IMAMAT 25

Taung kapitunge

(Sau. 15:1-11)

1 # Sasu. 23:10-11 Su wawo u Wul᷊uri Sinai Mawu nudidato si Musa dang nundoi si sie 2puhabari u manga atorang i'i su bangsa Israel. Boko i kumu musumu su wanua ko sarung ionggo u Mawu si kumu, i kumu mambeng pangadati Mawu dingang u l᷊al᷊eng i'i: Sintinia taung kapitunge i kumu ta botonge muhal᷊i tana guna ngu mukoa anseri. 3Su kanandu nung u taung i kumu mambeng pusuang manga anseri kumu, mamuwasi manga awuhi anggori kumu dang munggopol᷊i l᷊uang u tana ngi kumu. 4Arawe sintinia taung kapitunge nitani guna ngu Mawu. Inau su kanandu u taung e'e tana mambeng iwala dang ta botonge ihal᷊ikang. Kumbahang musuang manga anseri dang kumbahang mamuwasi manga awuhi anggori kumu. 5Kere'e l᷊ai gandung ko nutumuwo ngu naunge arako anggori bou kau anggori kumu ko ta niwuwasi, ta botonge ikomol᷊i dang ireso i kumu, watu'u taung e'e ko taung. 6Pangindul᷊eng u tana. Maneng kere'e, tana e'e mambeng mangonggo u l᷊uange l᷊ai guna ngu ikoa kang i kumu, manga l᷊ang i kumu, manga taumata ko mul᷊ahal᷊i su koa i kumu, dang manga tau raghi ko natana dingang i kumu. 7Dang l᷊ai guna ngu manga binatang papal᷊iharang i kumu dang manga binatang ko maghaghila su wanua ngi kumu. Kaul᷊i u ghisi ngu tana e'e botonge kanengang.

Taung pananul᷊engang

8Rekengko pitu ikaling dingang pitu taung, paupul᷊osio su taunge ul᷊ie. 9Bou e'e tanggali mapul᷊o wul᷊ang kapitunge, e'e ko l᷊ou pangangampung u dosa, roiko taumata paniu tarompeti su apang tampa su kal᷊abo u wanua. 10I kumu mambeng puhae ngu taung ko kal᷊imampul᷊o e'e dang pamohang u kal᷊al᷊iwiri su kaul᷊i u kawanua. Su taung e'e apang rarotong ko seng niwal᷊u mambeng isul᷊e su tataghuange ko horo arako su manga hintou ngi sire. I sai ko niwal᷊u kere l᷊ang mambeng isul᷊e su walagheng i sire. 11Kumbahang musuang anseri kumu. Gandung ko nutumuwo sisane arako wua ngu anggori ko su awuhi anggori kumu ko ta niwuwasi ta botonge ikomol᷊i dang ireso i kumu. 12Taung e'e kere taung ko susi si kumu. I kumu kitang botonge kumang apang ko nutumuwo sisane su kobong i kumu.

13Su taung e'e kaul᷊i u tana ko seng niwal᷊u mambeng isul᷊e su tataghuange ko horo. 14Inau boko i kumu muwal᷊u tana su sinsul᷊ung u tau Israel arako mul᷊uang tana bo i sie, kumbahang mukoa puwawal᷊u l᷊au pul᷊al᷊uang e'e ko takoae adili. 15Hariga ngu tana e'e mambeng itantu tuhu ul᷊i u taung su kanandu tana botonge mangonggo u l᷊uange sarang Taung Panul᷊enge tuhue. 16Boko ul᷊i u taunge maul᷊i, hariga ngu tana e'e ko mal᷊ighari. Kateho boko ul᷊i u taunge singkodo, harigange mambeng pakamura, watu'u ko niwal᷊u ko ul᷊i u ko nitipo. 17Kumbahang mul᷊inga sinsul᷊ung u tau Israel, kateho i kumu mambeng kataku u Mawu Ruata ngi kumu.

Hal᷊i u taung kapitunge

18Tuhuke ko kaul᷊i u tita l᷊au parenta ngu Mawu, tadeau i kumu muwiahi dingang matatapi su wanua e'e. 19Tana ngu wanua e'e sarung mangonggo u l᷊uange hakiu i kumu pia kang ko su kitae dang matana pai se'e dingang kal᷊al᷊uasi.

20Kateho pari pia ko makina apa ko sarung ikang salama ngu taung kapitunge su tempo ngu tana ta nisuangeng dang l᷊uange ta niemong. 21Su l᷊al᷊ung u taung kanunge Mawu sarung mangal᷊amati tana hakiu l᷊uange botonge guna ngu tilu taung. 22Dang su tempo ngu i kumu musuang anseri kumu su taung kawal᷊unge, ko nitipo su taung kanunge mborong pia guna ngu ikang i kumu. Katewe sasadia ngu kang i kumu botonge sarang murating u temponge i kumu munggopol᷊i l᷊uang u taung e'e.

Pananul᷊e ngu tana l᷊au wal᷊e

23Tana ngi kumu ta botonge iwal᷊u sarang kal᷊iwuenge, watu'u tana e'e ko wal᷊inge koa i kumu, kateho ko koa u Mawu Ruata. I kumu kitang kere tau raghi ko niwala guna ngu mupake tana e'e.

24Boko tana simpalang niwal᷊u, mambeng iaku haki u tataghuange ko horo guna ngu manubusi tana e'e. 25Boko singkatau Israel nasusa wiahi hakiu i sie nasihasa muwal᷊u tanange, manga ana u singkataunge ko kasandighange mambeng manubusi tana e'e. 26Boko takoae taumata ko makatubusi tana e'e kateho samuringe tataghuang u tana e'e seng botonge wiahi dang seng pia doinge guna ngu manubusi tana e'e, 27kuteu i sie mambeng mamaehi su taumata ko seng nul᷊uang tanange dingang u hariga hasili u tana e'e salama ngu taung-taung tuhue sarang Taung Pananul᷊eng tuhue. Dingang kere'e i sie sau nakarea tanange. 28Arawe boko i sie ta nakatanggong manubusi tanange, taumata ko nul᷊uang tatapi pia kawasange su tana e'e sarang Taung Pananul᷊eng tuhue. Su l᷊al᷊ung u taung e'e tana e'e mambeng isul᷊e su tataghuange ko horo.

29Boko singkatau muwal᷊u u wal᷊e simbau su l᷊al᷊ung u soa ko nil᷊ikutang u meseli, kuteu i sie pia hakie manubusi wal᷊enge su l᷊al᷊ung u tempo sintaung irekeng bou tanggali puwawal᷊u. 30Kateho boko wal᷊e e'e ta nikatubusi su l᷊al᷊ung sintaung, nau nailang hakie guna manubusi wal᷊e e'e. Wal᷊e e'e tatapi makoa koa u taumata ko seng nul᷊uang wal᷊e e'e l᷊au hintounge. Su l᷊al᷊ung u Taung Pananul᷊eng, wal᷊e e'e ta isul᷊e. 31Guna ngu wal᷊e su kampong ko ta nil᷊ikutang u meseli mupake atorang ko musul᷊ung dingang u atorang guna ngu tana: tataghuang ko horo pia hakie manubusi dang wal᷊e e'e mambeng isul᷊e su tempo ngu Taung Pananul᷊eng. 32Arawe tau Lewi pia hakie su apang tempo manubusi rarotong i sire su apang soa ko seng nitantu guna ngi sire. 33Boko singkatau Lewi muwal᷊u wal᷊enge su manga simbau soa e'e dang i sie ta nanubusi, wal᷊e e'e mambeng isul᷊e si sie su Taung Pananul᷊eng. Watu'u wal᷊e ngu tau Lewi su manga soa ngi sire ko tatapi koa i sire su tal᷊oara u bangsa Israel. 34Arawe manga ngudae su sindihang u manga soa ngu suku Lewi ta botonge iwal᷊u. E'e ko koa u tau Lewi sarang kal᷊iwuenge.

Rang su tau ko susa

35 # Sau. 15:7-8 Boko singkatau bangsa simbau dingang i kumu ko natana su sindihang i kumu nasusa wiahi dang seng ta makatanggong mangongkosi wiahi i kumu mambeng putul᷊ung si sie kere singkatau raghi arako nasampeli, tadeau i sie botonge muwiahi turusi su tal᷊oara i kumu. 36-37#Sasu. 22:25; Sau. 23:19-20Kumbahang manuntu bungange bou apang ko nipakirang i kumu si sie, kateho katakuko i kumu su Mawu Ruata ngi kumu, dang pakawalako tau e'e muwiahi su tal᷊oara i kumu. Kumbahang l᷊ai mangal᷊a untunge bou kang ko niwal᷊u i kumu si sie. 38Ko e'e parenta ngu Mawu Ruata ngi kumu ko seng numbawa si kumu nusumuwang bou Mesir guna ngu pangonggol᷊ang wanua ngu Kanaan si kumu, tadeau I Sie makoa Mawu Ruata ngi kumu.

Pul᷊al᷊iwiri l᷊ang ko nil᷊uangeng

39 # Sasu. 21:2-6; Sau. 15:12-18 Singkatau bangsa simbau dingang i kumu ko natana su tal᷊oara i kumu nanawo susa hakiu i sie muwal᷊u badange kere l᷊ang si kumu, tau e'e ta botonge parentang i kumu pukoa hal᷊i u singkatau l᷊ang. 40I sie mambeng matana dingang i kumu kere singkatau mantrosi dang muhal᷊i guna ngi kumu sarang Taung Pananul᷊eng. 41Su tempo e'e i sie l᷊au manga anae botonge manintang u wal᷊e ngi kumu dang musul᷊e sarang koa u walaghenge dang sarang tana ngu manga i upung i sire. 42Tau Israel ko manga l᷊ang u Mawu; Ko I Sie numbawa si sire nusumuwang bou Mesir, dang ual᷊ing u e'e i sire ta botonge iwal᷊u kere singkatau l᷊ang. 43Inau singkatau Israel ko muwal᷊u watangenge si kumu ta botonge i kumu mukoa ko mahasa si sire. I kumu katakuko su Mawu Ruata ngi kumu. 44Boko i kumu mupake l᷊ang, i kumu botonge mul᷊uang su manga bangsa ko natana su sindihang i kumu. 45I kumu botonge l᷊ai mul᷊uang manga ana u tau raghi ko natana su tal᷊oara i kumu. Manga ana u tau raghi ko nipahinding su wanua ngi kumu botonge mariadi koa i kumu 46dang botonge l᷊ai iturusi su manga ana i kumu guna ngu makoa l᷊ang i sire sarang kal᷊iwuenge. Kateho su sinsul᷊ung i kumu tau Israel ta botonge i kumu mukoa ko mahasa si sire.

47Boko singkatau raghi ko natana su tal᷊oara i kumu nakoa ko kala, dang pia sinsul᷊ung u tau Israel ko nasusa wiahi hakiu i sie nuwal᷊u watangenge kere l᷊ang su tau raghi e'e arako su wal᷊aghenge, 48tau Israel e'e tatapi pia hakie guna ngu itubusi. Singkatau bou ana u singkataunge ko ese, 49arako i om'e, arako ana u tamahuaringe arako singkatau ko wal᷊inge bou ghe'e ko masandighi, botonge manubusi si sie. Arako boko i sie sisanenge samuringe seng makaupili, i sie botonge manubusi watangenge sisane. 50L᷊ang e'e mambeng pudidato dingang u tau ko seng nul᷊uang si sie. I sire mambeng mundekeng ul᷊i u taung mangki bou watangenge niwal᷊u kere l᷊ang sarang Taung Pananul᷊eng tuhue, bou e'e manantu hariga tatubusi. Hariga e'e mambeng itantu sintuhu dingang u rekenang u wawaehi ko nionggo su singkatau mantrosi. 51-52L᷊ang e'e mambeng manul᷊e hariga ngu l᷊al᷊uang u watangenge laboe musul᷊ung ul᷊ie dingang wawaehi ngu singkatau mantrosi su kanandu u taung-taung ko tangkeng nil᷊al᷊engange, 53kere kakakoa u i sie seng nuhal᷊i kere singkatau mantrosi ko iwaehang pusintaung. Ta botonge mawunge mukoa si sie dingang mahasa. 54Boko i sie ta ikatubusi dingang u manga simbau bou l᷊al᷊eng e'e, i sie l᷊au manga anae mambeng il᷊iwiri su l᷊al᷊ung u Taung Pananul᷊eng tuhue. 55Singkatau Israel ta botonge makoa l᷊ang sarang kal᷊iwuenge, ual᷊ingu bangsa Israel manga l᷊ang u Mawu. Ko Mawu seng numbawa si sire nusumuwang bou Mesir. Ko I sie Mawu, Mawu Ruata ngi sire.

Currently Selected:

IMAMAT 25: PLT

Highlight

Copy

Compare