ረውምየት እቂዝ 7
7
ፈወነ 7
ኽጊስ ኻርነይ ፈነው
1ይፅን ክታችወ! ኽግ ኣርቐቍዝ ዊግጠኵን፤ ኽግ ላው እጅርል ስልጣን ፃየው ኣቐውድ እጅርድየን ርዅየዝ ፅባንድ ጭቝ ኣቐጘ ኣርቓይርነቅመ? 2ላይ እውነ ጝርጕርየ ጅቅ ገባሸነውዙ ኽግዝ ዊስንሽረይ ኣረውድ ጝርጕርየድ ርዅየዝ ፅባንትል ኣሽ የጝ፤ ጝርጕርየድ ክርሽ ግን ገባሸነውዙ ኽጊስ ኻርነይ ፍርኵች። 3እንዝ ማጥን ጝርጕርየድ ርዅየዝ ፅባ ላየ ግልወ ድውርሽ ሸርሙጠ ይሽተች፤ ጝርጕርየድ ክርሽ ግን ላየ ግልወ ድውርሽም እኳ ገባሸነውዙ ኽጊስ ኻርነይ ፍራንስቅ ሸርሙጠ ይሽታይም።
4እንዝ ማጥን ይፅን ክታችወ! ክትንም ክርስቶስት ስየይዝ ኣመካይነትዝ ኽግስ ክትርንኵርኑ፤ እንም ክርጘይስ ጐዊዝ ጝጭስ ኣቕርን እደረስ ፍር ፍርዝናንስ ማጥን የጝ። 5ስየዙ ፍቃድዝ ዊናንድ ክርጘዝ ፍር ፍርዝናንስ ማጥን ኽግዝ ቂስቅሽተው ኽጥያትዙ ምርቕፀድ ይናሰውነቲል ሰራሻ ዊኑ። 6ነን ግን ጘጝ እፁሽን ዊነዊስ ክርናንስቅ ኽጊስ ኻርነይ ፍንኵኑን፤ ኣቓንስቅም መንፈስዙ ኣይር ጒደነይዝ ኣግልግልነኵንጚ ኣርጐው ፃፍሽተው ኽጊዝም ኣግልግላይነቅ።
ኽግዝመ ኽጥያትዝ
7ነስየ ወረጘ ይና? ኽግ ጝቕም ኽጥያትመ? እረ ኣየውማ! ዊገድ ግን ኽግዝ ኣማካይነትዝ ኣየው ኣቓን ኽጥያት ወረጘ ኣቐጘ ኣርቕጨም ዊኒቀር፤ ኽግድ፦ «ማርቕፅተ» ዪየው ኣቓን ምርቕፀ ወረጘ ኣቐጘ እርግጥ ኣርቕጨም ዊኒቀር።#ዘፀ. 20፡17፤ ዘዳ. 5፡21። 8ኽጥያት ግን ትዛዝድ ነሰው ኣጋልዝ ፃቭ ኣውማው ምርቕፀድየንትቅ ይግል ቂስቅስሽጠ ፃቩ፤ ኽግ እጀው ኣቐውዝየ ግን ኽጥያት ክረው የጝ። 9ያንም በውገ ኽግ እጀው ዊናንድ ርዅየ ጕርየ ዊኑን፤ ትዛዝ ተረት ግረ ግን ኽጥያት ፅበው ኣቑ፤ ያንም ክጡን። 10ርዅየዝ ኣጠ ኻስቭኑ እድየን ትዛዝድየን ክርጘ ነሰጘ ተረድጩን። 11ኽጥያት ትዛዝዝ ኣመካይነትዝ ችጝሸው ኣጋልድየንት ጣቅምሽ ይት ኻጝሱ፤ ትዛዝዝ ኣመካይነትዝም ይት ቍዉ።#ዘፍ. 3፡13። 12እንዝ ማጥን ጝቕም ኽግድ ቅዱስ የጝ፤ ትዛዝድም ቅዱስ፣ ፃድቅ፣ ቀሰው፣ የጝ። 13እደሰለ ቀሰው ኣቐው ዊገድመ ይጭስ ክርጘ ኣቑ? እረ ኣየውማ! ዊገድ ግን ኽጥያት፣ ኽጥያት ኣቐነውድ ኣርቕሽታንስ ማጥን ቀሰው ኣቐው ዊገይዝ ኣመካይነትዝ ይግል ክርጘ ነሱ፤ እንም ኽጥያት ትዛዝዝ ኣመካይነትዝ ወሰገቨ ኽጥያት ኣቓንስ ማጥን የጝ።
ኽጥያት ጅቅ ቲግልሸነው
14ኽግድ መንፈሳዊ ኣቐጘ ኣርቕነኵን፤ ያን ግን ኽጥያትዝ በረ ኣጨ ቂጨር ስየዙ እጅር የጝ። 15ያን ፃቨው ዊገድየንት ኣርቐቅም፤ ፃቭጨ በነውድየንት ፃቨቅም፤ ዊገድ ግን ሽክጠውድየንት ፃቨኵን።#ገላ. 5፡17። 16ፃቭጨ በናይቀውድየንት ፃቨር ኣቐውዝየ ኽግድ ቀሰው ኣቐጘ ሚዝርጠኵን። 17እነየው ኣቐውዝየ ጝት ፃቨርድ ያን ኣዪጝቀ ይግል ፅበው ኽጥያትድ የጝ። 18ይጊስ፣ የነትም ይስየይስ ውረውረ ቀሰው ዊገ ችጝሻየጘ ኣርቐኵን፤ ቀሰው ኣቐው ዊገድየንት ፃቨነው በን ፃቀር የጝ፤ ኣነጚ ጝት ፋፅመነው ቸለቅም። 19ያን ፃቨውድ፣ ፃቭጨ በነው ቀሰው ዊገድየንትም ኣየው፤ ዊገድ ግን ፃቭጨ በናይቀው ጭቓ ዊገድየንት ፃቨኵን። 20ፃቭጨ በናይቀው ጭቓ ዊገድየንት ፃቨር ኣቐውዝየ ጝት ፃቨርድ ያን ይቕም ኣዪጝቀ ይግል ፅበው ኽጥያትድ የጝ።
21ቀሰው ዊገድ ፃቭጨ በናንድ ጭቕት ይግል እኩ፤ ኣቓንስቅም እኒን ኽግድ ይኣቒል ሰራሻ ኣቐጘ ተረድጨኵን። 22ኣቒቱ ይሰውነቲዝ እደረት ኽጊዝ ጭቕጘ ዲስ የኵን። 23ዊገድ ግን ይሰዊነቲዝቍ ኣካላኒዝ ኣቒል ኣቕ ሰራሸው ኽጥያትዙ ኽጊዝ እፁሸተ ፃቭ ይኣይምረውዊዙ ኽጊጅቅ ጋጥመው ላየ ኽግ ይሰውነቲዝቍ ኣከላኒዝ ኣቒል ኣቕ ሰራሻንድ ቓለኵን። 24ያን ኣወየር ጐስቛል እጅር የጝፈ! እኒን ክርጘዝ ይውሽተው ሰውነቲስ ይት ኣው ቓዝጡ?
25ይናኣደረ እየሱስ ክርስቶስት ኣመካይነትዝ እደረስ ሚዝየነ ኣነ፤ እደስለስ ያን ይቕም ይኣይምረዊዝ እደረት ኽግዝ በረ የጝ፤ ይሰውነቲዝ ግን ኽጥያትዙ ኽግዝ በረ የጝ።
Currently Selected:
ረውምየት እቂዝ 7: ኽምጣኣኪ
Highlight
Share
Copy
Want to have your highlights saved across all your devices? Sign up or sign in
