IMAMAT 20

Hukumang su taumata ko mal᷊al᷊awang

1 Mawu nangoro si Musa 2muhabari hal᷊i i'i su tau Israel, “Apang taumata su tal᷊oara i kumu arako tau raghi ko natana su tal᷊oara i kumu ko mangonggo anae su Molokh, mambeng pakipal᷊o su kaul᷊i u kawanua dingang u watu sarang pakapate. 3Taumata ko mangorbang u anae si Molokh, mupakal᷊amuhu u Kema-Ku dang muhinakang areng-Ku ko susi. I sie sarung Daku ihukung dang seng ta Daku irekeng tataho u umati-Ku. 4Boko kawanua manaka mata ngi sire su kakanoa u tau e'e dang ta muhukung pakapate si sie, 5kuteu Ia sisane-Ku sarung muhukung si sie, kaul᷊i u walaghenge, l᷊au kaul᷊i u taumata ko singkahindo dingange nanintang si Sia dang nanumba Molokh. I sire seng ta Daku irekeng tataho u umati-Ku.

6Taumata ko matamai mundo tughu su tahawawua ko mukoa pukakauhi dingang u manga roh u taumata ko nate sarung Daku ihukung dang seng ta Daku irekeng tataho u umati-Ku. 7Diagateko tadeau i kumu tatapi ko susi, ual᷊ing u ko Ia Mawu Ruata ngi kumu. 8Tuhukeko apang tita-Ku, ual᷊ing u ko Ia Mawu ko nupuhae ngi kumu guna ngu Ia.”

9 # Sasu. 21:17; Mat. 15:4; Mrk. 7:10 Mawu nangonggo manga atorang i'i, “Taumata ko mangane si papange arako si mamange mambeng ihukung u papate. I sie mate ual᷊ing u sal᷊ae sisane.

10 # Sasu. 20:14; Im. 18:20; Sau. 5:18 Boko singkatau Israel mawuang dingang u kawing u taumata singkawanuae, i sie dingang kowawine e'e mambeng ihukung u papate. 11#Im. 18:8; Sau. 22:30, 27:20 Singkatau ko ese ko nutatamba ngu badang dingang u manga singkatau bou kawing i papae, nukabasara haki i papange. Ko ese l᷊au kowawine e'e mambeng ihukung u papate. I sire mate ual᷊ing u sal᷊a ngi sire sisane. 12#Im. 18:15Boko singkatau ko ese nutatamba ngu badang dingang u manuhange kowawine, i sire rua mambeng ihukung u papate. I sire seng nawuang, dang i sire mate ual᷊ing u sal᷊a ngi sire sisane. 13#Im. 18:22 Boko singkatau ko ese mutatamba ngu badang dingang ko ese ko wal᷊inge, i sire nukoa kakanoa ko makararinting dang ko hina, i sire rua mambeng ihukung u papate. I sire mate ual᷊ing u sal᷊a ngi sire sisane. 14#Im. 18:17; Sau. 27:23Boko singkatau ko ese nukawing dingang u singkatau kowawine l᷊au i mama ngu kowawine e'e, i sire tilu mambeng itutung sarang pakapate, ual᷊ing u i sire nukoa kakanoa ko ta nutatahino. Kakanoa ko kere'e ta botonge ene su tal᷊oara i kumu. 15#Sasu. 22:19; Im. 18:23; Sau. 27:21 Boko singkatau ko ese nutatamba ngu badang dingang u binatang, taumata dingang u binatang e'e mambeng pakipate. 16Boko singkatau kowawine nutatamba ngu badang dingang u binatang, kowawine dingang u binatang e'e mambeng pakipate. I sire mate ual᷊ing u sal᷊a ngi sire sisane.

17 # Im. 18:9; Sau. 27:22 Boko singkatau ko ese nutatamba ngu badang dingang wawinenge arako dingang wawinenge tamba papa, mutatintang mama, arako tamba mama, mutatintang papa, i sire seng ta Daku irekeng tataho u umati-Ku. I sire seng nukoa kakanoa ko ta nutatahino dang mambeng mananggong sukenge. 18#Im. 18:19Boko singkatau ko ese nutatamba ngu badang dingang u singkatau kowawine ko pia kotori, i sire seng ta irekeng tataho u umati-Ku.

19 # Im. 18:12-14 Boko singkatau ko ese nutatamba ngu badang dingang i tantenge, i sire rua mambeng mananggong suke ngu palanggarang e'e. 20Boko singkatau ko ese nutatamba ngu badang dingang u kawing i om'e, i sie nuhinakang si om'e. Ko ese l᷊au kowawine e'e mambeng mananggong hukumange. Sarang mate i sire ta makarea ana. 21#Im. 18:16 Boko singkatau ko ese mangaho kawing sintamahuaring, i sie nuhinakang sintamahuaringe dang nukoa kakanoa ko ta nutatahino. Sarang mate i sire ta makarea ana.”

22 Mawu nuhengetang, “Tuhukeko kaul᷊i u tita l᷊au parenta-Ku, tadeau i kumu ta itokol᷊i bou wanua ngu Kanaan, sarang apa Ia mumbawa si kumu. 23Kumbahang manguntu adati bangsa ko natana pai se'e. I sire makasuka si Sia dingang u kaul᷊i u kakanoa i sire ko dal᷊ai. E'e sabapie i sire Daku nitokol᷊i, tadeau i kumu botonge makasu su wanua e'e. 24Tana ko mal᷊oahi l᷊au ko matawa e'e seng Daku nipudiandi si kumu, inau Daku ionggo si kumu makoa koa i kumu.

Ko Ia Mawu, Mawu Ruata ngi kumu ko seng nupuhae ngi kumu bou manga bangsa ko wal᷊inge. 25Ual᷊ing u e'e i kumu mambeng botonge mupul᷊ahae dingang muhino binatang ko haram bou ko tawe haram. Kumbahang kumina binatang ko haram. Binatang e'e Daku nil᷊ahe ko haram, inau boko i kumu kumina e'e i kumu makoa ko mal᷊amuhu. 26I kumu Daku nihae bou manga bangsa ko wal᷊inge tadeau mariadi koa-Ku. I kumu mambeng ko susi ual᷊ing u ko Ia Mawu, dang Ia ko susi.

27Apang tau ko ese arako kowawine ko mukoa pukakauhi dingang u manga roh u taumata ko nate mambeng pakipal᷊o sarang pakapate. Tau e'e mate ual᷊ing u sal᷊ae sisane.”

Currently Selected:

IMAMAT 20: PLT

Highlight

Copy

Compare