1 TESALONIKA 1
1
Keyagi warek wene
1 #
Kis. 17:1
Nawor nakbur kir jemaat Tesalonika werek mende, Ar Allah Ninombae inom, nen Ar Tuhan Yesus Kristus akburi agop mende inom, aenelak wa:
An Paulus o, ar Silas o, nen ar Timotius o, nir ninakla wadok eti, Ar Allah amende kado milogo wokeraga, adeknggen nggok mende wokeraga, etegero ar eka dogowak yiluk, ninakla wadok kertagwi o.
Ir Jemaat Tesalonika mende nen ebebar andalok eku lagugwa wene
2Nir nen kir obogar, Ar Allah wa yiluk nggok ar yoritagwi o. Ar Allah Ninombae oba, kir kinake paga nir tamban kunik kanik mondok, kinoba eberek dogolir, nggino yorir tagwi o. 3Nir nen kir Ar Kristus oba ebebar andarugup mende, kinebe paga eti kinagwi, kir nen akuni inakba kalok yamak dagwi, kir nen Ar Tuhan Yesus Kristus oba eberek werek mende, kir kinoba eberek dogolir kinake Ar Allah yoritagwi o. 4Ar Allah nen kinakba kalok, Ar adik amende dogobagik nen yiluk, miki nakige ninilu paga o, nawor nakbur wa. 5Nir nen wene pano wene yokeragu dogolir, ninane paga mban dek o, Roh Allah obarne paga yokeragagumo o. Nir nen wene Pano Wene ebe wene o yiluk, panggok diluk agorik o. Kir kinake paga, nir kinakla endoma nenggerogon welagagu eti kir kinilu o. 6#Kis. 17:5-9Kir nen nir ninobabur waganggwi, ninewe obabur waganggwi ekugupmo o. Kir eta paga anggin panggin kinoba aga kigik, wene pano wene yokera wagagu mende, kinadeknggen paga waganggugupmo o. Kinadeknggen eti, Ar Roh Allah nen kinilitimo birigemo o. 7Eta paga, kir akuni jemaat Makedonia inom, Akhaya inom eku dogowak nen yiluk, inowalkigik ekugup o. 8Eta ekugup paga wene Pano Wene, Ar Tuhan ane eti o Makedonia nen, Akhaya nen, obogar wigak yirige o. Eta paga arar dek ogwe, wene kir nen Ar Allah oba ebebar andalok waganggugup mende obok wigak yirigemo, nir ambi oba lambologo yurak dek arar o. 9Ir akuni obok nen, nir o pagane kinoba wagagumo, kir nen wokninakugup mende inom kinabok yir tagwi o. Ir nen kir maduk amudi kunik pogoraku lagagup mende, mbo dambe kalok, Ar Allah ebe iluk adigar apma doguwak nen yiluk, oba wagagup mende inom, kinabok mbililir tagwi o. 10Kir nen Ar Allah Akbur mbogor taga nen waganem torek werek kinabok kolir tagwi o. Ar Yesus eti kambiluk lektagama nen iluk agage mende enogo arar o. Ar Yesus eti nen, Ar yabungga Ar Allah anini ninoba wurakanem ndilninabigin arar o.
Currently Selected:
1 TESALONIKA 1: WLW
Highlight
Copy
Compare
Share
Want to have your highlights saved across all your devices? Sign up or sign in
