RASUL-RASUL EKUGWA WENE 27
27
Ar Paulus o Roma lagage wene
1Nir woknirek o Italia laurak yirugwama, Paulus inom, akuni kede warek mende amberak inom, ap Kaisar mende tentara inewe “Resimen Kaisar” endaga Yulius eti nen, nir non mbalogo wogorek lowak o, iluk oba birugwa. 2Nir kapal ambi o Adramitium nen wagagemo, eti paga dagarugu o. To eti akuni o Asia to lakma nggwe etoma, ya wukdagik erir laga kakik, nir eti paga dutek arar lagagu. Ap Aristarkhus o Makedonia mende, ai Tesalonika nen wagagerekmo ninom lagagu. 3Noge ambi yiluk kubenengge, nen o Sidon tolakma etoma wura lagagu. O eta ari lagagurik, ar ap Yulius nen Paulus imbirak pano korok ar etatuk, ar Paulus kogari nen, ye mende nde mende kar wadok mende amberak wokiruak nen bikda lan o, yiluk kede pigalogo wuldirige. 4O wiya konabi nggok mende pulka waga agagemo, nir i aik paga, o Siprus nggwe lambok-lambok lagagu. 5Eta nen laut paga podaliluk lagu dogolir, o Kilikia inom, Pamfilia inom, lak kigik o Mira akuni Likia mende werekma etoma labi lagagu. 6Eta ari lagagurik nen, ap tentara inewe, nir woknerek mende ernogo, to ambi o Aleksanderia nen Italia lagaluk waganem kwakige o. Kwakbega lagagerek, nir obogar to eti akla malninakige.
7Ibar lugun talek, o hari mbere ambi negen ar ekwi ninagik, o miyo kunik ar eki nanggige, i tarin nen ninabeken taguk mbaguk erir, o Knidus etoma panggo yi lagagu. O wiya mondok ambik eka agagemo, nir o Kreta aik paga nen, o Salmone agubak abo nggebelogo, wiya dekma etoma arar ari lagagu. 8Nen maduk kigigar, pulau agubak eti nggebelogo lagagu-lagagu, o Lasea eti eragalu korok ar, tolakma ambi endaga Pano Tolakma yirtagama etoma arar labi lagagu o.
9Nen nir nogo, ibar lugun talek wanggerir nugwi ninagik, o Hari Raya Pendamaian,#27:9: Hari Raya Pendamaian: Hari Raya yi eku lagugwa eti, bulan September irep paga nen bulan Oktober edoma paga eta arar ma, o eta paga eti o elokte maduk mondok arar ma, akuni to kapal paga laurak mende nggedalogo baurak negen etaga lagage. akuni Yahudi mende erir tagama arar nggebek togo lagagemo o. O wene dek pano lamo negen, o telek dek agagemo, tuan lau dida yirigemo; Paulus nen kurumbi yoraga dogolir, 10“Wadigi nakburi, nir yogondak lagunem elam marogo binanigin kigi o. Nir ninabeken tagik tagok erninaka, ye mende nde mende wolok wago yoma aknggan waganggwi, ninebe inom elam marogo binanigin ar aga o,” yiluk yoragage. 11Ogwe, ap tentara inewe enogo nen, ir ap to wakwa mende yi, ir nen ndak erugun nggodek yiluk andega lagagerek, ar Paulus wene yirige enogo eragalu enda birige o. 12Nen o to kapal labir tagama etoma, o elokte eta togi dagi warir taga paga, to labek dogorak eti mondok maduk arar o. Nen o Feniks eti to kapal labir tagama o Kreta paga elokte molinggi wura lektagama, i laut aik paga nggwe wolok o. Ma ir ap to kapal wolok lektaga mende yuknegen kwak nen andugu dogolir, nir o pelabuhan Feniks panoma etoma ibar-ibar lalok, etoma ninagik o togi kenam arigin eti dek ari lowak nen o, yiluk andarugwa o.
To i tebelkige wene
13Ebekbiluk, luok nen yiluk ekumen, wiya o selatan nggwe nen min turu wagagemo, ir ap to kapal wolok lektaga mende inakla nen, yogo nir obok pano lektagwi yiluk inakla andalok, to kol kede yidili taga mende sauh eti, weralogo ilikbiluk, pulau Kreta eti dagalogo arar lagagu o. 14Ogwe dogolukdek ar, o wiya kakde endaga wiya Timur Laut eti, ado paga nggwe nen nombalogo yeger ka waga dogolir, 15nir ninaro kapal enogo pulabek ka wagage o. Eti eka paga nen, to kapal enogo wiya pu dengga waga kigik, laurak mondok ndak dek ar agagemo, nir etaga mban ar ninil kowak o, yiluk ninobatenen ar dambe karugumo, to kapal enogo wiya nen yadek padek erir, woknirek odo kirek lagage o. 16Nen we ninagap bugudagar endak tagage eti, nir woknirek o pulau bugudak ambi endaga Kauda eti abora, abel Selatan nggwe woknirek binani lagage paga arar o. Etoma ari lagagurik nen perak, mondok dibirek ma negen kigik ogwe, toral sekoci eti ndilarugu o. 17Toral sekoci yemenogo obogar nandodogo, to kapal akla ilik biluk, nen to kapal ebe obakte kede akber togo makwi ekugu o. Nenaluk yambu pade erogo, o Sirtis todimo wulbinanu nogo yiluk ekugu. Eku lagagurik, to wiya mbalkwa layar eti, arar mbigalogo biluk, wiya nen woknirek nggoma binani ligin yiluk, nir ninobatenen arar dambe karugu o. 18Kubenengge o wiya mondok pudengga padengga erigin nanggige, ye mende nde mende to akla yagadek wolok wagagu mende, amberak to anggin dek erogo yiluk, ima arar mboti mbati erogo wurakugu o. 19Tuguluk kubenengge, ir to waritaga mende nen, ye mende nde mende, to kapal akla etoma welagage mende, ininggi paga kabedogo ima mboti mbati arar wurakugwa ar o. 20O yige ndagalke, mo akbinak kigikdek, dadi akbinak kigikdek, wiya waka mondok ar puk agagemo, ninakla paga nen, yogo nir niniluk laurak kwak ndak dek arar aga o, yiluk eberkugu.
21Etegerogo erninabir waga paga, erom ninggikdek mondok lagunem, ar Paulus akuni inakla nen menatuk, ane yoraga dogolir, “Wadigi nakburi, o Kreta nen il ambi ya doguwok yorkeragi mende, kinaruk kulkikdek wagop paga, tungganengge mbo ima lagakwi, ninebe ninabeken ndamuk pamuk erninabir taga yoma, erurak dek mende arar o! 22Ogwe, yogondak an nggino nggano togo yokerak o, nengger tarugun yiluk kiniliti pirik parik erugup o. Ar akuni ambi to kapal yi akla nen, kambigin mondok dek o. We to kapal yi perak bularigin o. 23Nenaluk, Ar Allah an nebe ondewerek, nen an Ar alon palitaga werek eti, Ar mende malaikat nen, o kukbaga noba wagiya o. 24Wagu lagarik wene yonugu dogolir, ‘Paulus wae, kobade arugup o! Nenaluk kar ar ap Kaisar eti kimbirak abuk arigin o. Nen Ar Allah iliti pano eti paga nen, kar yi koba liklir paga, ir akuni to kapal akla kinom yoma, ir obogar inagap endarigin o.’ 25Etiar ma, newe nawor o, nir ninebe ndegelugun ar yiluk kiniliti andagu dogoni o! Nenaluk, An Ar Allah nen wene erigin yonege eti, Ar nen ebebar erigin andagi o. 26Ogwe, Nir ninebe perak pano ndegelek woknirek pulau ambi, i laut aik paga binani ligin o,” yiluk yorarige.
27Tuguluk, i laut Adria agum paga etoma, yegek dinanggik ndegek dinanggik erir nega kigik nogo empat belas paga yirugu. O kukbaga odo kirogo, ir ap to waritaga mende inakburi nen, yogo arar uwakngga ari wago inakla andarugwa. 28Andalok kede ima nggir yidilogo wurakugwa mende, i agup enogo empat puluh meter ndak-ndak karugwa. Tuguluk korok negen ar lagugwarik, kede enogo iyok paga wurakugwa mende, tiga puluh meter ndak-ndak karugwa. 29Ir ap to warir mende nen, nir arar pano lugun talek, to nggir kulik paga dilkanem yiluk, to kol sauh empat paga akoma nggwe nen wurakugwa. 30Nen ir ap to warir mende yomanogo kode kirak-kirak mbuguluwok nen yiluk, toral sekoci yemenogo wurabir lagu dogolir, to kol wurabi tagwi talek erir lagwi darugwa. 31Ekwi inil dalok, Paulus nen ap tentara inewe yoga dogolir, “Ir ap to warir mende yoma inebe dek arumo, kir to akla dulik yoma ambi kiniluk kode wundugun dek, obogar wartarugun o,” yiluk yorige. 32Yorigemo ir ap tentara nen toral ugu sekoci yomanogo obogar kol bero kigik i lagabir lagugwama, i nen wolok lagage.
33O akla mogolik nen yiluk eka kigik, ar Paulus nen yoraga dogolir, “Nir empat belas hari paga niniliti pirik mondok, nen erom ninggikdek abu ar wagorik mo, ninoba labek dek negen agorik o. 34Ma yogondak, an wene yi yokerak o, kir kinebe kiniri bugudak ar ambi wirok togo dek arigin mondok dek o. Kir kinebe kinobarne aruak nen, kir erom arar naurak o,” yiluk yoragage. 35Etegerogo yoraga lagagerek, Paulus roti inggimo pago dogolir, ir obogar inil dagik, nombae Allah wa, yiluk keyagi wakige. Roti enogo mbalogo nen narigemo, ir akuni obogar inarom narugwa. 36Ir obogar inarom nunggu lagugwarik, inebe inobarne aga, iniliti oba didu yega ekige. 37Nir akuni to paga dulik welagagu ninebe dambulik eti, dua ratus tujuh puluh enam paga welagagu o. 38Erom arar ninakla kerok togo nalok, gandum enggen mbalek to paga welagage mende, to anggin dek aruwak nen yiluk, ima nggiluk arar lagakugwa.
To kapal dik yirige wene
39Nen o arar keyalkigemo, ir to kapal wolok mende nen, i akbila etoma, agar kuli negen ambi telekma buru-buru yega inil karuga. Ogwe ir nen eti agar kulik yiluk, domborogo yenggak kalokdegar ogwe. Ma ir nen etomala kapal wolok ndak labi lugun a dek a, yiluk kapal agar kulik enogo paga labi lau walkarugwa o. 40Ir nen kapal yadu kede sauh kunik mende mbalogo ima dambe karugwa. Nen, wiya nen woknerek, o agar kulik inil karugwama etomala, woknerek lowak nen yiluk, to agubakma nggwe etoma, kain layar arar tugunggugwa. 41Ogwe, kapal alubak wuluk togo todimo arar longgoktogo yaktagage o. Nen to ebe abodok dek arar puk agage o. Nen akoma nggwe, i tarin pulka waga dogolir, arar miyalogo lagabir wagage o.
42Eta etagagemo, ir tentara nen akuni kede warek mende nggoma kode wulkunem warinabuwok o, yiluk andarugwa. 43Yirugwa mende, ap tentara inewe nen Paulus inom wakunem yiluk, wenemuk yirige. Nen ar ap komandan nen, kir akuni nggoma kinilu mende, ima wuralok nggoma ibar aburtaga dagi lani o; 44nen, kir akuni ambetak nggoma inonggokdek mende kau, yabunggane o abo mbalek mende paga, kinamik tagarek wundir lani o, yiluk yoragage. Ma, etegerogon arar ekugumo, nir akuni obogar iniluk ndegelek, i laut aik paga wundir lagugwa o.
Currently Selected:
RASUL-RASUL EKUGWA WENE 27: WLW
Highlight
Copy
Compare
Share
Want to have your highlights saved across all your devices? Sign up or sign in
