ኀበ ሰብአ ሮሜ 8

ምዕራፍ 8

ዘከመ ተስእኖ ለሕገ ኦሪት አድኅኖተ ሰብእ

1ወአልቦሙ እንከ ኵነኔ ለእለ የኀድጉ ምግባረ ሥጋ በኢየሱስ ክርስቶስ። 2#3፥27። እስመ ሕገ መንፈስ ዘሕይወት ዘተውህበ በኢየሱስ ክርስቶስ ውእቱ አግዐዘነ እምሕገ ኀጢአት ወሞት። 3#ግብረ ሐዋ. 13፥38፤ ዕብ. 2፥17። ወሶበ ተስእኖ ለሕገ ኦሪት ላዕለ ሞት በእንተ ድካመ ሥጋ ፈነወ እግዚአብሔር ወልዶ በአምሳለ ነፍስተ ኀጢአት ወኰነና ለይእቲ ኀጢአት በነፍስቱ። 4ከመ ያጽድቀነ ኪያነ ወከመ ይረሲ ለነ ከመ ዘፈጸመ ገቢሮቶ ለሕገ ኦሪት ለእለ በሕገ መንፈስ የሐውሩ ወአኮ ለእለ በሕገ ነፍስቶሙ ይገብሩ። 5#ዮሐ. 4፥24። እስመ ኵሎሙ እለ ለግዕዘ ነፍስቶሙ ይገብሩ ዘዝንቱ ዓለም ይኄልዩ ወእለሰ ዘመንፈስ ይኄልዩ ዘመንፈስ።

በእንተ ኅሊና ሥጋ ወኅሊና መንፈስ

6 # 7፥21። ወኅሊናሁሰ ለነፍስትነ ሞተ ያመጽእ ላዕሌነ ወኅሊናሁሰ ለመንፈስ ሰላመ ወሕይወተ ይሁብነ። 7#ያዕ. 4፥4። እስመ ኅሊናሁ ለነፍስትነ ፀሩ ለእግዚአብሔር ውእቱ እስመ ኢይገርር ለሕገ እግዚአብሔር ወኢሂ ይክሎ። 8እስመ ኵሎሙ እለ ለግዕዘ ነፍስቶሙ ይገብሩ ለእግዚአብሔር አድልዎ ኢይክሉ። 9#1ቆሮ. 3፥16። ወአንትሙሰ አኮ ለግዕዘ ነፍስትክሙ ዘትገብሩ ዘእንበለ ለሕገ መንፈስ እስመ መንፈሰ እግዚአብሔር ኅዱር ላዕሌክሙ ወዘሰ አልቦ መንፈሰ ክርስቶስ ላዕሌሁ ውእቱ ዘኢኮነ ዚኣሁ። 10ወእመሰ ክርስቶስ ምስሌክሙ ምዉተ ረስዩ ነፍስተክሙ ለምግባረ ኀጢአት ወሕያወ ረስዩ መንፈሰክሙ ለምግባረ ጽድቅ። 11እመሰ መንፈሱ ለዘአንሥኦ ለኢየሱስ እምዉታን ኅዱር ላዕሌክሙ ውእቱ ዘአንሥኦ እምዉታን ለኢየሱስ ያሐይዋ ለነፍስትክሙኒ በውእቱ መንፈሱ ዘየኀድር ላዕሌክሙ።

በእንተ ዘኢይደሉ አዝልፎ ምግባረ ሥጋ

12 # 7፥7-18። ወይእዜኒ አኀዊነ ኢርቱዕ ንግበር ለግዕዘ ነፍስትነ እንዘ ሀሎነ በነፍስትነ። 13#ገላ. 6፥8፤ ኤፌ. 4፥22። እስመ ኵሎሙ እለ ለግዕዘ ነፍስቶሙ ይገብሩ ምዉታን በላዕሉ እሙንቱ ወእመሰ በምግባረ መንፈስ ቀተልክምዎ ለምግባረ ነፍስትክሙ ተሐይዉ ለዓለም። 14እስመ ኵሎሙ እለ ይገብሩ ዘመንፈሰ እግዚአብሔር ውሉደ እግዚአብሔር እሙንቱ። 15#2ጢሞ. 1፥7፤ ገላ. 4፥5-8። ወዘአኮ ካዕበ ነሣእክሙ መንፈሰ ቅኔ በዘትፈርሁ አላ ነሣእክሙ መንፈሰ ዘይሁበክሙ ትርሲተ ወልድ ወትጸርሑ ሎቱ ወትብልዎ አባ ወአቡየ። 16#2ቆሮ. 1፥22። ውእቱ መንፈስ ቅዱስ ሰማዕቱ ለመንፈስነ ከመ ውሉደ እግዚአብሔር ንሕነ። 17#ራእ. 21፥7፤ ግብረ ሐዋ. 14፥22። ወእምከመሰ ውሉደ እግዚአብሔር ንሕነ ወራስያኒሁ ንሕነ ወእምከመሂ ወራስያነ እግዚአብሔር ንሕነ መዋርስቲሁኬ ለክርስቶስ ንሕነ ወእምከመሂ ወራስያነ እግዚአብሔር ንሕነ መዋርስቲሁ ለክርስቶስ ንሕነ ወእምከመሰ ዐረይነ ሕማመ ንዔሪ ክብረ ምስሌሁ።

በእንተ መንግሥተ ሰማያት

18 # 2ቆሮ. 4፥17። ወባሕቱ ኀልይዋ ለዛቲኒ ከመ ኢኮነት መጠነ ሤጣ ለእንታክቲ ክብር ወስብሐት እንተ ለዓለም ሕማሙ ለዝ ዓለም። 19#መዝ. 40፥1። እስመ ተስፋሁ ለዓለም ምጽአቶ ለወልደ እግዚአብሔር ይጸንሕ። 20#ዘፍ. 3፥17፤ 5፥21። እስመ ለከንቱ ተቀንየ ዓለም በኢያእምሮ። 21#ዮሐ. 1፥12፤ 8፥36። ወባሕቱ ቦቱ ተስፋ ከመ ይፃእ እምዝንቱ ዘአስሐቶ ወዘቀነዮ ወይግባእ ውስተ ስብሓተ ግዕዛኖሙ ለደቂቀ እግዚአብሔር። 22ነአምር ከመ ኵሉ ዓለም ሕሙም ወትኩዝ እስከ ይእዜ። 23#2ቆሮ. 5፥2። ወአኮ ዓለም ባሕቲቱ ዓዲ ንሕነሂ ንቴክዝ እለ ነሣእነ ቀዳሚሁ ለመንፈስ ቅዱስ እስመ ንሴፎ ትርሲተ ውሉድ ንርከብ መድኀኒተ ነፍስነ እስመ በአሚን ድኅነ። 24#2ቆሮ. 4፥18። ወተሰፍዎሰ ዘያስተርኢ ኢኮነ ተስፋ ወዘሰ ይሬኢ እፎ ይሴፎ ወይጸንሕ። 25ወእምከመሰ ንሴፎ ዘኢያስተርኢ ይትዐወቅ ትዕግሥትነ ከመ ተሰፈውናሁ ወቆምነ በእንቲኣሁ።

በእንተ ረድኤት

26 # ማቴ. 10፥20፤ ዮሐ. 16፥7-14። ወይረድአነ ለነ ድካመነ በመንፈስ ቅዱስ ወምንትኑ ውእቱ እንከ ጸሎትነ ለእመ ኢነአምር ተስፋነ ወባሕቱ መንፈስ ለሊሁ ይትዋቀሥ ለነ በእንተ ሕማምነ ወምንዳቤነ። 27#ዕብ. 2፥4-5። ወውእቱ የሐትቶ ለልብነ ወየአምር ዘይኄሊ መንፈስ ወይትዋቀሥ በኀበ እግዚአብሔር በእንተ ቅዱሳን። 28#ኤፌ. 1፥11። ነአምር ከመ ይረድኦሙ እግዚአብሔር ለኅሩያኒሁ ለእለ ያፈቅርዎ ውስተ ኵሉ ምግባረ ሠናይ። 29#ቈላ. 1፥15-19፤ ዕብ. 1፥6፤ ራእ. 1፥5። እስመ ለእለ ቀደመ ወኀረየ ወአእመሮሙ ኪያሆሙ ሠርዐ ይኩኑ በአምሳለ ወልዱ ከመ ይኩን ውእቱ በኵረ በላዕለ ብዙኃን አኀው። 30#ዕብ. 2፥4፤ 2ቆሮ. 12፥11-12። ወለእለሰ ሠርዐ ኪያሆሙ ጸውዐ ወለእለ ጸውዐ ኪያሆሙ አጽደቀ ወእለ አጽደቀ ኪያሆሙ አክበረ። 31#መዝ. 117፥6፤ ዘኍ. 14፥9። ምንተ እንከ ንብል እንበይነዝ ለእመ እግዚአብሔር ምስሌነ መኑ ይክለነ። 32#ዮሐ. 3፥17። ወልዶ ጥቀ ኢምሕከ እምኔነ አላ መጠዎ በእንተ ኵልነ ወምንትኑ ውእቱ እንከ ዘኢይጼግወነ ኵሎ። 33#ኢሳ. 50፥8-9። ወመኑ ውእቱ እንከ ዘይትዋቀሦሙ ለኅሩያነ እግዚአብሔር። 34ለእመ ለሊሁ ያጸድቅ መኑ ዘይኴንን ክርስቶስ ኢየሱስ ሞተ ወተንሥአ እምዉታን ወሀሎ ይነብር በየማነ እግዚአብሔር ወይትዋቀሥ በእንቲኣነ።

በእንተ ፍቅረ ክርስቶስ

35 # ዮሐ. 15፥18-21። መኑ ያኀድገነ ፍቅሮ ለክርስቶስ ሕማምኑ ምንዳቤኑ ተሰዶኑ ረኀብኑ ዕርቃንኑ መጥባሕትኑ ጻዕርኑ። 36#መዝ. 43፥22፤ 2ቆሮ. 4፥11። በከመ ይቤ መጽሐፍ «በእንቲኣከ ይቀትሉነ ኵሎ አሚረ ወኮነ ከመ አባግዕ ዘይጠብሑ።» 37#1ቆሮ. 15፥57። ወባሕቱ፥ በእንተዝ ንመውኦ ለኵሉ እስመ ውእቱ አፍቀረነ። 38#2ጢሞ. 1፥12። እትአመን ባሕቱ ከመ አልቦ ዘያኀድገነ ፍቅሮ ለእግዚአብሔር በኢየሱስ ክርስቶስ እግዚእነ ኢሞት ወኢሕይወት ወኢመላእክት ወኢቀደምት ወኢዘሀሎ ወኢዘይመጽእ። 39#2ቆሮ. 10፥5። ወኢዘኀይል ወኢዘልዑል ኢዘጸድፍ ወኢዳግም ልደት ዘመትሕት አልቦ ዘይክል አኅድጎተነ ፍቅረ ክርስቶስ።

Currently Selected:

ኀበ ሰብአ ሮሜ 8: ሐኪግ

Highlight

Copy