ኀበ ጢሞቴዎስ 1 5

ምዕራፍ 5

በእንተ አክብሮ ልሂቃን ወተአዝዞ

1 # ዘሌ. 19፥32። ሊቃናተ ኢታመጕጽ ተአዘዝ ከመ ዘለአቡከ ወለንኡሳን ከመ ዘለአኀዊከ። 2#ዮሐ. 19፥27። ወለልሂቃትሂ ከመ ዘለእምከ ወለንኡሳትሂ ከመ ዘለአኃቲከ በኵሉ ንጽሕ። 3ወአክብር ዕቤራተ በጽድቅ። 4#ማቴ. 15፥4። ወእመ ቦ እምኔሆሙ ዕቤር እንተ ባቲ ውሉድ አው ደቂቀ ውሉድ ይትመሀሩ ቅድመ አሠንዮ ለቤቶሙ ወይሴስዩ አዝማዲሆሙ እስመ ከማሁ ሠናይ ወሥሙር በቅድመ እግዚአብሔር። 5#ሉቃ. 2፥37፤ 18፥1። ወእንተሰ ዕቤር በአማን ንጽሕት እንተ ባሕቲታ ትነብር እስመ ትውክልታ እግዚአብሔር ባሕቲቱ ወትፀመድ ጸሎተ ወትስእል መዐልተ ወሌሊተ። 6#ሮሜ 8፥13። ወእንተሰ ትፌግዕ ምስለ ተውኔት ምውት ይእቲ እንዘ ሕያዋ። 7ወከመዝ ገሥጽ ከመ ኢያድልዉ ወኢያመክንዩ። 8#ገላ. 6፥10፤ 2ጢሞ. 3፥5። ወዘሰ ኢይኄሊ ለቤቱ ወይገድፍ አዝማዲሁ ወፈድፋደሰ ለእመ ኮኑ እምሰብአ ሃይማኖት ውእቱ ክሕደ ሃይማኖቶ ወየአኪ እምዘኢየአምን።

በእንተ ኅርየተ ዲያቆናውያት

9ወለእመ ኀረይከ እቤረ ኅረይ እንተ ስሳ ክረምታ እንተ አሐደ ብእሴ አውሰበት። 10#ዘፍ. 18፥4፤ ግብረ ሐዋ. 16፥15። እንተ ይንእድዋ በኵሉ ምግባረ ሠናይ ለእመ አልሀቀት ውሉዳ ወለእመ ነግደ ተወክፈት ወለእመ እግረ ጻድቃን ኀፀበት ወለእመ ርኁበ አጽገበት ወኵሎ ምግባረ ሠናይ ለእመ ተለወት። 11ወለንኡሳትሰ መበለታት ተገሐሦን ወኢትሢሞን ከመ ኢይትፈግዓ ላዕለ ክርስቶስ ወይፈቅዳ ይግብኣ ለአውስቦ። 12#ዕብ. 6፥4-6። ወጽኑሕ ደይኖን ለእመ ክሕዳ ሃይማኖቶን ቀዳሚተ። 13#2ተሰ. 3፥11። ወዓዲ አፅርዕተ ወሀኬተ ይትሜሀራ እንዘ የዐውዳ አብያተ ወአኮ አፅርዕተ ባሕቲቶ አላ ዓዲ ከመ ያብዝኃ ነቢበ ወምግባረ ከንቱ ይፈጥራ ነገረ ዘኢህልው። 14#2ሳሙ. 2፥13፤ ዳን. 6፥4። እፈቅድ እንከ ለንኡሳት ያውስባ ወይትዋለዳ ወይኩና በዓልታተ ቤት ከመ ኢይርከብ ምክንያተ ወኢአሐተኒ በዘይጸብኦን ጸላኢ ከመ ኢያጽዕላ ርእሶን። 15#2፥7። እስመ ቦ እለ ተመይጡ ወተለውዎ ለሰይጣን። 16ወለእመ ቦ እምእመናን ዘቦ ዕቤር ይዕቀባ ወኢያክብድ ላዕለ ቤተ ክርስቲያን ከመ ትክሀል ለእለ በአማን ዕቤራት።

ዘከመ ይደሉ ምክዕቢተ ክብር ለእለ ይትለአኩ ሠናየ

17 # ሮሜ 12፥8፤ ገላ. 6፥6። እለሰ ሠናየ ተልእኩ ቀሲሳን ምክዕቢተ ክብር ይደልዎሙ ወፈድፋደሰ ለእለ ይሰርሑ በቃል ወበምህሮ። 18#ዘዳ. 25፥4፤ 1ቆሮ. 9፥9፤ ሉቃ. 10፥7። ወይብል መጽሐፍ «ኢትፍፅሞ አፉሁ ለላሕም ሶበ ታከይድ እክለከ ወይደልዎ ዐስቡ ለዘይትቀነይ።» 19#ዮሐ. 8፥17። ላዕለ ልሂቅ ኢትስማዕ ውዴተ ዘእንበለ ይዝልፍዎ ክልኤቱ ወሠለስቱ ሰማዕት። 20#ዘዳ. 13፥11፤ ኤፌ. 5፥12። ወለእለሂ ስሕቱ በቅድመ ኵሉ ገሥጾሙ ከመ ባዕድኒ ይፍራህ። 21አሰምዕ ለከ በቅድመ እግዚአብሔር ወእግዚእነ ኢየሱስ ክርስቶስ ወመላእክቲሁ ኅሩያን ከመ ትዕቀብ ዘንተ እንዘ ኢታደሉ ወኢታጽድቆ ለሰብእ ቅድመ ፍትሕ ወኢትግበር ምንተሂ በዘትትሔመይ። 22#ግብረ ሐዋ. 6፥6፤ 2ዮሐ. 11። ወኢትሢም ፍጡነ ወኢመነሂ ወኢትሳተፍ በዝ ውስተ ኀጢአተ ባዕድ ወአንጽሕ እንከ ርእሰከ። 23#መዝ. 104፥15። ወኢትስተይ ማየ ዕራቆ ኅዳጠ ወይነ ቶስሕ በእንተ ሕማመ ከብድከ ወበእንተ ደዌከ ዘዘልፍ። 24ቦ ሰብእ ዘይትዐወቆ ኀጢአቱ ወይትባደሮ ውስተ ደይን ወቦ ዘይተልዎ ኀጢአቱ። 25#ገላ. 5፥22። ወከማሁ ዘሂ ይገብር ሠናየ ይትዐወቅ ወዘሂ ካልእ ምግባሩ ኢይትከበት።

Currently Selected:

ኀበ ጢሞቴዎስ 1 5: ሐኪግ

Highlight

Copy