌ണാലെ അവാന്‌ദ് ബക്‌ദി ദാസ്‌ത്തി ആയ ഉവഗാരപഡ്‌റാദില്ലെ.
18ണിമ്മ എല്ലാര്‌ണ ബ്‌ഡ ണെപ്പ്‌കെ്ഡേക്കാത്ത ണായ ണാന്‌ത്തെ അദിഗാമ് സൊല്ലുറെ. അദ്‌ണാലെ ണാന് സാമിക്ക് ഒഗെ ഇക്ക്‌റെ. 19ആന ഏസുക്കാറാര് കൂട്ടാത്തിലി ണെപ്പ്‌കെ്ഡേക്കാത്ത ണായാത്തിലി പത്തായിരാക്ക് മേല് ണായ പേസ്‌റാദ്‌ണ ബ്‌ഡ അവാര്‌ണ പഡിസ്യ ബേ്ണ്ടി ബുദ്ദ്യാലെ അഞ്ച് ബാക്ക് സൊല്ല്യ ണാന് ആസെപഡ്‌റെ.
20ഏസുക്കാറാരെ, ണിമ്മ മക്ക ബുദ്ദിന തള്ള്യെക്കി, തപ്പ് സെയ്‌ര കാര്യാത്തിലി ണിമ്മ അറ്യാത്ത പ്‌ള്ളെഗണ പാസെ ആയിരി. ബെല്ല്യവാര് ണെനേക്ക പാസെ ണിമ്മ ഈ കാര്യണ പറ്റി ണെനേത്ത് ണഡായി.
21<<ണെപ്പ്‌കെ്ഡേക്കാത്ത ണായാത്തിഗാമ്
ബെ്ള്‌ജൂരുഗ ബായിലിമ്
ണാന് എന്ന് ആള്‌ഗോഡെ ണായ പേസുവെ.
എന്താല്‌മ് അവാര് എന്ന് ണായണ കാദ്‌ക്ക് ഇക്കമാട്ടാര് എന്ത് ആണ്ടവാ് സൊല്ലുറാ്>>#എസയ്യാ് 28:11,12
എന്ത് മോസെ ബെത്ത സാമി സട്ടാത്തിലി സൊല്ലിര്‌ക്ക്‌ദല്ല.
22അദ്‌ണാലെ ണെപ്പ്‌കെ്ഡേക്കാത്ത ണായഗ അഡ്യാള ആയിര്‌ക്കാദ് ഏസുക്കാറാര്‌ക്കല്ല, ഏസുക്കാറാര് അല്ലാത്തവാര്‌ക്ക്‌ത്തെ. ആന സാമി ണായണ ണേരെ കേ്ട്ട് സൊല്ലുറാദ് അഡ്യാള ആയിര്‌ക്കാദ് ഏസുക്കാറാര് കൂട്ടാക്ക്‌ത്തെ. 23ഏസുക്കാറാര് കൂട്ട ഒട്ടുക്ക് ഒന്റായി കൂഡി എല്ലാര്‌മ് ണെപ്പ്‌കെ്ഡേക്കാത്ത ണായഗളിലി ണായ പേസിനാക്കി സാമിണിഗാല് ബര കെ്ഡേക്കാത്തവാരൊ ഏസുക്കാറാര് അല്ലാത്തവാരൊ ഉള്ളുക്ക് ബന്താക്കി ണിമാക്ക് പിരാന്ത് പ്‌ഡിത്തിര്‌ക്ക്‌ദ് എന്ത് സൊല്ലമാട്ടാര? 24എല്ലാര്‌മ് സാമിക്ക് സൊല്ല്യ ഇര്‌ക്ക കാര്യഗണ സൊല്ലുറദാനാക്കി ഏസുക്കാറാര് അല്ലാത്തവാരൊ സാമിണിഗാല് ബര കെ്ഡേക്കാത്തവാരൊ ഉള്ളുക്ക് ബന്താക്കി ണിമ്മ എല്ലാര്‌മ് സൊല്ലുറ ണായഗണ കേ്ട്ട് താന് സെയ്‌ദ പാവണ പറ്റി അയാള്‌ക്ക് ണെനേവു ബരു. എല്ല ആള്‌ഗാമ് പേസ്‌റ ണായണാലെ അവാ് കുറ്റക്കാറാ് എന്ത് കാണ്യ മുഡ്യു. 25അവാ് മനേസ്സിലി മറേസി ബെത്തിര്‌ക്ക കാര്യഗ എല്ലാര്‌ക്ക്‌മ് ണെപ്പ്‌കെ്ഡേക്കു. അച്ചെ അവാ് സത്ത്യമായിമ് സാമി ണിമ്മ് പട്ടിലി ഇര്‌ക്കാ് എന്ത് സൊല്ലി സഡാങ്ക ബ്‌ന്ത് സാമിന കുമ്മുഡ്‌വാ്.
ഏസുക്കാറാര് കൂട്ടാത്തില്യ കാര്യഗ എച്ചെ സെയ്‌ഡൊ?
26അദ്‌ണാലെ ഏസുക്കാറാരെ, ണാന് ണിമാക്കെ സൊന്ന കാര്യാദ് അര്‌ത്ത ഇദ്‌ത്തെ. ണിമ്മ ഒന്റായി കൂഡി സാമിന കുമ്മുഡ്‌ഗാട്ടി ണിമ്മ് പട്ടിലി പാഡ്‌റവാര് ഇര്‌ക്കുവാര്, പഡ്‌സ്‌റവാര് ഇര്‌ക്കുവാര്, സാമി കാട്ടി കൊഡുക്ക കാര്യഗണ സൊല്ലുറവാര് ഇര്‌ക്കുവാര്, ണെപ്പ്‌കെ്ഡേക്കാത്ത ണായഗളിലി പേസ്‌റവാര് ഇര്‌ക്കുവാര്. ഇദെല്ല ഏസുക്കാറാര് കൂട്ടാക്ക് സാമ്യോഡിര്‌ക്ക ബക്‌ദിന റമ്പ ആക്ക്യ ഉവഗാരപഡ്‌സുഡൊ. 27ണെപ്പ്‌കെ്ഡേക്കാത്ത ണായഗളിലി പേസിനാക്കി റണ്ട് ആളൊ മീ്റിന മൂണാളൊ പേസിന മദി. അദ്‌മ് സൊല്ലുഗാട്ടി ഒരു ആള് സൊല്ലി തീന്ത പ്‌റ ഇനി ഒരു ആള് സൊല്ലുറ ദിന്‌സിലി സൊല്ലുഡൊ. ആന ഒരുത്താ് അദ്‌ക്ക് അര്‌ത്ത സൊല്ലികൊഡുക്കുഡൊ. 28അര്‌ത്ത സൊല്ല്യ ആള് ഇല്ലാദെ പോന ണെപ്പ്‌കെ്ഡേക്കാത്ത ണായാത്തിലി പേസ്‌റവാ് ഏസുക്കാറാര് കൂട്ടാത്തിലി മ്‌ണ്ടാദെ ഇര്‌ന്ത് തന്നോഡെ താനേമ് സാമ്യോഡെ താനേമ് പേസികൊണ്ടിര്‌ക്കുഡൊ.
29സാമി ണായണ ണേരെ കേ്ട്ട് സൊല്ലുറ സാമിദാസ്‌ഗ റണ്ട് ആളൊ മൂണ് ആളൊ അദ്‌ണ സൊല്ലുഡൊ. അദ്‌ണ കേ്ക്കവാര് അദ് എന്തായെന്റ് സോദണെ സെയ്‌ഡൊ. 30ഏസുക്കാറാര് കൂട്ടാത്തിലി കുക്കാന്തിര്‌ക്ക ഒരു ആള്‌ക്ക് അയ്യി ഗള്യേലി ആണ്ടവാ് എന്താറ്റ കാട്ടി കൊഡുത്തിര്‌ന്താക്കി മുദ സാമി ണായണ ണേരെ കേ്ട്ട് സൊല്ലികൊണ്ടിര്‌ക്കവാ് താന് പേസി കൊണ്ടിര്‌ക്കാദ്‌ണ ണ്‌റ്‌ത്തുഡൊ. 31ണിമ്മ എല്ലാര്‌മ് പഡിക്ക ദിന്‌സിലിമ് ദയ്യിരപഡ്‌റ ദിന്‌സിലിമ് ണിമാക്ക് ഒരൊരു ആളായി സാമിക്ക് സൊല്ല്യ ഇര്‌ക്ക കാര്യഗണ സൊല്ലിലാമല്ല. 32സാമി ണായണ ണേരെ കേ്ട്ട് സൊല്ലുറ സാമിദാസ്‌ലാദ് ണിഗാല്‌ഗ അവാര്‌ദ് കയ്യിക്കഡി ഇര്‌ക്ക്‌ദ്. 33സാമി ഒത്തിമെന ആസെപഡ്‌റ സാമിത്തെ. അല്ലാദെ കക്കറെമൊക്കറെ ആരാദ്‌ണ ആസെപഡ്‌റ സാമ്യല്ല.
34ഏസുക്കാറാര് കൂട്ടാത്തിലി പെ്ണ്ണ്‌മക്ക മ്‌ണ്ടാദെ ഇര്‌ക്കുഡൊ. അദ്‌ത്തെ എല്ല ഏസുക്കാറാര് കൂട്ടാത്തിലിമ് ബെത്തിര്‌ക്ക കാര്യ. മോസെ ബെത്ത സാമി സട്ടാത്തിലി സൊല്ലിര്‌ക്ക പാസെ അവാര് ആളാ്ന്‌ദ് കയ്യിക്കഡിത്തെ ഇര്‌ക്കുഡൊ. അല്ലാദെ അവാര്‌ക്ക് ണായ സൊല്ല്യ അദിഗാര ഇല്ലെ. 35അവാര്‌ക്ക് എന്താറ്റൊരു കാര്യഗണ പറ്റി തെരിഡൊ എന്തിര്‌ന്താക്കി കൂരേലി ബെത്ത് ആളാ്നച്ചലോഡെ കേ്ട്ട് ണെപ്പ്‌കെ്ഡേസുഡൊ. ഏസുക്കാറാര് കൂട്ടാത്തിലി പെ്ണ്ണ്‌മക്കഗ ണായ പേസ്‌റാദ് സെര്യല്ല.
36സാമി സൊല്ലുസുലാക്ക ണിമ്മ് പട്ടിലിര്‌ന്ത്‌ത്തെ ബന്താദ? ഇല്ലെ ണിമാക്ക് താനെത്തെ കെ്ഡേത്താദ? 37ണാന് ഒരു സാമിദാസ് എന്ത്‌മ് സാമിണിഗാല് തര ബര കെ്ഡേത്തവാ് എന്ത്‌മ് ഒരുത്താ് ണെനേക്കദാനാക്കി ണാന് ഈ എ്ള്‌ദ്‌റ കാര്യഗ ആണ്ടവാ് കല്‌പനെ എന്ത് തെരിന്തിര്‌ക്കുഡൊ. 38അയാള് ഇദ് ആണ്ടവാന്‌ദ് കല്‌പനെ എന്ത് തെര്യാദിര്‌ന്താക്കി അയാള്‌ണാമ് ആണ്ടവാ് തെര്യാദെ ഇര്‌ക്കുഡൊ.
39അദ്‌ണാലെ ഏസുക്കാറാരെ, സാമിക്ക് സൊല്ല്യ ഇര്‌ക്ക കാര്യഗണ സൊല്ലുറ ബര കെ്ഡേസ്യ ബേ്ണ്ടി റമ്പ ആസെപഡിരി. ണെപ്പ്‌കെ്ഡേക്കാത്ത ണായഗാത്തി പേസ്‌റാദ്‌ണ തഡ്‌ക്കാമ് ബേ്ഡ. 40ണിമ്മ സാമി കുമ്മുഡ്യ കൂഡി ബര്‌ഗാട്ടി എല്ല കാര്യഗണാമ് പഡിപഡി ആയിമ് ണല്ല ദിന്‌സിലിമ് സെയ്‌ഡൊ.
Currently Selected:
1 കൊരിന്ത്യക്കാറാര് 14: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
