Pɛɛyeen Korontoosuk 7
7
1Sisɔ iinak sigɛ kɔnu poraak, agut sinɔɓa gaɓɛɛɗɛɛ ŋaadiyɛ sigɛ kookoriik agut eteŋkik, nɛ koy ŋaɗii ɛkan gaŋk olaatɛ sigaagɛ arir taar naŋk a wɛɛŋa gaŋk a somkaanakik, ɛ koy arii mentanka naŋk taamɛkɛ Waakoyotoŋk adaktan tuɓur Waakoyotoŋk.
Yaaka Paawuloosuk
2In tina tayɛɛ nyon ɓayɛtunɛɛkɛ goŋk a bakaanyiŋ. Kɛɛ iɗit sinɔkan tikiik, kɛɛ iɗit sinɔkan arii a meeŋɔŋk, kɛɛ iɗit sinɔkan sɔɔkiik. 3Moko kɔna tona sini kɛnɔ kɔnu goopii, agut sinɔ tonakan kɔna jeemɛ kɛ atukari ɓayɛtunɛɛkɛ gaŋk tak, kɛnɔ rɛɛrii agut omoŋ ɛɓɔrɛ beeɗii agut omoŋ. 4Laka ŋaadiyɛ sigɔ ɓɔɔkaaŋɔŋk iinakɛ raŋk. Laka meri ɛɛkoŋk sinɔ obiiŋɔŋk iinakɛ raŋk. Gaanana ɛɛk iinakɛ, yaata jɛt rakatɛɛ naŋk baŋɛ.
5Saaɓa aasi mɛlɛɛɗii Mɛkedooniyaakaak, nɛɓa ɛkan gaŋk kir laŋiiɗ imiiny. Laŋkiiɓa rakatɛ gɔɔteer baŋɛ, ɗaakikiiɓa a joop ɔgɔ nɛɓa lakii tuɓur ɓayɛtunɛɛkɛ gaŋk. 6Yakana gaananɛ kan tin Waakoyo sinɛ gaananɛ joop sigɔ sanɗiŋɔŋk mɛlɛɛɗ Tiitook. 7Moko mɛlɛɛɗ nɛɛkɛ dakɛɗa, mayakana agut sinɔkan tiyɛɛɗii kɛ gaananirkannɔ ɓɔrɛ sɛɛnŋɔŋk. Nɛ tina tonu kɛ latukarnɔta ŋɔɗɔ sinɔ gun tu dɛnɛrɗɔŋɔŋk, Nɛkan ɓakɛyɗiikariŋ, nɛ ariir nyeken agut eet. Agut sini obi yaaka naakɛ a kaalɛ ɔɔtɛ sinɛkan jeemɛk.
8Kɛygunkan aasi wosɛ sinɛkan kɔna taapɛɛraak ari kɔnu a sanɗikariŋ, nɛ kaa ŋadi agut sinɔkan taapɛɛɗa wosɛ nɛɛkik. Ma ŋada agut sinɔkan kɔnu ariɗ wosɛ naakɛ a sanɗikar ɔɔtɛya sinɔɔna balaaŋɔŋk. 9Yakana sisɔ yaataaŋ, moko agut sinɔkɔ kɔnu ariiɗa a sanɗikariŋɔŋk, ma agut sinɔkɔ kɔnu ariiɗ san noŋk a weerikɔɔ tikiyɛɛkɛ goŋk Waakoyotak. Agut sinɔ ɓɛɛlɛɛɗ san noŋk oko ɗɛyan Waakoyotoŋkuk nɛ kɛɛ any sinɔkan kɔnu tikeeɗaak. 10San sinɔ ɓɛɛlɛ oko ɗɛyan Waakoyotoŋk ɗɔku bɔdɛ sinɔ weerikiɗɛɛ tikiyɛɛkɛ Waakoyota a kiidɛ ŋadik, mayakana san ɗookoŋk ɗɔku rer. 11Agut san sini ɓɛɛlɛ oko ɗɛyan Waakoyotoŋkuk sinɔkan ijaagiɗi iinakɛ kɔɔrk. Arikan ɓaŋkaawurɔn sinɔ ɛtɛ ɛkik, a jumuran sinɔ ɛtɛ ɛkik, a ŋadi sinɔ ɛtɛ ɛkik, a tuɓur sinɔ ɛtɛ ɛkik, a ŋɔɗɔkikeen sinɔ ɛtɛ ɛkik, a nyeken sinɔ ɛtɛ ɛkik, a tiijeet sinɔ ɛtɛ ɛkik. Nɛ yaaŋɛɛri ant sineene kɛ mentaanakari olaatɛ baŋɛ. 12Agut sini moko kɔna taapiɗiira agut iɗit sinɛkan tikiɗiik, maŋk sinɛkan tikɛɛk. Mayakana agut ɓaŋkaawurɔn noŋk sinɛ latukari eteŋkaak, kɛnɔ yaaŋɛ ɛɛk taamɛkɛ Waakoyotoŋk.
13Gaananit naŋk nɛ tina yaa a kaalɛŋ agut yaaka Tiitook, agut sinɔkan gaananɛrɗɔ Tiitoo iinak baŋɛk, ɛkan ariir a imiinye ɓayɛ nɛɛkɛŋ. 14Tonakan Tiitowa meri ɛɛkoŋk sinɛkan lakii iinakɛkiŋ, maɓɔrɔ kiirti ariiɗ a laka keeny. Toniikan kɔna eekeer ɓɛɛnyɔwɛ gɛɛŋk baŋɛ, meri ɛɛkoŋk sinɛkan tonii Tiitowa agut iinakik mermenɛɛkan soon kɛ eekeerkiŋ. 15Nɛ obi jɛt mɛyin sinɛ lak Tiitoo agut iinakikiŋ saakan ɗegerɗi kɛ tiiɗikari iinak baŋɛ ɛkan boŋiir sɛɛn tuɓur a piiɗaank. 16Yaata a kaalɛŋ, agut sinɔ laka kɔne ŋaadiyɛ sigɔ daktaanakik.
Currently Selected:
Pɛɛyeen Korontoosuk 7: KSTM
Highlight
Share
Copy
Want to have your highlights saved across all your devices? Sign up or sign in
