Markus 3
3
Yesus monyamani urakng boponyakit watu ari Sabat
(3:1-6)
(Mat. 12:9-14; Luk. 6:6-11)
1Watu ari Sabat inyo bukai, Yesus mansu' ko dalapm rumah sombayakng. Di santai ado urakng inyo longannyo mati sopia'. 2Boko urakng Farisi kotakan borotian Yesus, honda' moniant aman Sio tajahan monyamani urakng nantai. Monurut sia', nantai tomansu' pokoroja'an inyo culih dilabuhan watu ari Sabat. Jadi, nononyo sia' ulih monyalahan Sio.
3Yesus bopandir ko urakng inyo longannyo mati sopia' nantai, “Mara, bodiritncam ko tongah!” 4Lalu, Yesus bopandir ko sia', “Lapo inyo ulih kito labuhan watu ari Sabat, bulah koboi'an kata'an bulah kojahatan; monyolamant'an urakng kata'an mombunuhnyo?” Apo sia' langunt mo.
5Yesus salu' obai sia' korikng hati. Agatn godi, Sio borotian ko sokolilikng boko urakng di santai. Lalu, kato-Nyo ko urakng inyo longannyo mati sopia'an, “Codakan longan kolai!” Pas urakng nantai monyodakan longannyo, longannyo nyamanam. 6Jadi, boko urakng Farisi koluar, copat bohoupm agatn boko urakng inyo mondukukng Rajo Herodes. Bosamo-samo sia' bohajat pakai' mombunuh Yesus.
Banya' urakng doi' tompat inyo jouh pan datakng ko Yesus
(3:7-12)
7Yesus ongko boko murid-Nyo moninggalan tompat nantai ongko botula' ko danau Galilea. Banya' urakng doi' propinsi Galilea tuyut sia'. Ado jam urakng doi' propinsi Yudea, 8doi' kota Yerusalem, doi' doerah Idumea, doi' sopia' timur sungai Yordan, doi' doerah sokitar kota Tirus ongko Sidon. Somuo sia' datakng ko Yesus obai sia' mondinga' mongona'i somuo inyo udah Sio labuhan. 9Sio monyiuh boko murid-Nyo monyiap'an porohu pakai'-Nyo oca' Sio kinyo disosahan urakng banya' nantai. 10Obai Sio udah banya' am monyamani urakng, lalu somuo urakng boponyakit bosonsongka'an bousaha mohampiki Sio oca' ulih moncama' Sio. 11Sotiap kali boko roh jahat moniant Yesus, sia' lansukng mongorobahan di hadapan-Nyo. Boko roh jahat nantai mondongkakng-mondorah, “Duatam Ana' Allah!” 12Apo Yesus morarakng koras sia' oca' kinyo momadahan sopo Sio.
Yesus momilih koduo bolas rasul-Nyo
(3:13-19)
(Mat. 10:1-4; Luk. 6:12-16)
13Yesus noi' ko pucu' bukit lalu moningkau boko urakng inyo kohonda' Sio. Jadi, sia' datakng ko Sio. 14Sio momilih duo bolas urakng pakai' hala tuyut Sio. Koduo bolas urakng ni'in Sio sobut ‘rasul’. Sio moutus sia' pakai' momboritoan Kabar Boi' 15ongko moonju' kuaso ko sia' pakai' monundukng boko roh jahat. 16Koduo bolas urakng inyo Sio pilih ia'an: Simon (inyo Yesus damo'i Petrus), 17Yakobus (ana' Zebedeus) ongko Yohanes somadikannyo. (Sia' duo somadikan ni'in Yesus mondamo'inyo Boanerges, rotinyo poana'an guntur.) 18Lopasnyo ado Andreas, Filipus, Bartolomeus, Matius, Tomas, Yakobus (ana' Alfeus), Tadeus, Simon (urakng Zelot), 19ongko Yudas Iskariot (inyo nononyo monyorahan Yesus ko boko urakng inyo molawatn-Nyo).
Yesus dituduh momakai kuaso Rajo Sitatn
(3:20-30)
(Mat. 12:22-32; Luk. 11:14-23, 12:10)
20Yesus pulakng ko rumah. Apo banya' urakng datakng agi' bokumpul di santai. Jadi, Yesus ongko boko murid-Nyo co sampat makatn. 21Boko urakng bopandir, “Sio gogilo am!” Pas koluarga-Nyo mondinga' nantai, sia' botula' pakai' momocaki Sio.
22Boko guru agama Yahudi inyo datakng doi' Yerusalem bopandir, “Sio dikuaso'i Rajo Sitatn! Rajo Sitatn inyo moonji'i kuaso ko Sio pakai' monundukng boko roh jahat.”
23Apo Yesus moningkau sia', lalu bopandir ko sia' agatn momakai boboropo poumpamoan. Kato-Nyo, “Co mungkitn rajo sitatn monundukng rajo sitatn inyo bukai! 24Aman sobuah koraja'an topocah dalapm boko kolompok inyo hala bomusuhan, pasti koraja'an nantai tajahan bonaso. 25Huatan aman sobuah koluarga hala bomusuhan ongko topocah-pocah, pasti koluarga nantai tajahan rusa'. 26Ubo nian jam di dalapm koraja'an Sitatn. Aman Sitatn molawatn dirinyo siku', boroti korajaan-nyo tobagi-bagi. Pasti io culih botahatn. Sio tajahan hancur. 27Aman ado urakng honda' momansu'i rumah urakng inyo toning oca' morampas kodampuannyo, pasti io gola' mongobat urakng inyo toning nantai holu'ai. Hoyu' io ulih morampok rumah nantai.#3:27: Yesus bomasud Sionam samo sama'an urakng inyo mongobatan urakng toning nantai. Sio molawatn Rajo Sitatn oca' urakng ulih monjadi anggota koluarga Koraja'an Allah daripado Koraja'an Sitatn.
28Dinga'ancam! Sotiap urakng inyo bodosa damo mohanyam, urakng nantai ulih diamputi. 29Apo urakng inyo mohanyam tohadap Roh Allah, urakng nantai tajahan co kalo diamputi. Dosa nantai bulah urakng bosalah somanah-manahnyo.” 30Yesus bopandir ubo nantai obai sia' mohanyam Sio agatn bopandir obai Sio dikuaso'i roh jahat.
Koluarga Yesus inyo sobondarnyo
(3:31-35)
(Mat. 12:46-50; Luk. 18:19-21)
31Lopas nantai, indai ongko boko somadikan Yesus datakng. Sia' bodiritn di luar, monyiuh urakng pakai' moningkau Sio. 32Timpu nantai, ado banya' urakng dudu' mongoliliki-Nyo. Sia' bopandir ko Sio, “Indai Duatn ongko boko somadikan Duatn ado di luar, honda' botomu Duatn.”
33Apo Yesus bopandir ko sia', “Sopo Indaiku? Sopo boko somadikan-Ku?” 34Yesus moniant boko urakng inyo dudu' mongoliliki-Nyo. Kato-Nyo, “Boko urakng ninam indaiku ongko boko somadikan-Ku! 35Somuo urakng inyo molabuhan lapo inyo dikohonda'i Allah, sia' nanam somadikan lolaki-Ku, somadikan botina'-Ku ongko indaiku.”
Currently Selected:
Markus 3: TBDS
Highlight
Copy
Compare
Share
Want to have your highlights saved across all your devices? Sign up or sign in
