ኀበ ሰብአ ቈላስይስ 2

ምዕራፍ 2

ተጋድሎ በእንተ አርዳእ

1 # ፊልጵ. 1፥30። ወእፈቅድ ታእምሩ መጠነ እትጋደል በእንቲኣክሙ ወበእንተ እለ በሎዶቅያ ወበእንተ ኵሎሙ እለ ኢርእዩኒ ገጽየ በሥጋየ። 2#ዮሐ. 17፥3። ከመ ይትፈሥሖሙ ልቦሙ ወይጽናዕ ትምህርቶሙ በተፋቅሮ ወበኵሉ ብዕለ ፍጻሜ በጥበብ ወበሃይማኖት ወበአእምሮ ምክሩ ለእግዚአብሔር ዘበእንተ ክርስቶስ። 3#1ቆሮ. 1፥24-30። ዘበኀቤሁ ሀሎ ኵሉ መዝገበ ጥበብ ወምክር ኅቡእ። 4#ሮሜ 16፥18። ወዘኒ ዘእብለክሙ ከመ አልቦ ዘያስሕተክሙ በኂጣነ ነገር። 5#1ቆሮ. 5፥3፤ 14፥40። አንሰ ለእመ ኢሀሎኩ በሥጋየ ኀቤክሙ በመንፈስየ ምስሌክሙ አነ ወናሁ እትፌሣሕ በዘእሬኢ ግዕዘክሙ ወሥርዐተክሙ ወጽንዐ ሃይማትክሙ ዘበክርስቶስ።

በእንተ ጽንዐ ሃይማኖት

6ወበከመ ተወከፍክምዎ ለክርስቶስ እግዚእነ ቦቱ ሑሩ። 7#ኤፌ. 2፥22፤ 3፥17። ወተሣረሩ ወተሐነጹ ቦቱ ወጽንዑ በሃይማኖት ዘተመሀርክሙ ከመ ትብዝኁ በአኰቴቱ። 8ዑቁ ኢይኂጡክሙ በጥበበ ነገር ዘይዬውሁ ለከንቱ በሥርዐተ ትምህርተ ሰብእ ለስሒተ ዝንቱ ዓለም ወአኮ በሕገ ክርስቶስ። 9#ዮሐ. 1፥14፤ 1ጢሞ. 3፥16። ዘላዕሌሁ ኀደረ ኵሉ መለኮቱ በሥጋ ሰብእ። 10#ኤፌ. 1፥21። ወአንትሙሂ ኩኑ ፍጹማነ ቦቱ እስመ ውእቱ ርእሱ ለኵሉ መኰንን ወለኵሉ መንግሥት። 11#ሮሜ 2፥29። ዘቦቱ ተገዘርክሙ ግዝረተ ዘኢኮነ ግብረ እደ ሰብእ በስልበተ ሥጋ ነፍስተ ኀጢአት በግዝረተ ክርስቶስ። 12#1ጴጥ. 3፥21፤ ሮሜ 6፥4-5፤ ኤፌ. 1፥19-20። ወተቀበርክሙ ምስሌሁ በጥምቀት ወባቲ ተንሣእክሙ ምስሌሁ በሃይማኖት ወበረድኤተ እግዚአብሔር ዘአንሥኦ እሙታን። 13#ሉቃ. 7፥42፤ ሮሜ 5፥20፤ ኤፌ. 2፥1። ወአንትሙሂ እለ ነበርክሙ ምዉታነ በኀጢአትክሙ ወበቍልፈተ ነፍስትክሙ አሕየወክሙ ምስሌሁ ወጸገወክሙ ኵሎ ኀጢአተክሙ። 14#ኤፌ. 2፥15፤ ኤር. 17፥1። ወደምሰሰ ለነ መጽሐፈ ዕዳነ በሥርዐቱ እምዕድውነ ወአእተቶ እማእከሌነ ወቀነዎ በመስቀሉ። 15ወበሰሊቦቱ አስተኀፈሮሙ ለቀደምት ወለመኳንንት ወአስተኀፈሮሙ በተከሥቶ ህላዌሁ።

በእንተ መብልዕ ወመስቴ ወካልኣን ኅርመታት

16 # ሮሜ 14፥2-3። ዑቁ እንከ አልቦ ዘይግእዘክሙ ኢበመብልዕ ወኢበመስቴ ወኢበመክፈልተ በዓላት ወኢበአሥኅርት ወኢበሰናብት። 17#ዕብ. 8፥5። እስመ ዝንቱ ኵሉ ውእቱ ጽላሎቱ ለዘሀለዎ ይምጻእ ወአልቦ ዘያስተአብደክሙ በእንተ ሥጋሁ ለክርስቶስ። 18ፈቂዶ በተየውሆ ወበተናሕስዮ ርእስ ከመ ትትአዘዙ ለሕርመተ መላእክት በዘኢርእየ ወይትሜካሕ በከንቱ በምክረ ሥጋሁ። 19#ኤፌ. 4፥15-16። ወኢይጸንዕ በርእስ ዘቦቱ የኀድር ኵሉ ሥጋ ወይትዋደድ በአሥራው ወመሌሊት ወይልህቅ ወይጸንዕ ወይበዝኅ ወይመልእ በእግዚአብሔር። 20#ገላ. 4፥3-9። ወእመ ሞትክሙ ምስለ ክርስቶስ እምንብረተ ዝ ዓለም በእፎ ካዕበ ከመ ዘሕያዋን ውስተ ዓለም ትገብሩ። 21#ዘሌ. 5፥2። ወይቤሉክሙ ኢትግሥሥ ወኢትልክፍ ወኢትጥዐም ዘንተ። 22እስመ ዝንቱ ኵሉ ለሙስና በከመ ትእዛዘ ሰብእ። 23#ኢሳ. 29፥13፤ ማቴ. 15፥9። ዘያመስልዎ ጥበበ በእንተ ትሕትና ልብ ወፍርሀተ እግዚአብሔር ወኢምሒከ ሥጋ አልቦቱ ክብር ምንተኒ አላ ውእቱ ዘመልዕልተ ሥጋ።

Currently Selected:

ኀበ ሰብአ ቈላስይስ 2: ሐኪግ

Highlight

Copy