ROMA 15

Pakasanang ko taumata ko wal᷊inge kumbahang watangeng sisane

1I kite ko seng nangaking kahingang suapang ko pangimaneng i kite mambeng pakasabari su manga kabaratang taumata ko pangangimange l᷊ome. Kumbahang i kite kitang mo mupakasanang u watangeng i kite. 2Su simbuka ngi kite singkatau-singkatau mambeng l᷊ai mupakasanang u naung u ana u simbau sinsul᷊ung i kite guna ngu kapapiange, tadeau pangangakinge matamba matoghasi. 3#Mzm. 69:8Watu'u I Kristus l᷊ai ta mupikiri u kasanangang u watangeng-E sisane. Su l᷊al᷊ung u Buki Susi mawawohe kiri'i, “Kaul᷊i u l᷊ahinakang ko nitarang si kau seng nanawo si sia.” 4Kaul᷊i u ko kawawohe su l᷊al᷊ung u Buki Susi ipanintiro si kite. Watu'u tatintiro ko i tarima bou Buki Susi makakoa si kite masabari dingang matoghasi hakiu i kite makapuharapi su Mawu Ruata. 5Mal᷊umbako Mawu Ruata, ko mangonggo pusasabari dang l᷊ahibori su taumata, mutul᷊ung i kumu tadeau muwiahi singkanaung, tumuhu tatul᷊ara I Kristus Yesus. 6Dingang u singkanaung i kumu kaul᷊ie makapundalo Mawu Ruata, I Yamang Mawu ngi kite Yesus Kristus.

Habari Mapia guna ngu manga bangsa ko wal᷊inge tau Yahudi

7Watu'u e'e manga ana u simbau tarimako simbau dingang ko wal᷊inge dingang u kal᷊al᷊uasi naung, musul᷊ung I Kristus l᷊ai manarima i kumu guna ngi mamantughi Mawu Ruata. 8Watu'u, putinaungte, himoneu I Kristus seng nutul᷊ung tau Yahudi tadeau mupakal᷊ahe himoneu Mawu Ruata mang satia mungganapi apang diandi-E si upung i kite 9#2Sam. 22:50; Mzm. 18:50I Yesus mang l᷊ai nukoa manga bangsa ko wal᷊inge pupakawantughi u Mawu Ruata watu'u kapiang u naung-E si sire. Su l᷊al᷊ung u Buki Susi kawawohe kiri'i,

“Watu'u e'e ia sarung mundalo ngi Kau su tal᷊oara u manga bangsa,

ia sarung musamperi daralo guna ngu areng-U.”

10 # Sau. 32:43 Pia l᷊ai mawawohe kiri'i,

“Pural᷊uasi dingang u umati Mawu Ruata ko nikapile,

ei manga bangsa!”

11 # Mzm. 117:1 Dang i'i l᷊ai,

“Pundaloko Mawu Ruata, ei kaul᷊i u bangsa,

kaul᷊i u taumata pundaloko si Sie!”

12 # Yes. 11:10 Dang i'i l᷊ai ko niul᷊i i Yesaya,

“Bou hintou ngi I sai sarung l᷊umitou singkatau

ko sarung mamarenta apang bangsa;

Si Sie apang bangsa sarung maharapi.”

13Mawu Ruata ko tampa puharapeng i kumu. Mal᷊umbako I Sie mutaho naungu dingang u kal᷊al᷊uasi dang pudarame watu'u i kumu mangimang si Sie, tadeau dingang u kawasa ngu Roh u Mawu Ruata i kumu kasaunge manamba muharapi su Mawu Ruata.

Alasang i Paulus namohe maringga

14Manga ana u simbauku ia mangaking kere'e kaul᷊ie hal᷊i ko mapia si kumu. I kumu l᷊ai matitong u kaul᷊ie dang makapanintiro simbau dingang u ko wal᷊inge 15Kateho su hal᷊i ko wal᷊inge ia mangonggo u ingati kahingang si kumu su l᷊al᷊ung u suratiku i'i, watu'u Mawu Ruata seng nangonggo u hal᷊i e'e si sia. 16I sie nukoa si sia mutangkiang si Kristus Yesus tadeau iroi sarang kaul᷊i u bangsa ko wal᷊inge tau Yahudi. Dang ia kere imam ko muhabari Habari Mapia bou Mawu Ruata, tadeau apang taumata ko wal᷊inge tau Yahudi mariadi simbau sasumba su Mawu Ruata ko botonge itarima-E. Mal᷊umbako Roh u Mawu Ruata mukoa si sire mariadi simbau sasumba ko nihae guna ngu Mawu Ruata. 17Inau, watu'u ia seng nasimbau dingang I Kristus Yesus, kuteu ia pia l᷊al᷊uasi watu hal᷊iku guna ngu Mawu Ruata. 18Ia wahani muhabari kere'e kitang bou hal᷊i u apa ko seng nikoa I Kristus bou watangengku guna ngu mukoa manga taumata ko wal᷊inge tau Yahudi matuhu su Mawu Ruata. Ia mukoa e'e bou didato dingang u kakanoa, 19ko nihundinganeng u manga ko nakal᷊aherang, dingang u manga hal᷊i ko takoae sihinge; kaul᷊i u e'e watu'u kawasa ngu Roh u Mawu Ruata. Habari Mapia bou hal᷊i I Kristus kaul᷊ie seng bou daku niul᷊i suapang taumata, nanita bou Yerusalem sarang Ilirikum. 20Kaoku ko muhabari Habari Mapia bou Mawu Ruata su patiku tampa suapang taumata ko mborong ta nakaringihi hal᷊i I Kristus. Watu'u ia mandiri mupararisi u hal᷊i su punguange ko seng nipilo u taumata ko wal᷊inge. 21#Yes. 52:15Su l᷊al᷊ung u Buki Susi mawawohe,

“Manga taumata ko mborong ta nakatarima habari hal᷊i I Sie, sarung makawua;

dang i sire ko mborong ta nakaringihi, sarung makahingang.”

Karaki i Paulus makoa sarang Roma

22 # Rm. 1:13 E'e sabapie ia masau maalangang guna ngu mutiwo si kumu. 23Kateho i'i hal᷊iku suapang tampa e'e seng nasue. Seng manga pira taung l᷊iwuenge ia mo mutiwo si kumu. 24Hindo boko ia sumahe su soa ngi kumu su tempo ngu ia makoa sarang Spanyol, ia mangantighi musombang i kumu dang mural᷊uasi singkodo tempo dingang i kumu. Bou e'e ia muharapi i kumu mutul᷊ung u l᷊al᷊al᷊engangku sarang Spanyol e'e. 25#1Kor. 16:1-4Kateho su orasi i'i ia makoa sarang Yerusalem mangunturi bantuang guna ngu umati Mawu Ruata pai se'e. 26Watu'u apang jamaati su Makedonia dang Akhaya seng nukumire mangonggo u bantuang su manga ana u simbau ko susa su tal᷊oara u umati Mawu Ruata su Yerusalem. 27#1Kor. 9:11Dingang naung u mal᷊uasi i sire nanantu mukoa hal᷊i e'e. Mang seng hinonge i sire mambeng mutul᷊ung u manga ana u simbau ko susa su Yerusalem e'e; watu'u bou manga tau Yahudi e'e manga taumata ko wal᷊inge tau Yahudi e'e seng nakatarima manga al᷊amatiu Mawu Ruata. Inau apang taumata ko wal᷊inge tau Yahudi e'e hinonge l᷊ai mutul᷊ung u tau Yahudi dingang u manga al᷊amati kakakala. 28Boko ia seng bou nanginsue hal᷊iku i'i, dang nanarakang u bantuang ko seng nakomol᷊i si sire su Yerusalem, mbuhue ia makoa sarang Spanyol sumahe bou soa ngi kumu. 29Boko ia musumongo sarang koa i kumu, seng mal᷊ahe ia sarung mumbawa al᷊amati napene bou I Kristus guna ngi kumu.

30Watu'u mawu ngi kite Yesus Kristus, dang watu'u kakindaghi ko nionggo u Roh u Mawu Ruata, ia mundo singapang botonge si kumu; kere wotonge i kumu pakatoghasi mukal᷊iomaneng ringangku guna ngu ia sarang koa u Mawu Ruata. 31Pukal᷊iomanengte tadeau Mawu Ruata mul᷊iu ngu ia bou l᷊imau manga taumata ko ta mangimang pai su Yudea, dang tadeau hal᷊iku tamai mangunturi bantuang sarang Yerusalem itarima u manga umati Mawu Ruata pai se'e dingang u kal᷊al᷊uasi naung. 32Dingang kere'e boko Mawu Ruata kumindaghi, ia makarating i kumu dingang u naung mal᷊uasi. Dang ia nahibori su tal᷊oara ngi kumu. 33Mal᷊umbako Mawu Ruata, ko mangonggo u purarame su taumata, mahundingang si kumu kaul᷊ie. Aming.

Currently Selected:

ROMA 15: PLT

Highlight

Copy