ረውምየት እቂዝ 8

ፈወነ 8

እደረት መንፈስዙ ስልጣንዝ ፅበነው

1ነስየ ክርስቶስ እየሱስትቍ ኣቐቊዝ ነን ኵነንየ እጀውም። 2ምላሰንድም ርዅየ ይወው እደረት መንፈሲዙ ኽግድ ክርስቶስ እየሱስት ኣመካይነትዝ ኽጥያትዝመ ክርጘዝዙ ኽጊስ ይት ኻርነይ ፊስኩ። 3ኽግድ ስየዙ ባኽሪዝ ምላሰንዝ ዝላቓንስቅ ፋፅመነ በውድየንት፣ እደረ በገዘ ጝዅርድየንት ኽጥያትኘ እጅርዝ ተከዝ ኽጥያትዙ ምስዋይት ኣቓንስ ማጥን እፃቐነውዝ ፋፅሙ፤ እንዝም ኽጥያትድየንት ስየዝ ኣመካይነትዝ ኲንኑ። 4እንም ስየዙ ፍቃድዝ ኣዪጝቀ መንፈስዙ ፍቃድዝ ፅብነቅ ይናጭስ ኽግድ ዋቕረው ፅድቅድ ምሉ በምሉዝ ፋፅምሻንስ ማጥን የጝ። 5ስየዙ ፍቃዲዝጘ ፅበቍድ ስየዙ በንድየንት ኻስቭጘኵ፤ መንፈስዙ ፍቃዲዝጘ ፅበቍድ ግን መንፈስዙ በንድየንት ኻስቭጘኵ። 6ስየዝቍዝ ኻስቨነውድ ክርጘ ነሰኵ፤ መንፈስዙ ፍቃድድ ኻስቨነው ግን ርዅየዝመ ዲግተዝ ነሰኵ። 7ስየዝቍዝ ኻስቨው እጅር እደረት ፃለት የጝ፤ እደረት ኽጊዝ ኣዚታውም፤ ኣዚትጠም ቸላውም። 8ስየዙ ፍቃድዝ ቃውሸቍድ እደረት ዲስ ሽጥጘ ቸላቍም።

9ክትን ግን እደረት መንፈስድ ክታግል ፅበው ኣቐውዝየ መንፈስዙ ፍቃድዝ የጝ ፅብርነውድጚ ስየዙ ፍቃድዝም ኣየው፤ ኣውማው እጅር ክርስቶስት መንፈስድ እጅው ኣቐውዝየ፣ ጘጝ እጅርድ ክርስቶስትውም ኣየው። 10ዊገድ ግን ክርስቶስ ክታኣቒል ፅበውዝየ ክታሰውነትድ ኽጥያትዝ ኣመካይነትዝ ክረው ኣቓንድ፣ ክታመንፈስድ ግን ፅድቅዝ ኣመካይነትዝ ፅበው የጝ። 11እየሱስት ክርጘይስ ጕይሰው እደረት መንፈስድ ክታግል ፅበው ኣቐውዝየ፣ ክርስቶስት ክርጘይስ ጕይሰውድ ክታኣቒል ፅበው ጝመንፈሲዝ ኣመካይነትዝ፣ ክረው ክታሰውነቲዝ ርዅየ ይውጡ።#1ቈረ. 3፡16።

12እንዝ ማጥን ይፅን ክታችወ! ቢን ፃይነቅ የጝ፤ ኣነጚ እን ቢንድ ስየዙ ፍቃዲዝጘ ፅብናንስ ማጥንም ኣየው። 13ምላሰንድም ስየዙ ፍቃዲዝጘ ፅብርንሽ ክርትርንቅ፤ ጭቓ ኣቐው ስየዙ ሰብድየንት መንፈስዝ ኣመካይነትዝ ቍውርንሽ ግን ርዅየዝ ፅብትርንቅ። 14እንዛይ እደረት መንፈስዝ ቃውሸቍድቅ እደረት ቝር ጛይ። 15ምላሰንድም እንደ ገነ ጐውተነውዝቍ በር ፃቨው መንፈስድ ኣዪጝቀ ዅርነይዙ መንፈስድ ለምትርንኵርኑ፤ ኣቓንስቅም ጝት፦ «ኣየ! ኣየ!» ይን ጭጝነኵን።#ማር. 14፡36፤ ገላ. 4፡6። 16እደረት ቝር ኣነጘ እድየን መንፈስድ ይናመንፈሲጅቅ ኣቕ ይናጭስ ሚዝርደኵ። 17ዅል ኣነውዝየ ቈሽ ጝወራሻን የጝ፤ ክርስቶስ ጅቅ ላብጠ ዊርስነቅ የጝ፤ ነን ጝሚከረይስ እርግጥ ኣድልሽነቅ ኣንሽ እግረ ጝክቭሪስ ኣድልሽነቅ ኣንቅ።#ገላ. 4፡5-7።

ተርጡ ክቭርድየን

18እን ኣልሚስ ለምርነው ይናስቃይድ እግረ ይናጭስ ጋልፅሽትጡ ክቭሪጅቅ ሚዝንሻንድ ውረውረቅ ኣየው ኣቐጘ እግዘኵን። 19ፍጥርትድቅ እደረት ቝሪዙ ጋልፅሽተነድ ኽየው በንዝ ሊሚደኵ። 20ምላሰንድም ፍጥርትድቅ ጊነዝ ኣጠ ፃቭሽትኩ፤ እንም ፍጥርትድ ጝቕም ማርፅ ኣዪጝቀ ቲስፈዝ ቅምሽጠ ፃቨው እደረት ፍቃድዝ የጝ።#ዘፍ. 3፡17-19። 21ቲስፈድም ፍጥርትድ ጝቕም ቢስብሰነውዙ በርነይስ ኻርነይ ፍ እደረት ቝርስ ኣቐው ኪብረው ኻርነይል ችጝጠ የጝ። 22ፍጥርትድቅ ነኳን ኣሽ ፅበውድ ቅምትዙ ስቃይዝጘ ጨጝቅሻ ኣቐጘ ኣርቕነኵን። 23ጘጝ ጭቝም ኣዪጝቀ መንፈስ ቅዱስቱ በውረ ይውትድየንት ችጝነቅ ይን ይናቕምም ይናሰውነቲዙ ኻርነይ ፈነ ኣቐው እደረት ቝር ኣቐነውድየንት ቲስፈዝ ሊሚድና ይናኣቒዝ ጨጝቅሽነኵን።#2ቈረ. 5፡2-4። 24ምላሰንድም ቓድነውድ እኒን ቲስፈይዝ የጝ፤ ዊገድ ግን ቲስፈድ ቓሊሽተው ኣቐውዝየ ቲስፈም ኣየው፤ ቓሊሽተውድየንትሰ ኣው ቲስፈ ፃቭጣ? 25ገነ ቓሊነውድየንት ቲስፈ ፃቭነቅ ኣንሽ ግን ጝት ኣቕልዝ ሊሚድነኵን።

26እኒዝጘም መንፈስ ቅዱስ ይናዝላይስ ከቨኵ፤ ኣወይን ፃልይነ ጥውሽጠጘ ኣርቓይነቅም፤ ጝቕም መንፈስ ግን ቃልዝ ጋልፅጥነ ቸልሻው ዊገዝ ይናጭስ ጨወኵ። 27ይናእዘንድየንት ሚርምረው እደረ፣ መንፈስዙ ኻሰቭድ ወረጘ ኣቐጘ ኣርቐኵ፤ ምላሰንድም መንፈስ እደረት ፍቃዲዝጘ ቅዱሳኒዝ ጨወኵ።

28እደረት ቀነቊዝ፣ ጝኻሰቪዝጘም ጭጝሸቊዝ፣ እጝቅ ዊገድቅ ጝታጭስ ቀሰውዝ ኣቐው ኣቐጘ ኣርቕነኵን። 29እደረ በውግዝ ኣርቐቍድዛት ጝዅርት ሚልክድ ተክጥጘ ማጥን በውግዝ ዊስኑ፤ እንም ጝዅር ንቕፀቍ ዚኒዝ ማኽሊል ባር ኣቓንስ ማጥን የጝ። 30በውግዝ ዊስነቍድዛትም ጭጙ፤ ጭጘቍድዛትም ፃድቅዙ፤ ፃድቅዘቍድዛትም ኪብርዙ።

31እደስለ እን ዊገይዝቍዝ ወረጘ ዊስንቅ? እደረ ይናጅቅ ኣቐውዝየ ኣው የጝ ይናት ተቃውምሽጠ ቸለውድ? 32በገዘ ጝዅርስ ኣርኽርኺጝቀ ይናእጝቅዝቅ ጝት ዲቍስ ነየውድ ኣወሽ እጝቅትቅ ልግስነዝ ቈሽ ነያው? 33እደረ ማርፀቍድዛት ኣው የጝ ኪሰውድ? ፃድቅዘውድ እደረ የጝ። 34እደስለ ፊርደውድ ኣው የጝ? ክረውድ፣ ክርጘይስም ጐውድ፣ እደረት ለዊል ጐየው እየሱስ ክርስቶስ ይናማጥን ጨወኵ። 35ክርስቶስት ፍቅሪስ ይናት ቲዘውድ ኣው የጝ? ችግርመ? ዊንስ ስቃይመ? ዊንስ ስድትመ? ዊንስ ግድርመ? ዊንስ ዝባተነውመ? ዊንስ ኻደገመ? ዊንስ ሰይፍመ? 36እንም፦

«ክማጥን ግሪ ጨቨቅ ቍውሽትነኵን፤

ዝውሸቍ ቢቂዝጘም እጊትኑን»

ይሽት ፃፍሸጘ የጝ።#መዝ. 44፡22። 37ኣውማውም ይናት ቲዛው፤ እንዝቅ ይናት ቀነው ክርስቶስት ኣመካይነትዝ ኻቐቲስ ዲቍነኵን። 38እንዝ ማጥን ክርጘም ኣነ ርዅየ፣ መላካንም ኣጝነ ጋኒናን፣ ነን ፅበውድም ኣነ እግረ ተረውድ፣ ዊንም ኣውማው ኻይልድቅ፣ 39ንየስ የነውም ኣነ ዝጥቅ የነው፣ ኣውማው ፍጥርትድቅም ኣቕሽ ይናኣደረ እየሱስ ክርስቶስት ኣመካይነትዝ ችጝነው እደረት ፍቅሪስ ይናት ቲዝጠ ቸላው ኣቐጘ ተረድጭኩን።

Currently Selected:

ረውምየት እቂዝ 8: ኽምጣኣኪ

Highlight

Copy