ROMA 4
4
I Abraham nakoa panganguntung
1Boko kere'e, apa hino ngu ko ipudidato ngi kite bou hal᷊i i Abraham, i upung u bangsa ngi kite? Kirapa l᷊al᷊eng u puwawiahie? 2Boko hal᷊i ko nikoae nakakoa Mawu Ruata nanarima i sie kere taumata ko makasanang naung u Mawu Ruata, kuteu mang pia l᷊ai alasange si sie l᷊umiaghi. Watu'u i sie ta makal᷊iaghi su tingo ngu Mawu Ruata. 3#Kar. 15:6; Gal. 3:6Su l᷊al᷊ung u Buki Susi pia kawawohe, “I Abraham mangimang su Mawu Ruata, watu'u pangangimange i'i i sie nitarima u Mawu Ruata kere taumata ko makasanang naung u Mawu Ruata.” 4Taumata muhal᷊i, manarima u wawaehi, dang wawaehie ta irekeng musul᷊ung u simbau l᷊aonggo, watu'u e'e ko hakie. 5Kateho pia taumata ko ta muharapi su reae sisanenge, i sie manarakang u watangenge su Mawu Ruata ko mul᷊iu ngu taumata bardosa bou pusansal᷊a. Bou pangangimange e'e Mawu Ruata manarima u taumata e'e kere taumata ko makasanang naung u Mawu Ruata. 6Kere'e l᷊ai su naung i Daud, e'e sabapie i sie nangul᷊i u sal᷊amati su taumata ko seng nitarima kere taumata ko nakasanang naung-E, suapang l᷊ai Mawu Ruata seng ta nundekeng u manga kakanoa u tau e'e. I Daud nangul᷊i kiri'i,
7 #
Mzm. 32:1-2
Kal᷊al᷊uasi taumata ko apang sal᷊ae seng nipakailang
dang apang dosange seng niampungang u Mawu Ruata!
8Kal᷊al᷊uasi su taumata ko apang dosange seng ta nituntukang u Mawu!
9Apa didato l᷊al᷊uasi i'i kitang inggile su manga taumata ko nutumuhu atorang u sunati? Arako l᷊ai suapang taumata ko ta nutumuhu atorang u sunati? Seng mbuae niul᷊i i kami su horo u e'e, himoneu i Abraham nitarima u Mawu Ruata kere taumata ko nakasanang naung-E, watu'u i Abraham mangimang su Mawu Ruata. 10Ho, ko kangereng Mawu Ruata seng nul᷊ahe u hal᷊i e'e? Suhoro i Abraham nisunati arako hindo samuri? Suhoro i sie nisunati, wal᷊inge samuri ngu e'e. 11#Kar. 17:10I sie nisunati samuri, dang sunati e'e kitang kere tatia ngu Mawu Ruata seng nanarima i sie kere taumata ko makasanang su naung u Mawu Ruata, watu'u Mangimang su Mawu Ruata su tempo ngi sie mborong ta nutumuhu atorang u sunati. Dang i Abraham makoa iyamang su hal᷊i u puwawiahiu rohani su taumata ko mangimang su Mawu Ruata, dang watu'u e'e seng nitarima u Mawu Ruata kere taumata ko makasanang su naung-E, maneng i sire ta nutumuhu atorang u sunati. 12I Abraham nakoa l᷊ai iyamang rohani guna ngu manga taumata ko nutumuhu atorang u sunati. I sie iyamang rohani ngi sire wal᷊ingewe kitang ual᷊ing i sire tumuhu atorang u sunati, kateho l᷊ai ual᷊ing i sire nuwiahi dingang mangimang Mawu Ruata, musul᷊ung kere i Abraham su tempo ngi sie mborong ta nutumuhu atorang u sunati.
Diandi ngu Mawu Ruata nitarima watu'u mangimang si Sie
13 #
Kar. 17:4-6, 22:17-18; Gal. 3:29 Mawu Ruata nudiandi si Abraham dingang u hintounge himoneu dunia i'i sarung makoa pusaka i Abraham. Mawu Ruata nudiandi kere'e wal᷊ingewe sarung i Abraham tumuhu su atorang u agama Yahudi, kateho ual᷊ing i sie mangimang su Mawu Ruata hakiu i sie nitarima u Mawu Ruata kere taumata ko makasanang su naung-E. 14#Gal. 3:18Watu'u boko kitang manga taumata ko matuhu su manga atorang u agama Yahudi ko sarung manarima u apang ko seng nipudiandi ngu Mawu Ruata, kuteu u pangangimang su Mawu Ruata tingari takoae gunange, dang diandi ngu Mawu Ruata l᷊ai takoae mangal᷊enge. 15Atorang u agama Yahudi makasongo ngu hukumang u Mawu Ruata. Arawe boko atorange takoae, kuteu takoae l᷊ai sukunge.
16 #
Gal. 3:7
Inau diandi ngu Mawu Ruata e'e wanggili u pangangimang u taumata su Mawu Ruata. E'e makoa simbau l᷊aiki su kaul᷊i u hintou ngi Abraham himoneu diandi e'e nionggo si sire kere simbau l᷊aonggo kere bou Mawu Ruata, wal᷊ingewe kitang si sire ko mutuhu su atorang u agama Yahudi, watu'u l᷊ai si sire ko mangimang su Mawu Ruata musul᷊ung kere i Abraham mangimang si sie, watu'u i Abraham ko iyamang i kite kaul᷊i u su pangangimang. 17#Kar. 17:5Watu'u Mawu Ruata nangul᷊i kiri'i si Abraham, “Ia seng nundiadi i kau iyamang u kaul᷊i u bangsa.” Kere'e Mawu Ruata nundiandi si Abraham. Dang i Abraham nangimang si Sie. I Sie Mawu Ruata ko nupuwiahi taumata ko nate. I Sie l᷊ai Mawu Ruata ko kitang dingang didato makakoa apang ko mborong takoae mariadi pia. 18#Kar. 15:5I Abraham mang turusi l᷊ai muharapi dang mangimang maneng l᷊ai seng takoae harapange. Watu'u e'e i sie nakoa iyamang u kaul᷊i u bangsa. Kere kawawohe su l᷊al᷊ung u Buki Susi, “Hintou ngu sarung makoa ko maul᷊i kahingang.” 19#Kar. 17:17I Abraham su tempo e'e seng matitong ko i sie mang seng ta mariadi pia hintounge watu'u badange seng tumaniu maghurang dang umurie seng masandighi mahasu su taunge, napal᷊iu l᷊ai i Sara kawinge e'e, ko wanto. Kateho pangangimang i Abraham mang ta nadio. 20I sie mang tatapi mangimang dang ta nanompol᷊i diandi ngu Mawu Ruata. Katewe pangangimange kasaungewe natoghasi si Sie, hakiu i sie nundalo Mawu Ruata. 21I sie tingari mangimang Mawu Ruata makakoa apang ko seng nipudiandi-E. 22E'e sabapie i Abraham nitarima u Mawu Ruata kere taumata ko makasanang naung u Mawu Ruata. 23Didato “nitarima kere taumata ko makal᷊uasi naung u Mawu Ruata” mawawohe wal᷊inge kitang guna ngi Abraham sisane, 24kateho l᷊ai guna ngi kite. I kite l᷊ai sarung i tarima kere taumata ko seng makasanang su naung u Mawu Ruata, watu'u i kite mangimang su Mawu Ruata ko mupakawiahi I Yesus Mawu ngi kite, bou papate. 25#Yes. 53:4-5I Yesus e'e seng nisarakang tadeau pakipate watu'u apang dosa ngi kite; bou e'e I Sie sau nipuwiahi u Mawu Ruata tadeau mupakakoa i kite sau pakapia dingang u Mawu Ruata.
Currently Selected:
ROMA 4: PLT
Highlight
Share
Copy
Want to have your highlights saved across all your devices? Sign up or sign in
