NAHUM 2

Niniwe nanawo

1Ei Niniwe, pundaringihiko!

Ko mo mundusa si kau seng nusumongo!

Diagateko manga tatinda u pudadiaga!

Tuhungeko l᷊al᷊eng!

Pusasadiate muparang.

( 2Tingari, Mawu sarung mupakaul᷊e ngu kal᷊ahamaghi u Israel, tadeau makoa kere horo, suhoro u nihampasi manga rokae.)

3Kulung u roka mahamu kulurie,

l᷊au pakeang u dinsie kere daha.

Roka seng sadia guna ngu mangalo.

Kere putung, uase ngu keretae mal᷊enda.

Kaul᷊i u kawal᷊onge#2:3: Botonge mariadi mangal᷊enge: Kaul᷊i u kawal᷊onge; Ibrani: kau sanobar. l᷊ul᷊inso.

4Su l᷊al᷊eng, manga kereta tutondo masahawu.

Su peleng, i sire e'e kapusasahusunge

Tuhungang kere obori ko kahenange,

kaputatandung u kasasahawu kere l᷊ul᷊u.

5Manga Parwira nikuiang patamai;

i sire nasangko su tempo ngu kapangalonge. #2:5: Manga parwira … kapangalonge; naska Ibrani: ta mal᷊ahe.

I sire kapusasahawue nakoa sarang meseli soa,

pakakasi u ghaghoghahi dingang nipararisi.

6Tukari u ake kaul᷊i u sal᷊uhi seng niwuka,

kuteu kal᷊abo u istana nughigho!

7Ratu kowawine nikasame,

manga mananundughie kasikinge dang kapul᷊ungkange,

i sire makikindaghi kere burung paluma,

dang kapamupelie roko ual᷊ingu susa ngu naung.

8Ana u kawanua ngu Niniwe nahuntal᷊ang nusawuhi,

kere ake ko nusoang bou l᷊ahumpinge ko naopehi. #2:8: Botonge mariadi mangal᷊enge: Ana u kawanua … naopehi

Pia kiha, “Pangiro, pangiro!”

kateho takoae ko mo musul᷊e.

9Pal᷊ahote apang wul᷊aeng l᷊au sal᷊akae!

Rarotong su soa e'e maul᷊i kahingang!

10Niniwe seng naghaghoro, narumasi dang nal᷊inggi.

Naunge nadio nahinsang u taku.

Wuku l᷊ome dang kakendenge.

Pahesi kaul᷊i u taumata nawilosi.

11Ko su apa soa e'e orasi i'i?

Soa ko kere l᷊iang tampa u pusal᷊ehang u singa?

Tampa u manga ana u singa ipakang,

tampa u pukomol᷊ang u singa ko ese l᷊au kowawine,

tampa ko matatapi su manga anae?

12Ndahuwite pai se'e singa nanumbou kinae,

dang nunggaghehe e'e guna ngu singa kowawine l᷊au manga anae.

I sie namene sal᷊ehie

dingang u manga kakodo u ghisi ngu ghanange.

13“Ia i'i ko rokau,” hengetang u Mawu Ko Makawasa. “Manga kereta ngu sarung Daku itutung pakasue. Parajuritiu sarung mate su l᷊al᷊ung u parang, dang Ia sarung mangal᷊a apang ko seng nial᷊au bou taumata ko wal᷊inge. Apang ko ituntu u manga raroiu sarung ta ikaringihi l᷊ai.”

Currently Selected:

NAHUM 2: PLT

Highlight

Compare

Copy