Ijaag Wosɛytaanakoŋk 28

Paawuloos Asuulɛɛ Maltaak

1Nɛɓa mɛlii walasa bɔdɛɛɗ, nɛɓa ɗegerii asuulɛ sinɛkɔ mɛlgiɗiik kɛ riyɛ kɛ Maltaa. 2Joop sigɛ beeɗir asuulɛɛ sinaanɛk ijaagirɓa tina mentanka sinɔ reemɗi ɓayɛk. Agut sinɔɓa ɛɛkɛɛɗ tulk nɛ saloŋɔŋk, nɛɓa adir maɗ nɛ tin boŋurŋ. 3Nɛɓa Paawuloos tolɛ temaak nɛ oriir sɛɛg maɗa, nɛɓa ŋaarki kooko agut paakan nɛɛk, nɛ gaamɗitargeeɗ nɛ lallawiɗ ariit. 4Saaɓa dɛnɛrɗi joop maltaak kooko a lalalawi ariit Paawuloosuk, nɛɓa tonur ɛkanɛɛkɛ gɛŋk kɛ, "Ege sini iɗit sinɔ ɓokokotiiŋɔŋk eekeerɛ. Kɛygunkɔ ŋaaraakɛ goroo sinɔɔnɛ obiiŋɔŋk bɔdɛɛɗiŋ, kikoy bɔdɛ pirdii Jookoŋk nɔkoy oolɛ nɔ beeɗ wɛɛŋakɛ." 5Yakanaɓa Paawuloos oriir kooko nɛɛk maɗa, aɓa kiik laŋiiɗ soon meeŋɔŋk. 6Nɛɓa koorɛr joop kɛ ŋayorkɔɔ ɛɛk nɛɛkɛ sise, maŋk ɗiirikɔɔ reta a gorgorŋ. Yakana saaɓa koorɛrɗi kɛ manyk nɛ dɛnɛr a kɛɛ rakatɛ sinɔ laŋkik, nɛɓa weerɛr koɓiɗak gɛŋk nɛ tonur kɛ, "Ege sini joo."

7Saadiɓa arkiɗiik jɔk, lakɛɓa ɗoo iɗit Pupiliyoos sinɔ ɔɗɔwen asuulɛ nɛɛkik. Nɛɓa tin boŋu nyaka nɛɛka nɛ tin wɔɔrɛ a mentanŋ a ɗoŋ jiit. 8Saaɓak ɛpɛn Pupiliyoosa goruɓa paakan ɛɛkoŋk a paayan nɛ ɗuɗuŋɗe, nɛɓa Paawuloos guugunyuru son lak sɛɛnik nɛ ɗanɗamaaɗiŋ nɛ riiɓeeɗ ari nɛ ebɔdɛŋ. 9Nɛɓa saadi baŋiya, kurak gortaanak ɔgɔɔk sigɛ beeɗir asuulɛɛ nɛɛkɛkik nɛ bɔdɛrŋ. 10Eemɛyarɓa tin joop gɛɛnɛ a tina ɗɔkarki tigi sinɔ obiiŋɔŋk. Nɛ saaɓa kopaayɛɗii kɛnɔ ŋaarii emɗik, nɛɓa tina gaɓɛɛtar emɗa any sinɛ tina ɗɛyɛk baŋɛ.

Ŋawit Paawuloosuk Maltaake Rooma

11Nɛkan beeɗii a ɛyɛkeer jiit, nɛ ŋaarii emɗ sinɔɔnɛ kus Iskindiriyaakeek, sinaanakan kaalɛ baŋgi nɛɛk asuulɛɛ Maltaak, lakɓa sɛŋk yaaŋtan diyoskorosuk sinɔ riyɛ kɛ Jookak sigɔ Olakaanakik. 12Nɛɓa mɛlii katamɛya Sirkusuk, nɛɓa beeɗii saadi a ɗoŋ jiit. 13Nɛɓa saadi ŋaarii nɛ mɛlii Regiyuuma. Nɛɓa alɛ nɛɛkɛ, lakɛ yoŋgoy sinɔ kus goyse ɗiɗikaak. Nɛɓa anytinaan nɛɛkɛk kɛkar, mɛlii Putiyoluusa. 14Nɛɓa laŋkii dooytaanak sigɔ tin kaaɓur kɛnɔ beeɗii a sɛɛg agut omoŋ a ɗoŋ tula pɛɛy, nɛɓa ŋaarii Rooma. 15Nɛɓa tiyɛr dooytaanak gɛɛnɛ sigɛ atu Roomeek agut eteŋk, nɛɓa kurak mɛlɛɛɗa Gabiyeya Apiyoosuk a soona riyɛ kɛ Nyonitaak Ɗeegarɔɔnoŋk sigɔ Jiitik kɛnɔ tin boŋur. Nɛ saaɓa Paawuloos dɛnɛɛɗ sɛɛgik, nɛɓa pɔɔsɛ Waakoyo, ɛ gaanaanɛ ɛɛk nɛɛk.

Paawuloos Roome

16Saaɓa mɛlɛɛɗii Roomaak, nɛɓa pɛgɛdɛɛ Paawuloosa kɛnɔ beeɗ mowan nɛɓa gagiɗɛɛ amaasini sinɔ koorɛ sɛɛnŋɔŋk.

17Saaɓa mɛlɛɛɗ Roomaak ɗoŋikɛ sigɔɔgɛ jiitik baŋiya, riyɓa Paawuloos ɔɗɔweer Ayuuduk. Nɛɓa tolɗi, nɛ tonu sɛɛga kɛ, "Iinak manyaakak eeta, kɛɛ tikiyɛ sigɔkan ijaaga joope Israeelik a barɛɛɗ ɔrɛyak gaŋkik raŋk, makanti korkoɗɛɛ Yorsaleeme nɛkanti gaɓɛɛ joopa Roomuk. 18Nɛɓati mermenar nɛɓa ɗɛyɛrkɛ a guntu ŋɔɗutar sɔkɔn, agut sinɔ kante kirkiɗ laŋiiɗ any sinɔ goopaagidɛ retik. 19Yakana joop Ayuuduk ɓooyurkan saa guntu ŋɔɗurkuɗɛ sɔkɔnk, nɛkanti remɛr kɛnɔ kalɛya Keesaar nɔta dɛnɛ tikiyɛ gaaŋk. Makante kɛɛ any sinɔ daariyɗiiɗa joopa gaanakik. 20Riya kɔnu nɔkɔnu dɛna nɔkɔna tona any sini. Korkoɗɛɛkɔtu meltikɛ awɛytiiroŋk agut ŋaadiyɛ sigɛ kookorɛɛk sigɛɓa gaɓɛɛ joopa Israeelik."

21Nɛɓa sɛɛk jumurargeeɗ kɛ, "Kiikikan tina mɛlɛɛ wargatɛ sinɔkan taapɛɛ agut pɛɛni nookuk ɗook Yuudaak, joope sigaagɛkan kurak seenak kɛɛ iɗit sinɔkan tonu any sinɔ ŋɛɛwɛnŋɔŋk agut iinik. 22Pakattan ŋaadiyɛɛkoŋk sigi nomɛɗink ɗegerii kɛ ɓooyur joop nyonitaakɛŋ, agut sini ɗɛyii a tiyii koɓi nook kɛ ɓɛɛlɛ ɛkiŋ."

23Agut sini gaamurɓa waawuy, nɛɓa kurak nyaka nɛɛka a ɓɔɔkaaŋ. Nɛɓa sɛŋk yaaŋɛ sɛɛga koɓi nɛɛk a sɛɛga waasɛ agut burɛ Waakoyotoŋk a tukiɗi romiɗ mɛlɛɛɗa ajigeya. Yaaŋɛɓa sɛɛga agut Yeesee a mermenki Wargatɛɛ Higi Muuseek a Joop Pɛrkaakoŋkuk. 24Joop a omoŋ omoŋ ŋaadirɓa any sinɛ tonukuŋ, ma ɔgɔɔk kir ŋaadit. 25Nɛɓa sɛɛk pakakati a kir mɛyit. Saaɓa Paawuloos tonɗiiɗ pediya nɛɛkaakik, a inɓa kir pakakatiit nɛɓa tonu kɛ, "Liki pɛɛni sinɛɓa tonur Wɛɛŋa sigɔ Geetitaanakik ete pɛrkaakoŋk Isaayaseek ɔrɛyaka goŋkuk.

26Tonuɓa kɛ, 'Mak son lak joop sigik nɔ kɛɛɗin tonun sɛɛga kɛ,

Tiyan tiiɗikariŋ, nɛ kiir koɓiiɗ.

Dɛnɛ dɛnɗiikariŋ, nɛ kiir mermenɛɛ.

27Joop sigi ɓɔɔkaak kilararɓa ɓayɛtun gɛŋkiŋ,

kir tiiɗit ween gɛŋk,

minyerɓa taamɛ gɛŋkiŋ kɛnɔ kat dɛnɗi.

Ɔkɔnɓa ki ɓɛɛlan oko sinikiŋ,

gunɓa dɛnɛr taamɛkɛ gɛŋk,

ɛ tiyɛr weenɛ gɛŋk,

ɛ koɓur ɓayɛtunɛɛkɛ gɛŋk,

nɛ gunɓa weerik son lak Eetik,

nɛ gunɓa ebɔda sɛɛgiŋ.'

28Sisɔ, in ɗegerɛɛ kɛ wosɛykɛɛkan wosɛ bɔdɛɛɗoŋk Waakoyotoŋk joopa sigaaga moko Ayuudukuŋ, nɛkoy sɛɛk boŋur a arirgeeɗ kɛ dɔɔs! 29[Saaɓa toniiɗ sinik, nɛɓa joop Ayuuduk palamɗi ɛkanɛɛkɛ gɛŋk jɛt nɛ ŋaararŋ.]

30Beeɗɓa Paawuloos godeey sinaanɛɓa kɛraayɛk a emeyi pɛɛy baŋɛ. Nɛɓa boŋu joop sigɛɓa kurak son lak sɛɛnik baŋɛ. 31Waasiɗiiɓa agut burɛ Waakoyotoŋk, rɔɔriyaaɓa agut Suumi Yeese Keresee, a kɛɛ iɗit sinɔ ɓaarɗi sɛɛnik a ki ɓuriit.

Currently Selected:

Ijaag Wosɛytaanakoŋk 28: KSTM

Highlight

Copy