Roome 8

Beeɗit Goy Wɛɛŋa Sigɔ Geetitaanakik

1Agut sini kɛɛ goopan joope sigaagɛ sisɔ atu Yeese Kereseek, 2agut sinɔ boŋkukanti yaakata higi wɛɛŋakoŋk sinɔ gaɓɛ bɔdɛk Yeese Keresee higii tikiyɛɛkoŋk a retoŋk. 3Arikan Waakoyot any sinɛɓa ki oolɛ higii a ariŋɔŋk, agut sinɔ bɔɔla higii ɔɔtɛ ɓɛɛlɛt taaroŋk. Nɛkan Sɛŋk ari sini a wosɛyki Tɔɔn nɛɛk taare a gayi a iɗit sinɔ tikitank ɛkan goop Waakoyot tikiyɛ taare nɛɛkɛk. 4Ijaagɓa Waakoyot sini kɛnɔ dusanɛɛ sekiyɛ higiyoŋk eteŋkɛ sigaagɛ weeweriikii ɗɛyaan wɛɛŋakoŋk ma moko ɗɛyaan taaroŋk.

5Joop sigɛ beeɗir oko ɗɛyan taaroŋkuk riiɓer ɓayɛtun gɛŋk ɗɛyaan taaroŋk, ma joop sigɛ beeɗir ɗɛyaan Wɛɛŋakoŋkuk riiɓer ɓayɛtun gɛŋk ɗɛyaan Wɛɛŋakoŋk. 6Ege riiɓ ɓayaayoŋk ant taaroŋk rer, ma ege riiɓ ɓayaayoŋk ant Wɛɛŋakoŋk wɛɛŋa a bɔdɛ. 7Nɛ agut sini ege riiɓ ɓayaayoŋk ant taaroŋk gumaakikeen a Waakoyok. Ki ɓalɗiit higiya Waakoyotoŋk, ki oolɛ a ɓalɗigeeɗiŋ, 8Joop sigɛ beeɗir ɗɛyaan taaroŋk kir oolɛ a arir Waakoyo a yaageeɗiŋ.

9Yakana moko sɔɔk atukari ɗɛyaan taaroŋk, ma atukari ɗɛyaan Wɛɛŋakoŋk, ɔkɔn atu Wɛɛŋa Waakoyotoŋk iinakɛ tak eekeerɛŋ, iɗit sinɛ kiiɗɛ Wɛɛŋa Kereseek, nɛ moko sɛɛn tekaan Kereseek. 10Yakana ɔkɔn ar Kerese iinakɛ takiŋ, nɛ ege taar noŋk reten agut tikiyɛ, mayakana ege wɛɛŋa goŋk bɔdtaanak agut mentanka taamɛkɛ Waakoyotoŋkuk. 11Mayakana ɔkɔn atu iinakɛ tak Wɛɛŋa Waakoyotoŋk sigɛɓa boŋurku Yeese ret walasakiŋ, sɛɛn sinɛɓa boŋku Yeese Keresee ret walasak gaɓɛkoy kɔna bɔdɛ taara noŋk sinaana retenk goy Wɛɛŋa Gɛɛŋk sigɛ Geetitaanakik sigɛ atu iinakɛ takik.

12Agut sini iinak manyaakak eeta sigɛ dooytaanakik, lakɛ any sinɔ tina ɗɛyɛ a ijaagiiŋɔŋkuŋ yakana moko kɛnɔ beeɗii oko ɗɛyan taaroŋk ɗɛyɛ sinɛ riiɓ naŋkik. 13Ɔkɔn beeɗiir oko ɗɛyan taaroŋkuŋ, nɛkoy rɛrariŋ. Mayakana ɔkɔn ɓokotiir ijaag noŋk taaroŋk Wɛɛŋakɛ sigɔɔgɛ Geetitaanakiŋ, nɛkoy beeɗir weeŋakɛ.

14Ege joop sigɛ sɛɛg diiler Wɛɛŋa Waakoyotoŋk tɔɔmɔk Waakoyotoŋk. 15Mokokan boŋiir wɛɛŋa sigɔ kɔnu arir a laaŋoyeer kɛkar tuɓuraak, mayakana boŋiirkan wɛɛŋa sigɔ arir kɔnu a iinak tɔɔmɔk gɛɛŋk ɛ riyarɗɔ sɛɛn kɛ, "Aba, Baabɛɛk." 16Waasɛr tina Wɛɛŋa Waakoyotoŋk a wɛɛŋa gaŋk kɛ eteŋk tɔɔmɔk Waakoyotoŋk. 17Ɔkɔn sisɔ eteŋk tɔɔmɔkuŋ, nɛ eteŋk joop sigɛkoy mooniik, eteŋk Waakoyotoŋk sigɛkoy mooniik a Keresee agut omoŋɔŋk. Ɔkɔn eteŋk kaastaanak rakatɛ nɛɛkik a sɛɛn agut omoŋ eekeerɛŋ, nɛɓɔrɛ eteŋk sigɛkoy kaasii eemɛyɔn nɛɛkik a sɛɛn agut omoŋɔŋk.

Eemɛyɔn Sinɛkoy Mɛlkik

18Ikoma rakatɛ naŋk sinɛ sisɔk a ito kɛɛ any saa paariɗɛɛ a eemɛyɔn sinɛkoy tina yaaŋɛ ɛɛkik. 19Kookor riiɓ baŋɛ a lageeɗ ŋɔɗɔ yaaŋɛɛt tɔɔmɔk Waakoyotoŋk. 20Agut sinɔ ɓalɛɛɓa riiɓ baŋɛ kanysɛya, moko ɗɛyaan nɛɛkɛk, mayakana ɗɛyaan Waakoyotoŋk, agut sinɔ latu ŋaadiyɛ sigɛ kookorɛɛkiŋ, 21nɛ riiɓ ɔɗɔwa nɛɛka kɛnɔ ŋaarki mojɛɛɗ yaakata kɛnɔkoy mɛlɛ ɛ kaasɛ eemɛyɔn yaakatoŋk tɔɔmɔk Waakoyotoŋk.

22Ɗegerii kɛ riiɓ baŋɛ bandur a ito suusuwi amɗ ɔɔtɛ ɓartɛɛtoŋk mɛlɛɛɗa sisɔwa. 23Moko sɛɛn dakɛɗa, mayakana ɛkan gaŋk sigɛ laŋir tigi sinɛ tuki Wɛɛŋakoŋkuk, bandurii takanakɛ gaŋk a kookorii sinɔ eteŋk tɔɔmɔk Waakoyotoŋk, ege sini bɔdɛ ɛɛk naŋkik. 24Agut sinɔ bɔdiiɓa ŋaadiyɛɛkɛ sigeege kookoriikiŋ. Ŋaadiyɛ sigɛ kookorɛɛk sigɛ dɛnɛɛk moko ŋaadiyɛ sigɛ kookorɛɛk. Wooɗ sinɛ ari any sinɛ dɛnɛk a ŋaadiyɛ sigɛ kookorɛɛk? 25Mayakana ɔkɔn lakii ŋaadiyɛ sigɛ kookoriik sigɛ in kii taantaakiŋ, nɛ kookorikii ɓaŋkawurɔɔn oolaanik.

26Ɛɓɔrɛ kɔnyɛr tin Wɛɛŋa sigɔ Geetitaanakik bɔɔlakaat naŋk. Kii ɗegerɔɔn kɛ ɗɛyɛ tina a ɗanɗamaakii agut jikon, mayakana kalɛyiɗi tina Wɛɛŋa sigɔ Geetitaanakik bandurɔɔn sinɔɔnɛ ki gayɛ a yaaŋɛɛ toniiɗŋɔŋk. 27Sɛɛn sinɛ mermen ɓayɛtun gaŋkik ɗeger koɓi Wɛɛŋakoŋkuŋ, agut sinɔ kalɛyiɗi Wɛɛŋak joopa sigaaga geetitaanakik oko ɗɛyan Waakoyotoŋk.

28Ɗegerii kɛ ola baŋɛ ijaag Waakoyot mentankaata a joop sigɛ porur sɛɛnik, sigɛkan riyɛɛ sɛɛg koɓiɗa nɛɛkaakik. 29Agut sinɔ ruumeɓa jeemɛ Waakoyot joopa sigaagaɓa ɗeger sɛɛg jeemɛ kɛnɔ gayar Tɔɔn nɛɛk, kɛnɔ dakɛ a tekaayan manyaakakɛ sigaagɛ ɓɔɔkaak kɔɔr, 30ɛ joop sigɛgɓa ruume sɛɛga jeemɛk, nɛɓa ɓɔrɛ riy sɛɛgiŋ, ɛ joop sigɛɓa riy sɛɛgik, nɛɓa ɓɔrɛ ari sɛɛg a mentaana taamɛkɛ Gɛɛnɛk, ɛ joop sigɛɓa sɛɛg ari a mentaana taamɛkɛ Gɛɛnɛkik, nɛɓa ɓɔrɛ eemɛy sɛɛgiŋ.

Mɛyin Waakoyotoŋk

31Anɛ tonii ɛk agut any sini? Ɔkɔn Waakoyo a eteŋk agut omoŋ, nɛ wooɗ sinɛ tin ɓooyuk? 32Sɛɛn kiigeeɗɓa sanɗit Tɔɔn nɛɛkɛk yakanaɓa gaɓɛ sɛɛn eteŋka baŋɛ, nɛɓɔrɛ tina ki gaɓɛɛɗ ola baŋɛ a sɛɛn agut omoŋ? 33Wooɗ sinɛ daariyɗi joopa sigɔɔgakan daam sɛɛg Waakoyotuk? Sɛɛn Waakoyo sinɛ ari sɛɛg a mentaana taamɛkɛ Gɛɛnɛkik. 34Wooɗ sinɛ goop sɛɛgik? Rɛrɓa sɛŋk Yeese Keresee nɛɓa ŋaarki ret bɔdɛɗaak, nɛ beeber ɗiɗikɛ Waakoyotoŋk, sinɛ kalɛyiɗi agut eteŋkik. 35Wooɗ sinɛ tin pakatiki mɛyin Kereseek? Rakatɛ, maŋk ɓakɛ, maŋk epapay, maŋk ŋaawu, maŋk konaanikeen, maŋk rakatɛ sinɔ ɓaŋkawuŋɔŋk, maŋk aarɛ? 36Oko sinɛɓa taapɛɛɗɛ Wargatɛɛ Waakoyotoŋk kɛ,

"Ɓokootɛɛ tin agut Iin waawuy nɛɛk baŋɛ,

ikomɛɛ tin oko jiŋkuyɛ sigɔ ŋɔɔŋɔɔlɛɛŋɔŋk."

37Nɛ lɔsii ola sigi baŋɛ arkii rakaay lɔstaanakɛ goy nɛɛkɛ Sɛɛn sinaanɛɓa tin poruk. 38Mɛlɛkɔta siniŋ, kɛygun rer kɛygun bɔdɛ, kɛygun wosɛytaana Waakoyotoŋk, kɛygun suumiyɛ ɗookoŋk, kɛygun ola sigɛ ɓɛɛlɛr sisɔk, kɛygun ola sigɛkoy mɛlɛrkik, kɛygun ɓaŋkawukaatak, 39kɛygun jeeɗoka, kɛygun ɓukurka, kɛygun ola ɔgɔ baŋɛ sigɛɓa riiɓɛɛk baŋɛ. Ki oolɛ a tin pakatiki mɛyin Waakoyotoŋk sinaanɛkan laŋii goy Suumi naŋk Yeese Kereseekiŋ.

Currently Selected:

Roome 8: KSTM

Highlight

Copy