SASUWANG 18

I Yitro nutiwo si Musa

1I Yitro i empo ngi Musa, imam su Midian, nakaringihi kaul᷊i u apang ko nikoa Mawu Ruata si Musa l᷊au bangsa Israel, su tempo ngu i sie nangaha si sire nusumuwang bou Mesir. 2#Sasu. 2:21-22Kuteu natamaite i Yitro nutiwo si Musa numbawa si Zipora, kawing i Musa ko mborong natana su Midian, 3#Wuk. 7:29ringang i Gersom #18:3: Gersom: putuhung 2:22. dang i Eliezer anae ko ese darua. Ana ko kahimotongange nisigho si Gersom watu'u i Musa nangul᷊i, “Ia singkatau tau raghi su tampa u tau”; 4Ana karuange nisigho si Eliezer #18:4: I Eliezer: Areng i'i tingihie kere didato ngu Ibrani ko mangal᷊enge “Mawu Ruata nutul᷊ung si sia”. watu'u i Musa nangul᷊i, “Mawu Ruata isumba ngi upungku seng nutul᷊ung dang nupakasal᷊amati si sia hakiu ia ta nipate ngi ratu ngu Mesir”. 5I Yitro nusumongo singkahindo dingang kawing i Musa dang anae darua su tana l᷊inggi tampa i Musa nukema masandighi u wul᷊uri susi. 6I Musa nihabareng himoneu i sire musumongo, 7inau nusumuwang i sie nanginsomahi si sire. I sie nusuba su tingo ngi Yitro dang nangimbu. I sire nukina kapapia ngu badang i sire simbau-simbau, bou e'e nusumu su l᷊al᷊ung u kema ngi Musa. 8I Musa nuwuke si emponge kaul᷊i u apang ko nikoa u Mawu su ratu dang su bangsa Mesir guna ngu mupakasal᷊amati taumata ngu Israel. I sie l᷊ai nuwuke si sie apang manga l᷊intihi ko ipusombang u bangsa Israel su tal᷊oara u l᷊al᷊eng, dang kirapa Mawu nupakasal᷊amati si sire. 9Nakaringihi kaul᷊i u e'e, i Yitro nakapundang mal᷊uasi, 10dang nangul᷊i, “Idalote Mawu ko nupakasal᷊amati si kumu bou l᷊ima ngu ratu dang bangsa Mesir! Dalo su Mawu ko nupakal᷊iu ngu bangsa Israel bou putahul᷊ang. 11Tempo i'i ia matitong himoneu Mawu lebe ko l᷊abo bou kaul᷊i u mahang u mahang mawu, watu'u kaul᷊i u e'e nikoa-E su tempo taumata ngu Mesir marea u taumata ngu Israel dingang u kal᷊aoboti.” 12Bou e'e Yitro numbawa pira mbau korbang ko tutungang l᷊au korbang ko ihata guna ngu sasumba su Mawu Ruata. I Harun dang kaul᷊i u pangaha u bangsa Israel nusumongo dang nukumang singkakang dingang i Yitro si l᷊al᷊ung u sasongo ngu Mawu Ruata.

I Musa nuhengke manga mamamonesi

(Sau. 1:9-18)

13Ndai mal᷊ou i Musa namutusi manga purarendehi su tal᷊oara u manga taumata ngu Israel. Hal᷊i e'e nakasue tempo bou mal᷊ukari sarang huwi. 14Suapang i Yitro nakawua kaul᷊iue ko mambeng hal᷊ikang i Musa, i sie nukina, “Sude'e l᷊ai ko mambeng hal᷊ikangu guna ngu bangsa i'i? Apa ko kaul᷊i i'i hal᷊ikangu sisane, hakiu kitang guna ngu mundo tughungu, manga taumata e'e mambeng rumarisi su si'i manita mal᷊ukari sarang huwi?”

15Sasimbahi i Musa, “Manga taumata e'e nusumongo sarang koaku guna ngu mundea titong kao u Mawu Ruata. 16Kamangkeng i sire murarendehi, i sire tumatingo si sia tadeau pamutusi parkara ngi sire, dang ia puhabari si sire apang parenta dang apang tita ngu Mawu Ruata.”

17Angkung i Yitro, “Dal᷊ai kere'e. 18Dingang l᷊al᷊eng e'e, i kau mupakawau watangengu sisane, dang l᷊ai manga taumata e'e. Hal᷊i e'e tumaniu maul᷊i guna ngu singkatau. 19Raringihiko tughuku, dang Mawu Ruata sarung mutul᷊ung si kau. Tingari mapia i kau mumakili bangsa i'i su saruang ngu Mawu Ruata dang mumbawa parkara ngi sire si Sie. 20I kau mambeng manintiro si sire apang parenta ngu Mawu Ruata dang mul᷊ahe si sire, kirapa muwiahi mapia dang apa ko mambeng koateng i sire. 21Kateho su simbuka ngu e'e i kau mambeng mamile pirangkatau manga ko ese ko pilesa dang manibo si sire makoa pangaha u sihiwu su kataunge, mahasu su kataunge, limampul᷊o su kataunge, dang mapul᷊o ngkatau, i sire mambeng manga taumata ko mataku dang matuhu su Mawu Ruata, botonge pangimaneng, dang tawe mo manarima u soroki. 22Parentaiko i sire makoa kere mamamonesi u bangsa i'i, pusingkatau guna ngu apang komol᷊ange. Hal᷊i e'e mambeng ikoa i sire pakaatori. Manga parkara ko l᷊al᷊abo botonge ihabari si kau, kateho purarendehi ko manga ko dadio botonge masue si sire sisane. Hal᷊i e'e sarung mupakahang si kau watu'u i sire mutanggong jawapi dingang. 23Kamangkeng i kau mukoa kere'e, dang hal᷊i e'e niparenta ngu Mawu Ruata si kau, i kau sarung makatanggong mukoa hal᷊i u dang kaul᷊i u taumata sarung mapul᷊e dingang u l᷊uasi naung watu'u parkara ngi sire maehong maurusi.”

24I Musa nutumuhu tughu ngi Yitro, 25dang namile apang taumata ko pilesa su tal᷊oara u bangsa Israel. I sie nanibo si sire nakoa pangaha su sihiwu su kataunge, mahasu su kataunge, l᷊imampul᷊o su kataunge, dang mapul᷊o ngkatau. 26I sire nupal᷊al᷊eng hal᷊i i sire kere manga mamamonesi bangsa Israel. Manga parkara ko l᷊al᷊abo ihabari i sire si Musa, arawe purarendehi ko dadio masue si sire sisane. 27Bou e'e i Musa nupakawala ngi Yitro natamai dang napul᷊e sarang wanuange.

Currently Selected:

SASUWANG 18: PLT

Highlight

Copy

Compare