IMAMAT 27
27
Atorang hal᷊i u sasumba su Mawu
1 Mawu nangonggo si Musa 2atorang i'i guna ngu bangsa Israel. Boko singkatau isumba su Mawu guna ngu manubusi simbau diandi ko nitani, tau e'e botonge itubusi dingang u doi 3-7tumuhu hariga ko kahipake su Kema ngu Mawu:
— su wawo u nungupul᷊o su taunge:
ko ese mapul᷊ol᷊ima doi sal᷊aka
kowawine mapul᷊o doi sal᷊aka
— su tal᷊oara u duampul᷊o sarang nungupul᷊o su taunge:
ko ese l᷊imampul᷊o doi sal᷊aka
kowawine tilumpul᷊o doi sal᷊aka
— su tal᷊oara u l᷊ima sarang duampul᷊o su taunge:
ko ese duampul᷊o doi sal᷊aka
kowawine mapul᷊o doi sal᷊aka
— su wawa l᷊ima taung:
ko ese l᷊ima doi sal᷊aka
kowawine tatilu doi sal᷊aka
8Boko singkatau ko nudiandi tumaniu susa wiahi guna ngu mamaehi hariga ko seng nitantu, i sie mambeng mumbawa taumata ko seng mbuae nisumba su Mawu e'e sarang koa u imam. Imam mambeng manantu hariga ko lebe masana sintuhu dingang u toghasi tau e'e.
9-10Boko diandi e'e hal᷊i u binatang ko halal ko botonge ikatarima kere sasumba su Mawu, taumata ko nudiandi e'e ta botonge manukari dingang u binatang ko wal᷊inge, watu'u apang ko nisumba su Mawu mariadi koa u Mawu. Boko i sie mang manukari, dua mbau binatang e'e makoa koa u Mawu. 11Kateho boko diandi e'e hal᷊i u binatang ko haram ko ta ikatarima kere sasumba su Mawu, tau ko nudiandi e'e mambeng mumbawa binatang e'e sarang koa u imam. 12Imam sarung manantu harigange sintuhu dingang u kakakoa u binatang e'e. Dang hariga ko seng nitantu ko ta ikatawari. 13Boko tau e'e mo manubusi binatange, i sie mambeng mamaehi harigange itamba ngu duampul᷊o porseng.
14Boko singkatau mangonggo sasumba wal᷊enge su Mawu, imam manantu harigange tumuhu kakakoa u wal᷊e e'e. Hariga ko seng nitantu ko ta ikatawari. 15Boko tau e'e mo manubusi wal᷊enge, i sie mambeng mamaehi harigange itamba ngu duampul᷊o porseng.
16Boko singkatau mangonggo sasumba simbahageang bou tanange su Mawu, harigange mambeng itantu tumuhu ul᷊i u sasuang ko ipake guna ngu pusuangeng tana e'e. Apang duampul᷊o su kilonge gandung harigange mapul᷊o doi sal᷊aka. 17Boko tana e'e nisumba mangki Taung Pananul᷊eng, harigange mambeng iwaehi pakasuku. 18Boko tana e'e ionggo samuri ngu Taung Pananul᷊eng, imam mambeng mutagiseri harigange paghisa tumuhu ul᷊i u taung ko mborong pia sarang Taung Pananul᷊eng tuhue, bou e'e manantu hariga ko lebe mamura. 19Boko tau ko nangonggo anseri e'e mo manubusi, i sie mambeng mamaehi harigange itambang dingang u duampul᷊o porseng. 20Boko i sie nuwal᷊u anseri e'e katewe ta nuhoro nanubusi e'e bou Mawu, i sie seng takoae hakie manubusi anseri e'e. 21Su l᷊al᷊ung u Taung Pananul᷊eng tuhue, anseri e'e makoa koa u Mawu sarang kal᷊iwuenge, dang ionggo su manga imam.
22Boko singkatau mangonggo su Mawu anseri simpalang ko seng nil᷊uangenge, 23imam mambeng mutagiseri harigange tumuhu ul᷊i u taung ko mborong pia sarang Taung Pananul᷊eng tuhue. Bou e'e tau e'e mambeng mamaehi harigange su l᷊ou e'e l᷊ai. Doi e'e mariadi koa u Mawu. 24Su l᷊al᷊ung u Taung Pananul᷊eng, anseri e'e mambeng isul᷊e su tataghuange ko horo arako su hintounge.
25Kaul᷊i u hariga mambeng itantu tumuhu hariga ko kahipake su Kema ngu Mawu.
26Binatang ko kahimotongange nipahana ko koa u Mawu, inau ta botonge ionggo guna ngu korbang tuhu kao u naung. Ana u sapi, ana u domba arako ana u kambing ko kahimotongange nipahana ko koa u Mawu. 27Arawe binatang ko haram ko kahimotongange nipahana botonge itubusi tumuhu hariga ko kahipake su Kema ngu Mawu, itambang u duampul᷊o porseng. Boko ta nitubusi, binatang e'e botonge iwal᷊u su taumata ko wal᷊inge tumuhu hariga ko kahipake su Kema ngu Mawu.
28 #
Rek. 18:14
Takoae sarang singkatau ko botonge muwal᷊u arako manubusi apa ko seng nitani dingang takoae sarati #27:28: nitani takoae sarati: Apang ko nitani dingang u l᷊al᷊eng e'e nal᷊ahe nakoa koa u Mawu, hakiu ta ikapake dang mambeng ipakawinasa su Mawu, maneng e'e ko taumata, binatang arako tana. E'e ko koa u Mawu sarang kal᷊iwuenge. 29Katewe taumata ko seng nitani su Mawu guna ngu ipakawinasa ta botonge itubusi; i sie mambeng pateng.
30 #
Rek. 18:21; Sau. 14:22-29 Simbahageang mapul᷊o bou kaul᷊i u l᷊uang u tana, maneng gandung arako manga wua, ko guna ngu Mawu. 31Boko singkatau mo manubusi simbahageang bou hasili u e'e, i sie mambeng mamaehi harigange ko seng nitantu itambang dingang u duampul᷊o porseng. 32Pusimbau bou taha mapul᷊o binatang papal᷊iharang ko koa u Mawu. Boko binatang papal᷊iharang e'e irekeng, apang binatang papal᷊iharang ko kapul᷊onge mariadi koa u Mawu. 33Taumata ko pia binatang papal᷊iharang e'e ta botonge mamile-mile sude ko mapia, sude ko dal᷊ai. I sie l᷊ai ta botonge manukari. Boko i sie mang manukari, binatang papal᷊iharang darua e'e mariadi koa u Mawu dang ta botonge itubusi.
34Ko e'e manga parenta ko nionggo u Mawu su wawo u Wul᷊uri Sinai si Musa guna ngu bangsa Israel.
Currently Selected:
IMAMAT 27: PLT
Highlight
Copy
Compare
Share
Want to have your highlights saved across all your devices? Sign up or sign in
