ግብረ ሐዋርያት 28

ምዕራፍ 28

በእንተ አረሚ እለ ይነብሩ መላጥያ

1ወእምድኅረዝ አእመርነ ከመ ይእቲ ደሴት ትሰመይ መላጥያ። 2#2ቆሮ. 11፥27። ወመሐሩነ አረሚ እለ ይነብሩ ህየ ወአሠነዩ ላዕሌነ ወአንደዱ እሳተ ወአስተጋብኡነ ለኵልነ ከመ ንስሓን እምጽንዐተ ቍር ወእምብዝኀተ ዝናም።

ዘከመ ኢረከቦ ሕሡም ለጳውሎስ እም ሕምዘ አፍዖት

3ወአስተጋብአ ጳውሎስ ብዙኀ ሐሠረ ወወገረ ላዕለ እሳት ወወፅአት አፍዖት እምላህበ እሳት ወነሰከቶ እዴሁ ለጳውሎስ ወኮነት ስቅልተ ላዕሌሁ።#ቦ ዘኢይጽሕፍ «ወኮነት ስቅልተ ላዕሌሁ» 4ወሶበ ርእዩ አረሚ አፍዖተ ስቅልተ ላዕለ እደ ጳውሎስ ተባሀሉ በበይናቲሆሙ ዝንቱ ብእሲ ይመስል ቀታሌ ነፍስ ድኂኖ እምባሕር ኢኀደጎ ፍርደ እግዚአብሔር ከመ ይሕየው። 5#ማር. 16፥18። ወነገፈ ጳውሎስ እዴሁ ወነጽሓ ለአፍዖት ውስተ እሳት ወኢረከቦ ሕሠም። 6#14፥11። ወእሙንቱሰ መሰሎሙ ከመ በጊዜሃ ይመውት ወቆሙ ጕንዱየ እንዘ ይኔጽርዎ ወሶበ ርእዩ ከመ አልቦ ዘብእሶ መለሱ ካዕበ ቃሎሙ ወይቤሉ አምላክ ውእቱ።

በእንተ ፑፕልዩስ

7ወሀለወት ውስተ ውእቱ መካን ዐጸዱ ለብእሲ ዘስሙ ፑፕልዩስ ወሥዩም ውእቱ በይእቲ ደሴት ወተወክፈነ ኀቤሁ ውስተ ማኅደሩ ሠሉሰ መዋዕለ በትፍሥሕት። 8ወሀሎ አሐዱ ሕሙም አቡሁ ለፑፕልዩስ ዘቦቱ ሕማመ አማዑት ወቦአ ኀቤሁ ጳውሎስ ወጸለየ ወአንበረ እዴሁ ላዕሌሁ ወአሕየዎ። 9ወሶበ ርእዩ ዘንተ ተአምረ ዘገብረ አምጽኡ ኀቤሁ ኵሎ ድዉያነ ዘውስተ ውእቱ ደሴት ወአሕየዎሙ። 10ወአክበሩነ ፈድፋደ ዐቢየ ክብረ ወሶበ ወፃእነ እምኀቤሆሙ አስነቁነ በሑረትነ።

በእንተ ፀአቶሙ እምደሴት

11ወእምድኅረ ሠለስቱ አውራኅ ዐረግነ ዲበ ሐመረ እስክንድርያ ዘከረመት በይእቲ ደሴት ወባቲ ላዕሌሃ ለይእቲ ሐመር ትእምርተ ዲዮስቆሮስ ዘውእቱ አምላከ ኖትያት። 12ወእምህየ ነገድነ ወበጻሕነ ሰራፉስ ወነበርነ ህየ ሠሉሰ መዋዕለ።

በእንተ ሑረቶሙ ራቅዩን

13ወነገድነ እምህየ ወበጻሕነ ለሀገረ ራቅዩን ወበሳኒታ ወፃእነ ወእምድኅረ አሐቲ ዕለት ነፍኀ ነፋስ እምገቦሃ ወወሰደነ ክልኤተ ዕለተ እስከ አብጽሐነ ቀርጠበሉስ እንተ ሀገረ አንጾኪያ።

በእንተ ብጽሐቶሙ ሮሜ

14ወረከብነ በህየ አኀዊነ ወአእተዉነ ወነበርነ ኀቤሆሙ ሰቡዐ መዋዕለ ወእምዝ ሖርነ ወበጻሕነ ሮሜ። 15ወሶበ ሰምዑ አኀዊነ እለ ሀለዉ ህየ ወፅኡ ወተቀበሉነ እስከ ምሥያጥ ዘስሙ አፍዩስፋሩስ ወእስከ ሠለስቱ ከዋኒት ወሶበ ርእዮሙ ጳውሎስ አእኰተ እግዚአብሔርሃ ወተጸናዕነ። 16#27፥3። ወቦዊአነ ሮሜ መጠወ ሐቢ ሙቁሓነ ለሠርዌ ሐራ ወለጳውሎስሰ አብሖ ከመ ይንበር ኀበ ፈቀደ ወባሕቱ ዐቃቢሁሰ ምስሌሁ።

በእንተ ተናግሮቱ ምስለ ሊቃውንተ አይሁድ

17 # 23፥1። ወእምድኅረ ሠለስቱ ዕለት ለአከ ጳውሎስ ይጸውዕዎሙ ለሊቃውንተ አይሁድ ወመጽኡ ኀቤሁ ብዙኃን ሰብእ ወሶበ ተጋብኡ ይቤሎሙ አኀዊነ አልቦ እኩይ ዘገበርኩ ዲበ ሕዝብ ወኢዲበ ኦሪት ወበከመ ሞቅሑኒ በኢየሩሳሌም መጠዉኒ ለሰብአ ሮሜ። 18ወሐቲቶሙ እሙንቱ ፈቀዱ ያሕይዉኒ ሶበ ኢረከቡ ላዕሌየ ጌጋየ በዘይሞቅሑኒ ወበዘይኴንኑኒ። 19#25፥12። ወሶበ ተንሥኡ አይሁድ ይትቃወሙኒ ተማሕፀንኩ ሎሙ በቄሣር ንጉሥ ወአኮሰ ከመ አስተዋድዮሙ ለሕዝብየ። 20ወበእንተዝኬ አስተብቋዕኩክሙ ከመ ትምጽኡ ኀቤየ ከመ አስምዕክሙ ወእንግርክሙ እስመ በእንተ ተስፋሆሙ ለእስራኤል ተሞቃሕኩ በዝንቱ ሰናስል።

በአንተ አውሥኦተ አይሁድ

21ወይቤልዎ ረበናተ አይሁድ ለነሰ ኢበጽሐነ መጽሐፈ መልእክት እምድረ ይሁዳ በእንቲኣከ ወኢአሐዱ እምአኀው እለ መጽኡ እምኢየሩሳሌም ኢተናገረ ቅድመ ወኢዜነወነ በእንቲኣከ በነገር እኩይ። 22#24፥14፤ ሉቃ. 2፥34። አላ ንሕነ ንፈቱ ንስማዕ እምኔከ አሚኖተከ ወበእንተ ትምህርተ ሕግ ዘትብል እስመ ሰማዕነ ከመ በኵለሄ ትትካሐዱ።

በእንተ ዕድሜ ዘዐደመ ጳውሎስ

23ወእምዝ ዐደሞሙ ዕለተ በዘይመጽኡ ኀቤሁ ወመጽኡ ኀቤሁ ብዙኃን ኀበ ሀሎ የኀድር ወነገሮሙ በእንተ መንግሥተ እግዚአብሔር እንዘ ያሰምዖሙ ወያአምኖሙ በእንተ እግዚእነ ኢየሱስ እምኦሪተ ሙሴ ወእምነቢያት እምነግህ እስከ ሠርክ። 24ወቦ እለሂ አምንዎ ወመንፈቆሙሰ አበይዎ።

በእንተ ቃለ ኢሳይያስ ዘአስምዐ ጳውሎስ

25ወእንዘ ኢየኀብሩ ተመይጡ እምኀቤሁ ወይቤሎሙ ጳውሎስ ሠናየ ይቤ መንፈስ ቅዱስ በቃለ ኢሳይያስ ነቢይ ለአበዊክሙ እንዘ ይብል። 26#ኢሳ. 6፥9-10። «ሑር ኀበ ዝንቱ ሕዝብ ወበሎ ሰሚዐ ትሰምዑ ወኢትሌብዉ ወርእየ ትሬእዩ ወኢተአምሩ። 27እስመ ገዝፈ ልቦሙ ለዝ ሕዝብ ወደንቀወ እዘኒሆሙ ወከደኑ አዕይንቲሆሙ ከመ ኢይርአዩ በአዕይንቲሆሙ ወኢይስምዑ በእዘኒሆሙ ወኢይለብዉ በልቦሙ ወኢይትመየጡ ኀቤየ ወኢይሣሀሎሙ።»

በእንተ ሕይወተ አሕዛብ

28 # 13፥38-46። አእምሩ እንከ ከመ ለአሕዛብ ትከውን ዛቲ ሕይወት እንተ እምኀበ እግዚአብሔር ወእሙንቱ እለ ይሰምዕዎ ወይሌብዉ ወይትኤዘዙ ሎቱ።#ቦ ዘኢይጽሕፍ «ወይሌብዉ ወይትኤዘዙ» 29ወዘንተ ሶበ ይብሎሙ ወፅኡ አይሁድ ወሖሩ እንዘ ይትጋዐዙ በበይናቲሆሙ ፈድፋደ።

በእንተ ጸውዖቱ አሕዛበ

30ወነበረ ጳውሎስ ኀበ መካን ዘተዐሰበ በንዋዩ ክልኤተ ዓመተ ወይትቄበል ኵሎ ዘአተወ። 31ወይጼውዖሙ ለመንግሥተ እግዚአብሔር ወይሰብክ ወይሜህር በእንተ እግዚእነ ኢየሱስ ክርስቶስ እንዘ ክሡተ ይነግር ወአልቦ ዘይከልኦ። 32እስመ ውእቱ ቦአ ኀበ ኔሮን በቀዳማይ ጊዜ ወሞአ ወሖረ በሰላም ወነበረ እምድኅረዝ ኑኀ ክልኤቱ ዓመት ወወፅአ። 33ወእምዝ ተመይጠ ወአጥመቀ አዝማዲሁ ለኔሮን ወስምዐ ኮነ በሰይፍ ዕጉሠ።

እስከዝ ነገር አብጽሐ ሉቃስ በዜናሁ ወዘተሰወረ እምኔሁ እስመ ትረክብ አንተ በቀዳማይ ፍካሬ መልእክቱ ለጳውሎስ ዜና ግብሩ ለጳውሎስ።

ተፈጸመ መጽሐፈ ግብረ ልኡካን ዘጸሐፎ ሉቃስ ወንጌላዊ።

ወስብሐት ለእግዚአብሔር አሜን።

Currently Selected:

ግብረ ሐዋርያት 28: ሐኪግ

Highlight

Copy