MIKHA 6
6
Mawu nanuntu Israel
1Pundaringihiko apang ko nituntu u Mawu su Israel. Puwangungko, o Mawu, dang habarie kabaratang-U! Walate wul᷊uri l᷊au bongkonge mundaringihi apang ko sarung ipuhengetang-U.
2Ei manga wul᷊uri, ei manga dasari u dunia, pundaringihiko kabaratang u Mawu! I Sie ko pia parkarae dingang u Israel umati-E dang sarung manuntu si sire.
3 Mawu nuhengetang, “Ei umati-Ku, apa ko seng Daku nikoa si kumu? Su l᷊al᷊ung u hal᷊i apa Ia seng nupakasusa si kumu? Simbahiko Ia! 4#Sasu. 4:10-16, 12:50-51, 15:20I kumu seng Daku niwawa pasuwang bou Mesir, dang Daku nil᷊iwiri bou putatahul᷊ang; Ia seng nundoi si Musa, si Harun, l᷊au si Miryam tadeau pangaha si kumu. 5#Rek. 22:2–24:25; Yos. 3:1–4:19 Umati-Ku, putinaungko apa ko seng nikirou ngi Balak ratu ngu Moab si kumu dang apa ko seng nisimbahi Bileam ana i Beor si sie. Putinaungko apa ko nariadi su l᷊al᷊al᷊engang su tal᷊oara u pukakemang su Sitim l᷊au su Gilgal. Boko i kumu mutinaung kaul᷊ie e'e, i kumu sarung makatinaung apa ko seng Daku nikoa guna ngu mupakasal᷊amati si kumu.”
Sasumba ko ikao u Mawu
6Ko apa hinonge isumba ngi kite su Mawu Ruata su sorga, boko i kite musumongo guna ngu munggaweti si Sie? Apa i kite mambeng mumbawa sapi makuda ko kapiange guna ngu isumba kere korbang tongkateng si Sie? 7Apa Mawu sarung mal᷊uasi boko i kite mumbawa sarang koa-E hiwunge domba arako mapene-pene l᷊ana zaitung? Apa i kite mambeng manumba ngu ana ko iyakang i kite si Sie kere tatubusi su manga dosa ngi kite? 8Ta! Mawu seng nul᷊ahe si kite apang ko mapia. Ko ituntu-E bo i kite e'e ko tadeau i kite mukoa ko maadili, sintinia mukoa pukakindaghi, dang dingang kasasana u naung muwiahi masimbau dingang u Mawu Ruata ngi kite.
9Ko mapilesa kahingang boko i kite mataku u Mawu. I Sie nukui su taumata ko natana su soa, “Pundaringihiko, ei i kumu ko nakomol᷊i su soa! 10Su wal᷊e ngu manga taumata ko dal᷊ai pia rarotong ko nikarea dingang u l᷊inga. I sire nupake u l᷊aukurang ko ta nuhino, simbau kakanoa ko Daku ipubunsi. Taumata ko nukoa e'e sarung Daku ihukung. 11Tumaniewe Ia mangonggo u ampunge su taumata ko mupake u kilo ko ta nuhino? 12Manga taumata ko kala su soa ngi kumu manira taumata ko susa, dang i kumu kaul᷊ie mal᷊eo. 13Orasi i'i Ia manita mamahang dang munggaghoro si kumu ual᷊ingu manga dosa ngi kumu. 14I kumu sarung mukumang kateho ta mal᷊aeri – katewe tatapi mahutung. I kumu sarung muhengke sal᷊iumpuhi, kateho ta makadiaga. Manga apa l᷊ai ko idiagateng i kumu sarung Daku ghaghorong su l᷊al᷊ung u parang. 15I kumu sarung manawuhi gandung, kateho sarung ta manipo wuange. I kumu sarung mukoa l᷊ana bou wua ngu zaitung, kateho ta makapupake u l᷊anange. I kumu sarung mamuhu ake u anggori, kateho sarung ta manginung e'e. 16#1Mar. 16:23-34, 21:25-26 Kaul᷊ie e'e mariadi ual᷊ing i kumu mutumuhu manga kakanoa ko dal᷊ai u Ratu Omri l᷊au Ratu Ahab anae. I kumu mutumuhu manga kakanoa i sire. Ual᷊ingu e'e Ia sarung munggaghoro si kumu, dang i kumu sarung iheghesang l᷊au ihinakaneng u apang bangsa.”
Currently Selected:
MIKHA 6: PLT
Highlight
Share
Compare
Copy
Want to have your highlights saved across all your devices? Sign up or sign in
