Ijaag Wosɛytaanakoŋk 5

Haananiyaa A Sɛpiiraa

1Lakɛɓa iɗit om sinɔ riyɛ kɛ Haananiyaak, sɛɛn a jarti nɛɛk sinɔ riyɛ kɛ Sɛpiiraak, nɛɓa ɓalɗiiɗi ɗoo. 2Nɛɓa ŋɔr wori nɛɛk, ma diile gɔɔ om a tɛm nɛ kɛɛ gaɓɛ wosɛytaanaka, a ɗeger jarti nɛɛkɛ any siniŋ. 3Nɛɓa Petros tongeeɗ kɛ, "Iin Haananiyaa, guugunykɔna setan ɓayaaya nɛ kɔnu ari kɛnɔ raamun Wɛɛŋa sigɔ Geetitaanakik nɔ ŋɔrkun wori nɛɛk nyon om sinɛkɔ ɓalɗiiɗin ɗookuk agut jikon? 4Mokokɔ ɗoo nɛɛkɛ nook a inkɔ kiiɗin ɓalɗiit, nɛ saakɔ ɓalɗiiɗink baŋiya mokokɔ wori nɛɛkɛ nook? Anɛkɔ koɓun any sini ɓayaay nookɛ agut jikon? Raamunkɔ Waakoyo, ma moko iɗit."

5Saaɓa Haananiya tiyɛɛɗ pɛɛni sinik, nɛɓa ɗiiri nɛ rɛrŋ. Nɛɓa joop sigɛɓa tiyɛr any sinik baŋɛ ɓuri jɛt. 6Nɛɓa atiinyii ŋaarar raŋana, nɛ ɓuwer buusɛ nɛɛk nɛ diiler nɛ kaar kɔwarŋ.

7Nɛɓa sayitiyɛɛkɛ sigɔɔgɛ jiitik baŋiya, mɛlki jarti nɛɛk Sɛpiiraa saana, aɓa ki ɗegerɔɔn any sinɛkɔ laŋki baabuy nɛɛkɛkik. 8Nɛɓa Petros tongeeɗ kɛ, "Ɗoo noŋk ɓalɗiiɗɔɔkɔ a ɛtɛ wori nɛɛkɛ oko sinik dakɛɗak?"

Nɛɓa Sɛpiiraa jumurgeeɗ kɛ, "Ii, ɛtɛ wori nɛɛkɛ oko sinik dakɛɗa."

9Saaɓak tongeeɗɓa Petros kɛ, "Mɛyigiɗɔɔkɔ ɛk kɛnɔ paariir Wɛɛŋa Suumiyoŋk? Ɔsigɔy joop sigɔ kurak tɔkɔw baabuy nookuk atu tugaatik, diilerkɔɔ ɓɔrɛni tɔkɔwa." 10Nɛɓa sɛŋk ɗiiri sisa derakɛ gɛɛnɛ goyse ɗeek nɛ rɛrŋ. Nɛɓa mɛlɛrki atiinyii nɛ kurak laŋirki a kɔ rɛrŋ, nɛ diiler nɛ kaar kɔwar baabuy nɛɛkɛ jɔk. 11Nɛɓa ɓurii jɛt joop gode Sambatɛyoŋkuk baŋɛ, a joop sigɛɓa tiyɛr any sinik baŋɛ.

Sɔɔriyɛ A Ola Sigɔ Reemɗi Ɓayɛk

12Ijaagirɓa wosɛytaana sɔɔriyɛ a ola sigɔ reemɗi ɓayɛk, a ɓɔɔkaaŋ joope gɛɛnɛ kɔɔr. Nɛɓa tolɗi ŋaadtaana baŋɛ agut omoŋ, soodi riyɛ kɛ nyon Weeweeroŋk Salamoonuk. 13Eemɛyarɓa sɛɛg joop gɛɛnɛ, maɓa kɛɛ iɗit sinɔ paari beeɗit a sɛɛgik sɛɛge sɔgɔɔsɔyk. 14Joop sigɛ ŋaadir Suumi Yeeseek baŋɛ, moojak a jartiyatɔk, tutukiikɓa a ɓɔɔkaaŋ jɛt. 15Ɗɔkarkiɓa joop gortaanak a ɓɔɔkaaŋ gopana takana, nɛɓa riiɓer sɛɛg bɛroykɛ a beeɗiyɛɛkɛ, ijaagirɓa oko sinik kɛnɔ saa ɗoyiɗ Petros sinaanɛk, kɛnɔ laŋi sɛɛg tipi nɛɛkɛk. 16Kurakɓa joop a ɓɔɔkaaŋ katamɛɛkɛ sigaagɛ atu Yorsaleeme tookɛtaak, nɛɓa ɗɔkarki gortaanak a joop sigɔ rakatɛr wɛɛŋakɛ sigɔɔgɛ somkaanakik nɛɓa bɔdɛr baŋɛ.

Laaŋirki Wosɛytaana Epaayan

17Ɔɗɔwen tapa ŋaadiyɛɛkoŋk a komoy joop Saaduukuk baŋɛ, sigɛɓa sɛɛg a sɛɛnik enyɛrɓa sɛɛg nyeken nɛ ŋaarar sɛɛga raŋana. 18Nɛɓa gaamur wosɛytaanak, nɛ gaɓɛr sɛɛg godeya korkoɗɔɔnoŋk. 19Yakanaɓa wosɛytan Waakoyotoŋk tayɛ gode sinɛ korkoɗɔɔnoŋk kaalt, nɛ boŋku sɛɛg nɛ tonu sɛɛga kɛ, 20"In ŋaarɛ Godeya sinaana Geetitank, nɔ kɛɛɗɛ ɛtɛɛ nɔ tonɛɛ pɛɛni sini wɛɛŋakoŋk joopa baŋɛ." 21Nɛɓa boŋur wosɛytaana gɛɛnɛ sekiyɛ sigi, nɛ guugunyar Godeya sinaana Geetitank gibi, nɛ tuker rɔɔriyɔɔna joop.

Saaɓak ɔɗɔwen sinɛ tapa ŋaadiyɛɛkoŋk a joop sigɛɓa sɛɛg a sɛɛnik, kurakɓa nɛ tolɛr joop sigɔ gaɓɛr woorank, a gutarɛyɛ Ayuuduk baŋɛ agut omoŋ, nɛɓa wosɛyɛr joop godeya korkoɗɔɔnoŋk, kɛnɔ kaar ɗɔkarki sɛɛga wosɛytaanak. 22Nɛɓa joop sigɛɓa wɔsɛyɛɛk kaar godeya korkoɗɔɔnoŋk, nɛɓa kir laŋiiɗ nomtaanak saadi. Nɛɓa murarki nɛ kurak tonur sɛɛga kɛ, 23"Korɛɛkɔ tuga gode sinɛ korkoɗɔɔnoŋk a ɓaŋkawuŋ, nɛkɔ koortaanak ɛtɛtɛɗar tugaat nɛɛkɛ jɔk, yakana saakɔ tayɛɛɗii tuga nɛɛkik, nɛ kɛɛ iɗit sinɔkɔ laŋii takik."

24Ɔɗɔwen koortaanak Gode sinɛ Geetitank, a ɔɗɔweer tapa ŋaadiyɛɛkoŋk saaɓa tiyɛrɗi any sinik, nɛɓa reemɗi ɓayɛtun gɛŋk kɛ, egekɔɔ sini any sinɔ ɓɛɛlɛ ɛkik? 25Saaɓak mɛlkiɓa iɗit om nɛ kus tonu sɛɛga kɛ, "In dɛnɛɛ, joopkɔ gaɓɛɛr sɛɛg godeya korkoɗɔɔnoŋkuk, ɔsigɔy ɛtɛtɛɗar Godeey sinaanɛ Geetitank nɛ rɔɔriyar joopuk." 26Ɔɗɔwen koortaanak Gode sinɛ Geetitank, a amaasiniyɛ gɛɛŋk kaarɓa nɛ ɗɔkarki sɛɛgiŋ. Mokoɓa ɗɔkarki sɛɛg ɓaŋkawukaat, maɓa ɗɔkarki sɛɛg kɛ lɔt. Nɔɓa ijaagirɗi oko sinikik, ɓurerɓa joop gɛɛŋk kɛnɔmo baabaalar sɛɛg giɗeekɛ. 27Ɗɔkarkiɓa sɛɛg nɛ kurak arir a ɛtɛr taamɛkɛ joop sigɔ gaɓɛr woorank. Nɛɓa ɔɗɔwen sinɛ tapa ŋaadiyɛɛkoŋk kɔɔniy sɛɛg kɛ, 28"Toniikan kɔna a ɓaŋkawuŋ kɛnɔ kat rɔɔriyaakari a riyari tiriya Iɗit sinikiŋ. Yakana sisɔ rɔɔriyɔn noŋk enyɛɛrari Yorsaleem, ɛ ɗɛyɛɛr a yɛrom iɗit sinɛk riiɓeer eteŋkɛ raŋk."

29Nɛɓa Petros a wosɛytaanak ɔgɔ jumurar kɛ, "Ɔɔtɛ saagun tiiɗiɗii etaak nɛ tiiɗikii Waakoyota. 30Waakoyo ɔrɛyak gaŋkik boŋkukan Yeesee ret walasa, sinɔkan ɓokotiirk nɛ laalawari keet raŋk. 31Riiɓekan Waakoyot sɛɛn ɗiɗikakɛ gɛɛnɛk, eemɛyɔɔn a sɛɛn Ɔɗɔwen a Ebɔdtan, kɛnɔ gaɓɛ weerɛɛt tikiyɛɛkɛk a ranyjɛt tikiyɛɛkoŋk joopa Israeelik. 32Nɛɓa seek dakii a misikiriyɛ any sinik, ma ɓɔrɛ miskiriyɛ Wɛɛŋa sigɔ Geetitaanakik sigɛkan gaɓɛ sɛɛg Waakoyot joopa sigaaga tiiɗigeeɗik.

33Joop sigɛ gaɓɛr woorank saaɓa tiyɛrɗi any sinik, nɛɓa ŋadir jɛt nɛɓa ɗɛyɛr a ɓokootar wosɛytaanakiŋ. 34Yakana iɗit Paarisik sinɔ riyɛ kɛ Gɛmaliyaalik, sinɔ eemɛyar joop baŋɛk, ɛ sɛɛn rɔɔriytan higi Muuseek, ŋaarɓa raŋana joope sigaagɛ gaɓɛr woorank kɔɔr, nɛ tonu kɛnɔ wideerɛ wosɛytaanak gɛɛŋk walasa, ɔɔtɛya sinɔɔna balaaŋɔŋk. 35Tonuɓa joopa sigaaga gaɓɛr woorank kɛ, "Iinak joop Israeelik, in koorɛɛ ɛɛk agut any sinikɔɔ ijaagiir joope sigeegek. 36Jeemɛ ŋaarɓa raŋana Tewodaas nɛ tonu kɛ "Eet iɗit sinɔ obiiŋɔŋk" nɛkan nomɛrɗi joop sigɔ atu ɗibɛɛkɛ sigɔɔgɛ aŋank. Yakanakan ɓokotɛɛŋ, nɛkan kɛɛtiɗi nomtaana gɛɛnɛŋ, nɛkan dakɛ any sinɛkan ɗɛykɛɛk a kiiɗɛ ɔɔtɛ.

37Saadi baŋiya eme sinaanɛkan ikomiiɗɛɛ joopuk, Yuudaa sinɛkan iɗit Gɛlilaak pirekan ɗuka nɛkan ari kɛnɔ nomɛrɗi joop sigɔ ɓɔɔkaaŋɔŋk. Yakanakan ɓokotɛɛŋ, nɛkan kɛɛtiɗi joop sigɛɓa nomɛrɗik baŋɛ. 38Agut sini tona kɔna kɛnɔ ŋɔɗutaarɔ joop sigi nɔ wideer ɛɛk sɛɛge, agut sinɔ ɔkɔnkan koɓi sini maŋk ijaag sini kus eteŋ badɛkoyiŋ, 39ma ɔkɔnkan kus Waakoyoteŋ nɛ kiir oolɛ a sɔɔkɛɛr joop sigiŋ. Arikɔɔ kɔna ɛɛk a ɗaakan a Waakoyok."

Nɛɓa joop sigɔ gaɓɛr woorank boŋur waasiyɛ Gɛmaliyaalikiŋ. 40Nɛɓa riyarki wosɛytaanak gɛɛŋk son lak sɛɛgik, nɛ kurak arir a ɗiŋɛ sɛɛgiŋ. Nɛ tonur sɛɛga kɛnɔ kat waasiɗi a riyar tiriya Yeeseek, nɛ ŋɔɗutar sɛɛgiŋ. 41Nɛɓa ŋaararki wosɛytaana saadi ma yaa sɛɛgaŋ, agut sinɔkan ariiɗ Waakoyot a gayɛr nɔ daraayɛɛ sɛɛg agut tiriya Yeeseek. 42Kirɓa nyɛyɛ rɔɔriyɔn a waasiyɛ Pɛɛni sinɔ Bɛlkɛɛstank ɓɛɛnyɔwɛɛkɛ, sinɛ Yeesee sinɛ Kereseek Godeey sinaanɛ Geetitank, a wɛykɔkɛ joopoŋk.

Currently Selected:

Ijaag Wosɛytaanakoŋk 5: KSTM

Highlight

Copy