YouVersion Logo
Search Icon

Roome 2

2
Joop Ayuuduk
1Agut sini iin iɗit sinɛ pɛrɛdin ete omalteek kɛɛne any sinɔ kolɗun ɛɛkik, agut sinɔ saa pɛrɛdɛɛɗin ete omalteek, nɛ pɛrɛdin eek nookɛk. Pɛrɛdin ete maɓɔrɛ ijaagin any sinɛ ijaag iɗit sinɛ pɛrɛdɛɛɗinkiŋ. 2Ɗegerii kɛ pɛrɛdɛkoy Waakoyot kɛ ɗɔm joope sigaagɛ ijaagir any sinik. 3A koɓun kɛ pordunkoy pirdii Waakoyotoŋkuŋ ɔkɔn ɓɔre ijaagin any sinɛ pɛrɛdɛɛɗin joope ɔgɔɔkɛkiŋ? 4Maŋk daraayin mentanka nɛɛk, a ɓaŋkaawurɔɔn nɛɛkɛ jɛtik oolaanik? Kin ɗegerɔɔn kɛ gakiɓana Waakoyot mentanka nɛɛk a obiiŋ kɛnɔnu diile anta sinɔɔna weerikiɗin tikiyɛɛkɛ Waakoyotak?
5Yakana agut kilarɔn nook a ɓayɛ nook sinɛ kiiki weeriit tikiyɛɛkɛɛk, bobosun eek nookɛ raŋk goopan ɓɛɛnyɔ goopan Waakoyotoŋk saakoy yaaŋɛɛɗ ɛɛk pirdi sinɛ likik. 6Gaɓɛkoy Waakoyot eta a omoŋ omoŋ oko ijaag nɛɛk. 7Gaɓɛkoy sɛɛga bɔdɛ sinɛkoy nɔkoy nɔkoyk joopa sigaaga ɛtɛr a ɓaŋkawuŋɔŋk ijaaga any sinɔ mentanŋɔŋk ɛ ɗɛyɛr eemɛyɔn, a pɔɔsiyɛ, a any sinɔkoy ki badɛɛk, 8mayakanakoy mɛlki goopan sinɔ obiiŋɔŋk joopa sigaaga porur ɛkank, a sigaaga ŋɔɗar eekeer, nɛ nomɛr ant sinɔɔnɛ ŋɛɛwɛnŋɔŋkuk. 9Dakɛkoy a rakatɛ a ɓakɛ eta sinaana ijaag any sinɔ ŋɛɛwɛnŋɔŋkuk kɛygun wooɗa, tuki joopa Ayuuduk nɛ baŋiya joopa sigɔɔga moko Ayuuduk, 10mayakana dakɛkoy a eemɛyɔn, a pɔɔsiyɛ, a bɔdɛ eta sinaana ijaag any sinɔ mentanŋɔŋk kɛygun wooɗa, tuki joopa Ayuuduk nɛ baŋiya joopa sigɔɔga moko Ayuuduk. 11Agut sinɔ ki Waakoyot pakaatɛ joop.
12Goopkoy Waakoyot joop sigɔ moko Ayuuduk saa tikiɗiɗik kɛygun aasi kiikaayɛ sɛɛge higi Muuseekiŋ, ɛ koy goop joop Ayuuduk saa tikiɗiɗik, agut sinɔ latukuɗ higiŋɔŋk. 13Agut sinɔ moko mentaana taamɛkɛ Waakoyotoŋk joop sigɛ tiyɛr higiik, mayakana dakɛr a mentaana taamɛkɛ Waakoyotoŋk joop sigɛ ijaagir higi nɛɛkik. 14Joop sigɔ moko Ayuuduk kɛɛ sɛɛge higi Muuseek nɛ tiiɗi anta sinaana tonu higiik riiɓ nɛŋk. Kɛygun aasi sɛɛge kiikaayɛ higiiŋ, ma sɛɛk latu higi sinɛɓa riiɓoŋkuŋ. 15Nɛ ant sineene yaaŋɛr kalbiyɛ gɛŋk sinɔ kɛ taapɛɛɓa sekiyɛ higiyoŋk ɓayɛtunɛɛkɛ gɛŋk takik, ɛɓɔrɛ sɛɛga yaaŋɛ koɓi nɛŋk kɛ eekeer any sinɛ, ɛ gɔɔnyɛ sɛɛg ɓɛɛnyɔwɛɛkɛ ɔgɔɔkɛ ɛ titike sɛɛg ɓɛɛnyɔwɛɛkɛ ɔgɔɔkɛ. 16Ɓenysaakoy mɛlkiɗ Waakoyotuk nɛkoy goopa goy Yeese Kereseek olaatɛ sigaagɛɓa dugiɗi joopek baŋɛ oko sinɛ rɔɔriyaaɗa Pɛɛni sinɔɔnɛ Ɓɛlkɛɛstank.
17Tonun kɛ eet iɗit Ayuuduk nɛ titiɗiikin higiya, ɛ merin ɛɛk lalaŋ sinaanɛ latukari a Waakoyok, 18ɛ ɗegerin ɗɛyan Nɛɛk, ɛ ɗegerin ijaag any sinɔ mentanŋɔŋk agut sinɔkan barɛɗin higiik. 19Tonun kɛ eet ɔɗɔwen motakoŋk, 20ɛ rɔɔriya joop sigɛ gaagɛyɛk, ɛ rɔɔriya tɔɔmɔk, ɛ tonun kɛ laka ɗegerɔn a eekeer higiyoŋk baŋɛ. 21Iin sinɛ rɔɔriyin joop ɔgɔɔk kin rɔɔriyɛ ɛɛk nook? Iin sinɛ rɔɔriyaakin a ɓooyun agɛyk a nɛ agalɗikin? 22Iin sinɛ tonun kɛ kat ibiɗiikink, nɛ ibiɗiikin? Iin sinɛ ɓooyun jookak sigɔ nyonuk, nɛ agalɗikin Godeyikɛ sigɔɔgɛ Geetitaanakiŋ? 23Iin sinɛ merin ɛɛk higiik, nɛ arin Waakoyo a lak keeny saa sɔɔkɛɗin higiikiŋ? 24Agut sinɔ oko sinɛɓa taapɛɛɗɛ Wargatɛɛ Waakoyotoŋk kɛ, "Nyɔɔnɛɛ tiriya Waakoyotoŋk joope sigɔɔgɛ moko Ayuuduk kɔɔr agut iinak."
25Ɔkɔn tiiɗikin higiyaaŋ, nɛ yawɛ nookɛ lak ɔɔtɛɛŋ, mayakana ɔkɔn kin tiiɗit higiyaaŋ, nɛ ikomɛ yawɛ nook a ito kani kɛɛ yawɛɛɗ. 26Ɔkɔn iɗit sinɔ moko Ayuuduk sinɔɓa kɛɛ yawɛɛɗik tiiɗi sekiyɛɛka higiyoŋkuŋ, nɛ sɛɛn ki ikomiit Waakoyot a itoɓa sɛɛn yawɛɛŋ? 27Agut sini a lakin higi sinɛɓa taapɛɛk ɛɓani yawɛ, nɛ ɔkɔn aalin higiiŋ nɛne pɛrɛdɛ iɗit sinɔ moko Ayuuduk sinɔ koorɛ higiik sinɔɓa kɛɛ yawɛɛɗ taarekiŋ.
28Iɗit sinɔ sɛɛn iɗit Ayuuduk tiriyaaka dakɛɗak moko sɛɛn iɗit Ayuuduk sinɔ eekerkank, maɓɔrɛ yawɛ sinɔ dɛnɛɛ taare raŋk nɛɛkɛkik nɛ moko yawɛ sinɔ eekeerik. 29Ma iɗit Ayuuduk eekeerɛ, iɗit sinɔ sɛɛn iɗit Ayuuduk takan nɛɛkɛ sɛɛn iɗit Ayuuduk ɛ sɛɛn eekerkan yawɛɛɗ ɓayaayoŋkuŋk, a wɛɛŋakɛ, ɛ moko taapiyɛɛkɛ. Moko pɔɔsiyɛ gɛɛŋk ete ma pɔɔsiyɛ gɛɛŋk sooy lak Waakoyok.

Currently Selected:

Roome 2: KSTM

Highlight

Share

Copy

None

Want to have your highlights saved across all your devices? Sign up or sign in