EFESUS 3
3
Ar Paulus akuni Yahudi dek mende ineyabu ekige wene
1Eti paga nen, an Paulus, Ar Kristus Yesus endaga paga, kir akuni Yahudi dek mende kinake paga kede warogo banunggugwa o. 2Ar Allah Iliti pano nen, yabu kir kinake eka dogowak nen yiluk, nayonggo birige yiluk, kinaruk kulkugup arar o. 3Ar Allah nen, Awene erigin yiluk kimago mende, an bugalogo yornirige o. (Wene yi mende an diru bugudak nggaruk togon ogona enda mbalki o. 4#Kol. 1:26-27Kir nen diru endaga talumo, an Ar Kristus awene kimago mende nilu agage ndak-ndak, kir etegerogon ar kinilu arigin o.) 5O pagane ar agimago wene eti, ir akuni ugunar yoralokdek, yogondak Roh Allah nen, ir ap Rasul mende inom, nabi mende inom, ir inoba tugunogo yoneragage o. 6Kimago wene eti ebe yi o: alep Ar Allah nen ir Yahudi mende inake birige mende, Wene Pano Wene paga, ir akuni Yahudi dek mende inoba kidu-kidu erogo birige o. Ir akuni Yahudi dek mende etoma, obogar edo omanggi mende paga ar kunggigemo o. Tuguluk Ar Allah nen ir akuni Yahudi mende wokeragin o, yiluk wene warogo birige mende eti, ar Kristus Yesus paga tu kir obogar wokeragin o.
7Ar Allah nen we onggo dek mende woknirige eti, Wene Pano wene yorar nega dogowak nen yiluk wornirige eti arar o. Yabu eti Ar Allah obarne noba birige mo, wene ebe nakla dogi taga o. 8Ir akuni Ar Allah akburi obogar etoma pano mende o, ogwe an yi ap nebe mondok maduk mende arar o. Ogwe Ar Allah nen wene onggo dek noba birige eti, Ar Allah eyabu akuni ir Yahudi dek mende, ir inake wene Pano Wene dek ari tagodek mende eti yorawak nen yiluk, nayonggo birige o. 9Nen ir akuni an paga nen, Ar Allah ebe waltenak mende, o yoma kenamer ekige werek awene kimago welagage mende eti, inilu agwi erugun o. 10Ar Allah akla ebekige mende eti jemaat paga tu, ir ap ye edo nde edo mbogor paga ogona yoma werek mende, Ar Allah akla nggagalek mende eti inilu aruwak nen yiluk ekige o. 11Ar Allah nen erik nen yiluk, kwalogo birige aitok mondokma, eka dogolir Ar Kristus Yesus Tuhan nir ninewe dogolir erir taga o. 12Kristus oba panggologo ebebar andalok, Ar ninom ambi ar arumo, Ar Allah oba ninobade dek ar, Ar oba unggwi lagup mende o. 13Eta ma, an nen nggino yokera taga o. An kir kinake erogo banggama yagan waka paga, kiniliti pirik dogogup o. Eta obogar, kir pano dogobagik nen yiluk, etarir taga o.
Kristus nen iliti kunik erninakige wene
14Eta paga nen, Nombae Uwagam nendop yungguli taga o. 15Ar nen mban ar, ir keluarga mbogor taga mende inom, nen ir agar taga mende inom, inobabur inadik denek mende arar wogoragin o. 16An tamban eka dogolir, Ar Allah endaga mbogor nen Ar Roh Kudus paga nggweru kiniliti kode ekinabuwak o yiluk, yorir taga o. 17Ar Kristus oba ebabar andalok oba panggol kugu paga, Ar Kristus ebe ninilitimo dogolir, iliti kunik nen kinedo yagago menogo binagawak o. 18Kir Ar Allah akburi obogar, Ar Kristus iliti akuni kinakba karige mende anggup ogona paga nen kogona edoma kudi, tuguluk alebuak ogona kudi nen akom kogona kudi etoma obogar kir kinilu aruwak o. 19Ir Akuni o agar taga nen endago paga, odo kirogo niniluk arurak dekma, kir Kristus iliti kunik ekinakige paga, kir nen Ar Allah obabur pano kinilu arubagik nen yiluk, kir kinake Ar Allah yorir taga o.
20Ar Allah obarne ambik nilitimo yabu eka dogolir, nir nen nggino yogekdek mende, Ar Allah nen nggok togo ekdinanigin o. 21Kristus Yesus paga, jemaat obok nen, yogondak yabongga Ar Allah ar nggogor dugwi dogowak o. Ar Allah endaga nggok wogok bugwi dogowak o amin.
Currently Selected:
EFESUS 3: WLW
Highlight
Copy
Compare
Share
Want to have your highlights saved across all your devices? Sign up or sign in
