KARARIADI 8
8
L᷊uwa napal᷊usi
1Mawu Ruata ta nal᷊iwuhi Nuh l᷊au patiku binatang ko ene dingange su l᷊al᷊ung u kapal᷊i e'e. Mawu Ruata nupatiu anging, hakiu ake e'e nanita naoho. 2Kaul᷊i u kal᷊ipupu u ake su l᷊al᷊ung u tana dang kaul᷊i u sasuwangeng u ake su l᷊angi nihumping-E. Tahiti nawaesi, 3dang ake kal᷊aohoe. Nal᷊iu bou mahasul᷊imampul᷊o su l᷊ou nge ake seng ta tumaniu marange. 4Su tanggali mapul᷊opitu wul᷊ang kapitunge, kapal᷊i e'e nasilari su simbau pusu u wul᷊uri Ararat. 5Ake turusi kal᷊aohoe dang su tanggali kahimotongange su wul᷊ang kapul᷊onge, manga pusu u wul᷊uri nanita nikawua.
6Suapang paupul᷊o su l᷊ounge, i Nuh namuka simbau janela ngu kapal᷊i, 7dang namilo burung boka-boka simbau. Burung e'e ta nusul᷊e kateho turusi nutumila tarai namai sarang ake u l᷊uwa naoho kahingang. 8Tintal᷊a e'e, i Nuh namilo simbau burung paluma guna ngu mudea tahisi minsang ake seng naoho. 9Kateho ual᷊ingu ake mborong nanaka patiku wawo u dunia, burung paluma e'e ta nakarea tampa rarorokange. Inau burung e'e nusul᷊e sarang kapal᷊i, i Nuh nangul᷊uhi l᷊imange bou e'e nupasu burung e'e sarang l᷊al᷊unge. 10I Nuh nangampal᷊i pitu l᷊ou l᷊ai, bou e'e namilo sau burung paluma e'e. 11Nawawul᷊aeng burung e'e nusul᷊e sarang koa i Nuh numbawa raung u zaitung singkal᷊upa ko mborong matitoghi su tatodoe. I'i i Nuh matitong himoneu ake seng naoho. 12Suapang bou nangampal᷊i pitu l᷊ou l᷊ai, i sie paghisa l᷊ai sau namilo burung paluma e'e, dang paghisa e'e burung e'e seng ta nusul᷊e si sie.
13Su tempo ngi Nuh umurie nunguhasusimbau su taunge, su tanggali kahimotongange su wul᷊ang kahimotongange, ake seng naoho kahingang. I Nuh nul᷊engkeri atu u kapal᷊i e'e, dang nutuhung tamai-namai. I sie nakawua himoneu wawo u tana seng mamara. 14Su tanggali duampul᷊o pitu wul᷊ang karuange, dunia seng namara.
15Bou e'e Mawu Ruata nuhengetang si Nuh, 16“Suwangte bou kapal᷊i e'e singkahindo dingang u kawingu, manga ana u l᷊au manga kawing i sire. 17Wawate pasuwang kaul᷊i u burung l᷊au binatang ko wal᷊inge, ko l᷊al᷊abo l᷊au ko dadio, tadeau i sire botonge muhite dang makeke su patiku dunia.” 18Bou e'e i Nuh nusumuwang bou kapal᷊i e'e singkahindo dingang u kawinge, manga anae l᷊au manga kawing i sire. 19Kaul᷊i u burung l᷊au binatang u l᷊ul᷊unge nusumuwang bou kapal᷊i e'e, simbau-simbau tuhu komol᷊ang sinsul᷊ung i sire.
I Nuh nangonggo u sasumba
20I Nuh nupararisi mesba simbau guna ngu Mawu. Nial᷊ae simbau bou apang haghi ngu burung l᷊au binatang ko wal᷊inge ko mapia, bou e'e nisumbange kere korbang tutungang su wawo u mesba e'e. 21Raruru ko mawungi bou korbang sasumba e'e nakal᷊uasi naung u Mawu, dang I Sie nuhabari su l᷊al᷊ung u naung, “Ia seng ta sau mangane dunia i'i ual᷊ingu kakanoa u taumata; Ia matitong himoneu mangki mborong makuda, sipirang u taumata e'e ko dal᷊ai. Ia seng ta sau mupakawinasa patiku ko niriadi ko wiahi kere ko wuhu Daku nikoa i'i. 22Boko dunia i'i borong ene, sintinia mang sarung pia tempo ngu musuang l᷊au tempo ngu manipo, tempo ngu matinoung l᷊au tempo ngu matiti, tempo ngu mawaesi l᷊au tempo ngu tahiti, l᷊ou l᷊au huwi.”
Currently Selected:
KARARIADI 8: PLT
Highlight
Share
Copy
Want to have your highlights saved across all your devices? Sign up or sign in