REKENANG 4
4
Hal᷊i u taumata ngu Lewi bou hintou ngi Kehat
1 Mawu nundoi si Musa l᷊au si Harun 2pundekeng taumata ngu Lewi bou hintou ngi Kehat bou walagheng i sire singkatau-singkatau, 3bou e'e pamohe areng u kaul᷊i u manga ko ese ko umurie bou tilumpul᷊o sarang l᷊imampul᷊o su taunge ko makatanggong mukoa hal᷊i su Kema ngu Mawu. 4Hal᷊i i sire e'e ko mangurusi manga barang ko kasusinge.
5 Mawu nangonggo si Musa atorang i'i: Boko seng temponge mundusa pukakemang, i Harun l᷊au u manga anae mambeng sumu su Kema ngu Mawu, mupal᷊intu u pampele su tingo ngu Wantal᷊i u Pudadiandi, dang manaka wantal᷊i e'e dingang u heka e'e. 6Masue e'e, i sire mambeng manaka sau dingang simbau pisi ko al᷊usi, bou e'e namila u heka ko biru simpoto su wawoe dang namasi kau ghaghual᷊i u wantal᷊i e'e.
7I sire mambeng mamila u heka ko biru simpoto su wawo u meda tampa u boroti l᷊ahaghesi guna ngu Mawu dang su wawo u meda e'e mambeng i sire mamilo u pinggang, baki u tampa dupa, baki tampa u sasumba, l᷊au posi guna ngu ake anggori sasumba. Boroti l᷊ahaghesi mambeng pia sintinia su wawo u meda. 8I sire mambeng manaka kaul᷊i e'e dingang u heka mahamu simpoto, bou e'e mamila u pisi ko al᷊usi simpoto su wawoe, dang mamasi u kau ghaghual᷊i u meda e'e.
9I sire mambeng mangal᷊a heka ko biru simpoto dang manaka l᷊aeri u sol᷊o dingang u manga sol᷊oe, pakakasi pamursi sumbu ngu sol᷊o dang kakuntul᷊ange, dang kaul᷊i u tampa u l᷊ana zaitung. 10Rihi ngu sol᷊o dang kaul᷊i u sal᷊iumpuhi mambeng ipikung i sire dingang u simpoto pisi ko al᷊usi bou e'e ipilo su wawo u ghaghual᷊i.
11Bou e'e i sire mambeng mamila heka ko biru simpoto su wawo u mesba bou wul᷊aeng e'e, dang manaka dingang u pisi ko al᷊usi simpoto, bou e'e mamasi kau ghaghual᷊i u mesba e'e. 12Kaul᷊i u sal᷊iumpuhi ko ipake su l᷊al᷊ung u kamari susi mambeng al᷊akeng i sire dang ipikung dingang u heka ko biru simpoto. Bou e'e i sire mambeng manaka dingang u pisi ko al᷊usi simpoto, dang mamilo su wawo u ghaghual᷊i. 13I sire mambeng mamursi mesba e'e bou awu, bou e'e mamila heka ungu simpoto su wawoe. 14Dang su wawo e'e i sire mambeng mamilo kaul᷊i u sal᷊iumpuhi ko ipake su l᷊al᷊ung u punggaweting su mesba e'e: tampa u putung, poroki, sasaeri, l᷊au u loyang. Bou e'e i sire mambeng manaka kaul᷊i u e'e dingang u pisi ko al᷊usi simpoto dang mamasi kau ghaghual᷊i 15-20Mawu nuhengetang si Musa l᷊au si Harun, “Su tempo ngi kumu mamongkari pukakemang, i Harun l᷊au manga anae mambeng sumu sarang l᷊al᷊ung u Kema-Ku dang manaka kaul᷊i u barang dingang u sal᷊iumpuhi ko ene su se'e. Wuhue masue e'e, manga taumata ngu Kehat botonge sumongo tadeau mamikul᷊i. Arawe i sire ta botonge mutuhung, sumandighi arako manuhung manga barang e'e, watu'u seng nihae guna ngu Ia. Kamangkeng i sire mang mukoa l᷊ai, i sire sarung mate. Inau, tadeau manga taumata ngu Kehat e'e kumbahang mamu bou suku ngi Lewi, i Harun dingang u manga anae mambeng mangonggo u hal᷊i u singkatau-singkatau su tal᷊oara i sire apa ko wawaneng i sire. E'e ko hal᷊i u manga taumata ngu Kehat su tempo ngu Kema-Ku ial᷊ing. I Eleazar ana i Harun mutuhung kal᷊abo u Kema-Ku, l᷊ana ngu sol᷊o, dupa, korbang gandung guna ngu l᷊ahaghesi tatapi, l᷊ana upacara dingang u kaul᷊i u ko ene su l᷊al᷊ung u Kema-Ku e'e.”
Hal᷊i u taumata ngu Lewi bou hintou ngi Gerson
21 Mawu nundoi si Musa 22pundekeng taumata ngu Lewi bou hintou ngi Gerson tumuhu walaghenge simbau-simbau. 23I Musa mambeng mamohe areng u kaul᷊i kol᷊aese umurie bou tilumpul᷊o sarang l᷊imampul᷊o su taunge ko makatanggong muhal᷊i su Kema ngu Mawu. 24I sire puhal᷊i puhunturi manga barang i'i: 25Heka tenda ngu Kema e'e dingang u tataka bageang l᷊al᷊unge dang bageang l᷊ikuri bou pisi ko al᷊usi, heka su tukari Kema, 26manga senggo dingang u manga tal᷊inge guna ngu lilahi su kal᷊abo u Kema dingang u mesba, heka su tukari u sasukang lilahi dingang u kaul᷊i u sal᷊iumpuhi ko ipake guna ngu pamasikang kaul᷊i u barang e'e. I sire mutuhung kaul᷊i u hal᷊i ko pia tarange dingang u manga barang e'e. 27I Musa dingang i Harun mambeng maniti tadeau hal᷊i ko isarakang i Harun dingang u manga anae suapang taumata ngi Gerson e'e koateng, dang tadeau kaul᷊i u barang ko mambeng ihunturi, tadeau inturi. 28E'e hal᷊i u apang taumata ngi Gerson su l᷊al᷊ung u Kema; manga Hal᷊i e'e mambeng koateng su ana i Tamar, ana i Imam Harun.
Hal᷊i u taumata ngu Lewi bou hintou ngi Merari
29 Mawu nundoi si Musa pukoa pundekeng taumata ngu Lewi bou hintou ngi Merari tumuhu walagheng simbau-simbau. 30I Musa mambeng mamohe areng kaul᷊i u ko ese umurie bou tilumpul᷊o sarang l᷊imampul᷊o su taunge ko makatanggong muhal᷊i su Kema ngu Mawu. 31I sire ipuhal᷊i guna ngu muhunturi manga kakoa u Kema e'e, manga sal᷊awakunge, manga rihinge dingang u pangilenange. 32L᷊ai manga rihi ngu lilahie su kaul᷊i u sindihang u Kema e'e dingang u pangilenange manga papasie dang manga tal᷊inge dingang u manga kaul᷊i u pakakasi ko ipake guna ngu mupakatei. Apang taumata niparentang pumbawa manga barang pusimbau ko nitantu. 33E'e hal᷊i i sire hintou ngi Merari. Kaul᷊i u hal᷊i i sire su Kema ngu Mawu mambeng koateng su aha i Itamar, ana i Imam Harun.
Pundarekenang manga taumata ngu Lewi
34-48Sintuhu dingang u parenta ngu Mawu, i Musa, i Harun dang manga pangaha u umati nukoa rekenang u bou tatilu hintou su l᷊al᷊ung u suku ngi Lewi, e'e ko i Kehat, i Gerson dang i Merari. I sire nundekeng apang walagheng. I sire namohe areng u kaul᷊i u manga ko ese ko umuri sire tilumpul᷊o sarang l᷊imampul᷊o su taunge ko makatanggong muhal᷊i su Kema ngu Mawu ko i'i ul᷊ie:
| Walagheng | Ul᷊i u taumata | |
|---|---|---|
| i Kehat | 2.750 | |
| i Gerson | 2.630 | |
| i Merari | 3.200 | |
| Kaul᷊ie: | 8.580 |
49Kere niparenta Mawu si Musa, apang taumata iwohe dang onggol᷊ang u hal᷊ie singkatau-singkatau suapang ko mambeng itangkiange arako apang ko mambeng wawanenge.
Currently Selected:
REKENANG 4: PLT
Highlight
Copy
Compare
Share
Want to have your highlights saved across all your devices? Sign up or sign in
