ግብረ ሐዋርያት 27

ምዕራፍ 27

በእንተ ትእዛዘ ፊስጦስ

1 # 25፥2። ወእምዝ አዘዘ ፊስጦስ ይሰድዎ ኀበ ቄሣር ኢጣልያ ወተውህበ ጳውሎስ ወካልኣንኒ ሙቁሓን ምስሌሁ ለብእሲ እምነ ሐራ ሰብስጥያ ዘስሙ ዩልዮስ ሐቤ ምእት። 2#19፥29። ወሶበ ወፃእነ ከመ ንንግድ ረከብነ ሐመረ እምአሕማረ አድራማጢስ እንተ ትፈቅድ ሐዊረ ብሔረ እስያ ወነገደ ምስሌነ አርስጠርኮስ መቄዶናዊ ዘሀገረ ተሰሎንቄ። 3#24፥23፤ 28፥16። ወበሳኒታ በጻሕነ ሲዶና ወመሐሮ መልአክ ለጳውሎስ ወአብሖ ይሑር ኀበ አርካኒሁ ከመ ያዕርፍ ኀቤሆሙ። 4ወእምዝ ሖርነ እምህየ ወበጻሕነ አድያመ ቆጵሮስ እስመ ነፋስ እምገጽነ። 5ወቦእነ ባሕረ ቂልቂያ ወጵንፍልያ ወሖርነ ለሙራ ዘብሔረ ሉቅያ ይእቲ። 6ወበህየ ረከበ መልአክ ሐመረ እስክንድርያ እንተ ተሐውር ኢጣልያ ወአብአነ ውስቴታ።#ቦ ዘይዌስክ «ወነበረ ህየ» 7ወይእቲሰ ሐመር ክብደ ሖረት ወእምድኅረዝ በብዙኅ መዋዕል በጻሕነ ለገጸ ደሴተ ቀኒዶስ ወበእንተ ጽንዐ ነፋስ ኢክህልነ ሐዊረ ርቱዐ ወነገድነ አድያመ አቅራጥስ ለገጸ ሀገረ ስልማና። 8ወእምዕፁብ እንዘ ነሐውር ንሕነ ጥቃሃ በጻሕነ ለመካን ዘስማ መርስ ሠናይት ዘቅርብት ለሀገር እንተ ስማ ለአስ። 9#2ቆሮ. 11፥25-26፤ ዘሌ. 16፥29። ወጐንደይነ ህየ ብዙኀ መዋዕለ እስከ ቦአ ዕለተ ጾመ አይሁድ ወበጽሐ መዋዕል ዘኢይክሉ ሰብእ ነጊደ በባሕር ውእተ ጊዜ ወእምዝ አምከሮሙ ጳውሎስ ወይቤሎሙ። 10ስምዑኒ ኦ ወራዙት እስመ እሬኢ ንግደተነ በብዙኅ ምንዳቤ ወኀጕል ዐቢይ ወዘንተ ዘእብል አኮ በእንተ ጾረ ሐመር ባሕቲቱ ዓዲ ነፍሰነሂ ታኀጕሉነ ኅድጉ እስመ እፈርህ። 11ወመልአክሰ ለሰብአ ሐመር ወለሐዳፊ ይትኤዘዞሙ ወይትዌከፍ ቃሎሙ ወለጳውሎስሰ ኢይሰምዖ ወኢይትዌከፍ ቃሎ።#ቦ ዘኢይጽሕፍ «ወይትዌከፍ ቃሎሙ ወለጳውሎስሰ ኢይሰምዖ» 12ወውእቱሰ መርሶ ኢይደሉ ይክርሙ ውስቴቱ ክረምተ ወበእንተዝ አፍቀሩ ብዙኃን ከመ ይፃኡ እምህየ ለእመ ተክህሎሙ ከመ ይብጽሑ ለካልእ መርሶ ዘፊንቂ ዘመንገለ አቅራጥስ ዘስሙ ኤውንቄ ዘመንገለ የማን። 13ወነፍኀ ነፋሰ አዜብ ወመሰሎሙ ዘይበጽሑ በከመ ፈቃዶሙ ወአልዐሉ ሥራዐ ወሖሩ ደወለ አቅራጥስ።

በእንተ ጽኑዕ ነፋስ

14ወእምድኅረ ኅዳጥ መዋዕል መጽአ ላዕሌሆሙ ነፋስ ጽኑዕ ጥፉንቂስ ዘይብልዎ አውራቂስ ወይእቲ ነፋስ እንተ ስማ ሰልቢባ። 15ወተለዐለት ሐመርነ ወተዘብጠት ወኢክህሉ ኖትያት ቀዊመ ቅድመ ገጸ ነፋስ ወኀደግዋ ወሖረት። 16ወእምዝ ነፍኀ ነፋስ እስከ ቦእነ ደሴተ እንተ ስማ ቄዳ ወእምዕፁብ ክህልነ ከመ ናርግዝ ሐመረነ። 17ወእምዝ ታሓጊዘነ አጽናዕናሃ በአሕባል ወእምዝ ሶበ ፈርሁ ከመ ኢይደቁ ውስተ ልጐተ ባሕር አውረዱ ሥራዐ ወረሰይነ ንሑር ከማሁ።

በእንተ እለ ገደፉ ንዋዮሙ

18ወበሳኒታ ጸንዐ ላዕሌነ መዋግድ ወገደፍነ አልባሲነ ውስተ ባሕር። 19ወበሣልስታሂ ገደፍነ ኵሎ ዘውስተ ሐመር ዲበ ባሕር በእደዊነ። 20ወነበረ ይዘንም ላዕሌነ ጕንዱየ ዕለተ እንዘ ኢንሬኢ ፀሐየ ወወርኀ ወኢከዋክብተ ወቀበጽነ ሐዪወ።

በእንተ ዘተናገረ ጳውሎስ ለእለ ውስተ ሐመር

21ወአልቦ ዘበልዐ መብልዐ እምኔነ ወተንሥአ ጳውሎስ ወቆመ ማእከለ ወይቤሎሙ ሶበ ሰማዕክሙኒ ቀዲሙ አኀውየ ወኢወፃእክሙ እምአቅራጥስ እምድኅንክሙ እምዝ ኀጕል ወሕማም። 22ወይእዜኒ እብለክሙ ኢትፍርሁ እስመ አልቦ ዘይትኀጐል አሐዱ ነፍስ እምኔነ ዘእንበለ ዳእሙ ሐመርነ። 23እስመ ቆመ ኀቤየ በዛቲ ሌሊት መልአከ እግዚአብሔር ዘአነ ሎቱ ወኪያሁ አመልክ። 24ወይቤለኒ ኢትፍራህ ጳውሎስ ሀለወከ ትቁም ቅድመ ቄሣር ወናሁ ጸገወከ እግዚአብሔር ኵሎሙ እለ ነገዱ ምስሌከ። 25ወይእዜኒ ተፈሥሑ አኀውየ እስመ እትአመን በእግዚአብሔር ከመ ይከውን በከመ ይቤለኒ። 26#28፥20። ወባሕቱ ንበጽሕ አሐተ ደሴተ።

በእንተ እለ መሰሎሙ ዘበጽሑ ምድረ

27ወአመ ዐሡር ወረቡዕ ጊዜ መንፈቀ ሌሊት መሰሎሙ ኖትያት ከመ ዘበጽሑ ምድረ። 28ወአውረዱ ሐብለ ወረከቡ ዕሥራ በቆመ ብእሲ ወተአተቱ እምህየ ወአውረዱ ካዕበ ወረከቡ ዐሠርተ ወኀምስተ በቆም። 29ወፈርሁ ከመ ኢይደቁ ውስተ መካን ዘቦቱ ኰኵሕ ወከመ ኢይትጐዳእ ሐመሮሙ ወአውረዱ አርባዕተ መልሕቀ ውስተ ባሕር እንተ ድኅረ ሐመር ወጸለይነ ከመ ፍጡነ ይጽባሕ። 30ወእምዝ ሶበ ፈቀዱ ይትኀጥኡ ኖትያት እምሐመር አውረዱ እምኔሃ ራግናተ ውስተ ባሕር ከመ ይደሐሉ ቦቱ ወያጽንዑ ሐመሮሙ በምድር።

በእንተ ዘይቤ ጳውሎስ ለሐቢ

31ወርእዮ ጳውሎስ ይቤሎሙ ለሐቢ ወለሠገራት እምከመ ኢነበሩ እሉ ኖትያት ውስተ ሐመር ኢንክል ሐዪወ። 32ወተንሥኡ ሠገራት ወመተሩ ሶቤሃ አሕባለ ራግናት ወኀደግዋ ትደቅ። 33ወጸቢሖ ብሔር አስተብቍዖሙ ጳውሎስ ለኵሎሙ ይብልዑ እክለ ወይቤሎሙ ዐሡር ወረቡዕ ዮም እምዘኢበላዕክሙ እክለ። 34#ማቴ. 10፥30። ወዮምኒ ብቍዑኒ ምስሑ ወብልዑ ወርድኡ ነፍሰክሙ እስመ አልቦ ዘይትኀጐል እምኔክሙ ወኢሥዕርተ ርእስክሙ። 35#ዮሐ. 6፥11። ወዘንተ ብሂሎ ነሥአ ኅብስተ ወአእኰተ እግዚአብሔርሃ ወከፈለ ቅድመ ኵሎሙ ወወሀቦሙ ወአኀዙ ይብልዑ። 36ወተናዘዙ ኵሎሙ ወጥዕሙ። 37ወኮነ ፍቅዶሙ ለእለ ሀለዉ ውስተ ሐመር ክልኤቱ ምእት ወሰብዓ ወስድስቱ ነፍስ። 38ወተሴስዮሙ አቅለሉ ሐመረ ወነሥኡ ሥርናየ ዘውስተ ሐመር ወወገሩ ውስተ ባሕር።

በእንተ ድቀተ ሐመር

39ወጸቢሖ መዓልት ኢፈለጡ ኖትያት ውእተ ምድረ ወኢያእመሩ ዘየሐውሩ ወባሕቱ ርእዩ አድባረ ደሴት ዘቅሩብ ለሐይቀ ባሕር ወፈቀዱ ያብጽሑ ሐመሮሙ ህየ። 40ወመተሩ መልሕቀ ወኀደጉ ውስተ ባሕር ወአሠነዩ ምቅዋመ ወሰቀሉ ሥራዐ ዘይንእስ በከመ ንፍኀተ ነፋስ ወሖርነ መንገለ ሐይቀ ባሕር። 41#2ቆሮ. 11፥25። ወተለክአት ሐመር ማእከለ ክልኤቱ አእባን ልዑላን ወባሕሩ ዕሙቅ ወተእኅዘት እምቅድሜሃ ወኢያንቀልቀለት ወተሰብረት ወተመትረት ገቦሃ ዘድኅር እሞገድ ወእምቅድሜሃሰ ኢክህሉ ኖትያት።

ዘከመ ኀለዩ ይቅትሉ ሙቁሓነ

42ወተማከሩ ሠገራት ከመ ይቅትሉ ሙቁሓነ ከመ ኢይጽብቱ ወኢያምሥጡ። 43ወከልኦሙ ሐቢ እስመ ፈቀደ ያድኅኖ ለጳውሎስ ወለእለ የአምሩ ጸቢተ አዘዞሙ ይጽብቱ ወይፃኡ ለሐይቅ። 44ወእለ ተርፉ ዐደዉ ላዕለ ዕፀ ሐመር ወሰላድው ወካልኣን ዐደዉ በአሕባለ ሐመር ወወፅኡ ኵሎሙ ወበጽሑ ምድረ በዘከመዝ ግብር።

Currently Selected:

ግብረ ሐዋርያት 27: ሐኪግ

Highlight

Copy