ኀበ ጢሞቴዎስ 1 6

ምዕራፍ 6

በእንተ ሠሪዐ ቤት

1 # ኤፌ. 6፥5፤ ቲቶ 2፥9። ወኵሉ ነባሪ ወቅኑይ አክብሩ አጋእዝቲክሙ በኵሉ ከመ ኢይፅርፉ ላዕለ ስመ እግዚአብሔር ወላዕለ ትምህርቱ። 2#4፥11፤ ቲቶ 2፥9። ወእለሰ ቦሙ አጋእዝት መሃይምናን ኢያስተሐቅሩ እስመ አኀዊሆሙ እሙንቱ በሃይማኖት ዓዲ ፈድፋደ ይትቀነዩ ሎሙ እስመ ምእመናን ወፍቁራን እሙንቱ ወለእሉ ይትወከፉ ወይትለአኩ በፍሥሓ ሎሙ ከመዝ መሀር ወገሥጽ ወአስተብቍዖሙ። 3#ገላ. 1፥6-9፤ 2ጢሞ. 1፥13። ወእመሰ ቦ ዘይሜህር ካልአ ወኢይገብእ ኀበ ትምህርተ ነገረ ሕይወት ዘውእቱ ቃለ እግዚእነ ኢየሱስ ክርስቶስ ወኀበ ትምህርተ ጽድቅ። 4#1ቆሮ. 8፥2። ውእቱኬ ዘይትዔበይ እንዘ አልቦ ዘየአምር ዘእንበለ መቅሠፍተ ዘየኀሥሥ ወነገረ ጋዕዝ ዘእምኔሁ ይመጽእ ተሓምሞ ወተቃንኦ ፀሪፍ ወምክር እኩይ ወአስተዳጕጾ ሰብእ። 5#2ጢሞ. 3፥8። ወእሉ ሙሱናን ወውፁኣን እምጽድቅ ወይሬስይዎ ለጽድቀ እግዚአብሔር ተግባረ ተገኀሦሙ ለእሉ። 6#መዝ. 33፥11። እስመ ለነሰ ተግባርነ ዐቢይ ውእቱ ፈሪሀ እግዚአብሔር። 7#መክ. 5፥14። እስመ አልቦ ዘአምጻእነ ውስተ ዓለም ወአልቦ ዘንክል ነሢአ እምኔሁ። 8#ዘፍ. 28፥20። እምከመ ረከብነ ሲሳየነ ወዐራዘነ የአክለነ። 9#ምሳ. 23፥4። ወእለሰ ይፈቅዱ ይብዐሉ ይወድቁ ውስተ መንሱት ወብዙኅ መሣግረ ፍትወት ዘእበድ ዘይብእሶሙ ወዘያሠጥሞሙ ለሰብእ ውስተ ተሠርዎ ወሞት። 10#ዘፀ. 23፥8፤ ሉቃ. 12፥15-21። እስመ ሥርዉ ለኵሉ እኩይ አፍቅሮ ንዋይ እስመ ብዙኃን እለ በዛቲ ስሕቱ ወዐለዉ ሃይማኖቶሙ ወኀሠሡ ለርእሶሙ ብዙኀ መቅሠፍተ። 11#2ጢሞ. 2፥22፤ ዕብ. 12፥14። ወአንተሰ ብእሴ እግዚአብሔር ጕየይ እምዝ ወዴግን ጽድቀ ወምሂረ ወሃይማኖተ ወተፋቅሮ ወትዕግሥተ ወትሕትና። 12#1ቆሮ. 9፥25-26፤ ፊልጵ. 3፥12-15። ተጋደል ሠናየ ገድለ በሃይማኖት ለተመጥዎ ሕይወት ዘለዓለም ዘሎቱ ተጸዋዕከ ወአመንከ ሠናየ አሚነ በቅድመ ብዙኃን ሰማዕት። 13#ዘዳ. 32፥39፤ ዮሐ. 18፥37፤ 19፥11። ከመዝ እኤዝዘከ በቅድመ እግዚአብሔር ዘኵሎ ሙታነ ያሐዩ ወኢየሱስ ክርስቶስ ዘኮነ ሰማዕተ በቅድመ ጲላጦስ ጴንጤናዊ። 14#1ተሰ. 3፥13። በሠናይ አሚን ከመ ትዕቀብ ዘንተ ትእዛዘ በንጽሕ እንዘ ኢታደሉ እስከ ምጽአቱ ለእግዚእነ ኢየሱስ ክርስቶስ። 15#ራእ. 17፥14፤ ዘዳ. 10፥17። ዘያስተርኢ በዕድሜሁ ዘባሕቲቱ ብፁዕ ወኀያል ንጉሠ ነገሥት ወእግዚአ አጋእዝት። 16#2ዜና መዋ. 5፥14፤ ዮሐ. 1፥18። ውእቱ ባሕቲቱ ዘኢይመውት ወቦቱ ብርሃን ዘኢይጠፍእ እምቅድመ ዓለም ዘአልቦ ዘርእዮ ሰብእ ወአልቦ ዘይክል ርእዮቶ ዘሎቱ ክብር ወስብሐት ወኀይል ለዓለመ ዓለም አሜን።

በእንተ ትእዛዝ ዘተውህበ ለአብዕልት

17 # መዝ. 61፥10-11፤ ሮሜ 10፥12። ለአብዕልተ ዝንቱኒ ዓለም አዝዞሙ ከመ ኢይትዐበዩ ወኢይትአመንዎ ለብዕሎሙ ኀላፊ ዘእንበለ በእግዚአብሔር ሕያው ዘውእቱ ይሁበነ በብዝኀ ብዕሉ ኵሎ ከመ ንትፈሣሕ። 18ከመ ይግበሩ ግብረ ሠናየ ወይብዐሉ በገቢረ ጽድቅ ወይኩኑ ራትዓነ፥ ወጸጋውያነ ወሱቱፋነ። 19#ማቴ. 6፥20። ወይሣርሩ ለርእሶሙ መሠረተ ሠናየ ለዘይመጽእ ዓለም ከመ ይርከቡ ሕይወተ ዘበአማን። 20#2ጢሞ. 1፥14፤ 4፥7። ኦ! ጢሞቴዎስ ዕቀብ ማሕፀንተከ ተገኀሦሙ ለርኩሳን እለ ያመጽኡ ነገረ ከንቶ ወያሴስልዋ ለጽድቅ በሐሰት። 21#1፥6፤ 2ጢሞ. 2፥18። እስመ እሉ ስሕቱ እምተስፋ ሃይማኖት ጸጋ ምስሌከ አሜን።

ተፈጸመት መልእክት ቀዳማዊት ኀበ ጢሞቴዎስ ወተጽሕፈት በአቴና ወተፈነወት በእደ ቲቶ።

ወስብሐት ለእግዚአብሔር አሜን።

Currently Selected:

ኀበ ጢሞቴዎስ 1 6: ሐኪግ

Highlight

Copy