Markus 12
12
Yesus monyamoan boko pomimpitn urakng Yahudi agatn boko potani inyo jahat
(12:1-12)
(Mat. 21:33-46; Luk. 20:9-19)
1Lopasnyo Yesus bopandir ko sia' momakai poumpamoan. KatoNyo, “Ado urakng inyo mombulah kobutn anggur. Io mombulah pagar sokolilikngnyo, mongali lubakng tompat momoyah buah anggur nantai, ongko moninjakan monara jam oca' kobutn nantai dapat dijago'i. Lopasnyo, io monyewaan kobutn nantai ko boko potani, lalu borangkat ko nogori bukai. 2Watu musipmnyo am momotik buah anggur, puku' kobutn nantai monyiuh hulutnnyo ko boko potani ponyewa nantai pakai' monguti' hasil kobutn inyo monjadi bagian io. 3Apo sia' monangkap hulutn nantai, boduda'annyo, lalu monyiuhnyo pulakng kinyo dionji'i la'apo pan.
4Puku' kobutn nantai monyiuh hulutn inyo bukainyo ko sia'. Apo, sia' boduda'an hulutn nantai jam, sampai luko kopala'nyo. Sia' pan momisuh-maki io jam.
5Puku' kobutn nantai monyiuh hulutn inyo bukainyo agi' datakng ko sia'. Apo, sia' mombunuh hulutn nantai. Sama'an nian jam sotorusnyo agatn banya' hulutn agi'. Ado inyo dipantu' sia'. Ado jam inyo dibunuh sia'.
6Apo, puku' kobutn nantai ija' ado siku' urakng agi', ia'an ana'nyo siku' inyo kotakan kokidahnyo. Io bopandir dalapm hatinyo, ‘Pasti am boko potani nantai tajahan morogo'i ana'ku.’ Jadi, koponsuahannyo, io monyiuh ana'nyo ko sia'.
7Apo, boko potani ponyewa nantai bopandir di antaro sosamo sia', ‘Io nantai nononyo inyo monjadi puku' kobutn ni'in aman bopainyo udah mati. Mara am, kito mombunuh io oca' kobutn ni'in monjadi umputn kito!’ 8Jadi, sia' monangkapnyo, mombunuhnyo, lalu mombuakan io ko luar kobutn anggur nantai.”#12:8: Kobutn anggur molambakan umant Allah, huatan puku'nyo memang Allah (Yes. 5:1-7). Boko pomimpitn urakng Yahudi monula' boko nabi samo sama'an boko potani ponyewa monula' boko hulutn inyo diutus ko sia'. (2 Tawarikh 36:14-16). Yesus ia'an ana' puku' kobutn nantai, ia'an Ana' Allah. Jadi, udah jolas Sio mongotohu'i hajat sia' pakai' mombunuh Io.
9 Lopasnyo Yesus botakutn ko sia', “Watu ni'in, la'apo inyo tajahan dilabuhan puku' kobutn nantai? Pasti io tajahan datakng lalu mombonasoan boko potani ponyewa nantai. Lopas nantai io tajahan mompocayoan kobutn anggur nantai ko boko urakng bukai. 10Pasti kaitn kalo mombaco di Buku Suci mongona'i ni'in:
‘Batu inyo ditula' boko tukakng bangunan udah monjadi batu inyo kotakng pontikng pakai' bangunannyo.
11Tuhatn inyo molabuhan nantai!
Pakai' kito, porbuatanNyo nantai nontu bondar.’ ”#12:10-11: Doi' buku Mazmur 118:22-23
12Boko pomimpitn agama udah mongoroti masud doi' poumpamoan Yesus nantai. Poumpamoan nantai monyalahan sia'. Jadi sia' honda' monangkap Sio. Apo watu nantai sia' kinyo ulih obai sia' gola' agatn urakng banya'. Jadi, sia' botula' moninggalan Sio.
Boko pomimpitn urakng Yahudi balakng mouru'an Yesus
(12:13-27)
Potakutan mongona'i pombayaran pajak ko pomorintahan Romawi
(12:13-17)
(Mat. 22:15-22; Luk. 20:20-26)
13Lopas nian, boboropo pomimpitn agama Yahudi doi' kolompok Farisi agatn boko urakng inyo mondukukng Rajo Herodes disiuh botula' ko Yesus. Tujuan sia' pakai' mouru'an Yesus agatn sobuah potakutan. 14Jadi, boko urakng nantai datakng ko Yesus huatan bopandir, “Guru, koi tohu Duatn urakng inyo jujur. Duatn mongajar agatn jujur mongona'i caro hidup sosuai agatn porintah Allah. Duatn kinyo momihak boko urakng totontu. Obai nantai, Duatn kinyo gola' agatn sosopo pan. Monurut Duatn, poraturan Allah dalapm Hukupm Torat moulihan kito mombayar pajak ko Rajo Roma kata'an cado ai? Gola' kito bayar pajak kata'an cado ai?”
15Apo Yesus mongotohu'i sia' inyo pompadah boi'.#12:15: Sia' pakai' kato-kato inyo pompadah boi'. Apo Yesus mongotohu'i sia' honda' mouru'an Sio. Sia' mouru'an Sio sama'an ni'in: Aman Sio bopandir obai mombayar pajak nantai hal inyo boi' nian banya' urakng Yahudi paca'an godi obai sia' kinyo sonang agatn Pomorintahan Romawi. Aman Yesus bopandir obai mombayar pajak nantai hal inyo salah, Sio dapat dihukupm ulih Pomorintahan Romawi obai momborontak. Ongko Sio bopandir ko sia', “Mapo kaitn moncubo monggogadati Aku? Cubo tiat'an ko Aku sopingka'i duit pira'.” 16Ongko, sia' moonju' sopingka'i duit pira' ko Sio.
Yesus botakutn ko sia', “Gambar ongko damo sopo tocetak di si'itn?”
Timbas sia', “Gambar ongko damo Rajo Roma inyo disobut Kaisar.”
17“Amannyo ubo nian,” kato Yesus, “Onju' cam ko Kaisar inyo monjadi umputnnyo. Ongko onju' jam ko Allah inyo monjadi umputn Allah!” Sia' kotakng hiratn mondinga' Yesus monimbasi dinga' nantai.
Potakutan mongona'i bobali' hidup doi' komatian
(12:18-27)
(Mat. 22:23-33; Luk. 20:27-40)
18Lopasnyo, boboropo pomimpitn agama Yahudi inyo bukainyo datakng ko Yesus. Sia' doi' kolompok Saduki inyo kinyo pocayo agatn urakng mati bobali' hidup. Jadi, sia' moncubo mouru'an Yesus agatn potakutan mongona'i nantai. Kato sia', 19“Guru, Musa moajaran poraturan ubo ni'inan: Aman ado lolaki mati, kinyo boana', lalu somadikannyo gola' kawitn agatn iparnyo nantai oca' moonji'i koturutan pakai' somadikannyo inyo udah mati nantai.#12:19: Tiat buku Ulangan 25:5-6 ongko buku Kojadian 38. 20Nah, ado tujuh urakng somadikan. Somadikan inyo kojula'an kawitn agatn siku' botina', apo io mati sobolupm sia' boana'. 21Lalu, somadikannyo inyo koduo mongawiti iparnyo nantai. Apo, io pan mati jam sobolupm boana'. Sama'an nian jam tojadi agatn somadikannyo kotigo. 22Sama'an nian jam sotorusnyo sampai somadikannyo kotujuh. Ahirnyo, lopas somuo somadikan nantai mati, botina' nantai pan mati jam. 23Jadi, sia' tujuh somadikan somuonyo kawitn agatn botina' nantai jam. Nononyo watu urakng bobali' hidup agi' doi' komatian, botina' nantai tajahan monjadi bini inyo mono?”
24Timbas Yesus ko sia', “Kaitn koliru bondar obai kaitn kinyo mongoroti Buku Suci ongko kuaso Allah! 25Watu boko urakng hidup agi', conyiant am hubukan laki bini agi'. Sia' tajahan hidup samo sama'an molekat di sorugo. 26Hal mongona'i boko urakng hidup agi' doi' komatian ado di dalapm Buku Suci inyo ditulis Musa. Watu Allah bopandir agatn Musa doi' dalapm rado momant inyo sama'an api bonyalo, Allah bopandir, ‘Aku ninam Allah inyo disombah Abrahapm, Ishak, ongko Yakub.’#12:26: Doi' buku Koluaran 3:6 27Pasti sia' hidup agi' obai Allah kinyo disombah urakng mati. Allah disombah urakng inyo hidup! Kaitn koliru bondar!”
Potakutan mongona'i porintah Allah inyo kotakng pontikng
(12:28-34)
(Mat. 22:34-40; Luk. 10:25-28)
28Ado guru agama Yahudi inyo mondinga' Yesus botikakng-pahapm agatn boko urakng Saduki nantai. Io tohu obai Yesus moonji'i jawaban inyo bondar ko sia'. Jadi, io datakng ko Yesus huatan botakutn, “Porintah Allah inyo mono inyo kotakng pontikng?”
29Timbas Yesus, “Porintah inyo kotakng pontikng ia'an ni'in: ‘Oi somuo urakng Israel, dinga'ancam! Tuhatn Allah kito siku'mo. 30Bondar-bondar kasihi cam Tuhatn Allah kolai agatn sogonap hati kolai, sogonap jiwa kolai, sogonap pikiran kolai, sogonap kokuatan kolai.’#12:29-30: Doi' buku Ulangan 6:4-5 31Porintah koduo ia'an ni'in, ‘Kasihi cam sosamo kolai samo sama'an kolai mongasihi diri kolai siku'.’#12:31: Doi' buku Imamat 19:18 Conyiant ado porintah bukai inyo lobih pontikng doi' koduo porintah ni'in.”
32Guru agama Yahudi nantai bopandir ko Yesus, “Kotakng bondaram, Guru! Jawaban Duatn kona'! Tuhatn Allah kito siku'mo. Conyiant ado Tuhatn inyo bukai solaitn Sio.#12:32: Doi' buku Ulangan 4:35 33Memang monsio gola' mongasihi Sio agatn sogonap hatinyo, sogonap pikirannyo, sogonap kokuatannyo. Monsio pan gola' mongasihi sosamonyo samo sama'an io mongasihi dirinyo siku'. Koduo porintah nantai lobih pontikng doi' bonatakng posombahan inyo dicucul ongko somuo posombahan inyo bukainyo.”#12:33: Tiat buku Hosea 6:6.
34Yesus moniant obai guru nantai monimbas agatn bijaksana. Jadi, Yesus bopandir ko io, “Kolai kinyo jouh doi' Koraja'an Allah!” Lopas nantai, conyiant urakng inyo borani agi' moncubo mouru'an Sio agatn potakutan.
Yesus, Rajo inyo Dijanjian Allah, kinyo aja' doi' koturutan Rajo Daud, apo lobih bokuaso doi' nantai
(12:35-37)
(Mat. 22:41-46; Luk. 20:41-44)
35Timpu Yesus mongajar di tongahlamanan Rumah Allah, Sio bopandir, “Pikirancam mongona'i Rajo inyo Dijanjian Allah inyo disobut ‘Kristus’. Boko guru agama Yahudi mongatoan obai Kristus ia'an koturutan doi' Rajo Daud. 36Memang bondaram nantai. Apo Roh Allah mombulah Daud monulis pomandiran ni'in:
‘Tuhatn Allah bopandir ko Tuhatnku:
Dudu'cam di tompat inyo tohormat di sopia' kanan-Ku,
sampai Aku mongalahan boko musuh Kolai,
mombulah sia' monjadi samo sama'an kontonja'an kaki Kolai, mombulah sia' tundu' agatn kuaso Kolai.’#12:36: Mazmur 110:1
37Dalapm tulisan nantai, Daud moningkau Kristus sobagai ‘Tuhatn’. Obai nantai, Io bukainyo bayo koturutan Daud aja'.” Apo Io lobih bokuaso doi' nantai.#12:37: Yesus, Rajo inyo Dijanjian Allah, ia'an monsio (koturutan Daud) apo Allah pan (Tuhatn Daud) tiat Roma 1:3-4. Urakng banya' inyo ado di santai sonang mondinga' Yesus mongajar.
Yesus momadahi boko murid-Nyo jangan boporangai sama'an boko guru agama Yahudi
(12:38-40)
(Mat. 23:5-7; Luk. 20:45-47)
38Timpu Yesus mongajar, Sio pan bopandir, “Boboi' cam agatn boko guru agama Yahudi. Sia' gala' bojalatn-jalatn agatn jubah inyo panjakng oca' sia' di tiat pontikng. Sia' gala' dihormati di pasar. 39Di rumah sombayakng huatan di boko pogai, sia' gala' dudu' di tompat inyo kotakng tohormat. 40Sia' monipu boko botina' balu ongko morampas rumah sia'. Sia' moucap'an doa inyo kotakng panjakng, apo nantai bayo pompadah mo. Obai somuo porbuatan sia' inyo jahat nantai, Allah pasti tajahan mohukupm sia' lobih borat!”
Posombahan botina' balu inyo jaro
(12:41-44)
(Luk. 21:1-4)
41Yesus dudu' mohadapi kotak posombahan huatan moniant boko urakng momansu'an duit posombahan ko dalapmnyo. Banya' urakng dampu momansu'an duit inyo bosar nilainyo. 42Lalu, ado jam botina' balu inyo jaro datakng. Io momansu'an duo pingkai' duit pira' inyo kocit nilainyo. 43Yesus moningkau boko murid-Nyo huatan bopandir ko sia', “Dinga'an bo! Sobondarnyo botina' balu inyo jaro ni'in moonji'i lobih doi' somuo urakng bukai inyo momansu'an duit ko dalapm kotak posombahan nantai. 44Obai, somuo sia' moonji'i doi' kolobihan duit inyo ado disia'. Apo botina' balu jaro ni'in moonji'i doi' kokurakan duit inyo ado di io. Io moonji'i doi' somuo inyo ado di io pakai' kopontikannyo.”
Currently Selected:
Markus 12: TBDS
Highlight
Copy
Compare
Share
Want to have your highlights saved across all your devices? Sign up or sign in
