SASUWANG 27

Mesba

(Sasu. 38:1-7)

1“Pukoako mesba simbau bou kau akasia. Kakakoae muwuku, nandue dingang u wunahie taha dua meteri dua senti dang range'e simeteri tilu senti. 2Su apang wukunge ko rasi mambeng koateng u manga sasungenge ko makoa simbau dingang u mesba. Kaul᷊ie mambeng lapisang dingang witu. 3Koateko manga kawali, sikopi, manga wohosi, manga poroki dang tampa u putung. Kaul᷊i u sal᷊iumpuhi e'e mambeng koateng bou witu. 4Panganangko kawa bou witu dang taingko pa wukal᷊a guna ngu kau ghaghual᷊enge su wukunge pa su wal᷊ange. 5Range u anang u kawa e'e mambeng stenga bou range u mesba. Anang u kawa e'e mambeng ilawung su mesba su wal᷊ange. 6Koateko darua kau ghaghual᷊eng bou kau akasia nilapisang u witu, 7dang tahoko su l᷊al᷊ung u manga wukal᷊ae su darua sindihang u mesba su tempo ngu mamikul᷊i mesba e'e. 8Koako mesba e'e bou pupal᷊i dang pia l᷊oahi su l᷊al᷊unge, tumuhu kao ko Daku nitibo si kumu su wawo u wul᷊uri i'i.”

Salasari Kema ngu Mawu

(Sasu. 38:9-20)

9“Pukoako salasari pakal᷊iku su Kema-Ku ko nil᷊ikutang ngu pampele bou heka leneng ko al᷊usi. Su simbuka ngu timuhi pampele e'e nandue paupul᷊o pa su meteri, 10nitahangeng u duampul᷊o rihi witu, nahia u l᷊aumpahi u witu, dang kakai dingang u kakaie bou sal᷊aka. 11Koateko kere e'e l᷊ai su simbuka ngu sawunahi. 12Su simbuka ngu wahe, pampele e'e nandue duampul᷊odua su meteri dingang u rihinge mapul᷊o dang mapul᷊o l᷊ampahie. 13Su simbuka ngu raki, ko pia tukarie, nandu u pampele e'e l᷊ai duampul᷊odua su meteri. 14-15Su kuihi kuaneng tukari e'e mambeng sangetang u heka, nahia u nandue taha nungu meteri nungu senti dingang tatilu su l᷊al᷊ung u l᷊ampahie tatilu. 16Guna ngu tukari mambeng manange heka nandue sio meteri bou leneng al᷊usi ko nitenung bou wol ko biru, ungu dang mahamu, dang nil᷊ighaheng dingang u suji. Guna ngu manahang heka u tukari e'e mambeng koateng rihinge pa dingang pa l᷊ampahie. 17Kaul᷊i u rihi ko nal᷊iku su lilahi e'e mambeng ipusasumpu simbau dingang ko wal᷊inge dingang u kakai sal᷊aka, kakai e'e mambeng bou sal᷊aka dang l᷊ampahie bou witu. 18Heka ko nal᷊iku su salasari e'e nandue paupul᷊o pa su meteri, wunahie duampul᷊odua su meteri dang range'e dua meteri dua senti, heka e'e mambeng koateng bou heka leneng ko al᷊usi dang l᷊ampahie bou witu. 19Kaul᷊i u sal᷊iumpuhi ko ipake su l᷊al᷊ung u Kema, kaul᷊i u papasi guna ngu Kema dang guna ngu senggoe mambeng ikoa bou witu.

Hal᷊i u mangurusi sol᷊o

(Im. 24:1-4)

20Roiko taumata ngu Israel pumbawa l᷊ana zaitung kahingang dang kapiange guna ngu sol᷊o su l᷊al᷊ung u Kema-Ku, tadeau botonge iriko dang humena turusi. 21I Harun l᷊au u manga anae mambeng mangurusi sol᷊o e'e bou wawul᷊aeng murating mal᷊ukari su tampa Ia ene, su l᷊ikuri heka ko masasange su tingo ngu Wantal᷊i u Pudadiandi. Parenta e'e mambeng koateng u taumata ngu Israel dang hintounge sarang kal᷊iwuenge.

Currently Selected:

SASUWANG 27: PLT

Highlight

Copy

Compare