ኀበ ቲቶ 1

ምዕራፍ 1

1 # 1ጢሞ. 6፥3። እምጳውሎስ ገብሩ ለእግዚአብሔር ወሐዋርያሁ ለኢየሱስ ክርስቶስ በሃይማኖቶሙ ለኅሩያኒሁ ለእግዚአብሔር ወአእምሮ ጽድቅ ዘበጽድቁ ለእግዚአብሔር። 2ወበተስፋ ሕይወት ዘለዓለም ዘአሰፈወ እግዚአብሔር ዘኢይሔሱ እምፍጥረተ ዓለም። 3#ኢሳ. 12፥2፤ 2፥10-13። ወአርአየ ቃሎ በዕድሜሁ በስብከተ ዚኣነ ኪያሁ ወተአመነኒ ሊተ ላዕሌሁ በትእዛዘ እግዚአብሔር መድኀኒነ። 4#2ቆሮ. 2፥13፤ 8፥23፤ ገላ. 2፥3፤ 2ጢሞ. 4፥10። ለቲቶ ወልድየ ዘአፈቅር በተፋቅሮ ወበሃይማኖት ሰላም ለከ ጸጋ ወሣህል እምኀበ እግዚአብሔር አቡነ ወእግዚእነ ኢየሱስ ክርስቶስ መድኀኒነ።

በእንተ ሢመተ ክህነት

5 # ግብረ ሐዋ. 14፥23። እስመ እንበይነ ዝንቱ ኀደጉከ ውስተ ቀርጤስ ከመ ታስተራትዕ ዘተርፈ ወትሢም ቀሲሳነ ለለ አህጉር በከመ አዘዝኩከ። 6#1ጢሞ. 3፥2፤ 1ጴጥ. 5፥3። ብእሴ ዘአሐተ ብእሲተ አውሰበ ኅሩየ ዘኢየሐምይዎ በእኩይ ዘቦ ውሉድ መሃይምናን ዘኢያስተዋድይዎሙ በምርዓት እለ ኢኮኑ ዝሉፋነ እለ ይትኤዘዙ። 7#1ቆሮ. 1፥1፤ 2ጢሞ. 2፥4-24፤ 1ቆሮ. 4፥1-2፤ ማቴ. 24፥45፤ 2ተሰ. 2፥5። ወርቱዕ ይሠየም ጳጳሰ ዘአልቦ ሐሜት ዘኢያደሉ ከመ መጋቤ እግዚአብሔር ዘኢኮነ መዓትመ ዘልቡብ ዘኢያበዝኅ ሰትየ ወይን ወኢያፈጥን እዴሁ ለዘቢጥ ዘኢደፋሪ ወኢዝኁር ወዘኢያፈቅር ንዋየ ከንቶ። 8መፍቀሬ ነግድ፥ ዘሠናይ ምግባሩ ዘአንጽሐ ርእሶ ጻድቅ ወኄር ወየዋህ ወመስተዓግሥ ዘያነሐሲ ዘምሁር ቃለ ሃይማኖት። 9ዘይክል ገሥጾ በትምህርተ ሕይወት ወይዛለፎሙ ለእለ ይትዋሥኡ። 10እስመ ብዙኃን እለ ኢይትኤዘዙ ወነገሮሙኒ ከንቱ ወያስሕትዎሙ ለጽሉላነ ልብ። 11#ማቴ. 22፥34፤ 2ጢሞ. 4፥2-7። ወፈድፋደሰ ለእለ እምአይሁድ እለ ርቱዕ ይፍፅምዎሙ አፉሆሙ እስመ እሉ ይገፈትዑ አብያተ ኵሉ ወይሜህሩ በዘኢይደሉ በዘይረብሖሙ ኀሣር። 12ወናሁ ይቤ አሐዱ እምኔሆሙ ነቢዮሙ በእንቲኣሆሙ እስመ ሰብአ ቀርጤስ መደልዋን ሐሳውያን ዘልፈ አራዊት እኩያን ከርሠ መካን ወዝንቱ ስምዕ እሙን ላዕሌሆሙ። 13ወበእንተ ዝንቱ ተዛለፎሙ ምቱረ ከመ ይጠይቁ በሃይማኖት። 14#ኢሳ. 29፥13፤ ማቴ. 15፥9፤ 1ጢሞ. 4፥7። ወኢያምጽኡ መሐደምተ ወሥርዐተ ሰብእ ዘይመይጣ ለጽድቅ። 15#ማቴ. 15፥11፤ ሮሜ 14፥20። እስመ ኵሉ ዘኮነ ንጹሕ ለንጹሓን ወለርኩሳንሰ እለ ኢየአምኑ አልቦሙ ንጹሕ ምንትኒ። 16#ሕዝ. 33፥31፤ 2ጢሞ. 3፥5። እስመ ርኩስ ኅሊናሆሙ ወበልቦሙ የአምኑ ከመ ዘየአምርዎ ለእግዚአብሔር ወይክሕድዎ በምግባሮሙ ርኩሳን እሙንቱ ወከሓድያን ወምኑናን በውስተ ኵሉ ምግባረ ሠናይ።

Currently Selected:

ኀበ ቲቶ 1: ሐኪግ

Highlight

Copy