KARARIADI 46

I Yakub dingang u wal᷊aghenge nakoa sarang Mesir

1I Yakub nurarumpighi apang rarotonge bou e'e nuwua. Nurating u Bersyeba i sie nanarakang u sasumba su Mawu Ruata ko nisumba ngi Ishak i papange. 2Su l᷊al᷊ung u kawawua su sihuwi, Mawu Ruata nuhengetang si sie, “Yakub, Yakub!”

“Iya, Mawu,” nisimbahie.

3“Ia Mawu Ruata, Mawu Ruata ko nisumba ngi papa ngu,” angkung-E. “Kumbahang mataku makoa sarang Mesir. Ia sarung mukoa hintou ngu bangsa ko l᷊abo pai se'e. 4Ia sarung mahundingang i kau sarang Mesir, dang mumbawa hintou ngu musul᷊e sarang wanua i'i. I Yusuf sarung ene su sindihang u boko i kau mapul᷊e asal᷊ie.”

5Bou e'e i Yakub nuwua bou Bersyeba. Manga anae nupaawi i papa ngi sire l᷊au ana kawing i sire sarang wawo u kereta ko niroho ngu ratu ngu Mesir. 6#Wuk. 7:15 I sire l᷊ai numbawa binatang ko papal᷊iharang l᷊au apang rarotong ko nikarea i sire su Kanaan, bou e'e nuwua sarang Mesir. I Yakub numbawa kaul᷊i u hintounge, e'e ko 7kaul᷊i u ana punge kol᷊aese l᷊au kowawine.

8Manga tataho u walagheng ngi Yakub ko natuhu sarang Mesir e'e ko: 9i Ruben, anae ko iyakang; manga anae; i Henokh, i Palu, i Hezron l᷊au i Karmi. 10I Simeon; manga anae: i Yemuel, i Yamin, i Ohad, i Yakhin, i Zohar l᷊au i Saul, ana bou kawinge singkatau kowawine ngu Kanaan. 11I Lewi; manga anae; i Gerson, i Kehat l᷊au i Merari. 12I Yehuda; manga anae: i Syela, i Peres l᷊au i Zerah, arawe ana i Yehuda ko wal᷊inge, e'e ko i Er l᷊au i Onan nate su Kanaan. Manga ana i Peres: i Hezron l᷊au i Hamul. 13I Isakhar; manga anae: i Tola, i Pua, i Ayub l᷊au i Simron. 14Zebulon; manga anae: i Sered, i Elon l᷊au i Yahleel. 15I sire kaul᷊ie ko manga ana ko nipahinding i Lea bo i Yakub su Mesopotamia, su l᷊ikuru e'e l᷊ai anae kowawine arenge i Dina. Inau kaul᷊i u hintou ngi Yakub su kawinge i Lea tilumpul᷊otilu su kataunge.

16I Gad; manga anae: i Zifyon, i Hagi, i Syuni, i Ezbon, i Eri, i Arodi l᷊au i Areli. 17I Asyer; manga anae: i Yimna, i Yiswa, i Yiswi, dang i Beria l᷊au i Serah, wawine ngi sire. Manga ana i Beria ko i Heber l᷊au i Malkiel. 18Kapul᷊onung taumata e'e ko hintou ngi Yakub bo i Zilpa, e'e ko l᷊ang kowawine ko nionggo i Laban si Lea, anae kowawine.

19I Rahel kawing i Yakub pia darua anae, i Yusuf l᷊au i Benyamin. 20#Kar. 41:50-52Su Mesir i Yusuf nakahombang ana darua, i Manasye l᷊au i Efraim ko nipahinding u kawinge i Asnat, ana i Potifera, ko nakoa imam su Heliopolis. 21I Benyamin; manga anae: i Bela, i Bekher, i Asybel, i Gera, i Naaman, i Ehi, i Ros, i Mupim, i Hupim l᷊au i Ared. 22I sire mapul᷊opa su kataunge e'e ko hintou ngi Yakub bou kawinge i Rahel.

23Tuhue i Dan; anae i Husim. 24I Naftali; manga anae: i Yahzeel, i Guni, i Yezer l᷊au i Syilem. 25I sire pitu e'e ko hintou ngi Yakub bo i Bilha, l᷊ang kowawine ko nionggo i Laban si Rahel anae.

26Hintou ngi Yakub ko nakoa sarang Mesir kaul᷊ie nungupul᷊onung su kataunge, su l᷊ikuru manga manuhange. 27#Wuk. 7:14Manga ana i Yusuf ko nipahinding su Mesir pia dua ngkatau, hakiu walagheng i Yakub ko nasongo su Mesir kaul᷊ie pitumpul᷊o su kataunge.

I Yakub l᷊au walaghenge nge su Mesir

28I Yakub nundoi si Yehuda puhoro guna ngu pukui si Yusuf tadeau musombang i papange su Gosyen. Su tempo ngi sire nurating u Gosyen, 29I Yusuf nusumake keretae guna ngu musombang dingang i papange su se'e. Su tempo ngi sire nusombang, i Yusuf nul᷊ahuku si papange dang numpal᷊ehe mal᷊iwue. 30Angkung i Yakub si Yusuf, “Orasi i'i ia seng sadia mate, ual᷊ingu seng nakawua si kau dang matitong himoneu i kau mborong wiahi.”

31Bou e'e i Yusuf nangul᷊i su manga tamahuaringe ko wal᷊inge, “Ia mambeng matamai dang muhabari su ratu himoneu manga gheku dang kaul᷊i u manga ana u simbauku ko natana su Kanaan seng nasongo. 32Ia sarung mangul᷊i himoneu i kumu ko mul᷊al᷊ukari manga domba l᷊au sapi, dang ko seng numbawa binatang papal᷊iharang i kumu l᷊au manga rarotong i kumu. 33Boko ratu mukui si kumu dang makina hal᷊i i kumu, 34ul᷊ie si sie himoneu i kumu ko mul᷊al᷊ukari binatang papal᷊iharang mangki mborong ko dio, musul᷊ung kere u manga i upung i kami. Dingang kere'e i sie sarung mundoi si kumu patana su Gosyen.” I Yusuf nangul᷊i u hal᷊i e'e ual᷊ingu taumata ngu Mesir mupundang mahina mul᷊al᷊au dingang u manga mul᷊al᷊ukari binatang.

Currently Selected:

KARARIADI 46: PLT

Highlight

Copy

Compare