Omoŋ Tɛsɛlonkeek 2

Ijaag Paawuloosuk Tɛsɛlonkeek

1Iinak manyaakak eeta, ɗegerari ɔɗɔwa noŋk kɛ mokokan kɔrii son lak iinakik kanysɛya. 2Oko sinɛ ɓɔrɔ ɗegerarɗɔ kɛ laŋkiikan nyɔɔna a rakatɛ saakan arkiɗii jeemɛ Pilipisiyoosekiŋ. Yakana aasi kɛygun tina mɛlaakɛ ɓooyan sinɔ obiŋɔŋkuŋ, nɛkan tina gaɓɛ Waakoyot diirikeen kɛnɔ kɔnu rɔɔriyii Pɛɛnii sinɔɔnɛ Ɓɛlkɛɛstank sinaanɛkan tina gaɓɛ Waakoyotuk. 3Moko kɔnu rɔɔriyii rɔɔriyɔnɔ sinɔɔnɛ tikaaŋɔŋk maŋk koɓiiɗ sinɔɔnɛ ŋɛɛwɛnŋɔŋk maŋk sinɔɔnɛ ɗɛyɛɛɗii a raamɛɗii iinakik.

4Yakana tonii agut sinɔkan tina gaɓɛɛɗ Waakoyot Pɛɛni sinɔ Ɓɛlkɛɛstank a adarat a tin ŋaadigeeɗŋɔŋk. Nɔkan ijaagiɗii sinik kɛnɔ yaa ɓayɛ Waakoyo sinɛ mermen ɓayɛtun gaŋkik, ma moko kɛnɔ yaa ɓayɛ etoŋk. 5Ɗegerari sinɔ kɛ kii kan kɔna muuset ɛɛk nyonɛ kɛnɔ kɔne laŋii tɔkɔny, maŋk tɔkɔny naŋk maŋk ɔɔtɛ tagayoŋk. Nɛ ɗeger tin Waakoyo. 6Kiikan ɗɛyɛ eemɛyɔn sinɔ laŋɛɛ iinakɛk kɛygun wooɗe. 7Kɛygun aasi eteŋk nomtaanakiŋ ɔɔtɛ saagun kɔnu ooɗɛɛɗiik, nɛkan kɔne weeweriikii kɔɔr a rikitii ɛɛk oko sini lowiiɗ ɛmɛsa tɔɔna tɔɔn nɛɛkik. 8Porii seek kɔnu jɛt nɛ agut sinɔ kɔnu poriiɗiiŋɔŋk nɛ kɔna waasii Pɛɛni Waakoyotoŋk sinɔ Ɓɛlkɛɛstank, moko sini dakɛɗa, eteŋk ɓɔrɛ ragadtaanak sinɔɔna kɔna gaɓɛɛɗii wɛɛŋa gaŋkŋɔŋk.

9Iinak manyaakak eeta, ɗegerari kɛ ijaagɗikiikan ɛk ɛkan bɔɔlaakii ɛk, bɔɔlaakiikan ijaag kaay a waawuy saakan kɔna waasɛɛɗii Pɛɛni sinɔ Ɓɛlkɛɛstank Waakoyotoŋk, kɛnɔ kat lakɛ iɗit sinɔ dakgiɗii a diilk. 10Ɗegerari sɔɔk ɛ ɓɔrɛ ɗeger Waakoyot kɛ beeɗiikan a eteŋk geetitaanak a tin kɛɛ laaganyɛk, saakan arkiɗii saay iinakɛ ŋaadtaanakɛ kɔɔrk. 11Iinak ɗegerari any sinɛkan ɓɔrɛ kɔna ijaagiik a omoŋ omoŋ oko sinɛ iɗit lowiiɗ tɔɔmɔk gɛɛŋkiŋ. 12Ɗegerar kɛ ariikan kɔna adarat a ɓaŋkaawurari ɛ kɔnu rɔɔriyii, kɛnɔ koy boŋiir Bbrɛ nɛɛk ɛ koy iinak kaastaanak eemɛyɔn nɛɛkik. Ɛ kɛnɔ beeɗiir beeɗiit sinɔ ari Waakoyo sinɛkan kɔnu riyk a yaageeɗŋɔŋk.

13Ɛ ɓɔrɛ pɔɔsii Waakoyo a kii nyɛyɛ. Agut sinɔ saakan boŋurɗɔ Pɛɛni Nɛɛk sinɛɓa tiyɛɛr eteŋkɛɛk, nɔkan boŋiir oko Pɛɛni Waakoyotoŋk sinɛ ijaagɗi iinakɛ sigaagɛ ŋaadiɗikarik eekeerɛk, ma mokokan boŋiir oko pɛɛni etoŋk. 14Iinak manyaakak eeta, gayikar a Godeyi Sambatɛyɛɛkoŋk Waakoyotoŋk sigɛ sɛɛg laŋɛ ɗook Yuudaak sigɛ atu Yeese Kereseek oko sinɛkan laŋirkiɗ rakatɛk joope Ayuuduk nɛkan ɓɔrɔ laŋirkɔ rakatɛ tekaaneerɛ goŋkuŋ. 15Ege sigi joop Ayuuduk sigɛɓa ɓokotur Suumi Yeesee a joop pɛrkaakoŋk, ɛ ɓɔrɛ tin epapayar nɛ tin ɔɔyɛr ɗokanɛɛka. Sɛɛg joop sigɔ arir Waakoyo a ki yaaka ɓayɛ nɛɛk ɛ sɛɛg gumaakeer joop baŋɛk. 16Ɓaarar tin kɛnɔ kat waasii Pɛɛni sinɔ Ɓɛlkɛɛstank sinɔ koy bɔdɛrɗi joop sigɔ moko Ayuuduk. Oko sinik ɛnyɛnyɛkar a tutukarki tikiyɛ tikiyɛɛka raŋana. Yakana mɛlkikɔɔ sɛɛga goopan Waakoyotoŋk pediya nɛɛkaak.

Ɗɛyɛ Paawuloos Dɛnɛɛ Joop Tɛsɛlonkeek

17Yakana iinak manyaakak eeta saakan kɔnu pakakatiiɗii ɔɔtɛya sinɔɔna balaaŋɔŋk taarek, ma moko koɓiiɗik, nɛ paarii a ɗɛyii a kɔnu dɛnii taamt agut sinɔ kɔna lakiɗii ŋɔɗɔ jɛtik. 18Ɗɛykaayiikan a gun kɔrii son lak iinakkiŋ. Kɛ ɗɔm eet Paawuloos paarirkaayakan ɛnyɛ son lak iinakik agut ɓɔɔkaaŋ, yakanakan tin ɓaarɗi setan. 19Ŋaadiyɛ sigɛ kookoriik a yaaka naŋk a merii naŋk ɛɛkoŋkŋk a dooroy naŋk eemɛyɔɔnoŋk wooɗak? saakoy mɛlkiɗ Suumi naŋk Yeeseek taamɛkɛ gɛɛnɛkik Moko iinak? 20Iinak eemɛyɔn naŋk ɛɓɔrɛ iinak yaaka naŋk eekeerɛ.

Currently Selected:

Omoŋ Tɛsɛlonkeek 2: KSTM

Highlight

Copy