ኀበ ሰብአ ቆሮንቶስ 2 2

ምዕራፍ 2

በእንተ ምክንያተ ጽሕፈቱ ዳግም

1ወዘንተ እንከ መከርኩ በነፍስየ ኢይምጻእ ትኩዝየ ኀቤክሙ። 2ወእመሰ አነ አተከዝኩክሙ መኑ ያስተፌሥሐኒ ዘእንበለ ዘአነ አተከዝክዎ። 3#12፥21። ወዘኒ ዘጸሐፍኩ ለክሙ ከመ መጺእየ ኢይርከበኒ ኀዘን በዘሀለወኒ እትፌሣሕ ተአሚንየ በኵልክሙ ከመ ፍሥሓ ዚኣየ ዘኵልክሙ ውእቱ። 4እስመ እምነ ብዙኅ ሕማም ወኀዘነ ልብ ጸሐፍኩ ለክሙ ዘንተ በብዙኅ አንብዕ ወአኮሰ ከመ ትተክዙ ዳእሙ ከመ ታእምሩ አፍቅሮትየ ከመ ፈድፋደ አፈቅረክሙ። 5#1ቆሮ. 5፥1። ወዘኒ አተከዘኒ አኮ ኪያየ ባሕቲቶ ዘያቴክዝ ዳእሙ ኵልክሙ ዘእንበለ አሐዱ ኅብር እምኔክሙ ወይእዜኒ ኢያከብድ ቃልየ ላዕሌክሙ። 6ተአክሎ ለዘከመዝ ዛቲ ተግሣጽ እንተ ረከበቶ እምብዙኃን። 7ወዓዲ ይደሉ ከመ ትስረዩ ሎቱ ወታስተፍሥሕዎ ከመ ኢይሠጠም እምብዝኀ ኀዘን ዘከመዝ። 8ወበእንተዝ አስተበቍዐክሙ አጽንዑ ተፋቅሮ ምስሌሁ። 9#7፥16። ወበእንተዝ ጸሐፍኩ ለክሙ ከመ አእምር ግዕዘክሙ ለእመሁ በኵሉ ትትኤዘዙኒ አው አልቦ። 10#ሉቃ. 10፥16። ወእመቦ ዘሰረይክሙ ሎቱ አነሂ ሰረይኩ ምስሌክሙ ወእመሂ ቦ ዘኀደግሙ ሎቱ ኀደጉ ለልየ በእንቲኣክሙ በገጹ ለክርስቶስ። 11#ሉቃ. 22፥31። ከመ ኢይትዐገለነ ሰይጣን እስመ አኮ ዘንስሕቶ ኅሊናሁ።

በእንተ ፍኖተ እግዚአብሔር

12 # ግብረ ሐዋ. 14፥27፤ 26፥6፤ 1ቆሮ. 16፥9። ወበጺሕየ ጢሮአዳ ውስተ ትምህርቱ ለክርስቶስ ተከሥተ ሊተ ፍኖተ እግዚአብሔር። 13ወኢረከብኩ ዕረፍተ ለነፍስየ እስመ ኢረከብክዎ ለቲቶ እኁየ ወተፈለጥኩ እምኔሁ ወሖርኩ መቄዶንያ። 14እኩት እግዚአብሔር ዘዘልፈ የዐቅበነ በእግዚእነ ኢየሱስ ክርስቶስ ወተዐውቀ በላዕሌነ መዐዛ አእምሮቱ በኵሉ በሐውርት። 15#1ቆሮ. 1፥18። እስመ መዐዛሁ ለክርስቶስ ንሕነ በኀበ እግዚአብሔር በእንተ እለ ይድኅኑ ወእለሂ ይትኀጐሉ። 16#3፥5-6፤ ሉቃ. 2፥34። እስመ ቦ እለ ይደልዎሙ መዐዛ ሞት ለሞት ወቦ እለ ይደልዎሙ መዐዛ ሕይወት ለሕይወት ወመኑ ዘይደልዎ ዝንቱ። 17#7፥1-12። እስመ ኢኮነ ከመ ብዙኃን እለ ይትሜየንዎ ለቃለ እግዚአብሔር በካልእ ዳእሙ በንጽሕ ወከመ ዘመጽአ እምእግዚአብሔር ንነግር በቅድመ እግዚአብሔር በእንተ ክርስቶስ።

Currently Selected:

ኀበ ሰብአ ቆሮንቶስ 2 2: ሐኪግ

Highlight

Copy