SASUWANG 30

Mesba tampa u panutungang dupa

(Sasu. 37:25-28)

1 Mawu l᷊ai nangul᷊i si Musa, koako mesba simbau bou kau akasia tampa u panutungang dupa. 2Kakoa u mesba e'e mambeng muwuku, nandue l᷊au wunahie taha paupul᷊ol᷊ima su sentinge, dang range'e siompul᷊o su sentinge. Su wukunge pa koateko manga sasungenge ko masimbau dingang u mesba e'e. 3Bahageang wawoe, nasu l᷊ai sindihange pa dang manga sasungenge mambeng lapisang u wul᷊aeng tuleng dang l᷊ikuteng u bingkenge wul᷊aeng. 4Koateko wukal᷊ae darua su wawa u bingke su sindihange darua ipanahang kau papikul᷊ang u mesba e'e. 5Papikul᷊ang e'e mambeng ikoa bou kau akasia dang nilapisang dingang u wul᷊aeng. 6Piloko mesba e'e su l᷊ikuru heka ko su tingo ngu Wantal᷊i u Pudadiandi. Su tampa e'e Ia sarung musombang dingange. 7Sintinia mal᷊ukari su tempo ngi Harun musumongo manadia sol᷊o, i sie mambeng manutung dupa mawungi su wawo u mesba e'e. 8Hal᷊ie mambeng koatenge l᷊ai su tempo ngu i sie mupahena ngu sol᷊o wawul᷊aeng. Sasumba dupa e'e mambeng koateng turusi su kanandu tempo. 9Kumbahang manumba su wawo u mesba e'e dupa ko ilarang, korbang binatang arako korbang l᷊ahaghesi; kumbahang l᷊ai manuang sasumba ake u anggori su wawoe. 10Paghisa sintaung i Harun mambeng mukoa upacara mupakasusi ngu mesba kere maniwohi kapa u sasungenge dingang u daha ngu binatang ko isumba guna ngu kal᷊aampung u dosa. Hal᷊ie mambeng ikoa sintinia taung su kanandu u tempo. Mesba e'e mambeng ko susi kaul᷊ie dang nitani guna-Ku.”

Balasteng guna ngu Kema ngu Mawu

11 Mawu nuhengetang si Musa, 12“Su tempo ngu pundekenang u bangsa Israel, sintinia taumata kol᷊aese mambeng mamaehi si Sia doi tatubusi guna ngu watangenge tadeau i sie ta kahinomang u silaka su tempo ngu rekenang e'e nikoa. 13#Sasu. 38:25-26; Mat. 17:24Apang taumata ko irekeng su l᷊al᷊ung u rekenang e'e kaul᷊ie mambeng mamaehi doi ko ul᷊ie nitantu tumuhu hariga ko nikoa su Kema-Ku kere l᷊aonggo ko nitantu su Kema-Ku kere bantuang ko nitantu guna-Ku. 14Apang taumata ko nirekeng su l᷊al᷊ung u rekenang e'e, ko apang ko ese umurie duampul᷊o su taunge arako lebe mambeng mangonggo u bantuang ko nitantu e'e. 15Taumata ko kala ta mambeng mamaehi lebe, dang taumata ko susa makurang su tempo ngi sire mamaehi doi tatubusi guna ngu watangenge. 16Tuntukeko doi e'e bou bangsa Israel, dang koako guna ngu nggaweti su l᷊al᷊ung u Kema-Ku. Kaul᷊ie ko doi tatubusi guna ngu watangeng i sire, dang Ia sarung sintinia makatinaung guna ngu manirung si sire.”

Bak bou witu

17 Mawu nuhengetang si Musa, 18#Sasu. 38:8“Koako bak simbau bou witu dingang u l᷊ampahie bou witu l᷊ai. Piloko bak e'e su tal᷊oara u Kema dang mesba, bou e'e tahoneko dingang u ake. 19Ake e'e guna ngi Harun dang manga anae tadeau i sire botonge manguhasi l᷊ima l᷊au l᷊aeri 20-21su horo u sumu Kema arako sumandighi mesba guna ngu mumbawa korbang tongkateng. I sire mambeng mukoa e'e tadeau ta pateng. Atorang e'e mambeng tuhukang i sire dang hintou ngi sire sarang kal᷊iwuenge.”

L᷊ana guna ngu upacara

22 # Sasu. 37:29 Mawu nuhengetang si Musa, 23“Pangal᷊ako manga rampa ko kapiange, nungu kilo mur natuno, tilu ngkilo kau manisi, tilu ngkilo tuwu mawungi, dang nungu kilo kau teja. 24Kaul᷊ie itimbang tumuhu timbangang ko ipake su Kema-Ku. Tambaiko pa u literi l᷊ana zaitung, 25dang koateko l᷊ana guna ngu upacara, ko ilau musul᷊ung u l᷊anisi. 26Pakeko l᷊al᷊au e'e guna ngu pul᷊anisi Kema-Ku, Wantal᷊i u Pudadiandi, 27meda dang kaul᷊i u sal᷊iumpuhi, rihi ngu sol᷊o dingang u sal᷊iumpuhi, mesba tampa panutungang dupa, 28mesba guna ngu korbang tongkateng dingang u kaul᷊i u sal᷊iumpuhi, dang bak u ake dingang u l᷊ampahie. 29Dingang l᷊al᷊eng e'e i kau mambeng muhae ngu manga barang e'e guna ngu Ia, tadeau kaul᷊ie mariadi ko susi. Kaul᷊i u patiku ko nahino su mesba e'e mambeng isarakang su Mawu, dang i sai l᷊ai ko manuhung sarung makarea silaka watu'u toghasi u kasasusinge. #30:29: silaka ual᷊ingu katatoghasi u kasasusinge, Tuhunge 29:37. 30L᷊anaiko l᷊ai i Harun dang manga anae tadeau i sire itabisi makoa imam guna ngu mutangkiang si Sia. 31Ul᷊iko su bangsa Israel himoneu su kanandu u tempo l᷊ana guna ngu upacara e'e ko nitani guna ngu Ia. 32L᷊ana e'e ta botonge isiwohi su manga taumata biasa. Kumbahang mukoa l᷊ana kere'e dingang mupake l᷊al᷊au e'e l᷊ai. L᷊ana e'e ko susi, dang mambeng irekeng kere barang ko susi. 33Taumata ko mukoa l᷊ana kere e'e, arako mupake l᷊ana e'e guna ngu taumata ko wal᷊inge imam, ta botonge irekeng kere tataho umati-Ku.”

Dupa

34 Mawu nuhengetang si Musa, “Pangal᷊ako rampa manga pira mbau haghinge ko musul᷊ung kaul᷊ie, e'e ko pul᷊u u sense, pisi ngu puhe, pul᷊u u rasamala dang dupa ko tuleng. 35Pakeko kaul᷊i u e'e guna ngu pukoa dupa pia l᷊al᷊aue mawungi. Tambaiko asinge tadeau dupa e'e tatapi ta muwal᷊u dang botonge ipake guna ngu Ia. 36-37Simbahageang bou dupa e'e mambeng il᷊unta pakal᷊ul᷊e. Wawako e'e sarang Kema-Ku dang sawuhiko su tingo ngu Wantal᷊i u Pudadiandi. Dupa e'e mambeng tuhungang kere barang ko susi nitani guna ngu Ia. Kumbahang mukoa dupa pia l᷊aue dingang u haghinge ko kere e'e l᷊ai guna ngi kumu. 38I sai ko mukoa l᷊anisi kere e'e, ta l᷊ai irekeng tataho umati-Ku.”

Currently Selected:

SASUWANG 30: PLT

Highlight

Copy

Compare