ኀበ ሰብአ ቆሮንቶስ 2 3

ምዕራፍ 3

በእንተ ጽሒፈ መልእክተ ክርስቶስ ለምእመናን

1 # 5፥12። አኀዊነ ነአኀዝኑ ካዕበ ይእዜ ንንግርክሙ ንወድስ ርእሰነ ወቦኑ ዘንፈቅድ ከመ እልክቱ ካልኣን እስከ ንጽሕፍ ኀቤክሙ በእንቲኣነ መጽሐፈ አው ከመ ትጽሐፉ አንትሙ። 2#1ቆሮ. 9፥2። ወለነሰ መጽሐፍነ አንትሙ ይእቲ ወጽሕፍት ውስተ ልብነ ወትትዐወቅ ወያነብባ ኵሉ ሰብእ። 3#ዘፀ. 24፥12። ወየአምሩክሙ ከመ መልእክተ ክርስቶስ አንትሙ እንተ ተልእክናሃ ንሕነ ወጽሕፍት ይእቲ ወአኮ በማየ ሕመት ዘእንበለ በመንፈሰ እግዚአብሔር ሕያው ወኢኮነ ጽሌ ዘእብን ዘእንበለ ጽሌ ልብ ዘሥጋ። 4#ዮሐ. 12፥16። ወብነ ባሕቱ ከመዝ ተስፋ በኀበ እግዚአብሔር በእንተ ክርስቶስ። 5#10፥12። ወኢይደልወነ ነኀሊ ለሊነ ለርእስነ ወኢምንተኒ። 6#ዮሐ. 6፥13፤ ሮሜ 7፥6። እስመ እምኀበ እግዚአብሔር ኀይልነ ዘረሰየነ ላእካነ ለሐዲስ ሕግ ወአኮ በሕገ መጽሐፍ አላ በሕገ መንፈስ እስመ መጽሐፍ ይቀትል ወመንፈስ ያሐዩ።

በእንተ ክብረ መልእክታት

7 # ዘፀ. 34፥30፤ ግብረ ሐዋ. 9፥31። ወሶበ ለእንታክቲ መልእክተ ሞት እንተ ተጽሕፈት በእብን ተገብረ ላቲ ስብሐት እስከ ኢይክሉ ደቂቀ እስራኤል ነጽሮተ ገጹ ለሙሴ በእንተ ስብሐተ ገጹ ኀላፊ። 8እፎ እንከ ይትገበር ፈድፋደ ስብሐት ለመልእክተ መንፈስ ቅዱስ። 9#ሮሜ 1፥17፤ 3፥21። ሶበ ለመልእክት እንተ ታኴንን ወታሐስብ ተገብረ ላቲ ስብሐት ብዙኅ ሚ መጠን ፈድፋደ መልእክተ ጽድቅ ትሴባሕ ወትከብር። 10እስከ ትከውን እንተ ተሰብሐት ከመ ዘኢተሰብሐት ሶበ ያስተዔርይዋ በዝንቱ ስብሐት ዐቢይ። 11ወሶበ ኀላፊ ዘይሰዐር ረከበ ስብሐተ እፎ ፈድፋደ ዘይነብር ይረክብ ቀዋሚ ስብሐተ። 12ወእንዘ ብነ መጠነዝ ተስፋ ርቱዕ ንቅረብ በገጽ ገሃደ። 13#ዘፀ. 34፥33-35። ወአኮ ከመ ሙሴ ዘይገለብብ ገጾ ከመ ኢይርአይዎ ደቂቀ እስራኤል። 14#ሮሜ 11፥25። ወባሕቱ ተጸለለ ልቦሙ እስከ ይእዜ እስመ ውእቱ ግላ ነበረ ውስተ ሕግ ብሉይ አምጣነ ተነበ ወኢተከሥተ እስከ አፅርዖ ክርስቶስ። 15ወእስከ ዮም ሶበ ያነብቡ ኦሪተ ሙሴ ይገልዎሙ ልቦሙ። 16#ሮሜ 11፥23-26። ወእምከመ ተመይጡ ኀበ እግዚአብሔር የአትት ውእቱ ግላ እምኔሆሙ። 17#ዮሐ. 4፥24፤ 8፥36። እስመ እግዚአብሔር መንፈስ ውእቱ ወኀበ ሀሎ መንፈሰ እግዚአብሔር ህየ ሀሎ ግዕዛን። 18ወንሕነሰ ኵልነ ከሢተነ ገጸነ ንነጽር ስብሐተ እግዚአብሔር ከመ ዘበመጽሔት ወንትመሰል በአርኣያ ዚኣሁ ከመ ንባእ እምክብር ውስተ ክብር በከመ ይሁበነ እግዚአብሔር መንፈሰ።

Currently Selected:

ኀበ ሰብአ ቆሮንቶስ 2 3: ሐኪግ

Highlight

Copy