KARARIADI 41
41
I Yusuf nupakal᷊ahe mangal᷊eng u manga ipi ratu ngu Mesir
1Suapang nal᷊iu dua taung, ratu ngu Mesir nipi, himoneu i sie ko kararisi su wiwihi u sal᷊uhi Nil. 2Singkawua pia pitu sapi ko matatawa dang pisinge mal᷊enda, nusumuwang bou sal᷊uhi e'e bou e'e nanita nukumang onasi su wiwihi u sal᷊uhi e'e. 3Bou e'e pia pitu sapi kowawine nusumuwang l᷊ai; manga binatang e'e mahusu dang kate pisi namikung duhi. Manga sapi ko mahusu e'e nurumarisi su sindihang u manga sapi ko matawa, su wiwihi u sal᷊uhi e'e. 4Bou e'e manga sapi ko mahusu nukumang manga sapi ko matawa. Bou e'e ratu napuko. 5Bou e'e i sie nikapatikilang dang sau naipi. Su l᷊al᷊ung u ipinge i sie nakawua pitu wul᷊ihi u gandung ko pia tahoe dang masasasa nutumuwo su pohoe simbau. 6Bou e'e nutumuwo l᷊ai pitu wul᷊ihi u gandung ko wal᷊inge, ko mal᷊ahusu dang nukumoho nahango ngu anging u tana l᷊inggi. 7Bou e'e wul᷊ihi u gandung ko mahusu e'e namelohi kapitu ngu wul᷊ihi ko pia tahoe kanini. Bou e'e ratu napuko dang nakatitong himoneu i sie ko nipi. 8#Dan. 2:2Singkamal᷊ukari ratu pundangeng balisa, ual᷊ingu e'e niroie pukui kaul᷊i u tahapatehi dang taumata ko pia titonge su Mesir. Bou e'e niwuke'e ipinge si sire, kateho takoae sarang singkatau ko botonge makapul᷊ahe mangal᷊eng u ipi e'e.
9Bou e'e musasiliwiri inung nangul᷊i su ratu, “Su l᷊ou i'i l᷊angu mambeng mangaku ngu pusansal᷊aku. 10Horo i Tuang Ratu nuwawal᷊uang su musasiliwiri boroti dang si sia, bou e'e i kami nipasu su l᷊al᷊ung u tutupang, su wal᷊e tumbonang u mudadiaga istana. 11Pia su sihuwi i kami rua nipi, dang ipi ngi kami rua e'e mutatintang mangal᷊enge. 12Singkatau ana ko makuda tau Ibrani ene su se'e dingang i kami. I sie mutatangkiang tumbonang u mudadiaga istana e'e. I kami nuwuke ngu ipi i kami si sie, bou e'e nipakal᷊ahe'e mangal᷊eng ipi e'e. 13Nal᷊ahe kaul᷊ie nariadi musul᷊ung ko nihabarie, e'e ko i Tuang Ratu nupusul᷊e ngu ia sarang pangkati ko horo, kateho nuhukung u papate su musasiliwiri boroti e'e.”
14Kuteu ratu nundoi pangal᷊a si Yusuf, dang maehong-ehong i sie nipasuwang bou tutupang. Suapang i Yusuf bou nangahuri kumie dang nangahusi l᷊aku, i sie nupasaruang ratu. 15Angkung u ratu si sie, “Ia nipi, dang takoae sarang singkatau ko nakapul᷊ahe mangal᷊enge ipiku e'e. Pia ko nuhabari si sia himoneu i kau botonge makapul᷊ahe mangal᷊eng u ipi.”
16I Yusuf nusumimbahi, “Wal᷊inge l᷊ang u, Tuangku, kateho ko Mawu Ruata ko sarung mangonggo pul᷊al᷊ahi ko nuhino.”
17Bou e'e ratu nangul᷊i, “Ia nipi himoneu ia ko kararisi su wiwihi u Saluhi Nil. 18Bou e'e nusumuwang bou sal᷊uhi e'e pitu sapi ko matatawa dang pisinge mal᷊enda, bou e'e nanita nukumang onasi su wiwihi u sal᷊uhi e'e. 19Bou e'e nusumupu pitu l᷊ai sapi ko wal᷊inge, ko mal᷊ahusu dang kate pisi namikung duhi. Mborong tangkeng ia nakawua sapi ko kere'e kal᷊al᷊aie su kaul᷊i u Mesir. 20Manga sapi ko mal᷊ahusu e'e nukumina nasue pitu sapi ko matatawa kanini. 21Kateho bou e'e manga sapi ko mahusu e'e mborong tatapi mahusu. Bou e'e ia napuko. 22Bou e'e ia nikapatikilang, dang sau nipi, himoneu ia nakawua pitu wul᷊ihi u gandung ko pia tahoe dang masasasa, nutumuwo su pohoe simbau. 23Bou e'e nutumuwo l᷊ai pitu wul᷊ihi u gandung ko mal᷊ahusu dang nukumoho nahango ngu anging u tana l᷊inggi. 24Wul᷊ihi u gandung ko mahusu e'e namelohi wul᷊ihi u gandung ko pia tahoe kanini. Seng daku niwuke ipiku darua e'e su manga tahapatehi, kateho takoae sarang singkatau ko nakapul᷊ahe mangal᷊enge.”
25Bou e'e i Yusuf nangul᷊i su ratu, “Ipi darua e'e musul᷊ung mangal᷊enge; Mawu Ruata seng nuhabari si Tuangku apa ko sarung ikoa-E. 26Pitu sapi ko matatawa e'e ko pitu taung, dang pitu wul᷊ihi u gandung ko pia tahoe e'e ko pitu taung l᷊ai; ipi darua e'e ko musul᷊ung mangal᷊enge. 27Pitu sapi ko mal᷊ahusu, ko nasupu samuringe, l᷊au pitu wul᷊ihi u gandung ko mal᷊ahusu dang nukumoho nahango ngu anging u tana l᷊inggi ko tempo ngu kal᷊ahutung pitu taung l᷊iwuenge. 28Kere ko seng nihabari l᷊ang u si Tuangku, Mawu Ruata seng nangandaghi si Tuangku apa ko sarung ikoa-E. 29Hindo sarung sumongo pitu taung tempo ko napene u wiahi su kal᷊abo u wanua ngu Mesir. 30-31Bou e'e sarung sumongo pitu taung tempo ngu kal᷊ahutung, dang tempo ngu napene u wiahi e'e sarung ta ikatinaungang, ual᷊ingu tempo kal᷊ahutung e'e sarung kere'e katital᷊ie, hakiu wanua e'e nal᷊inggi. 32Ipi ngi Tuangku pakarua, e'e mangal᷊enge himoneu hal᷊i e'e seng nitantu u Mawu Ruata dang himoneu Mawu Ruata sarung maehong mukoa e'e.
33Ual᷊ingu e'e mapiang i Tuangku mamile singkatau ko pande dang mapilesa dang mangonggo kawasa si sie guna ngu mangatori wanua i'i. 34-35I Tuangku l᷊ai mambeng puhengke manga pul᷊ahal᷊i ko wal᷊inge, dang pangonggo si sire kawasa guna ngu pangal᷊a simbahageang l᷊ima bou kaul᷊i u pananipong gandung su l᷊iwuenge pitu taung tempo ko napene u wiahi e'e, bou e'e mangomol᷊i suapang soa dang mundiaga e'e. 36Gandung e'e sarung makoa sasadia ngu kang su l᷊iwuenge pitu taung tempo ngu kal᷊ahutung ko sarung sumongo su Mesir. Dingang kere'e kawanua ta sarung mate kal᷊unusang.”
I Yusuf nihengke nakoa gubernur su Mesir
37Ratu dingang u manga pul᷊ahal᷊ie nukumire su kirou ngi Yusuf e'e. 38Bou e'e ratu nangul᷊i si sire, “Susa i kite makarea taumata ko wal᷊inge ko lebe mutatahino bo i Yusuf, watu'u i sie niaha u Roh u Mawu Ruata.” 39Kuteu ratu nangul᷊i si Yusuf, “Mawu Ruata seng nuhabari kaul᷊i u i'i si kau, inau nal᷊ahe himoneu i kau lebe pande dang mapilesa bou manga i sai-sai. 40#Wuk. 7:10 I kau sarung daku ihengke makoa gubernur, dang kaul᷊i u kawanuaku mutumuhu parenta ngu. Kitang ia sisaneku ko lebe mangawasa bo i kau.” 41-42#Dan. 5:29Bou e'e ratu nul᷊ua bou tal᷊imboronge sinsing ko pia ukirie capi u kararatuang, bou e'e nil᷊ohoe su tal᷊imboro i Yusuf apiru nangul᷊i, “Dingang u i'i i kau daku ihengke makoa gubernur kaul᷊i u Mesir.” Bou e'e nipake'e l᷊ai si Yusuf simbau juba leneng ko maal᷊usi, dang nilohokange hante wul᷊aeng su l᷊ehie. 43Bou e'e nionggoe si Yusuf kereta kararatuang ko karuange guna ngu sasakenange, dang ko mul᷊uhal᷊i su ratu ko il᷊uadateng l᷊umal᷊eng su horo u kereta e'e apiru kahabari, “Pakaingati! Onggol᷊e l᷊al᷊eng! Onggol᷊e l᷊al᷊eng!” Kere'e i Yusuf nihengke nakoa gubernur kaul᷊i u Mesir. 44Angkung i ratu si sie, “Ko ia ratu dang ia mamohang himoneu boko takoae parenta bo i kau takoae sarang singkatau su kaul᷊i u Mesir botonge mukoa manga apa.” 45-46Bou e'e ratu nangonggo simbau areng u Mesir si Yusuf, e'e ko Zafnat-Paaneah. Nionggol᷊ang u l᷊ai singkatau kawinge arenge i Asnat, ana i Potifera ko nakoa imam su soa ngu Heliopolis. I Yusuf umurie tilumpul᷊o su taunge su tempo i sie nanita nuhal᷊i guna ratu ngu Mesir. Kuteu i Yusuf nuwua bou istana ngu ratu dang natamai nul᷊iku kaul᷊i u wanua e'e. 47Su l᷊al᷊ung u tempo pitu taung ko napene u wiahi e'e tana nangonggo u ghisinge napal᷊iu ul᷊ie. 48Gandung e'e nighopol᷊i Yusuf bou e'e niresoe su manga soa. Su apang soa i sie nundeso gandung l᷊uang u manga anseri su sindihang u soa e'e. 49Gandung ko niresoe e'e kere'e kaul᷊ie hakiu i Yusuf nangiro nundekeng ual᷊ing u ul᷊ie musul᷊ung u nei su wiwihi u apeng.
50Su horo u tempo kal᷊ahutung e'e nahumpa, i Asnat kawing i Yusuf nahinding ana hindua kol᷊aese. 51Angkung i Yusuf, “Mawu Ruata seng nukoa si sia ta nakatinaung kaul᷊i u apang kasasusaku dang su manga ana u singkatau ngi papaku.” Ual᷊ingu e'e nisighonge anae ko kaiyakanenge i “Manasye”. #41:51: Manasye: Areng i'i raringihang kere su wahasa ngu Ibrani mangal᷊enge “mupakal᷊ihuwi”. 52I sie sau nangul᷊i, “Mawu Ruata seng nangonggo manga ana si sia su tempo ngu kasasusaku,” bou e'e nisighonge anae ko karuange i “Efraim”. #41:52: Efraim: Areng i'i raringihang kere su wahasa ngu Ibrani mangal᷊enge “nangonggo manga ana”.
53Pitu taung tempo ko napene u wiahi ko nikatemangeng u kaul᷊i wanua ngu Mesir e'e, seng nasue. 54#Wuk. 7:11Kuteu nasongote pitu taung tempo ngu kasasusa, nuhino kere ko seng nihabari Yusuf. Su kaul᷊i u dunia nariadi kal᷊ahutung, arawe su kaul᷊i u Mesir pia sasadia ngu wiahi. 55#Yoh. 2:5Su tempo ngu kawanua ngu Mesir manita makapundang kal᷊ahutung, i sire nundo kang su ratu. Bou e'e ratu nangoro si sire pakoa sarang koa i Yusuf dang putuhu apang ko niparenta ngi Yusuf si sire. 56Su tempo ngu kal᷊ahutung kasaunge katatambange dang seng nurumaki sarang kaul᷊i u tampa, i Yusuf namuka kaul᷊i u gudang dang nuwal᷊u gandung su tau Mesir. 57Bou kaul᷊i u dunia manga taumata nusumongo sarang Mesir guna ngu mul᷊uang gandung bo i Yusuf, watu'u kal᷊ahutung e'e kere'e kabuhae su apang tampa.
Currently Selected:
KARARIADI 41: PLT
Highlight
Copy
Compare
Share
Want to have your highlights saved across all your devices? Sign up or sign in
