SASUWANG 9

Binatang papal᷊iharang nate

1 Mawu nuhengetang si Musa, “Tamaite putatingo ngu ratu, dang ul᷊iko si sie himoneu Mawu, Ruata ngu tau Ibrani, nangul᷊i: ‘Pakawalako umati-Ku matamai tadeau i sire botonge makapanumba si Sia. 2Kamangkeng i kau ta mundoi si sire, 3Ia sarung mupasongo ngu sahinda ko mabuha su kaul᷊i u binatang papal᷊iharang i kumu, kawal᷊o, keledai, onta, sapi, domba l᷊au kambing i kumu. 4Ia sarung muhae ngu binatang papal᷊iharang u tau Israel l᷊au binatang papal᷊iharang u tau Mesir. Bou binatang papal᷊iharang u tau Israel, takoae sarang simbau ko sarung mate. 5Ia, Mawu, manantu u l᷊ou dol᷊ou guna ngu mukoa hal᷊i e'e.’ ”

6Ndai mal᷊ou, Mawu nukoa kere ko seng niul᷊i-E, kaul᷊i u binatang papal᷊iharang u bangsa Mesir nate, kateho bou binatang papal᷊iharang taumata ngu Israel sarang simbau takoae ko nate. 7Ratu nukina apa ko seng nariadi, bou e'e niwuke si sie himoneu bou binatang pupal᷊iharang u taumata ngu Israel takoae sarang simbau ko nate. Kateho ratu nukitihi watu dang ta nupakawala ngu bangsa e'e matamai.

Sahinda wisul᷊i

8 Mawu nuhengetang si Musa l᷊au si Harun, “Pangal᷊ako awu pirang hangkung bou tampa pananongkateng. Su tingo ngu ratu, i Musa mambeng manawuhi awu e'e sarang kinoang. 9Kuteu awu e'e sarung mukaesi su kaul᷊i u tana Mesir, su taumata dang binatang awu e'e ko sarung makal᷊itou manga wisul᷊i ko mapusu makoa l᷊esi munana.” 10#Kl᷊h. 16:2Bou e'e i Musa l᷊au i Harun nangal᷊a awu, dang nutumatingo su ratu. I Musa nanawuhi awu e'e sarang kinoang. Su taumata dang binatang nul᷊umitou manga wisul᷊i ko napusu nakoa l᷊esi nunana. 11Manga mapapande ngu mul᷊iku mata ta makaputingo si Musa watu'u kaul᷊i u badang i sire napene u wisul᷊i musul᷊ung u taumata ngu Mesir ko wal᷊inge. 12Kateho Mawu nupukitihi u ratu, dang kere seng bou niul᷊i u Mawu, ratu tawe mo mupandung didato ngi Musa l᷊au i Harun.

Tahiti eisi

13 Mawu nuhengetang si Musa, “Tamaiko dol᷊ou pakal᷊uka-l᷊ukari kahingang pusuma u ratu, dang pangul᷊iko si sie himoneu Mawu, Ruata ngu taumata Ibrani nangul᷊i: ‘Pakawalako umati-Ku matamai tadeau i sire makapanumba si Sia. 14Paghisa i'i Ia sarung mupasongo ngu silaka ko wal᷊inge kitang su manga mapapangkati arako kitang su kawanua, kateho l᷊ai si kau, tadeau i kau matitong himoneu takoae sul᷊ung-Ku su kaul᷊i u dunia, 15Boko Ia mo muhukung i kau dang kawanuangu dingang u sahinda, nal᷊ahe i kumu seng nawinasa kahingang. 16#Rm. 9:17Kateho i kumu Daku iwala wiahi, tadeau Ia botonge mupatode kawasa-Ku si kau, hakiu areng-Ku tumeleng su kaul᷊i u dunia. 17Maning we kere'e, i kau borong l᷊ai marange naungu dang ta mupakawala ngu umati-Ku matamai. 18Dol᷊ou mal᷊ukari su tempo ko musul᷊ung, Ia sarung mupasongo ngu tahiti eisi ko mauha kere ko mborong ta paghisa nariadi su Mesir mangkeng l᷊inau tempo horo sarang tempo i'i. 19Kuteu parentaiko tadeau kaul᷊i u binatang papal᷊iharang dang patiku apang ko tataghuaneng u ko ene su l᷊ikuri wawa sarang tampa ko takoae sungkal᷊ange. Kaul᷊i u taumata l᷊au u binatang papal᷊iharang ko ene su l᷊ikuri dang ta makapusirung sarung mate kahinomang u tahiti eisi.’ ” 20Pira ngkatau bou tal᷊oara u manga mapapangkati nataku su didato ngu Mawu. I sire numbawa manga l᷊ang dang binatang i sire nusumu sarang wal᷊e tadeau masirung. 21Kateho ko wal᷊inge ta nundaringihi l᷊aingati e'e dang nanintang u manga l᷊ang dang binatang papal᷊iharang i sire su ngudae.

22Bou e'e Mawu nuhengetang si Musa, “Hengkeko l᷊imau sintarai, dang tahiti eisi sarung rumasehi su kaul᷊i u tana ngu Mesir. Tahiti e'e sarung mahino su taumata, binatang dang su patiku sasuang su anseri.” 23I Musa nuhengke tikinge sintarai, dang Mawu nuparenta ngu l᷊ul᷊u dang tahiti eisi dang kila manaheri dunia. Mawu nuparenta ngu 24#Kl᷊h. 8:7, 16:21tahiti eisi ko mauha takoae sul᷊unge nihundinganeng u kila ko musasaheri. E'e tahiti eisi ko kauhakenge su wuke ngu Mesir. 25Su kaul᷊i u soa tahiti eisi e'e nangumu kaul᷊i u patiku sasuang su anseri, nasu l᷊ai taumata dingang u binatang papal᷊iharang. Kaul᷊i u sasuang su anseri narusa dang manga kau nal᷊ahaka. 26Kitang u bageang Gosyen, tampa katanakeng u manga taumata ngu Israel, ta nikahinomang u tahiti eisi.

27Bou e'e ratu nukui si Musa l᷊au si Harun, dang nangul᷊i, “Ia seng nubardosa, Mawu ko mang tingari, ia l᷊au u kawanuaku seng nukoa sal᷊a. 28Pukal᷊iomanengko su Mawu; i kami seng nasusa kahingang karea u l᷊ul᷊u l᷊au tahiti eisi i'i. Ia sarung mamilo i kumu matamai. I kumu tahawal᷊uasi matana si'i l᷊ai.”

29I Musa nangul᷊i su ratu, “Pakaehong su horo u ia murating su l᷊ikuru soa, ia sarung muhengke u l᷊imaku mukal᷊iomaneng su Mawu l᷊ul᷊u sarung mangiro dang tahiti eisi sarung mawaesi, tadeau i Tuangku matitong himoneu dunia i'i ko koa u Mawu. 30Kateho ia matitong himoneu i Tuangku dang mapapangkati mborong l᷊ai ta mataku u Mawu Ruata.”

31Sasuang hote l᷊au jelai nal᷊uma, watu'u hote kapuhowae dang jelai kapuwul᷊ihi. 32Kateho gandung dang manga wua pia watunge ta narusa watu'u mborong wal᷊inge temponge.

33Bou e'e i Musa nanintang u ratu dang natamai sarang l᷊ikuru soa, pai se'e i sie nuhengke u l᷊imange nukal᷊iomaneng su Mawu. Su tempo e'e l᷊ai nangiro l᷊ul᷊u, tahiti eisi dang tahiti. 34Saritau ratu nakawua apang ko nariadi, i sie sau nubardosa. I sie dingang u manga mapapangkati tatapi nukitihi. 35Kere ko seng niul᷊i u Mawu si Musa, ratu ta nupakawala ngu Israel matamai.

Currently Selected:

SASUWANG 9: PLT

Highlight

Copy

Compare