Roomaxituse 4
4
Abrahaamey aadexona gizzosa
1Hine, nimba yella Abrahaamey am degesso hidiwu ni hiye? 2Abrahaamey be hantana gizesesa e maaddhako esuna be cee'uttesa keemako e keemaane. Hattema Wonto buro esuna be cee'uttesa keenguwasso. 3Hayla Fissharoy am ohe? <<Abrahaamey Wonto e aadesso. Ye be aadexona gizo maaddhi e taabutto>> hidiko e hine. 4Hanta hante axuse e hanto wooma shamey e gatto gafa wooma shameko baaka esuse mikke ingo maaquwasso. 5Axi beese modhe hante dheeddakoni axe e cubbowafa maare Wonto be aadesso geede e aadexoy gizo maaddhiko e taabutte. 6Dawitey be badena Wontoy e hanta beedi e maaddho baane fede ogena esa gizusso axi aba makki aallo suuzuttesesa e maaqesa addusisine 7<<Iita u hantaafa Wontoy uso maardi u cubbo ucci e oossositi suuzutteseesitako u maaqe. 8Wontoy e cubbo e gara taakuwa axi suuzuttesesako>> yeydiko e hido.
9Hinne Dawitey <<Suuzuttesesako u maaqe>> yeydi hidositi Ayhudaxituwani Ayhuda maaquwasitani kosaara e kose? Eewwa, Ayhuda maaquwasitani kosako e kose. Ye esini <<Abrahaamey be aadexona gizo maaddhi e taabutto>> yeydiko nu hidese. 10Hinne waydi e taabutto? Gada e utto geediyani gada e uttosume buroni e taabuttosi? Gada e utto geede e maaddho baane gada e uttosume buroko. 11Abrahaamey gada utto badi yesune e aadexoy gizo maaddhi taabuttesenike beysesuko Wontoy esa gada e uttoronike e mato. Ye e gisha gada utto badi yesine Wonto aadesi uyne u aadexoy gizo maaddhi taabuttosituse uddi Abrahaamey adeko. 12Yeydiwo Abrahaamey gada utteseesituseni adeko. Ye ususe ade maaqese e dandadhosi gada u uttosunawo e maaddho baane Abrahaamey beese gada utto badi yesine aadessi e hando ogena u handoosunako.
Aadexiya yeseesituse ohutta gobbo
13Abrahaamey be fira fiixhaara ha saha e dhaalenikeko Wontoy esa gobbusso. Esani e gobbussosi Abrahaamey Wonto woga e katto gisha e maaddho baanne Wonto e aadesso gishaara e aadexoy gizo maaddhi taabutto gishaarako. 14<<Woga kafenako ta loole>> yeydi hineesiti dhaalaxe u maaddhakoma aadexoy go'uwasako maaqaane, Wontoy gobbusso gobboni yeydiwo go'uwasako e maaqaane. 15Wogay e oonesi Wonto huulako. Wogay dheeddakoma woga garey badiko e yecha.
16Wontoy gobbusese gobboy e bentesi aadexonako. Ye e gisha Abrahaame fira fiixhay uddi ye gobbusuttese gobbo Wonto maxo modhetiyafa dendasuna u ekkenike eezuttuwasso. Abrahaame fira fiixha hidi hiyoni wogana yeseesitawo e maaddho baanne hade Abrahaameke Wonto aadexeesitusaarako. Ye esini Abrahaamey aadexo ogena nimba uddi yella adeko. 17Yeydi e maaddhosini Abrahaamese <<Nemba be nuunana nuunana zeere axituse adeko ta matese>> yeydi e diizuttonikeko. Abrahaameni haydhechashituse yeso ingesa, badi yechashe e yesoronike mahesa maaqe be aadesso Wonto buro nuuse adeko.
18Abrahaamey <<Ha esako>> hidi gobbo e gara e gaddo abakoy baa woggaaka Wonto aadexisiniyara gobbisiniyarako e yecha. <<Ne fira fiixhay ha e aalloko e lagge>> yeydi e diizuttonikeko be nuunana nuunana zeere laga axituse ade e maaddho. 19Esi beese xhiixi bera ellese axe maaddhi cindi yeluwasa maaddhiyara e machi Saaray cindese menxe maaddhi yelese i danda'uwasa maaqenikiyara eresa maaddhakoni aadexona gatto baasso.
20Fetto aadexona oseydi Wonto e kussosa baaka Wontoy esa gobbusso gobbo eezzo baasso. 21Ye esini Wontoy <<Mahoko ta mahe>> hidi gobbusso gobbose e mahenike bidzi muxhurona eezo keenguwadiko e yecha. 22Ye e gisha Wontoy Abrahaamey aadesso aadexona gizo mati e taatto.
23<<Gizo mati e taatto>> yeydi hine katoy e diizuttosi Abrahaamesewo e maaddho baane 24niisaarako. Ni Laaxi Yesuusa haybowafa densa Wonto aadexe nimbani gizo matiko e taake. 25Wontoy e woga ni gardo gisha Yesuusay hay'oronike garsi e indo. Nimba gizo mahese esa haybowafani e denso.
Currently Selected:
Roomaxituse 4: KilleC
Highlight
Copy
Compare
Share
Want to have your highlights saved across all your devices? Sign up or sign in